Mateo 21

I Jesús kok pa tinimit Jerusalén

1Are naqaj chik je o wi pa Jerusalén, xeupon pa tinimit Betfagé, pa o wi i jyub' Olivos. Are uri i Jesús xeutaq b'i keb' utijoxelab', 2xub'ij chke:

—Jix che i komon le chi o pan chqawach. Chila kiriq wi jun ati axna yuqulik, o jun rak'al ru'. Chitoro loq, xaq cheik'ama loq. 3Xaq we o ktz'onow chiwe wach uchak kixtijin chutorik, chib'ij che chi kuriq uchak che i Ajwal, xaq ire juntir kutzalij chal chawe, chixchoq che —xub'ij Jesús chke.

4Keje xki'an ile, xaq xe'el uri pacha utz'ib'am kan jun profeta. Keje iri kub'ij:

5Chab'ij iri chke i aj tinimit Sion:

“I wajawinel yix ya kk'un iwu'.

Ire u'anom ti nim che rib', xa kul chrij jun b'uru kk'unik;

kk'unik kul chrij jun ral b'uru, rak'al jun ati axna aj-eqan”.

Keje ile utz'ib'am kan i profeta.

6I utijoxelab' i Jesús xe'ek xaq xki'an na, pacha i b'ital chke. 7Xkik'am li ati axna ru' i rak'al. Te'uri xkikoj ki'u' chkij; i Jesús x-an chrij. 8Je k'i i winaq je rachi'il pa b'e; ike xkirip i ki'u' chwach, wiqb'al re i pub'e. Xaq je o jujun xkich'up uxaq che' xaq xkikoj pa b'e. 9I winaq chi je nab'e chwach, xaq i je teren loq, konojel xe'ok chi sik':

—¡Nim u'ij Ire chi umuq uxikin i qajawinel mam David! ¡Dios chuya ni utz puwi i juni chi utaqom na loq! ¡Lik choksax ni u'ij i Dios! Keje ile xesik'in chub'ixkil.

10Are xok b'i Jesús pa Jerusalén, i winaq konojel xech'ujer na rumal i kikotemal. Je k'i xetz'onowik:

—¿Pachin i achi le? —Xecha.

11—Are i Jesús, chi profeta; ile aj Nazaret, ukwenta i Galilea —xkib'ij i winaq.

I Jesús xeresaj b'i ajk'ay prachoch i Dios

12Te'uri i Jesús xok prachoch i Dios; are uri xeresaj b'i konojel i ajk'ayinel xaq i ajlo'onel chi je o xe ja. Xeub'alk'atij b'i kimexa i je ajjalwachil uwach kipwaq i winaq, xaq keje i kitem i je ajk'ay palomax. 13Xub'ij chke:

—I Dios, chupam uwuj, ub'im kan i tziji: “I wachoch, lik jun ja re kitz'onb'al i winaq chwe”, xwiri yix i'anom kijul ili'omab' che —xub'ij i Jesús chke.

14Chila prachoch i Dios je o jujun mawach, xaq je o jujun je klis je o chila. Ike xetejeb' pan ru' i Jesús, are uri Ire xerutzirsaj. 15Xaq je o jujun ak'alab' je o chila chi kesik'in chub'ixkil: “¡Nim u'ij ire chi umuq uxikin i qajawinel mam David!” Xecha. I kaj-atzil i rajpatan i Dios, xaq i je tijonel re ujer atb'al tzij, are xkil i nimaq taq il chi xu'an i Jesús, xaq are xkita kitzij i ak'alab', ike lik xpe koywal. 16Are uri xkib'ij che i Jesús:

—¿Kata yet wach ketijin chub'ixkil? —Xecha.

—Qatzij kinta. Iwajlam ti b'ari uwach i uwuj i Dios, chi klapan pkiwi i ak'alab'. Chi keje iri kub'ij.

Yet a'anom chi ak'alab',

xaq a'anom chke i k'a ketz'umanik

chi lik kkib'ixaj ni a'ij; xcha.

17Are uri i Jesús xeukanaj kanoq te'uri x-e k'a Betania, keu'ana jun a'ab' chila.

