Marcos 8

I Jesús xeutzuq lajujmo' (4,000) winaq

1O juyak are xemoltaj tan chik uk'iyal winaq ru' i Jesús, xwiri lik nti kiwa re kkitijo. Are uri i Jesús xeusik'ij utijoxelab' ru', xub'ij chke:

2—To' kiwach i winaq le, man are oxib' ij iri chi je o chi wu' xaq nti chik kiwa re kkitijo. 3We keintaq b'i chi kachoch i nti wa kitijom, moqxa kkich'ij ti uponik, man je o jujun chke chi lik naj je petnaq wi —xcha.

4I utijoxelab' xkib'ij che:

—¿Wach kitzuqik uk'iyal winaq kqa'an yoj? Man waral ipa oj wi lik tz'inilik jyub' chi lik nti winaq jeqel chi —xecha.

5I Jesús xutz'onoj chke:

—¿Ni'pa wa re trigo o iwu'?

Ike xkib'ij:

—Xa wuqub'.

6Are uri i Jesús xub'ij chke i winaq chi kekub'i chwach ulew, are uri xuk'am i wuqub' wa re trigo, xutioxij che i Dios, te'uri xupiro, xuya chke utijoxelab'. Ike xkijach chke i winaq. 7Xaq o keb' oxib' kar ku', i Jesús xaq xutioxij chik che i Dios rumal ile, te'uri xutaq chik ujachik chke i winaq. 8Konojel i winaq xkitij wa xaq lik xenojik, are xkelej wa'im, i utijoxelab' xkimol wuqub' chikach ch'aqa taq chi xkik'is taj. 9I winaq chi xkitij wa, kolo je lajujmo' (4,000) te'uri i Jesús xeu'ijla kanoq. 10Are uri xe'ok b'i pa barco ku' utijoxelab', xe'ax ch'aqap che i ulew Dalmanuta ub'i.

I aj fariseo kkitz'onoj che i Jesús chi ku'an jun nim laj il

11Are uri xeupon aj fariseo ru' i Jesús xe'ok chuchapik kib' chitzij ru'. Xaq xe'ok chutz'onoxik che i Jesús chi chu'ana jun nim laj il chkiwach, xwiri xa k'amb'al upam kki'ano, we qatzij chi ru' i Dios petnaq wi. 12Are uri i Jesús lik xuk'is uk'ux xaq xub'ij:

—¿B'uchak kitz'onoj rilik jun nim laj il? Lik kinb'ij chiwe, lik mijun k'utb'al re ucho'ab' i Dios k-an ni chiwach —keje ile xub'ij i Jesús chke.

13Are uri xel ku', xok chik chupam i barco, x-ax ch'aqa semelik ya, i aj fariseo xekanaj kanoq.

I kik'utunik i aj fariseo

14I utijoxelab' i Jesús xsach chkik'ux chi kkik'am b'ik wach kkitijo; xa jun lejom wa re trigo o ku' pa barco. 15I Jesús lik xub'ij chke:

—Chita pe lik chijaqa ib'a'wach, chi'ana kwent i kunb'al re i kiwa re trigo aj fariseo xaq i re ma Herodes.

16I utijoxelab' i Jesús xkib'ij chkiwach:

—Xub'ij ile chqe rumal nti qawa re trigo xqak'am loq —xecha.

17I Jesús xunab'ej wach kkib'ij chkiwach, rumali xub'ij chke:

—¿B'uchak kib'ij chi nti chik i wa re trigo? ¿K'amaja b'ari kita ub'e xaq inab'em taj? ¿Lik tz'apil b'ari inojb'al? 18O ib'a'wach —¿Xwiri kixtzun taj? O ixikin ¿Xwiri kixtan taj? ¿Lik nti b'awa kk'un chik'ux? 19Are xinjach jo'ob' wa re trigo chke i lajujwinaq kab'lajujmo' (5,000) achiyab', ¿Ni'pa chikach ch'aqa taq xk'is taj?

Ike xkib'ij:

—Kab'lajuj chikach. 20—Xaq are xinya wuqub' wa re trigo chke i lajujmo' (4,000) winaq, ¿Ni'pa chikach ch'aqa taq xk'is taj?

Ike xkib'ij:

—Wuqub' chikach.

21Are uri i Jesús xub'ij chke:

—Ru' ronojel ile k'amaja uri kita ub'e.

