Marcos 7

Wach i k-anaw che jun winaq chi ch'am taj

1O jub'an aj fariseo xaq jub'an tijonelab' re i atb'al tzij chi je petnaq pa tinimit Jerusalén xetejeb' pan ru' i Jesús. 2Ike le, are xkilo chi o jujun chke utijoxelab' i Jesús ketijin chwa'im tz'il ki'ab', xe'ok chkich'amixik man xki'an taj pacha usuk' chkiwach ike chi na'al kkich'aj ki'ab' are ke'ok chwa'im. 3(Man aj fariseo xaq konojel aj Judío lik je teren chrij pacha xki'an i katit kimam chi kkitij ti kiwa we kkich'aj ti ki'ab' k'a pkich'uk pacha rajwaxik. 4Xaq keje ile kki'ano are ke'e pa k'eb'al man are keupon chi kachoch lik kkitij ti tan kiwa we kkich'aj ti ki'ab' pacha xki'an katit kimam ujer. Xaq o jub'an chik k'iyal anik chi keterej ike chrij pacha iri: Uch'ajik i b'as, uch'ajik i xar, uch'ajik i laq chi anch'ich' xaq uch'ajik i ch'at.) 5Rumali i aj fariseo xaq i tijonelab' re i atb'al tzij xkitz'onoj che i Jesús:

—¿B'uchak atijoxelab' yet kki'an taj pacha kib'im kan i qatit qamam ujer? ¿B'uchak kkitij kiwa ru' ki'ab' tz'il?

Xecha che i Jesús.

6I Jesús xula' uwach chke:

—Lik qatzij pacha ub'im mam Isaías chi profeta chkij i keb' kipalaj chi ix are yix, are xutz'ib'aj i tziji:

I winaqi lik xwi ru' kichi' kkikoj in-ij,

xwiri i kik'ux lik naj o wi chwe.

7Lik nti kuchakuj chi kikoj taq u'ij i Dios,

man i k'utunik chi ki'ano xa unojb'al jun winaq.

8Man yix kiwaj ti ukojik utaqanik i Dios, xwi kiwaj ukojik i k'utunik chi xa unojb'al jun winaq.

Keje ile xub'ij i Jesús chke i winaq le.

9Xaq xub'ij chik chke:

—Yix iya'om kan utzij upixab' i Dios junla, rumal taq u'anik kik'utunik i winaq. 10Man i ma Moisés ub'im kan keje iri: “Chakojo ki'ij aqajaw achuch”, “man pachin jun kuk'oqoj uqajaw xaq we uchuch, lik kkamsax ni uri”. 11Xwiri yix lik kib'ij chi jun winaq o pu'ab' kub'ij che uqajaw xaq we uchuch: “Katinto taj man ni'pa o wu' lik insujum chik che i Dios”, 12xaq lik kib'ij chi pachin jun kb'in keje ile nti chik uri chuqul keuto uqajaw uchuch. 13Rumal ni'pa ile, iwo'tam kan utzij upixab' i Dios, rumal taq i k'utunik chi xa ke i winaq chi kik'ut chiwach, xwi ta la ile, xaq k'i na ki'an yix pacha ile. 14Te'uri i Jesús xeusik'ij i winaq ru', xub'ij chke:

—Chinita ni iwonojel xaq chik'ama ni usuk' wach kwaj kinb'ij chiwe. 15Ronojel ni'pa kutij b'i jun winaq are ti ile k-anaw che chi ch'am taj, i k-anaw che jun winaq chi ch'am taj are wach kel li puk'ux. 16Pachin o uxikin chuta ub'e uri wach xinb'ij —keje ile xub'ij i Jesús chke.#7.16 Kriqtaj ti i jurab'aj tziji chupam konojel i wuj re utzij i Dios.

17I Jesús are xel chkixol i winaq xok pa ja, are uri i utijoxelab' xkitz'onoj che wach usuk' i k'utunik chi xuya chke i winaq. 18Are uri i Jesús xub'ij chke:

—¿Xaq yix kita ti ub'e i tzij le? ¿Kita ti b'ari ub'e chi are ti wach kutij jun winaq k-anaw che chi ch'am taj 19Man ni'pa i kutijo kok ti puk'ux xa prixkol k-e wi, te'uri kel tan chik?

