Tèmel keeya 18

Pol ge suwal Korent diŋ

1Ko 1.1-9; 2.1-5; 2Ko 11.5-12; 12.12-13

1Guwa̰, Pol ɗege ge Aten go mbo suwal Korent yà. 2Sok ge dee yà, seɗ Yahuɗ a̰me ɗu, ge too ge suwa ge Po̰o̰ ne go, ge àa tol ne Akilas mage na gwale Prisil, gale mbo ya mbo no ge suwa Itali ya, ge dape, Kloɗ, gan ga̰a̰l ge waɗe ge suwa Itali ne ho na wa go, a yin̰a Yahuɗ ma ge suwal ga̰a̰l Rom diŋ. Pol mbo ya ge num ta. 3Ajo̰o̰ àa ka kee tèmel ge ɗu pe, gaa kàɗɗa kee tèmel ge num dagre. Num tèmel kaa tèmel ge wan dab ge gur pe ma yaɗ gezi. 4Ge dwam sabaɗ ma go tatab, àa ge nda ka pee ta fare ge zok kee kaɗeya ge Yahuɗ ma way zì, ka ɓyare vin̰a go na ee Yahuɗ mage Grek ma eya fare.

5Sok ge Silas mage Timote mbô ge suwa Maseduwan ya ge suwal Korent diŋ, Pol mbo ya hon tene ge ɓul mɔɗwag ge fare oyya ta, ka jan Yahuɗ ma zum waŋ go, Krist, ndu ge Dok taa nee ne. 6Ajo̰o̰ Yahuɗ ma ka mḛḛ piliya ge ne, àa ka sal ne me, ge sok mbe go, gasage na ba̰a̰ kuci ma ge num pagal, jan num go: Ḛ swàm kaa ge ḛ pagal, mbi tok zì to. Ge sego, mbi gaa seŋe tene ge nda ge no rusu Yahuɗ zì to ma ta. 7Ɗege ge sok mbe go, mbo ge ndu a̰me ge àa tol ne Titus Justis diŋ yà, a ndu ge ka uware Dok ge Yahuɗ ma way, ge ne zok no guwa ge zok kee kaɗeya ge Yahuɗ ma way. 8Krispus ga̰a̰l ge zok kee kaɗeya ge Yahuɗ ma way mbe ne, mbo ya hoɗ fareba ge Bagezok ta ɓanna ge na zok mɔɗwag. Nda gḛḛ ge suwal Korent diŋ, ge ka za̰a̰ Pol ma mbo ya hoɗ fareba, àa mbo ya kee num baptem waɗme.

9Dwam a̰me ɗu, Bagezok mbo ya jan Pol fare ge kin̰a zì go: Kaa ge mo chiya voo to, ɗaŋɗe, mbo ndwa zḛḛ ge fare oyya zì, mɔge to. 10Ee mo ndwa se, mbi go, ndu a̰me ge kee mo fare to. Ago, mbi nda ma go gḛḛ ge suwal mbe diŋ. 11Kee ge num buwal zì del ɗu ge saba menengal, ka hate num fare ge Dok ne.

12Sok ge Galiyo̰ kaa goformo̰ ge suwa ge Akay ne go, Yahuɗ ma za̰a̰ ta ge Pol pagal, àa wan ne, àa mbo ge ne ge nda ge kun sariya ma ndwa se yà. 13Àa jan go: Ndu mbe no, ɓyare ee nda uware Dok, be ge eeya ge Moyiz ne ma pagal to. 14Sok ge Pol ɓyare faaya ndwa ben tene, Galiyo̰ vee ne be hage na wa, jan Yahuɗ ma go: Daa go ne fare ge swày hunna nee ne koo n̰aal a̰me ge kakatag ne, mbi daa mà za̰a̰ ḛ, 15ajo̰o̰ ḛ pee ta ge fare ma pagal, ge dḭḭl mage eeya ge ḛ ḛ ma pagal, mbi ɓyare vaa ḛ buwal to, ḛ sḛ ma ndi fare mbe nuusiya ta buwal zì. 16Yan num ge sok kun sariya zì ya zum. 17Sok mbe go, àa wan Sosten, ga̰a̰l ge zok kee kaɗeya ge Yahuɗ ma way ne, àa ɗege ne ta iyalla ge zok kun sariya wa zum, ɗaŋɗe, Galiyo̰ iigi tene ge fare mbe pe to.

