Mateo 18
18
¿Pachin nawi i mas nim u'ij?
1Are uri xetejeb' pan utijoxelab' i Jesús ru', i xkitz'onoj che:
—Pu'atb'al tzij i Dios aj Chikaj, ¿Pachin nawi nim u'ij ke'eloq? —Xkib'ij che.
2Are uri i Jesús xusik'ij jun ak'al ru', i xuya chkiwach. 3Xub'ij chke:
—Qatzij i kinb'ij chiwe: Yix, we kijalwachij ti inojb'al, we ki'an ti che iwib' pacha uno'oj jun ak'al, kixok ti uri Pu'atb'al tzij i Dios aj Chikaj. 4I jun chi nim u'ij pa ajawinik re i Dios, are i jun chi ku'an ch'utin che uk'ux pacha i ak'ali, are ire uri mas nim u'ij Pu'atb'al tzij i Dios aj Chikaj. 5We o jun kuk'ulaj jun ak'al ru' pinb'i, ke'el uri chi Yin kinuk'ulaj puk'ux.
I xib'rikil re tzaqik pa mak atzalal
6Jun ch'utin chi ukub'am uk'ux chwe, we o jun ku'an che chi ktzaq chupam umak, nim laj mak uri u'anom i jun le. Mas utz ke'el che, wetene kxim jun nim laj ka' rij uqul xaq kk'aq b'i pa ya ji'sab'al re. 7¡To' kiwach i winaq waral chwach i jyub' ta'aj, man lik o ni tzaqsab'al ke! Lik o na; xwiri ¡To' uwach i jun chi kutzaqsaj jun chik chupam umak!
8We are a'ab', we are awaqan k-anaw chawe katmakunik, su' chak'upij b'ik xaq chak'aqa b'i naj. Man keje ile kariqb'ej re ak'aslemal, tupu xa jun a'ab', xaq xa jun awaqan. Chwach we keb' a'ab', keb' awaqan we xa kat-e pa a' chi ktoqow ronojel ij saq. 9Xaq we are ab'a'wach k-anaw chawe katmakunik, su' chawesaj i chak'aqa b'i naj. Man keje ile, kariqb'ej re ak'aslemal tupu xa jun ab'a'wach. Chwach we keb' ab'a'wach xwiri xa kat-e pa a' chi ktoqow ronojel ij saq.
I tijojb'al tzij chrij i chij sachnaq
10Jun ch'utin pacha iri, yix miqajsaj u'ij. Kinb'ij uri chiwe, i ángel aj chikaj chi je chajal ke, lik arewi je o chwach Inqajaw chikaj. 11Yin, chi xinalaxoq chwach ulew pacha winaq, in k'unnaq chikito'ik ni'pa i je sachnaq.#18.11 Konojel ti wuj chi o utzij i Dios chupam chi lik mas qatzij re ujer kanoq, kriqtaj ti jun versículo ri.
12¿Wach ku'an jun achi, kib'ij yix, we je o jo'winaq (100) uchij, we xsach jun chke? ¿Wach ku'an ni ire uri? ¿Xatab'a keukanaj ti kan i b'elejlajuj kajwinaq (99) che i jyub' ipa i kewa wi, man k-e chutzukuxik i jun chi sachnaq kanoq? Lik kutzukuj na. 13I we xuriqo, mas kkikot ni ru' i jun le chwach i b'elejlajuj kajwinaq (99) chi xesach taj. 14Xaq keje ku'an Iqajaw yix chi o chikaj. Kraj Ire chi mijun ch'utin pacha iri ksachik.
Wach ukuyik umak i awachalal
15We o jun awachalal chwach i Cristo u'anom i utz taj chawe, cha'ijla uri are utukel; keje ile chasaqij che wach umak chawe. Ire, we xuta ub'e wach i xab'ij che, kixkanaj chik kan uri iwachalal iwib' chwach i Cristo. 16Ire, we kukoj ti retalil wach i kab'ij che, te'uri chasik'ij ni jun o keb' chik. Keje ile i je keb' oxib' kkita wach ukojik umak ka'ano. 17We xaq kukoj ti retalil chke ike, chab'ij uri pa molb'al ib'. We xaq kukoj ti retalil chke pa molb'al ib', chi'ana uri che pacha lik nti Dios ru', o pacha jun utz ti laj ajtz'onol alkawal ke aj Roma.