Ru' i tzij le i Jesús xusaqij chi ronojel ni'pa ktijawik is ch'am. 20Xaq xub'ij chke:

—I k-anaw ch'am taj che jun winaq are ronojel ni'pa kel li puk'ux. 21Man ronojel ni'pa kel li puk'ux jun winaq are iri: Ch'am ti laj nojb'al, uminik rib' jun achi ru' rach achi xaq jun ixoq ru' rach ixoq, el-anik, kamsanik, 22xaq o i je ili'omab', xaq o i je rayinel; xaq o i je aj-anol i utz taj, xaq o i je ajt'oronel; xaq o i je aj-anol utz taj; xaq o i ktitat kipam chke i kachi'il wach i o ku'; xaq o i ajnuk'ul tzij; xaq o i kki'an nimaq che kib'; xaq o i kkich'ob' taj we utz wach kki'ano. 23Ronojel ni'pa i utz ti laj taq b'iroxik le lik puk'ux i winaq kel wi loq xaq are ile k-anaw che chi ch'am taj.

Keje ile xub'ij i Jesús chke utijoxelab'.

I ukub'ib'al uk'ux jun ixoq chi aj Judío taj

24Relik i Jesús chila ipa te o wi, x-e che i jyub' Tiro, are xuponik xok che jun ja chila, tupu xraj taj chi k-etamaxik ipa o wi, xwiri xtiki ti chruwaxik rib'. 25O jun ixoq juntir xuta utzijol ipa o wi i Jesús, i ixoq le o jun ralit chi o itzel tew che, are xupon ru' i Jesús xxuki chwach. 26I ixoq le aj Judío taj, aj Sirofenicia, are uri k'iyal mul xutz'onoj utzil che i Jesús chi kresaj b'i itzel tew che i ralit. 27Xwiri i Jesús xub'ij che:

—Chaya ni chke alk'uwalxelab' chi kkitij kiwa ike nab'e, man kumaj taj chi kya' kiwa ike le chke i tz'i —xcha.

28Ixoq le xub'ij che i Jesús:

—Qatzij, Nim laj Winaq, xwiri xaq i tz'i kkitij ne uk'aj wa chi kkitzaqsaj li alk'uwalxelab' chuxe' i mexa —xub'ij.

29Are uri i Jesús xub'ij che ixoq:

—Lik usuk' i xab'ij le, utz we kat-ek, i itzel tew elnaq chik che awalit —xcha che ixoq.

30I ixoq are xupon ru' ja, xuriq i ralit kotz'ol chwi ch'at, lik nti chik itzel tew che.

I Jesús xrutzirsaj jun tak chi xaq qas ti kel uch'awb'al

31I Jesús xel chik chila che i ulew Tiro, xik'aw pa tinimit Sidón xaq xik'aw pa jalajuj taq tinimit re i ulew Decápolis, xupon k'a chuchi' i semelik ya Galilea. 32Are uri xk'am b'i jun achi ru' chi lik tak, xaq to' kni'natik, are uri xkitz'onoj utzil che i Jesús chi kuya u'ab' puwi. 33I Jesús xresaj b'i achi le chkixol i winaq, are uri xeumin uwi u'ab' pa taq uxikin te'uri xukoj uk'axaj che uwi u'ab' xunak' pan che utzam ra'. 34Te'uri i Jesús xtzun an chikaj, xuk'is uk'ux xaq xub'ij: “¡Efata!” Chi ke'eloq, “¡Chatjaqtajoq!”

35Are uri juntir xejaqtaj uxikin i achi le chi tak te'eq, xaq utz chik ch'awik ku'ano man xyiji utzam ra'. 36I Jesús xub'ij chke i winaq chi mijun kkilap wi wach i xkilo, xwiri are keu'atij chub'ixkil, xane kkikowij kik'ux chulapik. 37Konojel i winaq lik xkib'isoj xaq xkib'ij: “Ronojel ni'pa ku'ano is utz”; “ku'an chke i je tak, chi ketanik; xaq i kel ti kich'ab'al, kech'aw rumal”; xecha.

Currently Selected:

Marcos 7: ACHICUB

Highlight

Copy