Juan 9
9
I Jesús xutzunsaj jun achi chi mawach chralaxik
1I Jesús are xik'aw che jun k'ijib'al xril jun achi chi lik mawach chralaxik. 2Are uri utijoxelab' xkitz'onoj che:
—Tijonel, ¿B'uchak i achi le mawach xalaxik? ¿Rumal kimak uqajaw uchuch, o rumal umak ire?
3I Jesús xula' uwach chke:
—Rumal ti kimak uqajaw uchuch xaq rumal ti umak ire. Ile k'utb'al re i anik re i Dios. 4Tz'aqat k'a pa'ij lik rajwaxik kqa'an uchak i Jun chi xintaqaw loq, man are kok a'ab' mijun chik kchakunik. 5Tz'aqat in o chi chkiwach i winaq, yin lik in saq re uwach i jyub' ta'aj.
6Are xb'itaj i tzij le rumal i Jesús, xuk'aq pich' uk'axaj chwach ulew, xuyijb'a pich' xo'ol te'uri xukoj che ub'a'wach i mawach. 7Te'uri xub'ij che
—Jat, jach'aja ab'a'wach pa yab'al ya Siloé? (I tziji ke'eloq: “Taqom”.)
I mawach le x-ek, xeuch'aja ub'a'wach chupam i ya, are xtzalij loq ktzun chik. 8Konojel ni'pa i winaq chi je o chrij chwach chi kilom are kutz'onoj pwaq, xkib'ij chkiwach:
¿Are ti b'awa achi ile mawach chi kkub'i chutz'onoxik upwaq? —Xecha.
9O jujun kkib'ij:
—Lik are ire.
Xaq o jub'an chik kkib'ij:
—Are ti ile, tupu lik kmajawik.
Xwiri i mawach te'eq, xub'ij:
—Qatzij, lik in are yin.
10Are uri i winaq xkitz'onoj che:
—¿Wach u'ankil uri ile chi wo'or kattzun chik?
11Ire xula' uwach chke:
—Are jun achi chi Jesús ub'i, Ire xuyijb'a pich' xo'ol, xukoj che inb'a'wach. Te'uri xub'ij chwe: —Jat, jach'aja ab'a'wach pa yab'al ya Siloé. Yin xin-ek, are xch'ajtaj inb'a'wach, xintzunik.
12Are uri xkitz'onoj che:
—¿Ipa o wi i achi le?
Ire xub'ij:
—Weta'am taj.
I aj fariseo xkitz'onoj che i mawach te'eq wach rutzirik
13-14I ij le are xuyijb'a i xo'ol i Jesús chi xutzunsab'ej re i mawach te'eq, are jun ij sábado. Rumali chi xkik'am b'i i mawach te'eq chkiwach aj fariseo. 15Are uri i aj fariseo xkitz'onoj che:
—¿B'uchak chi wo'or kattzun chik?
I achi xub'ij chke:
—Xukoj xo'ol che inb'a'wach, xin-e chuch'ajik, wo'or kintzunik.
16O jujun chke aj fariseo xkib'ij:
—I winaq chi xu'an ile re ti i Dios man kukoj ti u'ij i ij sábado —xecha.
Xwiri o jub'an chik xkib'ij:
—¿Wach taq u'anik uri i nimaq taq il, we ajmak? —Xecha.
Rumali xkijach kiwach. 17Xkitz'onoj chik che i achi:
—Yet, ¿Wach kach'ob' che i achi le chi xrutzirsaj ab'a'wach? ¿Pachin i achi le kab'ij yet? —Xkib'ij che.
—I achi le are jun profeta —xub'ij i achi chke.
18Xwiri i aj Judío xkaj ti ukojik chi ktzun chik i achi chi mawach te'eq. Rumali lik k'a xkitaq usik'ixik uqajaw uchuch. 19Are uri xkitz'onoj chke:
—¿Are iwak'al yix iri? ¿Lik qatzij ile chi mawach xalaxik? ¿Wach u'anik xu'ano chi wo'or ktzun chik? —Xecha.
