Marcos 9

1I Jesús xub'ij chik chke:

—Lik saq laj tzij kinb'ij chiwe, chi o jujun chke i je o waral kekam ti tan, k'a kkil ni i ajawinik re i Dios chi kk'un ru' nim laj ucho'ab' —xcha

Uyojtajik uwach utzunb'al i Jesús

2Waqib' ij uk'ulmaxik ile, i Jesús xuk'am b'i ma Pedro, ma Jacobo xaq i ma Wan, xe'e puwi jun nim laj jyub' chi lik naj uwi. Are je o chik chila are uri i Jesús lik xyojtaj uwach utzunb'al chkiwach. 3I u'u' lik xu'an saq xaq lik xwalch'inik. Nti chik jun k'ul kmajaw usaqil tupu lik ch'ajtalik. 4Are uri xkil uwach mam Moisés xaq mam Elías ketijin che i lapanik ru' i Jesús. 5Are uri ma Pedro xub'ij che i Jesús:

—Tijonel, ¡lik utz x-ono chi oj o waral! Man kqa'an oxib' mujb'al: Jun awe yet, jun re mam Moisés xaq jun re mam Elías.

6Keje ile xub'ij ma Pedro che i Jesús man che oxib' lik je oknaq il, rumali xuna ti ma Pedro wach xub'ij. 7Are uri xaqte'et xqaj li jutzob'aj sutz' pkiwi chi lik xuch'uq kiwi, xaq xtataj jun ch'awb'al chupam i sutz' le chi xub'ij: “Iri are Ink'ojol chi lik k'ax kinna'o; chikojo retalil che wach kub'ij.” Xcha. 8Are xkita i ch'awb'al le, juntir xetaqen k'ulala, xwiri i jub'an je nti chik xwi chik i Jesús o utukel.

9Are ktijin li kiqajik tzam jyub', i Jesús lik xub'ij chke utijoxelab' chi mkilap ronojel ni'pa i xkilo, k'a are kwalij ni che i kamik i jun chi pacha Winaq chi Xolalaxoq chwach Ulew. 10Rumali, xkib'ij taj wach xkilo; xwiri kkitz'onoj chkiwach: ¿Wach usuk' i tzij le chi xub'ij, chi kwalij che i kamik? 11Te'uri xkitz'onoj che i Jesús:

—¿B'uchak kkib'ij i tijonelab' re i atb'al tzij chi are mam Elías kk'un nab'e? —Xecha che i Jesús.

12Ire xub'ij chke:

—Qatzij ile chi are mam Elías kk'un nab'e, man are ire koluyijb'a ni ronojel. ¿B'uchak uri chi kub'ij uwuj i Dios, chi are i pacha Winaq chi Xolalaxoq chwach Ulew kutij ni jalajuj taq k'ax xaq kxutux na? 13I Jesús xub'ij chik chke: Xwiri yin kinb'ij chiwe chi mam Elías k'unnaq chik, xwiri i winaq xki'an che ronojel ni'pa xkaj u'anik; pacha kub'ij uwuj i Dios chi kuk'ulmaj na, —keje ile xub'ij i Jesús chke.

I Jesús xresaj itzel tew che jun ala

14Are xetzalij chik chila ipa je o wi kan i jub'an chik utijoxelab', xekiriqo chi suttal kij kumal jub'an k'iyal winaq, o jujun tijonelab' re i atb'al tzij kichapom kib' chitzij ku'. 15I winaq are xkil uwach i Jesús, konojel xe'e pa'anem chuya'ik rutzil uwach, lik xekikotik. 16I Jesús xutz'onoj chke:

—¿Wach taq kixtijin yix chuchapik iwib' puwi chitzij ku' ike le?

