Lucas 21

Usipon jun ixoq malkan xaq nib'a'

1I Jesús are o prachoch i Dios xeril i b'eyomab' chi ketijin chuya'ik kipwaq pa taq kaxa re i sipon. 2Xaq xril jun ixoq malkan lik nib'a', ire xa keb' upwaq xuya'o chi nti qas u'ij 3Te'uri i Jesús xub'ij chke utijoxelab':

—Qatzij i kinb'ij chiwe, chi ixoqi malkan xaq nib'a', xwiri i upwaq chi xuya'o, mas k'i uya'om chkiwach konojel. 4Man konojel kkiya i sipon chi xk'is ti ku'; xwiri i ixoq le chi lik nib'a', ronojel xuya'o ni'pa i o ru'; nti chik xukanaj re uk'aslemal.

I Jesús xutzijoj chi rachoch i Dios kwulijsax na

5O jub'an winaq ketijin chulapik i rachoch i Dios chi lik chomiq taq ab'aj o che, xaq lik chom i wiqb'al re chi kisipam i winaq chwach i Dios. Are uri i Jesús xub'ij chke:

6—Ni'pa iri chi kixtijin chutaqexik, kuriq ni jun ij chi kwulij na. Mijun ab'aj kkanaj chik puwi jun chik.

Jalajuj taq k'utb'al chuxe'el i k'isb'al ij

7Te'uri xkitz'onoj che:

—Tijonel, ¿Junpa k-ani ile chi xab'ij? ¿Wach i retalil kqil na are lik ya kpetik? —Xecha.

8I Jesús xula' uwach chke:

—Chi'ana kwent iwib', miya iwib' kixt'orik. Man je k'i kek'un na xaq keje iri kkib'ij: “Yin in Cristo”; kecha, xaq “Ya kpe uri k'isb'al ij”. Xwiri yix mixkojon chke. 9Yix are kita utzijol chi o ch'oj pa taq tinimit, xaq i k'ax laj k'aslemal mixij iwib' rumal ile. Man are ile kk'ulmax ni nab'e, xwiri ile lik are ti k'isb'al ij —xub'ij i Jesús chke.

10Xaq xub'ij chik chke:

—Jun tinimit ku'an ch'oj chrij jun chik tinimit; xaq jun nim laj tinimit ku'an ch'oj chrij jun chik nim laj tinimit 11Lik kik'aw ni nimaq taq ukab'raqan, xaq lik o ni numik, xaq o ni yob'il pa jalajuj taq k'ijib'al, kiwil ni nimaq taq b'iroxik chwa kaj chi lik xib'in ib', xaq i nimaq taq aljinsab'al.

12Xwiri nab'e chwach ni'pa ile, yix kixchaptaj na xaq kix-oqtax na. Kix-e kiya pa taq ja re molb'al ib' ke i judío man kki'anb'ej i atb'al tzij piwi. Kixkitz'apij prexil, kixkik'am b'i chkiwach i ajawinelab' xaq chkiwach i je aj-atol tzij, xa wumal yin. 13Man keje ile yix lik kilap ni ronojel ni'pa iwilom xaq wach iweta'am chwij yin. 14Mixk'achir chuch'ob'ik wach kib'ij na tob'al iwib'. 15Man yin kinya ni i tzij chiwe chi lik re no'oj chi lik mijun chke i ajch'oj chiwij ktiki chula'ik uwach chiwe xaq we kkib'ij taq chi utz taj. 16Xwiri yix kixjach ni pki'ab' i ajch'oj chiwij kumal iqajaw ichuch, kumal iwatz icha', kumal iwachalal, xaq kumal i wamiy; o jujun chiwe kekamsax na. 17Konojel i winaq tzel kixkil na wumal yin, 18xwiri lik mitene ktzaq jun iwi re ijolom. 19Lik chikub'a ik'ux man keje ile, kich'ak ni ik'aslemal saqil.

