Marcos 15

I Jesús xk'am b'i chwach ma Pilato

1Are xsaqirik, xkimol kib' i kaj-atzil i rajpatan i Dios ku' unimaqil i tinimit, ku' i tijonelab' re ujer i atb'al tzij, xaq ku' i jutz'ob'aj unimaqil chi kki'at tzij pkitinimit aj Judío. Xkixim i Jesús, xkik'am b'i chila ipa ku'at wi tzij ma Pilato chi aj Roma xaq xkijach pu'ab'. 2Are uri ma Pilato xutz'onoj che i Jesús:

—¿Yet at Ajawinel ke aj Judío winaq?

I Jesús xula' uwach che:

—Are pacha i xab'ij le —keje ile xub'ij i Jesús che ma Pilato.

3Kumal i kaj-atzil i rajpatan i Dios chi lik k'i umak i Jesús xkitzukuj. 4Rumali i ma Pilato xukamulij chik utz'onoxik che i Jesús:

—¿B'uchak chi kala' ti uwach chke? Kata ti b'awa chi lik k'i amak ketijin chukojik.

5Xwiri i Jesús xula' ti uwach che; rumali ma Pilato lik xub'isoj.

I winaq lik xkib'ij chi i Jesús kkamsaxik

6Pa taq nima'ij Pascua i ma Pilato o pu'ab' kro'taj b'i jun chke ajprex, chrij pachike kirayijb'al i winaq chi ko'tax b'ik. 7O jun achi ma Barrabás ub'i, o chila prexil junam ku' i jub'an chik ajkamsanel, chi xkimol kib' chu'anik ch'oj chrij i atol tzij, xaq xki'an kamik. 8Are xeupon i winaq ru' ma Pilato xe'ok chub'ixkil che chi chu'ana pacha ax ku'an wi. 9I ma Pilato xub'ij chke:

—¿Kiwaj yix we kwo'taj b'i Ajawinel ke aj judío winaq?

10Man ma Pilato xril ub'e chi i kaj-atzil i rajpatan i Dios xkijach i Jesús pu'ab' ire xa rumal ktitat kipam che. 11Xwiri, i kaj-atzil i rajpatan i Dios xekitun i winaq chi chkitz'onoj chi are ma Barrabás ko'tax b'ik. 12Are uri ma Pilato xutz'onoj chke:

—¿Wach kiwaj yix kin-an che i jun chi Ajawinel ke aj judío kixcha yix che?

13Are uri konojel i winaq xesik'in chub'ixkil:

—¡Charipa xaq chatz'awa chwach i krus ru' klawux! —Xecha.

14I ma Pilato xub'ij chik chke:

—¿Wach umak u'anom?

I winaq le lik xesik'in chik chub'ixkil:

—¡Charipa xaq chatz'awa chwach i krus ru' klawux! —Xecha konojel.

15Xwiri ma Pilato kraj taj chi kpe koywal i winaq che rumali xro'taj b'i ma Barrabás. Te'uri xutaq uya'ik ulo'xik i Jesús, xaq xujach b'i pki'ab' i winaq man kkikamsaj chwach i krus.

16Te'uri i achiyab' chi je yij che i ch'oj xkik'am b'i Jesús chila che i nim laj ja ipa ku'at wi tzij i atol tzij; chila xkimol wi kichi' i jutz'ob'aj aj Roma chi je yij che i ch'oj. 17Xkikoj jun u'u' i Jesús kaqxar ktzunik, xaq xkikoj jun koron re k'ix che ujolom. 18Are uri xesik'in chub'ixkil i tziji:

—¡Chk'asi ni Ajawinel ke aj Judío! —Xecha.

19Xaq xkich'ay ujolom ru' jun che', xkichub'aj upalaj xaq xexuki chwach pacha taq kkikoj u'ij kki'an che kib'. 20Are xeutzin chuyo'yaxik, xkesaj i k'ul kaqxar chi xkikoj te'eq chrij, xkikoj chik i mer saqil u'u'. Te'uri xkik'am b'ik ripb'al re xaq tz'awb'al re chwach i krus.

Uripik xaq utz'awik i Jesús chwach i krus

21Are uri jun achi aj Cirene chi ma Simón ub'i, chi uqajaw ma Alejandro xaq ma Rufo, ire le k'unik re pa taq es, are ktijin rik'awik chila xkik'ulaj chwach, are uri xki'an pen che chi kutelej b'i krus chi utelem i Jesús.

22Xkik'am b'i Jesús che jun k'ijib'al chi Gólgota ub'i (chi ke'eloq: “K'ijib'al re ub'aqil ujolom kamnaq”). 23Are uri xkiya uwa'al uva muqb'am che, chi o kunb'al mirra#15.23 Mirra, kunb'al chi lik muy chi utz re koksax che jun ch'akulaj re jun kamnaq re k-on ti chu. Xaq sikirsab'al ch'akulaj chi o k'axk'olil che. ru'; xwiri i Jesús xraj taj. 24Te'uri xkiripo xaq xkitz'aw chwach i krus. I achiyab' chi je yij che i ch'oj xki'an sakinik chrij u'u' i Jesús, ilb'al re wach taq kkich'ak b'i chkijujunal.