17Jun chke i je o chila xub'ij:

—Tijonel, yin ink'amom li wak'al awu', man o jun itzel tew che chi u'anom mem che. 18Xaipa o wi kchaptaj rumal, i itzel tew le kutzaqsaj pulew, lik kpuluw uk'axaj rumal, kuqach'ach'ej uware xaq kupichichej rib' rumal. Xintz'onoj utzil chke atijoxelab' chi kkesaj b'i itzel tew che xwiri je tikinaq ti che —xcha.

19Are uri i Jesús xub'ij chke utijoxelab':

—¡B'uy laj taq winaq chi lik nti ukub'ib'al ik'ux che i Dios! ¿K'a junpa nawi ij rajwaxik kink'iji iwu'? ¿K'a junpa nawi ij kinch'ijo ni'pa i ki'ano le? Te'uri xub'ij: —Chik'ama li ala warali —xcha.

20Te'uri xkik'am b'i ala chwach i Jesús. Xwiri i itzel tew are xril uwach i Jesús, xutzaqsaj chik ala pulew xaq xupuluwsaj chik uk'axaj. 21I Jesús xutz'onoj che uqajaw ala:

—¿Junpa jeqannaq li i k'ax che ala le?

I uqajaw ala xub'ij:

—I itzel tew are k'a ch'utin ujeqom li che; 22lik k'iyalmul uk'aqom pa a' xaq uk'aqom pa ya, kraj ire kukamsaj. We kattiki chrelsaxik itzel tew le, cha'ana utzil uri chqe chojato, chawila tob'al qawach —xcha.

23Are uri i Jesús xub'ij che uqajaw ala:

—¿B'uchak kab'ij chi “we kintiki'ik”? ¡Is k-an tikilem che pachin kkojonik!

24Are uri uqajaw ala xsik'in chub'ixkil:

—¡Yin kinkojo, chinato chuya'ik mas ukub'ib'al ink'ux! —Xcha.

25I Jesús are xrilo chi ktijin kimoltajik i winaq ru', are uri xub'ij che itzel tew:

—Yet chi at tak chi xaq at mem laj itzel tew, kinb'ij chawe, chatel che i ala le, chawo'taj kanoq xaq matok chik puch'akul.

26Are uri i itzel tew le xsik'inik xaq xuk'aq chik ala pulew, lik pacha taq xukamsaj kanoq, te'uri x-ek. Rumali lik je k'i i winaq xkib'ij chi ala le kamnaq chik. 27Xwiri i Jesús xuchap che u'ab' ala le, xuyak anoq; are uri i ala xtak'i'ik.

28Te'uri Jesús xok ru' jun ja junam ku' utijoxelab'. Are je o chila kitukelal, i tijoxelab' xkitz'onoj che:

—¿B'uchak xojtiki ti yoj chrelsaxik i itzel tew le? —Xecha che i Jesús.

29I Jesús xub'ij chke:

—Jun itzel tew pacha ile, lik xwi ru' chutz'onoxik che i Dios kelik.

I Jesús kukamulij chik ub'ixkil ukamik

30Are xe'el chila, xeik'aw pa Galilea. Xwiri i Jesús xraj taj we k-etamaxik, 31man ktijin chuk'utik chke utijoxelab' ru' i tziji:

—I pacha Winaq chi Xolalaxoq chwach Ulew kjach ni pki'ab' i winaq re kkikamsaj; xwiri che oxib' ij kwalij ni che i kamik.

32Xwiri ike kkik'am ti usuk' wach kub'ij i Jesús chke xaq kkixij kib' chutz'onoxik che wach usuk'.

¿Pachin lik mas nim u'ij pu'atb'al tzij i Dios?

33Are xeupon pa nim laj tinimit Capernaum, are je o chik ru' ja, i Jesús xutz'onoj chke utijoxelab':

—Are kojtijin che i b'e, ¿Wach taq i tzij chi ichapom taq iwib' puwi pa b'e?

