Mateo 15

I k-anaw ch'am taj che i winaq

1Te'uri o jujun chke i aj fariseo winaq xeupon ru' i Jesús, xaq jub'an tijonel re ujer atb'al tzij. Ike je petnaq k'a pa tinimit Jerusalén. Are uri xkitz'onoj che i Jesús:

2—I atijoxelab' yet, ¿B'uchak kki'an ti k'utunik chi kik'utum kan i qatit qamam? ¿B'uchak kkikoj ti retalil che i ujer atb'al tzij re uch'ajik ki'ab' are kkitij kiwa? —Xecha che.

3Are uri i Jesús xutz'onoj chke:

—Yix ut, ¿B'uchak xa kixterej chrij i to' k'utunik? ¿B'uchak ikojom ti retalil i saq laj tzij re utzij upixab' i Dios? Lik xa ikanam kanoq rumal ik'utunik yix. 4Man i Dios xub'ij: “Chakojo ki'ij aqajaw achuch”, xaq xub'ij chik: “Pachin k'ax kch'aw chkij uqajaw uchuch, lik chkamsaxoq.” Keje ile xub'ij i Dios. 5Xwiri, yix kisaqij ub'ixkil chi jun achi kub'ij che uqajaw uchuch: “Katinto taj”; kub'ij che, “man ni'pa i o wu' is insujum chik che i Dios”; kub'ij. 6Xapachin jun kub'ij ile, nti chik chuqul uri keuto uqajaw uchuch, kixcha. Ke'el ut chi iqajsam u'ij utzij upixab' i Dios; xa kixterej chrij ik'utunik yix. 7¡Yix, xa keb' ipalaj! Lik qatzij wach utz'ib'am kan i profeta, mam Isaías. Lik keje iri utz'ib'am kanoq:

8“I winaqi lik kkikoj in-ij ru' kichi',

xwiri i kik'ux lik naj o wi chwe.

9I ukojik in-ij kki'ano, lik nti kuchakuj,

man i k'utunik kki'ano, xa kitaqanik i winaq.

Keje ile ub'im i Dios”. Xub'ij i Jesús chke.

10Te'uri xeusik'ij i winaq ru' i xub'ij chke:

—Chita pe' xaq chimaja usuk' iri: 11Are ti wach kok puchi' k-anaw che chi ch'am taj, xa are i tzij chi kel li puchi'; are k-anaw uri che chi ch'am taj —xcha i Jesús chke.

12Te'uri i utijoxelab' i Jesús xetejeb' pan ru', i xkitz'onoj che:

—¿Xawil Yet chi xpe koywal i aj fariseo che i tzij le? —Xecha che.

13Are uri i Jesús xula' uwach chke:

—Ni'pa i tikon chi utikom ti Inqajaw chikaj, lik kemich' nu b'i ru' i ra'. 14Mikoj retalil chke ike; man xa je mawach, xa je ajk'amol b'e chke jub'an chik mawach. Jun mawach, we kuk'am b'i jun rach mawach, junam uri ke'etzaq pa siwan —xub'ij i Jesús chke.

15Te'uri i ma Pedro xub'ij che:

—Chasaqij ni tijojb'al tzij le chqe, chi xab'ij —xcha.

16Are uri i Jesús xula' uwach chke:

—Yix, ¿K'amaja b'ari kita ub'e wach i kinb'ij? 17Kita ti b'ari ub'e ile, chi wach taq kok puchi' jun winaq ile k-e che upam; xa kik'awik xaq kel tan chik. 18Xwiri, wach i kel puchi', puk'ux uri petnaq wi. Are ile k-anaw chke i winaq chi ne te ch'am. 19Man pkik'ux i winaq kpe wi ronojel i utz taj. Are rumal uri o i kamsanik, xaq o i je k'ulanik kkimin kib' ru' jun chik; xaq o i winaq chi ne te k'ulanik kki'an i urayijb'al kich'akul; xaq i je ili'omab', xaq ajt'oronelab', xaq keje i je ajnuk'ul tzij chrij i Dios. 20Are i ni'pa ile are k-anaw chke i winaq chi ne te ch'am. Xwiri we jun kuch'aj ti u'ab' are kutij uwa, ile are ti k-anaw che chi ch'am ti puk'ux. Keje xub'ij i Jesús ile chke.