Gwanna ge Pol ne ya ge suwal Antiyoch diŋ

18Pol kaɗ kaal swag ge suwal Korent diŋ. Guwa̰, n̰a na̰ van ma, ndee baaburi go mbo Siri ɓanna ge Prisil mage na obe Akilas. Zḛḛ ge go ne ndee baaburi ge sok ndee baaburi ge Saŋkre ne go, soɗ na pagal gezi, ge dape, kê wa tii a̰me go. 19Sok ge àa dee ya ge suwal Efez diŋ, a ge sok mbe go, Pol n̰a Prisil mage na obe Akilas no. Kaɗɗa ge ne sḛ ɗe, mbo ge zok kee kaɗeya ge Yahuɗ ma way zì yà, àa ge num ka pee ta fare. 20Àa kaɗe ne go, ne kaa ge maa swag, ɗaŋɗe, vin num fare mbe to. 21Sok n̰a num go, jan num go: Kaɗɗa Dok mbo hage vin̰a ya ge mbi pagal, mbi mbo gwan-na ge ḛ ta. Ge Efez go, ndee baaburi go mbo zḛḛ. 22Sok ge Pol dee ya ge Sezare go, kan na ko mbo ge suwal Jerusalem yà, ndwa san ɓase ge Krist ne ma wa. Guwa̰, gwan-na mbo Antiyoch.

Sok mboya ge Pol ne ge ndwa taa

23Guwa̰ ge kaa swag ge suwal Antiyoch diŋ, ɗege ge sok mbe go, ka zwagre tene zḛḛ zḛḛ ge suwa ge Galati mage Frigi ne ma go. Ka sal nda ge ame hateya ma peɗ pul ge hoɗ fareba ge num way ma zì.

Apolos ge suwal ga̰a̰l Efez mage Korent diŋ

24Ge dwam mbe ma go, Yahuɗ a̰me ɗu ge àa tol ne Apolos, too ge suwal Alekzandri go, ne ka̰a̰l ka faa fare sawal, kaa ndu ge kuwa Njaŋeya ge Dok ne ma gezi kwaɗa hetel, mbo ya ge suwal Efez go no. 25See hateya ge vin̰a ge Bagezok ne pagal kwaɗa, kaa fogol cacaf sok oy fare mage hate fare ge Zeso ne go, ge temel pagal. Ɗaŋɗe, ka kuwa ɗeŋew baptem ge Yohana ne. 26Ka jan fare be ndwa baaya ge zok kee kaɗeya ge Yahuɗ ma way zì. Sok ge Prisil mage na obe Akilas za̰a̰ ne fare hateya go, àa wan ne ya ge maa ta, àa hate ne vin̰a ge Dok ne zum kɔn̰al yaɗaɗ. 27Ajo̰o̰ na kaa ge dwaɗɗa ge mbo suwa Akay, na̰ van ma vin ne fare mbe, àa teme lawayta mbo hon nda ge ame hateya ma, ndwa go num ame ne. Sok ge dee yà, na̰ van ge ho fareba ma seɗ pool gḛḛ ge ne ta, ge kwaɗa keeya ge Dok ngay ne ge ne ta pe. 28Ago, ge fare janna ge ne ne ge gag ma ta, ka pee tene ge Yahuɗ ma, ge sok seɗ ta ge num way ge sok ɓase go ge ma, ka ngay num ge Njaŋeya ge Dok ne ma ta go, Krist, ndu ge Dok taa nee ne.

Currently Selected:

Tèmel keeya 18: kiaGRB

Highlight

Copy