25I or chi xkirip i Jesús chwach i krus, are i b'elejeb' or re usaqirb'al. 26Xkikoj jub'an tz'ib' puwi an i krus chi kub'ij wach rumal kkamsaxik; i tz'ib' keje iri kub'ij: “AJAWINEL ke aj judío winaq.” 27Xaq je o keb' ili'omab' xerip chwach i krus junam ru' i Jesús, jun puwiqab'im, xaq i jun chik pumoxim. 28#15.28 (Konojel ti wuj chi o utzij i Dios chupam chi lik mas qatzij re ujer kanoq, kriqtaj ti jun versículo ri.) Versículo 28: Keje ile xe'eloq pacha tz'ib'tal kan chupam uwuj i Dios, chi lik x-ajlax b'i junam ku' ajmak laj taq winaq.

29Konojel i winaq chi keik'aw chila lik kkib'ij utz ti laj taq tzij che i Jesús, xkisutsa kijolom, xaq xkib'ij che:

—Yet chi ab'im kawulijsaj i rachoch i Dios, xwiri churox ij kayak jun chik k'ak', 30¡Chato uri awib' xaq chatqaj li chwach i krus! —Xecha.

31Xaq i kaj-atzil i rajpatan i Dios junam ku' i tijonelab' re ujer atb'al tzij xkib'ij utz ti laj taq tzij che i Jesús; xaq xkib'ij chkiwach:

—Ire le xeuto i winaq xwiri ktiki ti chuto'ik rib' ire. 32We qatzij are i Cristo chi Ajawinel ke aj judío, chuqajsaj li rib' uri chwach i krus, man keje ile kqilo xaq kqakoj uri chi are ire Cristo —xecha.

Xaq i keb' ili'omab' chi je riptal chwach i krus xkiyo'ya pan i Jesús.

Ukamik i Jesús

33Are tik'il ij xpe jun nim laj equm chwach ronojel uwach i jyub' ta'aj, i equm le xk'is k'a che oxib' or re uqajb'al ij. 34Che i or le, are uri i Jesús lik xsik'in chub'ixkil i tziji: (“¡Eloi, Eloi! ¿Lama sabactani?” I usuk' i tzij le keje iri ke'eloq: “¡Wajwal Dios, Wajwal Dios! ¿B'uchak inawo'tam kanoq?”)

35I jujun winaq chi je o chila are xkita i tzij le, xkib'ij:

—Chita pe', ktijin chusik'ixik mam Elías chi profeta —xecha.

36Are uri jun chke x-e la pa'anem, xumu ch'aqap k'ul chupam i ch'am laj uwa'al uva muqb'am. Te'uri xuch'ap tzam tani, xuya an che i Jesús man kutz'ub'ub'ej; xub'ij:

—Chqoy-ej pe we qas lik kk'un mam Elías chuqajsaxik chwach i krus —xcha.

37Xwiri i Jesús ko xsik'inik, are uri xel uk'ux. 38Xaq i kortin chi o prachoch i Dios xraqch'ij pa nik'aj, xmajan li puwi, xk'is k'a chuxe'. 39I aj-atzil chke i achiyab' chi je yij che i ch'oj aj Roma, are xrilo chi xkam i Jesús, xub'ij:

—Lik saq laj tzij i winaq le lik Rak'al i Dios —xcha. 40Xaq je o oxib' ixoqib' chi ketaqen li chinaj; chi je are ati Mariy Magdalena, ati Salomé xaq ati Mariy chi uchuch ma Santiago chi cha'xel chi xaq uchuch ma José. 41I ixoqib' le je terejnaq chrij i Jesús xaq xkito are o te'eq pa Galilea. Xwi ti la ile, xaq o jub'an chik ixoqib' chi xe'e ru' i Jesús are x-e pa Jerusalén.

Umuqik i Jesús

42Are i ij re uyijb'axik kib', ke'eloq chuxe'el i ij sábado are ya xqaj ij, 43o jun achi chi ma José ub'i, aj pa tinimit Arimatea, ire le lik nim u'ij chkixol i je nimaq taq atol tzij; i ma José le xaq roy-em i ajawinik re i Dios rumali xukowij uk'ux, xok b'i ru' ma Pilato xutz'onoj uch'akul i Jesús che. 44I ma Pilato are xuta chi kamnaq chik i Jesús, lik xok il, rumali xutaq usik'ixik i aj-atzil chke i achiyab' chi je yij che i ch'oj aj Roma, man kutz'onoj che we qatzij kamnaq chik xaq wach taq onom or xkamik. 45Are xuta i ma Pilato wach xb'ix che rumal i aj-atzil chke i achiyab' chi je yij che i ch'oj, te'uri xuya b'i uch'akul i Jesús che ma José. 46Are uri ma José xulo' jun chom laj sawan re lino, xupasij uch'akul i Jesús chupam are xuqajsaj li chwach i krus. Te'uri xuya chupam jun jul chi worom chupam jun nim laj ab'aj; te'uri xutz'apij uchi' ru' jun ab'aj. 47I ati Mariy Magdalena xaq ati Mariy chi uchuch ma José, xkilo ipa xya' wi uch'akul i Jesús.

Currently Selected:

Marcos 15: ACHICUB

Highlight

Copy