Mateo 16

I aj fariseo xaq i aj Saduceo kkaj rilik jun nim laj il

1O jujun aj fariseo winaq kuk'am kib' ku' jub'an aj Saduceo xeupon ru' i Jesús. Kkaj ike kkik'am upam i Jesús, rumali xkib'ij che chi kuk'ut jun nim laj il chke, k'utb'al re chi Dios o ru'.

2Ire xula' uwach chke: —Yix lik iweta'am usuk' uwach i kaj, wach i ku'ano. Are kqaj i ij, we kaq uwakaj, kib'ij yix: “Chweq, chom laj ij, man kaq i uwakaj”; kixcha. 3Xaq we o jun usaqirb'al, i uwakaj lik kaq, xaq eqmuj, kib'ij yix uri: “Kpe i jab' wo'or man i uwakaj xa kaq xaq eqmuj”; kixcha. Yix lik kiwil ni ub'e i uwakaj, wach i ku'ano; xwiri, kiwil ti ub'e wach ktijin i Dios chu'ankil che taq i ij le. 4I winaq wo'or, lik ne te utz, lik kkikoj ti chik i Dios. Man k-an ni jun nim laj il chiwach, k'utb'al re ucho'ab' i Dios wu'. Xwiri, nti jun nim laj anik k-an ni chiwach, xwi pacha i x-an che i ma Jonás ujer —Keje ile xub'ij i Jesús chke.

Are uri xeukanaj kanoq i x-ek.

I kik'utunik i aj fariseo

5Te'uri i Jesús junam ku' utijoxelab', xe'ax chik ch'aqa semelik ya. Xwiri, xsach chkik'ux nti kiwa xkik'am b'ik. 6Are uri i Jesús xub'ij chke:

—Chita pe', chi'ana kwent che i kunb'al re i wa re trigo, ke aj fariseo xaq i aj Saduceo; keje ile xub'ij chke.

7I utijoxelab' xkita ti ub'e; rumali xe'ok chub'ixkil chkiwach:

—Xub'ij ire ile man yoj nti qawa re trigo qak'amom loq —xecha.

8I Jesús xunab'ej wach kkib'ij.

—¿Rumali xub'ij chke, b'uchak kib'ij ile chi nti qawa re trigo? —Xcha chke. ¡Yix nti qas ukub'ib'al ik'ux che i Dios! 9¿K'amaja kita ub'e uri? ¿Kk'un ti b'ari chik'ux chi Yin, che i jo'ob' wa re trigo xeintzuq ni lajujwinaq kab'lajujmo' (5,000) achiyab'? ¿I kk'un ti b'ari chik'ux ni'pa chikach xk'is taj? 10¿Xaq kk'un ti chik chik'ux chi Yin, che i wuqub' wa re trigo xeintzuq ni lajujmo' (4,000) achiyab'? ¿I ni'pa uri chikach ximolo? 11¿B'uchak uri kita ti ub'e chi are ti rumal i wa re trigo xinb'ij Yin ile? ¡Chi'ana kwent che i kunb'al re i wa re trigo ke i aj fariseo xaq i aj Saduceo! —Xub'ij chke.

12Te'uri utijoxelab' xkita ub'e chi Ire are ti kub'ij i kunb'al re i wa re trigo. Are i usuk' i xub'ij, are chki'ana kwent che i kik'utunik i aj fariseo xaq i aj Saduceo.

Ma Pedro xusaqij chi Jesús are i Cristo

13I Jesús, are xeupon pa jyub' Cesarea re i Filipo, xutz'onoj chke utijoxelab':

—¿Wach kkib'ij i winaq chwij chi in pachin Yin, chi Xinalaxoq chwach Ulew pacha Winaq? —Xub'ij.

14I utijoxelab' xkib'ij:

—O jujun kkib'ij chi Yet at are i etz ma Wan Ajqajsanel Ya. Xaq o jujun kkib'ij chi Yet at are i mam Elías; xaq o jujun kkib'ij chi at are i mam Jeremías, o moq xa at jun chke i profeta.