I Jesús xutzunsaj jun mawach pa tinimit Betsaida

22Are xeupon pa tinimit Betsaida, are uri i winaq xkik'am li jun mawach ru' i Jesús xaq xkitz'onoj utzil che chi kuyin jub'i' ub'a'wach che. 23Are uri i Jesús xuchap b'i che u'ab' i mawach, xresaj b'i pa tinimit; te'uri xukoj jub'i' uk'axaj che ub'a'wach i mawach le xaq xuya u'ab' puwi, i xutz'onoj che:

—¿Kattzun chik jub'i'?

24Are uri i mawach xutikb'a taqenik, xub'ij che i Jesús:

—¡Kewil i winaq pacha che' keb'inik! —Xcha.

25Are uri i Jesús xuyin chik pan jub'i' ub'a'wach achi le; are uri i achi le lik xtzunik xaq xutzirik, lik ronojel is xrilo. 26Are uri i Jesús xutaq b'i chi rachoch xaq xub'ij che chi ktzalij ti chub'i pa tinimit.

Ma Pedro xusaqij chi Jesús are i Cristo

27Chrijil chik ronojel ile i Jesús junam ku' utijoxelab' xe'e pa taq komon re i jyub' Cesarea chi re i tinimit Filipo. Are ketijin che i b'e, i Jesús xutz'onoj chke utijoxelab':

—¿In pachin yin kkib'ij i winaq?

28Ike xkib'ij:

—O jujun kkib'ij chi Yet at ma Wan chi Ajqajsanel Ya; o jub'an chik kkib'ij chi yet at mam Elías; xaq o jub'an chik kkib'ij chi Yet at jun chke i profeta —xecha.

29I Jesús xutz'onoj chke ike:

—I yix, ¿Wach kib'ij, in pachin yin?

I ma Pedro xub'ij:

—Yet at Cristo —xcha.

30Xwiri i Jesús lik xub'ij chke chi mijun kkilap wi pachin taq ire.

I Jesús xub'ij chi kkamsax na

31I Jesús xujeq uk'utik chke utijoxelab' chi pacha Winaq chi Xolalaxoq chwach Ulew, lik kutij ni k'iyal uyej xaq kxutux ni kumal kinimaqil xaq kumal i kaj-atzil i rajpatan i Dios xaq kumal i tijonelab' re i atb'al tzij. Xaq xub'ij chke chi kkamsax na xwiri churox ij kwalij chik. 32Ile lik xusaqij chke. Te'uri ma Pedro xuk'am b'i Jesús naj pan jub'i' chke i rachi'il, are uri xok chub'ixkil che chi utz ti xub'ij. 33Xwiri Jesús xeutzu li utijoxelab', xumaj kitaqexik, te'uri xuyaj ma Pedro; xub'ij che:

—¡Chatel chinwach Satanás! Man anojb'al yet keje taj pacha unojb'al i Dios. Ach'ob'onik yet xa keje pacha kich'ob'onik i to' winaq chwach i jyub' ta'aj!

Keje ile xub'ij i Jesús che ma Pedro.

34Te'uri i Jesús xeusik'ij utijoxelab' ru' xaq xeusik'ij i winaq chi je o chila, xub'ij chke:

—We o jun kraj kterej chwij yin, lik much'ob' chik rib' uri ire, lik chuch'ija uri i kamik chwach i krus xaq chterej chwij. 35Man pachin jun kraj uto'ik uk'aslemal waral chwach i jyub' ta'aj xa ksach uri uk'aslemal saqil. Xwiri, pachin jun ksach uk'aslemal waral wumal yin xaq rumal i utz laj tzij re i Dios, kuriq uri uk'aslemal saqil. 36Man, ¿Wach uch'ak che jun winaq, we kuch'ak ronojel i b'eyomal re uwach i jyub' ta'aj, we xa kusach uk'aslemal saqil? 37Xaq ¿Ktiki nawi jun winaq chulo'ik uk'aslemal? 38Man pachin jun kk'ix wumal yin xaq rumal intzij chkiwach ajmakib' laj taq winaq chi xaq lik kekojon taj; xaq keje uri pacha i Winaq chi Xolalaxoq chwach Ulew kk'ix ni che ire, are kk'un ru' u'ij uchomal Uqajaw xaq ku' i lo'laj taq ángel?

Currently Selected:

Marcos 8: ACHICUB

Highlight

Copy