Mateo 19

I Jesús kk'utun chrij ujachik kib' i je k'ulinaq

1Are xutzin chub'ixkil ronojel ile, i Jesús xel pa Galilea i x-e pa Judea. Chila xu'axuj i ya re i Jordán. 2Je k'i i winaq je teren chrij; chila xerutzirsaj wi k'iyal iwab'ib'.

3Are uri xeupon jub'an aj fariseo ru'; kkaj kkik'am upam, tzaqsab'al re kki'ano. I xkitz'onoj che:

—Jun achi, we kraj kujach kan i rixoqil, ¿Xab'i chi makil, utz nawi kujacho? Keje ile xkib'ij che i Jesús.

4Ire xula' uwach chke:

—¿Xatab'a iweta'am taj wach i tz'ib'tal kan chupam uwuj i Dios? Kub'ij chi i Dios chuxeb'al ij saq, are xeu'an i winaq, “xu'an jun achi xaq jun ixoq”. 5Xaq xub'ij i Dios: “Rumal uri chi jun achi o uchak kel ku' uqajaw uchuch man kkuk'aj kib' ru' i rixoqil. I je keb' le ke'eloq xa je jun chi winaq”. 6Rumali ke'eloq ne te keb' chik, ike xa je jun xe'eloq. Rumali i winaq, nti pki'ab' kkiyoj ile chi uyijb'am i Dios, xa jun u'anom chke. Keje ile xub'ij i Jesús.

7Te'uri xkitz'onoj chik che i Jesús:

—¿B'uchak uri xub'ij i mam Moisés chke i achiyab' chi o uchak kkiya jun wuj chke i kixoqil, jachb'al ke? Te'uri kkijach b'ik. Xkib'ij.

8Ire xula' uwach chke:

—Keje xuya i mam Moisés ile chiwe man yix lik ix b'uy. Rumali chi xuya chiwe kijach ni iwixoqil. Xwiri, chuxeb'al ij saq, keje ti ile uch'ob'om li Dios. 9Kinb'ij iri chiwe: We o jun kujach b'i i rixoqil, xwiri we i rixoqil nti umak u'anom ru' jun chik achi, i rachijil te'eq o umak uri chwach i Dios man kumin rib' ru' jun chik ixoq chi k'ulinaq ti ru'.

10Te'uri i utijoxelab' xkib'ij che:

—We keje ke'el ile, jun achi ru' jun ixoq, mas utz uri we kutzukuj ti rixoqil —xecha.

11I Jesús xub'ij chke:

Xwiri konojel taj kkita ub'e ile, xwi kkita ub'e i jub'an chi o ucho'ab' i Dios ku'. 12O k'iyal taq usuk' chi o jujun achiyab' kek'uli taj: O jub'an chik chi tz'aqat ti kich'akul chkalaxik; xaq o jub'an chik chi tz'aqat ti kich'akul man xaril antal chke; xaq o jub'an chik kkitzukuj ti kixoqil rumal uchak i Dios, chi chak re U'atb'al tzij i Dios aj Chikaj. We o jun ktiki chutayik ub'e ile, chu'ana na —xub'ij.

I Jesús kuya utzil chomal pkiwi ak'alab'

13Je o jujun winaq xekik'am li ak'alab' ru' i Jesús, kuyab'ej ni re u'ab' pkiwi, xaq kutz'onb'ej i utz re i Dios pkiwi. Xwiri, i utijoxelab' xkijeq ki'atixik i je ok'awnaq ak'alab'. 14I Jesús, are xrilo, xub'ij chke:

—Chiya chke i ak'alab' kek'un wu'; mi'atij, man ni'pa i je pacha ak'alab' pkik'ux o ke che U'atb'al tzij i Dios aj Chikaj —xub'ij chke utijoxelab'.

15Are uri xuya u'ab' pkiwi i ak'alab'; te'uri xel chila.