20I uqajaw uchuch xkila' uwach chke:
—Qeta'am chi ire lik qak'al xaq qeta'am chi mawach xalaxik. 21Xwiri qeta'am taj wach u'anik xu'ano chi wo'or ktzun chik, xaq qeta'am taj pachin xtzunsawik. Chitz'onoj che ire; man ire o chik ujunab', are ire kb'in chiwe wach u'anik xu'ano.
22Keje ile xkib'ij uqajaw uchuch man xkixij kib', man i aj Judío kib'im chkiwach chi kkesaj b'i jun winaq pa ja re molb'al ib' ke i judío, we kukojo xaq we kub'ij chi i Jesús are i Cristo. 23Rumali i uqajaw uchuch xkib'ij keje iri: “Chitz'onoj che ire, man tz'aqatnaq chik ujunab'.” Xecha.
24Are uri i aj Judío xkitaq chik usik'ixik i achi chi mawach te'eq. Xkitz'onoj chik che:
—Lik chab'ij i saq laj tzij chqe chwach i Dios; man yoj qeta'am chi i achi le lik ajmak.
25I achi chi mawach te'eq xula' uwach chke:
—Yin weta'am taj we ajmak, xwi weta'am chi yin in mawach te'eq xwiri wo'or kintzun chik —xcha.
26Xkitz'onoj julaj chik che:
—¿Wach xu'an chawe? ¿Wach xu'ano chi wo'or xattzunik?
27Are uri i mawach te'eq le xula' chik uwach chke:
—Inb'im chik chiwe, xwiri yix kixkojon ti chwe. ¿B'uchak kiwaj chi kinb'ij chik ukamul chiwe? ¿Moqxa kiwaj yix kixterej chrij? —Keje ile xub'ij chke.
28Are uri i aj Judío; xkib'ij k'ax che:
—Yet at jun chke utijoxelab' ire le, xwiri yoj oj utijoxelab' mam Moisés. 29Yoj qeta'am chi i Dios xlapan ru' mam Moisés, xwiri i achi le mipich' qeta'am ipa xpe wi.
30I mawach te'eq xub'ij chik chke:
—¡Lik b'isb'al ile chi yix iweta'am taj ipa petnaq wi! Xwiri ire xinutzunsaj yin. 31Qeta'am chi i Dios keuta ti ajmakib'. Ire xwi keuta i winaq chi kkikoj u'ij xaq pachin kki'ano pacha kraj Ire. 32Lik qatom ti ile we o taq jun kutzunsaj jun mawach chralaxik. 33I achi le wetene ru' ti i Dios petnaq wi, ¿Wach u'anik uri chi o taq pu'ab' ku'an ile? —Xub'ij i mawach te'eq chke.
34Are uri aj Judío xkib'ij che:
—Yet, lik at ajmak laj winaq are xatalaxik. ¿Wo'or kawaj taq kaya k'utunik chqe yoj? —Xecha che.
Te'uri xkesaj li achi le pa ja re molb'al ib' ke i judío.
Winaq chi je mawach pa kanima
35I Jesús xuta utzijol, chi xelsax li achi chi mawach te'eq chila pa ja re i molb'al ib'. Are xkik'ulaj kib' ru' i Jesús, xutz'onoj che:
—¿Katkojon yet che i pacha Winaq chi Xolalaxoq chwach Ulew?
36I mawach te'eq le xula' uwach che i Jesús:
—Nim laj winaq, chab'ij chwe pachinoq man keje ile kinkojon ni che.
37I Jesús xula' uwach che:
—Awilom chik uwach, man are yin chi kinlapan awu'.
38Are uri i achi le xxuki chwach i Jesús, xub'ij che:
—Lik katinkojo, Ajwal.
39Are uri i Jesús xub'ij che:
—Yin xink'un chwach i jyub' ta'aji chu'anik i atb'al tzij, man keje ile i je mawach ketzun na xaq konojel ni'pa ketzunik keu'on ni mawach —xcha.
40Je o jujun aj fariseo chila, are xkita ile xkitz'onoj che i Jesús:
—¿Xatab'a xaq oj mawach yoj? —Xecha.
41Are uri i Jesús xula' uwach chke:
—Wetene iweta'am chi ix mawach piwanima, nti imak uri. Xwiri kib'ij chi lik kixtzunik, rumali o i mak.
Currently Selected:
Juan 9: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