Ukub'ib'al uk'ux jun ixoq chi aj Judío taj

21I Jesús xel b'i chila, x-e che i keb' jyub', Tiro xaq Sidón. 22Chila jeqel wi jun ixoq chi aj Israel taj; ire xk'un ru' i Jesús xaq ko xub'ij:

—¡Nim laj winaq! ¡Yet chi at umuq uxikin kan i mam David! ¡Chawila tob'al inwach! Jun walit lik o itzel tew che, lik kutij uyej rumal —xcha.

23I Jesús xula' ti uwach che. Are uri i utijoxelab' xetejeb' pan ru' xaq lik xkitz'onoj utzil che:

—Chataqa b'i ixoq le, man to' ksik'inik teren li chqij —xecha. 24I Jesús xub'ij i tziji:

—I Dios in utaqom loq xwi chke i tinimit aj Israel chi pacha chij je sachnaq —xcha.

25Xwiri i ixoq xtejeb' pan ru' xaq xxuki chwach xaq xub'ij

—Nim laj winaq, ¡Chinato! —Xcha.

26I Jesús xula' uwach che:

—Utz taj kmaji ni kiwa i ak'alab' we xa kya' chke i tz'i —xub'ij.

27—Qatzij ile, Nim laj winaq —xub'ij i ixoq—, xwiri, xaq i tz'i kkimol ni uk'aj i wa chi ktzaq chuxe' i mexa re i kajaw —xub'ij.

28Are uri i Jesús xub'ij che:

—Ixoq, ¡Lik nim ukub'ib'al ak'ux! Ch-antaj na pacha i kawaj.

Are xub'ij i Jesús ile, juntir xutzir i ralit i ixoq.

I Jesús kerutzirsaj k'iyal taq iwab'ib'

29I Jesús xel chila x-e k'a chuchi' i semelik ya Galilea. Te'uri xel b'i puwi jun jyub' xaq xkub'i chila. 30Lik je k'i i winaq xeupon ru'. Xkik'am b'i i je jetz', je klis, je mawach, je mem, xaq jub'an chik iwab'ib' lik je k'i. Ni'pa i xekiya chwach i Jesús, konojel xerutzirsaj. 31Rumali, i winaq lik xkib'isoj man i mem xech'aw na, xaq i je klis xeutzir na; xaq i je jetz' xeb'inik, xaq i mawach xetzun na. Is xe'ok chukojik u'ij i Dios chi ki-Dios i aj Israel.

I Jesús xeutzuq lajujmo' (4,000) winaq

32Are uri i Jesús xeusik'ij i utijoxelab' ru', xaq xub'ij chke:

—To' kiwach i winaqi, man are oxib' ij iri chi je o chi wu'; nti chik wach kkitijo. Kwaj ti keintaq b'i chi kachoch we nti wa kkitij b'ik, man moqxa ketzaq pa taq b'e rumal kinumik —xcha chke.

33I utijoxelab' xkib'ij che:

—¿Pa koj-e wi chuk'amik i wa waral tzuqb'al ke uk'iyal winaqi? Lik nti jun jeqel waral che i k'ijib'ali —Xecha.

34I Jesús xutz'onoj chke:

—¿Ni'pa i wa re trigo o iwu'?

—Wuqub', —ru' keb' oxib' ral taq kar xecha.

35Te'uri i Jesús xub'ij chke i winaq chi chekub'i chwach ulew. 36Ire xuchap i wuqub' wa re trigo, xaq i kar. Xutioxij che i Dios, xupiro xaq xuya chke utijoxelab'. Ike xkijach b'i chke i winaq. 37Konojel is xkitijo xaq lik xenojik. Are xkelej wa'im, utijoxelab' xkimol ronojel i ch'aqa taq chi xk'is taj; xnoj wuqub' chikach che. 38I uk'iyal winaq chi xetzuqik, xwi achiyab' o lajujmo' (4,000) chke, y mas puwi ile je o i ixoqib' xaq i ak'alab'. 39Are uri i Jesús xeu'ijla b'i i winaq, xok pa barco, xaq x-e che i ulew Magdala.

Currently Selected:

Mateo 15: ACHICUB

Highlight

Copy