Tèmel keeya 19

Pol ge suwal Efez diŋ

1Sok ge Apolos kaa ge suwal Korent diŋ gale, Pol kale ya ge Azi sok njal ma go, deɗ-ɗa ge suwal Efez diŋ. Àa ge nda ge ame hateya a̰me ma seɗ ta, ele num go: 2Ḛ ame On̰om ge Harcal sok ge ḛ ho fareba go ɓade? Àa gwan ge ne janna go: I be za̰a̰ On̰om ge Harcal fare faaya dwam ɗu to. 3Pol ele num go: Àa kê ḛ ma̰ baptem pe de? Àa gwan ge ne janna go: Baptem ge Yohana ka hate nda ne. 4Ge sok mbe go, jan num go: Yohana kee baptem ge seŋe ta se ne, ka jan Izrayel van ma go, num ho fareba ge ndu ge mbo no ge na guwa̰ ya ta, ndwa go, Zeso. 5Sok ge nda mbe ma za̰a̰ fare ge Pol jin̰a maa num ma go, àa gwan kee num baptem ge dḭḭl ge Bagezok Zeso ne. 6Pol ee na tok ma ge num pagal kee kaɗeya, On̰om ge Harcal mbo ya biri num, àa ɗege faa wa ge ɗogle ma, àa ka zwagre fare ge Dok jan maa num ma zum me. 7Nda soɗob mbe ma mɔɗwag wol pɔgwa zi.

8Ɗiŋ saba taa, Pol ka mbo ge zok kee kaɗeya ge Yahuɗ ma way zì, ka jan num fare be voo. Àa ge num ka pee ta fare ge muluk ge Dok ne pagal, ka ɓyare vin̰a ge ee num vin na fare mbe ma go, num fare ge fareba ma ne. 9Ɗaŋɗe, nda a̰me ma vin fare mbe ma ge maa sḛ zì to, àa kuri be hoɗ fareba, àa ka vḛḛne vin̰a ge Bagezok ne ge ɓase ma ndwa zì. Ge sok mbe go, Pol ɔwabe tene ge num ta gezi, kwate nda ge ame hateya ma gezi yà jan, ka hate num fare dwam ge dwam ge zok hate nda ge Tiranus ne zì. 10Hon na hateya mbe ɗiŋ del zi, ge go Yahuɗ mage Grek ge Azi go ma peɗ deɗ-ɗa za̰a̰ fare ge Bagezok ne.

Seba van ge soɗob ma

11Dok hon Pol pool ge kee kaŋ ajab ge waɗe ge nda duwana ma dwaɗɗa ma pagal. 12Àa ka ɔwabe ne ba̰a̰ wa ge tigɗi uwa̰se mage ne ba̰a̰ ge ka̰a̰ num na duul ta ma, mbo taɗ nda ge tuguɗi ma ge num, nda ge tuguɗi mbe ma ka seɗ zonna, on̰om ge sone ma ndage zum ge num zì me. 13Yahuɗ a̰me ma, ge ka anna kee mbole ge sok ma go peɗ ndwa yan on̰om ge sone ma, àa ɗege tol dḭḭl ge Bagezok Zeso ne waɗme ge nda ge no ge on̰om ge sone ma pagal, àa ka janna go: Mbi hoɗ ḛ mbi wa ge dḭḭl ge Zeso ge Pol oy ne fare ta! On̰om ge sone ma, ḛ ndage zum. 14Yahuɗ ma ga̰a̰l a̰me ge nda ge kee tuwaleya ma way, ge àa tol ne Seba, ne van ge soɗob ge ɓỳala ma ka kee ano mbe ne. 15Ɗaŋɗe, ge dwam a̰me go ɗu, ndu ge no ge on̰om ge sone na zì gace num janna go: Mbi kuwa Zeso kuwa, mbi kuwa Pol me, ḛ sḛ ma, ḛ huɗi ma ne de? 16Ndu mbe ge no ge on̰om ge sone na zì mbe ɓole ya ge num pagal iyalla, ne pool waɗe ge num pagal, àa jay maa pe soo ge zok mbe zì ya pe swala, ge jwaŋ ma ge maa ta. 17Nda ge kaa ge suwal ga̰a̰l ge Efez ne diŋ-ge ma peɗ, Yahuɗ mage Grek ma za̰a̰ fare mbe, voo mbo ya wan num, dḭḭl ge Bagezok Zeso ne mbo ya seɗ uwareya. 18Lee gḛḛ ge nda ge ho fareba ma buwal zige mbo ya jan kaŋ ge maa kê num ge sone ma zum ge ɓase go. 19Nda ge ka kee mbole ma lee gḛḛ, gene maa maktub ge kee mbole ma ya, àa til num gezi, ge nda ndwa go peɗ me. Àa wan yee ge maktub mbe ma way digi, àa seɗ go num bware mbo digi ge silay dudubu warnuwan̰. 20A ge ano mbe ma no ta, Dok ngay pool ge na ne zum no, fare ge Bagezok ne dasare se no me.

Ho̰o̰l ge ɗege digi ge suwal Efez diŋ

21Guwa̰ ge fare mbe ma way go, Pol vin tene ge na on̰om zì go na kale mboya ge suwa Maseduwan mage Akay go, ndwa mbo Jerusalem yà. Ka janna go: Sok ge mbi mbo deɗ-ɗa yà, ɓyare go mbi mbo suwal ga̰a̰l Rom waɗme. 22Teme nda ge mbaa na ma zi, Timote mage Eras mbo suwa Maseduwan, ɗaŋɗe, ne sḛ gaa gale kàɗɗa swag ge suwa ge Azi ne go.