Keje ile xkib'ij i tijoxelab' che i Jesús.

15Are uri Ire xub'ij chke:

—I yix, ¿Wach kib'ij in pachin Yin? —Xcha.

16I ma Simón Pedro xub'ij:

—Yet at Cristo, at Uk'ojol i Dios k'aslik —xcha.

17Are uri i Jesús xub'ij che:

—¡Utz awe yet! Ma Simón chi at uk'ojol ma Jonás. Man i tzij le chi xab'ij ru' ti winaq petnaq wi; lik ru' Inqajaw chikaj petnaq wi. 18Rumali, kinb'ij chawe: Yet at a Pedro, i usuk' i ab'i le, ke'eloq “ab'aj”; puwi i ab'aj le kinyak ni wachoch. Ni'pa i je jutzob'aj re i Dios, lik ksachsax ti kiwach; mitene ucho'ab' i kamik ktiki ti che. 19Yin kinya i lawe chawe chi jaqb'al re i okb'al Pu'atb'al tzij i Dios aj Chikaj. Yix we kikuy ti imak chiwach chi chwach i jyub' ta'aj, xaq kkuytaj ti uri imak chila chikaj, xwiri we yix kikuy imak chi chwach i jyub' ta'aj, xaq kkuytaj ni uri imak chila chikaj —xub'ij che i ma Pedro.

20Te'uri xub'ij chke utijoxelab' chi lik mijun kilap wi we are Ire Cristo chi koy-em.

I Jesús xub'ij chi kkamsax na

21Te'uri i Jesús xok chub'ixkil chke utijoxelab' chi o uchak k-e Ire pa Jerusalén, xwiri i nimaq taq winaq chila, junam ku' i kaj-atzil i rajpatan i Dios, xaq i je tijonel re i ujer atb'al tzij, lik kintij ni uyej kumal. Xaq xub'ij chke chi kkamsax na, xwiri kwalij chik churox ij. 22Are uri i ma Pedro xusik'ij b'i i Jesús ru', utukel xaq xub'ij che:

—¡Ay, qajwal! ¡Mab'ij ile! I Dios chu'atij ni xab'ij le —xcha.

23Are uri i Jesús xupiskilij rib'; xub'ij che i ma Pedro:

—¡Chat-el ni chinwach, Satanás, ma'an latz' pinb'e! Anojb'al yet keje taj pacha uch'ob'onik i Dios. Ach'ob'onik yet xa keje pacha kkich'ob' i to' winaq —xcha i Jesús che.

24Te'uri i Jesús xub'ij chke utijoxelab':

—Pachin jun kraj kterej chwij, o uchak uri much'ob' chik rib', xwiri chterej ni chwij, tupu kkam ni rumal ile. 25We o jun xa k'ax kuna uk'aslemal re i uwach i jyub' ta'aj xa ksach uri uk'aslemal saqil. Xwiri, we o jun chi ksachsax uwach uk'aslemal chwach i jyub' ta'aj wumal Yin, kya' ni uri uk'aslemal saqil. 26Jun, ¿We kuch'ak ronojel i b'eyomal re uwach i jyub' ta'aj, xwiri we xa kusach uk'aslemal saqil? Lik nti uch'akom uri. ¿Wach utojik uri ku'an na, ch'akb'al re uk'aslemal saqil, we usachom? 27Man Yin, chi Xinalaxoq chwach Ulew pacha Winaq, kink'un ni ru' u'ij uchomal Inqajaw, xaq ku' in-ángel. Are uri, kinya ni chke i winaq chkijujunal chrij pacha i kmajaw chke. 28Saq laj tzij kinb'ij chiwe, je o jujun waral chi kekam ti tan, k'a kinkil na are kolin-ana ni in-atb'al tzij waral —xub'ij i Jesús chke.

Currently Selected:

Mateo 16: ACHICUB

Highlight

Copy