Juan 10
10
I ajyu'ul chij xaq i je uchij
1I Jesús xub'ij: “Lik saq laj tzij kinb'ij chiwe: Jun winaq we kok tu b'i che uchi b'e re i koral ke i chij, we xa kuk'aq rib' puwi i koral, lik xa ili'om uri. 2Xwiri jun we kok b'i che uchi b'e ipa je o wi i chij, ile ajyu'ul chij uri. 3I chajal re i okb'al, ipa je o wi i chij, are ire kjaqaw uchi b'e xaq i ajyu'ul chij keusik'ij i chij ru' kib'i; xaq i chij keta'am uch'awb'al i ajyu'ul ke, lik are ire ke'elsaw li pa koral. 4Are je o chik konojel i chij chisaq, are uri i ajyu'ul chij le knab'ej b'i chkiwach, ike keterej b'i chrij, man keta'am chik i uch'awb'al ajyu'ul ke. 5Xwiri i chij le to' ti keterej taq chrij jun we keta'am ti uwach, xa ke'anmaj chwach man keta'am ti uch'awb'al; keje ile xub'ij i Jesús chke.”
6I Jesús xub'ij i tijojb'al tzij le chke, xwiri ike xkita ti ub'e wach xraj ub'ixkil chke.
I Jesús utz laj ajyu'ul chij
7I Jesús xub'ij chik chke: “Lik saq laj tzij kinb'ij chiwe: Yin in keje pacha uchi b'e re i koral ipa ke'ok wi i chij. 8Konojel ni'pa je k'unnaq nab'e chinwach Yin, ike xa je ili'omab', xa ela' kki'ano. Xwiri i chij xekojon ti chke. 9Yin in uchi b'e: Pachin kok che uchi b'e le lik ktotaj na, lik keje ni uri pacha jun chij chi kok b'ik, xaq kel li che uchi b'e, xaq kuriq ni wach kutijo.”
10“I ili'om xwi kk'un chu'anik ela', kamsanik xaq chu'anik i jalajuj taq k'ax. Xwiri yin in k'unnaq chuya'ik k'aslemal, jun k'aslemal chi lik nti kramtaj che. 11Yin in utz laj ajyu'unel, i utz laj ajyu'unel kuya uk'aslemal chwach i kamik tob'al ke i chij. 12Xwiri jun we keuyu'uj i chij xa rumal kya' jun rajil, ire are krilo chi kk'un utiw k-anmajik kero'taj kan i chij, man ire are ti ajyu'unel ke xaq i chij je re taj. Are uri i utiw le kok chu'anik k'ax chke i chij xaq xaipa keukichersaj b'ik. 13I achi le k-anmajik man k'ax ti keuna i chij; man ire xwi i rajil kuch'ob'o.”
14Yin in utz laj ajyu'unel, lik weta'am kiwach inchij xaq ike keta'am inwach Yin. 15Keje pacha in-anom Yin weta'am uwach Inqajaw xaq ire reta'am inwach Yin xaq Yin kinya ink'aslemal pkik'exel i chij. 16Xaq o jub'an chik inchij chi kachi'il ti je o chupam i korali, xaq rajwaxik chi keink'am li waral. I chij le kekojon ni chwe, man keje ile keu'on ni xaqjun kiwach i xaq xa jun ni ajyu'unel ke.
17“Rumali chi k'ax kinuna Inqajaw man Yin kinya ink'aslemal chwach i kamik, te'uri kinwalij chik. 18Mijun o pu'ab' kresaj ink'aslemal, Yin intukel kinya ink'aslemal chwach i kamik, lik pin-ab' o wi uya'ik xaq uk'amik chik ink'aslemal. Are taqanik ile chi xuya Inqajaw chwe.”
19I aj Judío are xkita i tzij le, xkichap chik kib' che i itzij chrij wach xub'ij i Jesús. 20Lik je k'i chke i winaq xkib'ij:
—¿B'uchak kixkojon che, xa o itzel tew che i xa ch'uj? —Xecha.