34Xwiri ike le xech'aw ti chik, man i tzij chi kichapom te'eq kib' puwi pa b'e, are pachin taq mas nim u'ij chke ike. 35Are uri i Jesús xkub'i'ik, xeusik'ij i kab'lajuj utijoxelab' ru' xaq xub'ij chke:

—Pachin jun we kraj kuya rib' chunab'eyal, rajwaxik uri chuya rib' pa k'isb'al re chke konojel, xaq chu'ana che rib' pacha mokom chkij konojel —keje ile xub'ij i Jesús chke.

36I Jesús xuk'am pan jun ak'al xuya chkixol te'uri xu'aluj anoq xaq xub'ij chke:

37—Pachin jun kuk'am jun ak'al pacha iri pinb'i yin, ke'el uri chi yin kinuk'amo, xaq pachin jun kinuk'am yin, xwi ti yin uri kinuk'amo xaq kuk'am i jun chi in taqawnaq loq.

Jun we ku'an ti ch'oj chqij uya'om uri uwach qu'

38Are uri ma Wan xub'ij che:

—Tijonel, xqil jun winaq chi ktijin chrelsaxik itzel tew pab'i yet. Xwiri qachi'il ti yoj, rumali xqa'atij —xcha.

39Are uri i Jesús xub'ij:

—Mi'atij che man mijun ku'an jun nim laj il pinb'i yin, te'uri k'ax tan chik kch'aw chwij. 40Man pachin jun ku'an ti ch'oj chqij, ke'el uri uya'om uwach qu'. 41Xapachin jun tupu xa jun b'as ya kuya chiwe yix rumal ix re i Cristo, lik saq laj tzij uri kinb'ij chiwe chi kya' ni usipon —xcha i Jesús.

I xib'rikil re tzaqik pa mak atzalal

42Xapachin jun kutzaqsaj jun chke i ch'utiqi chupam umak, chi kekojon chwe yin, lik utz teneri che wetene kxim jun ka' rij uqul xaq kk'aq b'i pa ya, ji'sab'al re. 43We are a'ab' k-anaw chawe chi kattzaq chupam amak, su' chawesaj b'ik. Man utz ke'el chawe we xa jun chik a'ab' olik are katok che i k'aslemal saqil, chwach we keb' a'ab' chi xa kat-e pa a' chi ktoqowik ronojel ij saq. 44#9.44 Versículo 44: Man chila lik kekam ti kamolil ike xaq i a' lik kchup taj. (Konojel ti wuj chi o utzij i Dios chupam chi lik mas ujer kanoq, kriqtaj i jun versículo ri.) 45We are awaqan k-anaw chawe chi kattzaq chupam amak, su' chawesaj b'ik. Man utz ke'el chawe we xa jun chik awaqan olik are katok che i ak'aslemal saqil, chwach we keb' awaqan chi xa katk'aq b'i pa a' chi lik ktoqowik. 46#9.46 Versículo 46: Man chila lik kkam ti kamolil ike xaq i a' lik kchup taj. (Konojel ti wuj chi o utzij i Dios chupam chi lik mas ujer kanoq, kriqtaj i jun versículo ri.) 47We are ab'a'wach k-anaw chawe chi kattzaq chupam amak, su' chawesaj b'ik. Man utz ke'el chawe we xa jun ab'a'wach olik are katok che i ajawinik re i Dios chwach we keb' ab'a'wach chi xa katk'aq b'i pa a' chi lik ktoqowik, 48man chila lik kkam ti kamolil ike xaq i a' lik kchup taj.

49Man konojel lik ke'on ni tza ru' i a' le. 50I atz'am lik kuriq uchak chqe. Xwiri we xsach utzayil, ¿Wach u'ankil uri ki'an chik yix che, re ku'an chik tza? Lik rajwaxik uri chi yix ix keje na pacha i atz'am chi o ujelal ik'aslemal chiwach, xaq rajwaxik chi lik o ni chomalil chiwach.

Currently Selected:

Marcos 9: ACHICUB

Highlight

Copy