G%E9nesis 21
21
Ralaxik a Isaac
1I Ajwal xuk'ut i k'axnab'al uk'ux che tit Sara, rumali xuya che pacha i xusujuj. 2Rumali xk'aqtaj tit Sara, xalax jun rak'al re i rachijil chi mam Abraham. Lik purijal chik xalax i kak'al le, lik xalax che i ij chi ub'im i Dios che mam Abraham. 3I rak'al mam Abraham chi xalax ru' tit Sara, xuya pub'i, a Isaac. 4Are xel wajxaqib' ij ralaxik a Isaac, are uri mam Abraham xu'an i circuncisión che, chrij pacha taqtal che rumal i Dios. 5I mam Abraham o chik jo'winaq (100) junab' che are xalax uk'ojol chi a Isaac. 6I tit Sara xub'ij: “I Dios xu'an chwe chi xintzenik, xaq xapachin kuta utzijol chi xinalanik, ktzen ni uri wu'. 7I mam Abraham lik xik'aw ti ile pujolom chi kril ni uwach jun rak'al wu', xwiri wo'or xinya jun rak'al purijal.” Xcha tit Sara.
Kelsaxik b'i ati Agar xaq a Ismael prachoch mam Abraham
8I a Isaac nim chik are xmaj i tz'um che, lik che i ij are xmaj i tz'um che, i mam Abraham xu'an jun nim laj nima'ij. 9I tit Sara are xunab'ej chi ralab' ati Agar ru' mam Abraham, kuyo'ya ralab' ire, 10xub'ij che mam Abraham: “Chawesaj b'i ajke'el le junam ru' i ralab', man i ralab' ajke'el le lik kel ti ub'itaq re ru' i walab' yin chi a Isaac.” Xcha.
11I mam Abraham are xuta i tzij le lik xk'achir rumal, man a Ismael le xaq uk'ojol ire. 12Rumali xub'ij i Dios che mam Abraham: “Matk'achir rumal i ala le xaq mita rumal awajke'el. Cha'ana ronojel ni'pa kub'ij awixoqil chawe chi tit Sara man rumal a Isaac chi ak'ojol kepe ni amuq axikin. 13Xaq i ralab' i ajke'el le kin-an ni chke i rak'al chi ke'on jun nim laj tinimit, man ire le xaq lik awak'al yet.”
14Chukab' ij i mam Abraham lik we' xwalijik, xuk'am i lejom wa re trigo, xaq xuk'am jun tz'um chi o ya chupam, xuya che ati Agar. Xuya an xol uteleb' xaq xuya b'i ralab' che, are uri xutaq b'ik. Are u'ankil uri chi xel b'i ati Agar, to' x-e b'i pa taq tz'inilik jyub' chaqij chila Beerseba. 15Are xk'is i ya chupam i tz'um, xumin kan ral ralab' le chuxe' jun ch'ixch'ik che'. 16Are uri x-ekub'i pan chinaj che i ak'al, man xub'ij puk'ux: Kwaj taj kwilo are kkam wak'al. Xwiri are xkub'i pan chinaj, i ala le ko xsik'in che o'ej.
17I Dios are xuta chi kjek'jat i ak'al che o'ej, are uri i ángel re i Dios xch'aw li chikaj che ati Agar, xub'ij che: “¿Wach xak'ulmaj ati Agar? Maxij awib', man i Dios xuta chi ak'al le lik kjek'jat che o'ej chila ipa aya'om wi kanoq. 18Chatwalijoq, jak'ama i ak'al le, maya che chi ktzaq pulew, man Yin kin-an na chi ke'on ni jun nim laj tinimit amuq axikin ru' ire le.”
19Are uri i Dios xu'an che ati Agar chi xril pan jun k'otom o ya chupam. Rumali x-e chunojsaxik i tz'um che i ya, te'uri xuya uya' i ralab'. 20I ala le chila xjeqi wi xaq chila xk'iy wi pa tz'inilik jyub' chaqij, man i Dios xrok'aj xaq xe'eloq chi lik sik'aj u'ab' che i k'aqanik ru' ch'ab'. 21I tz'inilik jyub' chaqij le ipa xjeqi wi are Parán; i ati Agar xuk'ulb'a i ralab' le ru' jun ixoq aj Egipto.
I Mam Abraham xaq ma Abimelec kki'an jun trat
22Che taq i ij le i ma Abimelec junam ru' ma Ficol, chi are aj-atzil ke i achiyab' chi je yij che i ch'oj, xe'elapan ru' mam Abraham, xkib'ij che:
—I Dios o awu' che ronojel ni'pa taq ka'ano. 23Wo'or lik chab'ij chwe waral pub'i i Dios, chi ka'an ti jun utz taj chwe, mita chke wak'al, mita chke inmuq inxikin, man pacha i rutzil ink'ux yin chi xin-an chawe yet xaq keje cha'ana ni yet ile chwe yin, xaq keje cha'ana chke konojel i winaq ipa at o wi wo'or.
24I mam Abraham xub'ij:
—Lik kinb'ij pub'i i Dios chi lik mijun utz taj kin-an chawe. 25Xwiri mam Abraham xukoj uch'ojil che ma Abimelec, chi i je umokom ma Abimelec xkimaj jun k'otom che mam Abraham. 26Are uri xub'ij ma Abimelec:
—Yin lik intom ti ile, k'ate ne wo'or xinta, xaq yet xab'ij ti chwe. Yin lik weta'am taj pachin x-anaw ile,
27Are uri mam Abraham xeuk'am i chij xaq i b'akib' xuya che ma Abimelec, lik chekeb' xki'an jun trat. 28Te'uri mam Abraham xuya wuqub' atitab' chij junla, 29rumali ma Abimelec xutz'onoj che mam Abraham:
—¿Wach usuk' i wuqub' atitab' chij le chi je aya'om junla?
30I mam Abraham xub'ij che:
—Cheak'ama i wuqub' atitab' chij le, ilb'al re chi yin in-anom i k'otom le —xcha.
31Rumali xkiya pub'i i k'ijib'al le Beerseba, man chila xkib'ij wi chi lik xwi i utz kki'an chkiwach; keje i trat ile xki'an chila Beerseba.
32Te'uri ma Abimelec chi ajawinel re i tinimit Gerar xaq ma Ficol chi kaj-atzil i achiyab' chi je yij che i ch'oj xetzalij chik pkulew. 33I mam Abraham xutik jun che' Tamarisco chila pa Beerseba xaq chila xukuxtaj xunataj wi ub'i i Ajwal, chi are i Dios ronojel ij saq. 34Lik k'iyal ij xk'iji mam Abraham chila che kulew i aj Filistea.
Currently Selected:
G%E9nesis 21: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
