G%E9nesis 20
20
Mam Abraham xaq i ma Abimelec
1I mam Abraham xel chila ipa o wi te'eq, x-e pusuk' ulew Neguev, chila xk'iji wi chuxol i keb' tinimit Cades xaq i Shur. Are o chila Gerar, 2i mam Abraham xub'ij chi tit Sara chi rixoqil xa ranab', rumali ma Abimelec chi ajawinel re i tinimit Gerar xutaq uk'amik tit Sara man ku'an rixoqil che. 3Xwiri che a'ab' le i Dios xuk'ut rib' che ma Abimelec puwaram, xub'ij che: “Katkam na man ixoq le chi xataq uk'amik, k'ulanik.”
4Xwiri ma Abimelec k'amaja kumin rib' ru' tit Sara, rumali xula' uwach che i Dios: “Wajwal ¿Xatab'a kakamsaj jun winaq chi nti umak u'anom? 5Man mam Abraham xub'ij chwe chi tit Sara xa ranab', xaq i tit Sara xub'ij chwe chi mam Abraham le lik uxib'al; rumali yin ru' ch'am laj ink'ux xintaq uk'amik ixoq le, lik nti jun utz taj xinch'ob' u'anik.” Xcha.
6Are uri i Dios xub'ij che puwaram: “Weta'am chi xa'an ile ru' ch'am laj ak'ux, rumali xinya ti chawe chi kamin awib' ru' man keje ile katmakun ti chinwach. 7Xwiri wo'or su' chataqa uya'ik ixoq le che mam Abraham chi rachijil, man ire profeta xaq kutz'onoj ni pawi man keje ile katk'asi'ik. We ka'an taj lik chawetamaj uri chi lik katkam na junam ku' awinaq.” Keje ile xub'ij i Dios che ma Abimelec.
8Are xsaqir chukab' ij, i ma Abimelec lik k'a we' xwalijik, xutaq kisik'ixik konojel umokom, man kraj kulap chke ronojel wach taq xrachik'aj cha'ab'. Are xkita umokom ile wach xrachik'aj lik konojel xe'ok il. 9Are uri ma Abimelec xutaq usik'ixik mam Abraham, xub'ij che:
—¡Wach usuk' i xa'an chwe le! ¿Wach in maktajnaq wi chawach, chi xak'am li nim laj mak atzalal le pinwi, xaq pkiwi i winaq chi je o pin-ab'? I xa'ano le lik kmajaw taj chi k-anik. 10¿Wach taq kattijin chuch'ob'ik are xa'an i t'oronik le chwe?
Keje ile xub'ij ma Abimelec che mam Abraham.
11Are uri mam Abraham xula' uwach che:
—Xinch'ob' yin, i winaq chi je o waral che i tinimiti kkixij ti kib' che i Dios, lik kinkikamsaj uri rumal i wixoqil kinb'ij yin. 12Xwiri xaq lik qatzij chi ixoq le wanab', man umi'al inqajaw, tupu xaqjun ti qachuch ru'; rumali xin-an wixoqil che. 13Man i Dios are xub'ij chwe chi kwo'taj kan kachoch inqajaw inchuch man kin-e b'i chwach i jyub' ta'aj, are uri xinb'ij iri che wixoqil: Are utzil iri chi kwaj ka'an chwe xaipa koj-e wi, arewi chab'ij chi yin in axib'al, xincha che.
14Are uri ma Abimelec xuya b'i uchij, uchikop, rajchakib' xaq i rajke'elab' mam Abraham xaq xutzalij b'i rixoqil che chi tit Sara. 15Xaq xub'ij che mam Abraham:
—Wo'or o ronojel wulew chawach; chatjeqel uri ipa mer kumaj wi awach yet —xcha. 16Xaq xub'ij che tit Sara:
—Xinya b'i lajujwinaq kamo' (1,000) saqpwaq che axib'al tojb'al re ni'pa i k'ix chi xatik'aw chupam, keje ile katkiyo'ya ti winaq chi je o awu' —xcha.
17Are uri mam Abraham xutz'onoj che i Dios puwi ma Abimelec; rumali i Dios xrutzirsaj xaq xu'ano chi i rixoqil xaq i rajke'elab' kealan tan chik, 18man i Ajwal xu'an te'eq chke konojel ixoqib' chi je o prachoch ma Abimelec chi kealan taj, rumal ni'pa i xuk'ulmaj tit Sara chi rixoqil mam Abraham.
Currently Selected:
G%E9nesis 20: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