23Ge zaman mbe go, suwal ga̰a̰l Efez mbo ya seɗ iigiya gḛḛ ge vin̰a ge Bagezok ne pe. 24Ndu ge ɗeere fool a̰me ge àa tol ne go Demetriyus, ka ɗeere zok siim van ge dok ge gwale Artemis ne ma ge bware walam, nda ge ka kee tèmel ge ne ma, ka seɗ poɗɗa ge kwaɗa. 25Tol na nda ge tèmel mage nda ge ɗeere fool gegene ma ya se, jan num go: Mbi kondore ma, ḛ kuwa kuwa go, nè kaa kwaɗa ge nè ka̰a̰m buwal zì, ge tèmel mbe no ta. 26Ɗaŋɗe, Pol mbe jan go, Dok ge nda duwana ma kee num ge maa tok zì ma, num be din ta ge Dok ge fareba to. Muwa̰le nda ya gḛḛ ge na pe go, be ge suwal ga̰a̰l ge Efez ne diŋ ɗeŋew to, ɗaŋɗe, ge suwa ge Azi ne pagal mɔɗwag. Ḛ ge fare mbe ma za̰a̰ya mage num kuwaya waɗme. 27Ano mbe no, vḛḛne be nè tèmel ɗeŋew to, ɗaŋɗe, zok siim ge dok ge gwale Artemis ne mbe mbo seŋe a̰me pe to. Go mbe no, dok ge gwale Artemis mbo ban hormo ge na ne, ne sḛ ge nda uware ne, ge suwa ge Azi ne go peɗ, ge dunin̰a zì peɗ me. 28Sok ge àa wa̰a̰ num fare mbe ma pe go, àa ceŋe ge twam, àa ɗege oyya digi go: Artemis ge Efez ma way, a̰me ge mbyaɗ tene ge ne go to. 29Sok mbe go, suwal ga̰a̰l mbo ya iigi digi giliw, àa za̰a̰ ta, àa muwa̰le mbo ge sok seɗ ta ge ɓase ma way yà, àa zoore van Maseduwan ge zi ma, Gayus mage Aristark, num ge ka ɗeme Pol ma ge maa ndwa zḛḛ yà. 30Pol sḛ kaa ge dwaɗɗa ge mbo ge ɓase ma buwal zì yà, ndwa jan num fare. Ɗaŋɗe, nda ge ame hateya ma tele ne gezi. 31Ne kondore a̰me ma ge kaa ga̰a̰l ge suwa ge Azi ne go ma dol tèmel ya jan ne go: A̰me he mo ndwa ge mbo ge sok seɗ ta ge ɓase ma way mbe yà gale ɓaca. 32Ge sok seɗ ta ge ɓase ma way mbe go, nda ɗege oyya digi batraŋ, ge dape, nda gḛḛ be wan fare ge ee maa mbo ya ge sok mbe go pe to. 33Yahuɗ a̰me ma ge ɓase ma buwal zì, ɓyan maa kon ge àa tol ne Alekzandr ya ge nda ndwa zḛḛ, àa wan ne fare pe ge ndwa jan ɓase ma. Ne sḛ mbo ya hee na tok digi ndwa kee nda kuwaya go num zane. Ɓyare hee fare janna ndwa ben tene ge ɓase ma ndwa se. 34Ɗaŋɗe, sok ge ɓase ma kuwa go ne Yahuɗ ne, àa ɗege digi oyya wa dagre ɗu go: Artemis ge Efez ma way, a̰me ge mbyaɗ tene ge ne go to. Oyya ge num way mbe mbo ɗiŋ guwa ge ler zi. 35Guwa̰, ndu ge njaŋe kaŋ ge suwal ga̰a̰l ne seɗ vin̰a ge ee nda angal se, jan go: Ɓase ge suwal Efez ne ma, nè ge kuwaya go, suwal ga̰a̰l Efez, ne suwal ge koy zok ge dok Artemis mage kḭḭ caaya ge ne ne ge dee no ge pḭḭ zì ya ne to de? 36Ajo̰o̰ na fare ge mbiya ndu pee ne to ne, be kee kwaɗa go, ḛ hee ta digi to, ɓyare go ḛ iya ḛ laa se. 37Ago nda soɗob ge ḛ gene num ya ge sok mbe go ma, àa be chel a̰me ge nè zok siim zì to, koo àa jan fare a̰me ge sone kakatag ge dok ge gwale Artemis ne pagal to me. 38Go mbe no, Demetriyus mage na nda ge tèmel ma, kaɗɗa maa ge fare eeya ge ndu a̰me pagal ɗe, ɓyare go num mbo ya kaŋeya, àa wa kare num fare ge dwam ge àa ee num kee sariya ma go. 39Kaɗɗa ḛ fare ge ɗogle gegene ma go me ɗe, ḛ ge vin̰a ge mbo ge num ya ge ɓase ge suwal ne ma ndwa se, àa wa nuusi ḛ num. 40Kaɗɗa go to, nda mà ndil nè kwateya ge màge mbe ge mojo̰o̰ nè ɓyare ɗege digi ge ho̰o̰l a̰me go, ndwa go fare a̰me ge mbiya ben nè gezi ge kwateya mbe pe to. Guwa̰ ge aa na fare mbe janna go, hoɗ ɓase ma na wa go, num mbyare.

Currently Selected:

Tèmel keeya 19: kiaGRB

Highlight

Copy