I Jesús xuk'oqoj uche'lal higo chi nti uwach

18Are xsaqirik, xumaj chub'i ub'e, x-e pa Jerusalén. Are ktijin che i b'e, i Jesús xpe unumik. 19Xaqte'et xril jun che', uche'lal higo, o xukut b'e. Ire x-e pan ru' i che'; lik nti uwach xuriq che, xwi uxaq. Are uri i Jesús xub'ij jun k'oqb'al tzij che i che':

—¡Yet lik katwachin ti chik! —Xub'ij che.

Are uri i che' juntir xchaqijik. 20I utijoxelab', are xkil ile, lik xkib'isoj. Are uri xkitz'onoj che i Jesús:

—¿Wach xa'an che i che' le, chi juntir xchaqijik? —Xecha.

21I Jesús xub'ij chke:

—Qatzij i kinb'ij chiwe, we lik o ukub'ib'al ik'ux, xaq we k-on ti keb' ik'ux xaq yix kixtiki chu'anik pacha i xin-an yin che i che' le. Xaq xwi ta la ile, xaq kixtiki che, we kib'ij che i jyub'i, “chat-el chi, jak'aqa awib' pa mar”; kib'ij che, ile lik k-antaj na. 22Yix, wach i kitz'onoj che i Dios, we lik o ukub'ib'al ik'ux, kya' ni uri chiwe —xub'ij i Jesús chke.

Atb'al tzij chi o pu'ab' i Jesús

23Te'uri i Jesús xok chik prachoch i Dios xaq xok chkitijoxik chila. Are uri xetejeb' pan i kaj-atzil i rajpatan i Dios ru', xaq i nimaq taq winaq ke i aj Israel, xaq xkitz'onoj che:

—¿Pachin xyaw ile pa'ab' chi kattijin chu'ankil? ¿B'i chi atb'al tzijal o pa'ab', chi keje k-an ile? —Xecha.

24I Jesús xub'ij chke:

—Xaq keje Yin kin-an jun tz'onb'enik chiwe. We kib'ij usuk' chwe, te'uri xaq kinb'ij Yin chiwe b'i chi atb'al tzijal o pin-ab'. 25Chib'ij chwe pachin xyaw pu'ab' i ma Wan kuqajsaj ya pkiwi i winaq. ¿Are i Dios yawnaq che, o xa winaq yawnaq che? —Xcha i Jesús chke.

Ike xe'ok chub'ixkil chkiwach:

—¿Wach kqab'ij che? —Kecha—. We kqab'ij chi are i Dios yawnaq ni ile pu'ab' i ma Wan, Ire kub'ij ni uri chqe: “¿B'uchak uri xikoj taj wach i xub'ij?” 26We xaq kqab'ij chi xa ru' winaq petnaq wi wach i xub'ij i ma Wan, lik kqaxij qib' chke i winaq; man konojel i winaq kkib'ij chi ma Wan are jun profeta chi lik ru' i Dios petnaq wi wach i ub'im; xkib'ij chkiwach. 27Rumali xkib'ij che i Jesús:

—Qeta'am taj? —Xecha che.

—Xaq Yin kinb'ij ti uri chiwe wach i atb'al tzij o pin-ab' chi kin-an taq iri —xub'ij chke.

I tijojb'al tzij chkij keb' alk'uwalxelab'

28Te'uri i Jesús xutz'onoj chke:

—¿Wach kich'ob' yix che i tziji? O jun achi, je o keb' uk'ojol. I achi xub'ij che i jun: “Wak'al, jat wo'or pa chak chupam intikon.” Xcha. 29I rak'al xula' uwach che “kwaj taj”; xub'ij. Xwiri, xujalwachij uno'oj xaq x-e pa chak. 30Te'uri i kiqajaw xaq xu'ijla i jun chik, pacha xu'an che i nab'e. Ire xub'ij “kin-ek”; xcha, xwiri x-e taj.

31—¿Pachike chke i je keb' uk'ojol xu'ano pacha kraj i kiqajaw?

—Are i nab'e —xecha.