Jun k'ojol ala b'eyom klapan ru' i Jesús

16O jun achi, k'a ala, xupon ru' i Jesús xaq xub'ij che:

—Nim laj winaq, at utz laj Tijonel, ¿Wach taq i utz kin-an na, kinriqb'ej re ink'aslemal chi nti uk'isik? —Xub'ij.

17I Jesús xub'ij che:

—¿B'uchak kab'ij “utz” chwe Yin? Nti jun utz, xwi i Dios —xub'ij che—. Xwiri we kawaj katok che i saqil k'aslemal, cha'ana pacha kub'ij utzij upixab' i Dios —xub'ij che.

18—¿Pachike che? —Xutz'onoj i achi.

I Jesús xub'ij che:

—Matkamsanik; mamin awib' ru' jun chi at k'ulinaq ti ru'; matel-anik; manuk' tzij chrij jun chik; 19chakojo ki'ij aqajaw achuch; xaq k'ax chana alok'anij pacha k'ax una'ik awib' yet —xub'ij i Jesús che.

20Ronojel ile is kintijin chu'anik; in-anom na loq k'a are in ch'utin —xub'ij i achi che—. ¿Wach k'a kraj kin-ano? —Xub'ij.

21I Jesús xub'ij che:

—We kawaj chi lik nti chik rajwaxik chawe chwach i Dios, jat, chak'ayij ni'pa o awu', xaq chajacha chke i nib'a'ib'. Kariq uri ab'eyomal chikaj. Te'uri chatpetoq xaq chatterej chwij —xub'ij i Jesús che.

22I achi, are xuta ile, lik xb'isonik, man lik b'eyom; xumaj b'i ub'e, i x-ek.

23Are uri i Jesús xub'ij chke i utijoxelab':

—Qatzij i kinb'ij chiwe: I b'eyomab', k'ax kokik Pu'atb'al tzij i Dios aj Chikaj. 24Kinkamulij chik ub'ixkil chiwe: K'ax rokik jun b'eyom pa ajawinik re i Dios; k'ax ni ile chwach rik'awik jun kamey che i tel re jun akuxa —xub'ij chke.

25I utijoxelab', are xkita ile, lik xkib'isoj. Te'uri xe'ok chub'ixkil chkiwach:

—¿Pachin uri kkuytaj umak? —Xecha.

26I Jesús xeutaqej i xub'ij chke:

—I winaq ketiki ti chu'anik ile; xwiri i Dios ronojel is ktiki che —xcha.

27Are uri i ma Pedro xub'ij che:

—Qajwal, yoj, ronojel ni'pa i o qu', xqakanaj kanoq xaq oj terejnaq chawij. ¿Wach kya' chqe ut? —Xub'ij.

28I Jesús xub'ij chke:

—Qatzij i kinb'ij chiwe, are kuriq i ij chi kjaltaj ronojel ni'pa o chwach i jyub' ta'aj, are o chik i pacha Winaq chi Xolalaxoq chwach Ulew, kkub'i pukub'ib'al chi o u'ij, xaq yix chi ix terejnaq chwij xaq kya' i patan nim u'ij. Yix uri ki'at ni tzij pkiwi i je kab'lajuj tzob'aj aj Israel winaq. 29Konojel ni'pa i ko'tam kan ub'itaq ke wumal Yin, nim ni kkich'ak puwi ile. We o jun ukanam kan rachoch, o we ratz ucha', o we ranab', o we uchuch uqajaw, o we ukanam kan rixoqil, o we rak'al, o we rulew xa wumal Yin, nim i kuch'ak na. Kya' ni uri jo'winaq (100) che puwi ni'pa ile chi xa jun o te'eq ru', xaq kya' jun uk'aslemal chi nti uk'isik. 30Xwiri, ni'pa i je nab'e wo'or, je k'i na kekanaj kan pa k'isb'al re; xaq je k'i chi je o kan pa k'isb'al re wo'or, are ike kenab'ej na —xub'ij i Jesús chke.

Currently Selected:

Mateo 19: ACHICUB

Highlight

Copy