Marcos 16

Uwalijik i Jesús che i kamik chkixol i kamnaq

1Are xik'aw i ij sábado, i ati Mariy Magdalena, ati Mariy chi uchuch ma Santiago, i ati Salomé, xkilo' kunb'al muy re kb'ak che uch'akul i Jesús. 2Rumali lik we' che i nab'e ij re seman xe'e chila ipa xmuq wi i Jesús. 3I ixoqib' ketijin chub'ixkil chkiwach:

—¿Pachin nawi k-anaw utzil chqe chi kojuto chrelsaxik ab'aj chuchi' i jul? —Xecha.

4Xwiri, are xkitaqej, xkil pan i nim laj ab'aj chi kojtal kan chuchi' i jul, nti chik chila puk'ijib'al. 5Are xe'ok pa jul xkil jun k'ojol ala kul puwiqab'im; i u'u' naj raqan xaq lik saq. I ixoqib' le lik xkixij kib'. 6Xwiri i k'ojol ala le xub'ij chke:

—Mixij iwib', yix kitzukuj i Jesús aj Nazaret chi xripik xaq xtz'aw chwach i krus. Ire nti chik chi, walijnaq chub'ik; chiwila pe i k'ijib'al le ipa xya' wi kanoq. 7Jix, jib'ij chke utijoxelab' xaq jib'ij che ma Pedro, i Jesús nab'e ne kupon chiwach yix pa Galilea. Chila kiwil wi uwach pacha ub'im kan chiwe.

8Are uri ixoqib' pa'anem xe'el chila chuchi' ijul; man lik keb'arb'at rumal kixib'rikil. Xwiri lik mijun xkilap wi man lik kixim kib'.

I Jesús xuk'ut rib' che ati Mariy Magdalena

9 # 16.9 I k'isb'al taq versículo ri (9-20) kriqtaj ti chupam i ujer taq uwuj i Dios. Iri xu'on panoq te'uri xkiya ru'. Chrijil chik uwalijik i Jesús chkixol i kamnaq, che usaqirb'al re i nab'e ij che i seman, are uri nab'e xuk'ut rib' che i ati Mariy Magdalena, chi xelsax wuqub' itzel taq tew che rumal i Jesús. 10I ati Mariy Magdalena x-e la chub'ixkil chke i je terejnaq chrij i Jesús, are xupon ku', xeuriqa chi lik keb'isonik xaq ke'o'ik. 11Ike are xkita chi i Jesús k'aslik, chi xaq x-iltaj uwach lik xkikoj taj.

I Jesús xuk'ut rib' chke i keb' utijoxelab'

12Chrijil chik ile i Jesús junwi tan chik uk'utik rib' xu'an chke i keb' utijoxelab' are ketijin che i b'e enam ke pa taq es. 13Xaq i keb' le xe'e la chub'ixkil chke i jub'an chik tijoxelab', xwiri ike xaq xkikoj taj.

I taqanik chi xuya kan i Jesús chkiqul utijoxelab'

14Te'uri i Jesús xuk'ut chik rib' chke i julajuj taq utijoxelab', are ketijin ike chwa'im chi mexa. Are uri xeuyajo man nti ukub'ib'al kik'ux xaq lik je b'uy, man xekojon ti chke i xe'ilaw uwach chi walijnaq chik che i kamik. 15Are uri i Jesús xub'ij chke: Jix chub'ixkil i utz laj tzij k'ak' re i Dios chke i winaq chwach ronojel i jyub' ta'aj. 16Pachin jun kukojo xaq we kqajsax ya puwi, ktotaj ni uri. Xwiri pachin jun kukoj taj, lik kpe ni tojpen puwi. 17Konojel ni'pa kekojon che intzij ketiki ni chu'anik jalajuj nimaq taq il pacha iri: Pinb'i yin kkesaj ni itzel taq tew, xaq kech'aw ni pa k'ak' ch'ab'al; 18tupu kkichap ni kumatz, xaq we kkitu' ni jun b'iroxik chi o b'enen che lik nti kkik'ulmaj. Xaq keutzir ni iwab'ib' are kkiya ki'ab' pkiwi; xcha.

Relik b'i Jesús chikaj

19Chrijil chik ulapanik ku' utijoxelab', i Jesús xyak b'i chikaj, are uri xkub'i puwiqab'im i Dios. 20Are uri, i utijoxelab' i Jesús xe'e chub'ixkil i utz laj tzij re i Dios pa jalajuj taq tinimit. I Ajwal keuto chub'ixkil i utz laj tzij k'ak' re i Dios, ru' nimaq taq il. Amén qatzij.

Currently Selected:

Marcos 16: ACHICUB

Highlight

Copy