—Qatzij i xib'ij —xub'ij i Jesús chke—. Xaq kinb'ij ni Yin chiwe chi o i je utz ti laj taq ajtz'onol alkawal, xaq o ixoqib' chi xaqmanal kki'an ru' kich'akul ke'ok ni nab'e Pu'atb'al tzij i Dios aj Chikaj chiwach yix. 32I ma Wan Ajqajsanel Ya, xk'un chuk'utik chiwe chrij i suk'ul laj k'aslemal, xwiri xixkojon taj. I je ajtz'onol alkawal, xaq i ixoqib' chi xaqmanal kki'an ru' kich'akul, ike xkikojo. Tupu xiwil yix ile, xijalwachij ti i nojb'al, kojb'al re utzij —xub'ij i Jesús chke.

I tijojb'al tzij chkij i utz ti laj taq ajchakib'

33Te'uri xub'ij chke: —Chita chik jun tijojb'al tzij. O jun achi nim i rulew, utikom uva chwach. Te'uri xukoj koral chrij; xuyijb'a pa kkiyitz' wi uwa'al i uva, xaq xuyijb'a jun ral ja tak'tik chupam i tikon, chajb'al re ronojel. Te'uri xeukoj jujun ajchakib' je ajpamey ru'; ire x-e che jun tinimit naj. 34Are xuriq i ij re i molonik, xeutaq li umokom chutz'onoxik re ire chke i ajpamey. 35Are xeupon i mokom, xekichapo. I jun, xkich'ayo; i jun chik, xkikamsaj; i jun chik, xkikoj ab'aj che. 36Te'uri i rajaw tikon xeutaq chali jub'an chik umokom, mas je k'i chkiwach i nab'e. Are xeuponik, i je ajpamey xki'an chik chke pacha xki'an chke i xeupon nab'e.

37Pa k'isb'al re, xutaq li i saqil uk'ojol. Ire xuch'ob'o: “Ike lik kekojon ni che i wak'ali”; 38Xwiri, are xkil i uk'ojol i rajaw ulew, xkib'ij chkiwach: “Are ire le are i rajaw ulew k-on panoq; chqakamsaj; xecha, man keje ile yoj kojkanaj chwach ulewi”; xecha. 39Rumali xkichapo, xaq xkesaj li chwach ulew, xaq xkikamsaj. Keje i tijojb'al tzij ile xub'ij i Jesús chke.

40Te'uri xutz'onoj chke:

—B'ay, are kk'un ni rajaw i ulew le, ¿Wach ku'an ni ire chke i ajchakib' le? —Xub'ij.

41Ike xkila' uwach che:

—Ire lik keukamsaj ni je aj-anol utz taj le; lik kril ti tob'al kiwach. Te'uri kuya i rulew chke jub'an chik ajpamey, chi kkijach re ire che, are kuriq i ij re i molonik —xecha i nimaq taq winaq che i Jesús.

42Te'uri i Jesús xaq xub'ij chke:

—¿Xatab'a iwilom taj wach tz'ib'tal kan chupam uwuj i Dios? Keje iri kub'ij:

I ab'aj chi xkaj ti xkikoj i je aj-anol ja, are i ab'aj le

chi xe'eloq lik nim ni uchak che i kub'ib'al ja.

Are i xe'eloq le are i Ajwal Dios x-anawik,

rumali lik kojkikotik.

43Rumali, kinb'ij chiwe chi Dios kresaj ni uchak pi'ab' yix xaq kuya ni pki'ab' jub'an chik ajchakib' je utz, chi kkiya ni i molonik che i Dios pacha kmajawik. 44I ab'aj le chi xinb'ij chiwe, we o jun ketzaq puwi, xa kpaxik; xaq i ab'aj le, we ktzaq chrij jun winaq, lik ku'an ni k'ajk'aj —xcha i Jesús.

45I kaj-atzil i rajpatan i Dios, xaq i je aj fariseo, are xkita wach i tijojb'al tzij xb'ix chke, ya xketamaj chi xa are ike keulap na. 46Rumali kkaj ike kkichapo, xwiri xkixij kib' chke i uk'iyal winaq, man i winaq kkib'ij chi Jesús are jun profeta.

Currently Selected:

Mateo 21: ACHICUB

Highlight

Copy