21Xwiri o jub'an chik xkib'ij:
—We jun o itzel tew che, keje ti uri kub'ij ile. Xaq ¿Xatab'a jun itzel tew ktiki chutzunsaxik jun mawach? —Xecha.
I aj Judío xkixutuj i Jesús
22Che u'ijlal i alaj, o jun nima'ij pa tinimit Jerusalén; are i nima'ij re i rachoch i Dios. 23I Jesús o prachoch i Dios xaq kb'in che i k'ijib'al, I Uwach ja chi ma Salomón ub'i. 24Are uri xeupon jub'an aj Judío, ru' xkisutij rij xaq xkitz'onoj che:
—¿K'a junpa kab'ij chqe chi at pachin yet? We yet at are i Cristo su' chasaqij chqe.
25I Jesús xula' uwach chke:
—Inb'im chik chiwe xwiri yix xinikoj taj. I jalajuj taq b'iroxik chi in utaqom Inqajaw chu'anik, kuk'utb'ej re in pachin Yin. 26Xwiri yix kikoj taj man ix ti kachi'il inchij. 27Konojel ni'pa inchij yin keta'am inch'awb'al; xaq Yin weta'am kiwach ike; xaq ike keterej chwij. 28Yin kinya kik'aslemal chi nti uk'isik, lik kekam taj xaq lik arewi mijun ke'elsaw pin-ab'. 29Ni'pa uya'om Inqajaw chwe lik nim chwach ronojel ni'pa i olik. Xaq lik mijun ktiki chumajik che. 30Inqajaw xaq Yin xa oj jun —xcha.
31Are uri aj Judío xkiyak chik ab'aj re kkikoj te'eq che i Jesús. 32Xwiri i Jesús xub'ij chke:
—Rumal ucho'ab' Inqajaw, in-anom k'iyal taq i utz chiwach. ¿Pachike chke taq i utz le kikoj ab'aj chwe rumal?
33Are uri aj Judío xkib'ij che:
—Rumal ti taq jun utz a'anom chi kqakoj taq ab'aj chawe, kqa'an ile chawe man i atzij lik kuqajsaj u'ij i Dios; yet at jun to' achi xwiri ka'an taq Dios che awib'. 34I Jesús xub'ij chke: Chupam i'atb'al tzij yix keje iri tz'ib'talik:
—Yin xinb'ij, chi yix ix dios. 35Yoj qeta'am chi ronojel ni'pa kub'ij uwuj i Dios lik qatzij. I Dios xub'ij dios chke i winaq chi xub'ij utzij chke. 36I Dios we xinu'ul Yin xaq xinutaq li chwach i jyub' ta'aj. ¿B'uchak uri chi kib'ij yix chi xinqajsaj u'ij i Dios man xinb'ij chi in Uk'ojol Ire? 37Yin, we kin-an ti i chak chi ku'an Inqajaw, minikoji'. 38Nti k-ono we kinikoj ti Yin xwiri chikojo ni'pa i kin-ano man su' kiwetamaj chi Inqajaw o chwe Yin xaq Yin in o che Ire —keje ile xub'ij i Jesús chke.
39I aj Judío xkaj tan chik uchapik i Jesús, xwiri ire xresaj chik rib' chkixol.
40Te'uri i Jesús xtzalij chik ch'aqap che i raqana Jordán, chila xk'iji wi che i k'ijib'al ipa xuqajsaj wi i ya ma Wan pkiwi i winaq. 41Lik je k'i i winaq xeupon chrilik xaq kkib'ij chkiwach:
—Lik saq laj tzij tupu ma Wan nti jun nim laj il xu'ano, xwiri ronojel ni'pa i xub'ij chrij i achi le lik saq laj tzij —xecha.
42Je k'i i winaq xkikub'a kik'ux che i Jesús chila.
Currently Selected:
Juan 10: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