20Are kiwilo chi sutim chik rij i tinimit Jerusalén kumal i achiyab' chi je yij che i ch'oj, chiwetamaj uri chi juntir kwulijsax na. 21Are uri, ni'pa i je o pa Judea che anmajoq che oj pa taq k'achelaj chijyub'; ni'pa i je o pa tinimit Jerusalén che'el li pa tinimit; ni'pa i je o pa taq es, metzalij chal pa tinimit. 22I ij le, are i ij re nim laj tojpen man k-antaj na pacha i tz'ib'tal kan chupam uwuj i Dios.#21.22 Oseas 9.7. 23Xwiri ¡Lik to' kiwach ixoqib' che taq i ij le chi je k'aqtajnaq, xaq ixoqib' chi o kak'al chi k'a ketz'umanik! Man lik nim i k'ax kpe chwach i ulew re i nim laj tinimit; lik nim i k'oqb'al kpe pkiwi i winaq. 24O ni jujun kekamsax ni ru' ch'ich' chi k'ulala o uware; i jub'an chik kek'am nu b'i prexil, pa nimaq taq tinimit. I tinimit Jerusalén kqajsax ni u'ij kumal i ne te aj Israel winaq. Keje kki'an ile k'a kk'is ni ij chi yatal chke.

I uk'unik tan chik i pacha Winaq chi Xolalaxoq chwach Ulew

25O ni aljinsab'al uri che i ij, i ik', i ch'umil. Waral chwach i jyub' ta'aj konojel i winaq pa nimaq taq tinimit is kek'achir na; xaq kexib'taj na rumal i uch'awb'al i mar xaq rumal i nim laj uretum. 26I winaq kkitij ni kamik rumal kixib'rikil are kkich'ob' i k'ax chi kpe ni chwach i jyub' ta'aj. Man lik ronojel ni'pa yawnaq ucho'ab' i kaj ksiksat na. 27Te'uri kkil ni i pacha Winaq chi Xolalaxoq chwach Ulew kk'unik; kk'un pa sutz', ru' nim laj ucho'ab', ru' nim u'ij uchomal. 28Are kjeqan u'ankil ni'pa ile, lik chikowij ik'ux xaq chixkikotoq; chiyaka ipalaj; man iwelb'al chisaq lik naqaj chik o wi.

29Te'uri xub'ij jun tijojb'al tzij chke.

—Chiwila wach ku'an i uche'lal higo, xaq i jub'an chik che'. 30Are kiwilo chi ya kel li utux, iweta'am uri chi ya kpe i sa'ij. 31Xaq keje uri ile, are kiwil ni'pa taq i xinb'ij chiwe le, kita ub'e uri chi ya kjeqan i utz laj ajawinik re i Dios.

32Saq laj tzij kinb'ij chiwe, k-antaj ni ronojel ni'pa inb'im le, are k'amaja kekam i winaq je re wo'or. 33I kaj lik ksach ni uwach xaq i ulew, xwiri intzij ksach taj; lik k-antaj na pacha inb'im chiwe.

34Lik chiwila iwib'; miya che ik'ux chi xa kkowir chupam i utz taj, ab'arik, k'achirik re i k'aslemal waral chwach i jyub' ta'aj, man keje ile ktzaq ti ij le piwi are nti kich'ob' che. 35Pacha jun tzaqsab'al kk'un pkiwi konojel i winaq chwach i jyub' ta'aj. 36Chixk'ask'atoq; lik chitz'onoj che i Dios ronojel ij. Man keje ile kixtzaq ti chupam ronojel ni'pa i k'ax, chi kpe na, man keje ile lik kixupon ni chwach i pacha Winaq chi Xolalaxoq chwach Ulew.

37I Jesús are pa'ij, kuya i k'utunik chke i winaq prachoch i Dios; are cha'ab', kkanaj kan pa taq es chi Olivos ub'i. 38Lik konojel i winaq we' keupon chutayik wach kub'ij i Jesús prachoch i Dios.

Currently Selected:

Lucas 21: ACHICUB

Highlight

Copy