18Qatzij i kinb'ij chiwe: Yix we kikuy ti imak chiwach chi chwach i jyub' ta'aj, xaq kkuytaj ti uri imak chila chikaj, xwiri we yix kikuy imak chi chwach i jyub' ta'aj, xaq kkuytaj ni uri imak chila chikaj.
19Xaq kinb'ij chiwe: We je o keb' chixol yix waral chwach i jyub' ta'aj lik xaqjun i kinojb'al are kkitz'onoj che i Dios, Inqajaw chila chikaj kuya ni chke wach i kkitz'onoj. 20Keje ile ku'ano, man pa je o wi je keb' je oxib' kimolom ni kib' wumal Yin, xaq Yin in o ni ku' ike —xub'ij chke utijoxelab'.
21Te'uri i ma Pedro xtejeb' ru' i Jesús i xub'ij che:
—Wajwal, ¿Ni'pa mul kinkuy ni umak i wachalal chwach i Cristo we makunnaq chwij? ¿K'a wuqmul kinkuy na? —Xub'ij
22I Jesús xub'ij:
—Xwi ti wuqmul kakuyu. We akuyum wuqmul, chakuyu chik lajuj oxwinaq (70) mul i wuqub' le —xub'ij.
I tijojb'al tzij chrij i nim upatan chi xukuy ti umak i jun chik
23Rumali U'atb'al tzij i Dios aj Chikaj keje pacha xu'an jun ajawinel; xeusik'ij umokom ru' xaq xub'ij chke chi kkitoj ni kik'as che. 24Are xujeq u'ankil ile, xkik'am li jun chwach chi o uk'iyal lajujwinaq kamo' (1,000) uk'as u'anom ru'. 25I jun le lik nti keuk'ama wi, tojb'al re uk'as chi u'anom. Rumali, i ajawinel xub'ij chi kk'ayix na, junam ru' i rixoqil, xaq i rak'al, xaq ronojel i ub'itaq re, tojb'al re uk'as. 26Te'uri i rajtaqon le xxuki chwach ajawinel xaq xutz'onoj utzil che: —Nim laj winaq, chaya unimal ak'ux chwe; kok'ilal kintoj ni ronojel ink'as chawe —xub'ij. 27Are uri i ajawinel xril tob'al uwach, xaq xuchup uk'as; te'uri xro'taj b'ik.
28Ire x-ek; are uri xuk'ulaj jun rach ajchak. I rach ajchak le, o jub'i' uk'as ru'; are uri xuchapo, xok chuchapik puqul, xaq xub'ij che: —¡Chatojo chwe ni'pa ak'as wu'! —Xub'ij. 29I rach ajchak xxuki chwach xaq xutz'onoj utzil che: —Chaya unimal ak'ux chwe; kok'ilal kintoj ni ronojel ink'as chawe —xub'ij. 30I jun xraj taj; su' xuchapo xaq xutz'apij prexil. Chila xuya wi k'a kutoj ni uk'as che. 31Xaq je o jub'an kach ajchakib' xkilo wach xu'an i jun che i kachi'il. Ike lik k'ax xkina'o wach i x-ani che. Rumali, xe'e kib'ij che i kajawinel wach umak i jun xu'ano. 32I kajawinel xutaq usik'ixik, xaq xub'ij che: “¡Lik at utz ti laj winaq! Yin xinb'ij ni chawe chi ni'pa i ak'as wu', is xinkuy ni chawe, man lik xatz'onoj utzil chwe. 33Rumali, o chaqul yet keje cha'ana ni ile, chakuyu ni umak i jun we o uk'as awu'. O uchak chawila tob'al uwach, pacha xin-an yin chawe yet, xwil tob'al awach.” Keje ile xub'ij i ajawinel che. 34Lik xpe roywal che. Rumali, xutaq utz'apixik prexil xaq lik k-ani k'ax che k'a kutoj ni ronojel uk'as. Keje i tijojb'al tzij ile xub'ij i Jesús chke.
35Pa k'isb'al re xub'ij chke:
—Xaq keje k-an ni chiwe yix rumal Inqajaw aj chikaj, we yix chijujunal kikuy ti kimak i iwachalal ru' ronojel ik'ux —xub'ij i Jesús chke.
Currently Selected:
Mateo 18: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
