G%E9nesis 19
19
I Dios kusach uwach i Sodoma xaq Gomorra
1Lik ya kok a'ab' are xeupon i keb' ángel pa Sodoma; i ma Lot kul b'i pa okb'al re i tinimit. Are xerilo, juntir x-e chkik'ulaxik, xxuki'ik xaq xuqajsaj upalaj k'a chwach ulew, 2xub'ij chke:
—Chikuyu inmak, nimaq taq winaq, kintz'onoj utzil chiwe chi chixwar kan che a'ab'i chi wachoch yin chi in iwajchak. Man chila ru' ja o i ya re kich'ajb'ej iwaqan, keje ile chweq ksaqirik, kimaj chub'i ib'e.
Ike xkib'ij:
—Ntaj, mantiox, che i a'ab'i kojwar kan waral pa b'e.
3Xwiri ma Lot xu'an pen chke chi ke'e ru', ru' ja; rumali ike xe'e chi rachoch ma Lot. Are uri ma Lot le xuyijb'a jun nim laj wa'im, xu'an wa re trigo te'uri ike xkitijo.
4Lik k'amaja ne kekotz'i'ik, are xeupon pan achiyab' re i tinimit Sodoma chusutixik rij rachoch ma Lot, xeupon konojel achiyab', alab'om xaq che rijab'. 5Are uri xesik'in chub'ixkil che ma Lot.
—¿Ipa je o wi achiyab' chi xek'un pa waram chi awachoch? ¡Cheawesaj loq, man kqaj kqamin qib' ku'! —Xecha.
6Are uri xel li ma Lot chkiwach, xutz'apij kan uchija 7xaq xub'ij chke:
—Kintz'onoj jun utzil chiwe watz incha' chi mi'an i ch'am taj le. 8Yin je o keb' inmi'al chi nti jun achi uminom rib' ku'; kewesaj loq man ki'an chke pacha kumaj iwach; xwiri lik mi'an utz taj chke achiyab' le, man ike xa xek'un pa waram chuxe' inmujb'al —xcha.
9Ike xkib'ij che:
—¡Chatel chila! Man at aj chi teneri, xwiri wo'or kawaj taq ka'at tzij pqawi, rumali wo'or lik nim ni utz taj kqa'an chawe yet chwach kqa'an chke ike le —xecha. Are uri xkijeq utakpuxik ma Lot, man kkaj kkiraqij b'i uchija. 10Xwiri i keb' ángel le xkijek' b'i ma Lot pa ja, te'uri xkitz'apij li uchija. 11Are uri i ángel xki'an mawach chke konojel i winaq chi xkit'ub'ij kib' chwach uchija, che alab'om xaq che rijab'; xaq xekos chutzukuxik uchija.
12Are uri i ángel xkib'ij che ma Lot:
—We k'a je o jub'an chik awalk'uwal che i tinimiti cheawesaj b'ik, lik naj cheak'ama b'i junam ku' ak'ojol, ami'al, aji' xaq konojel ni'pa i je o pa'ab', 13man yoj kqachup uwach i tinimiti rumal kimak i winaq, chi uponnaq chwach i Ajwal chi lik kch'ijaw ti chik; rumali xojutaq li chuchupik uwach —xecha.
14Are uri ma Lot xlapan ku' alab'om chi kib'im chik kek'uli ku' umi'al, xub'ij chke:
—¡Chixwalijoq alab'om, chixel che i tinimiti, man i Ajwal kuchup uwach! Xwiri i alab'om le xkich'ob' ike chi xa kjunman ma Lot ku', rumali xewalij taj. 15Are xpe usaqirik, i ángel xkib'ij che ma Lot:
—¡Chab'isoj! Chak'am la b'i awixoqil xaq i keb' ami'al chi je o waral, man ksach ti iwach chupam i tojpen chi kpe puwi i tinimiti —xecha.
16I ma Lot xaq i ralk'uwal ktijin kib'aytajik, rumali i ángel xkichap b'i che ki'ab', xekesaj b'i chupam i tinimit rumal rutzil uk'ux i Ajwal chi o pkiwi ike. 17Are je elnaq chik pa tinimit, jun chke i ángel xub'ij che ma Lot:
—Chat-anmaj chuto'ik ak'aslemal, mattaqen chawij, xaq to' mattak'i taq pa taq b'e che ronojel i ta'aj le, jat k'a chwi jyub', man ksach ti awach chupam i tojpen chi kpe puwi i tinimiti.
18I ma Lot xub'ij che i ángel:
—Nim laj winaq, ma'an ile chwe. 19Qatzij neri chi lik nim utzil a'anom chik chwe, xaq lik utz ak'ux chwe man xinato, xwiri yin kinch'ij ti uponik k'a chwi jyub' le, man moqxa kinuriqa i kamik ksach uwach uri ink'aslemal. 20Naqaj che i waral o jun tinimit pich', we lik kinb'isoj lik kinupon ni uri chila. ¿B'uchak kaya ti chwe chi kin-e chuto'ik ink'aslemal chila? Man are jun tinimit chi lik pich'.
21I ángel xub'ij che ma Lot:
—Utzi', kinya ni chawe wach xatz'onoj chwe; kinchup ti uwach i tinimit le chi xab'ij. 22Xwiri chab'isoj, su' chat-anmajoq, man kinchup ti uwach i Sodoma xaq i Gomorra le we k'amaja katupon che i k'ijib'al —xcha i ángel che.
Rumali i tinimit le ipa xuto wi rib' ma Lot, xkanaj pub'i Zoar.
23Lik saqirnaq chik are xupon ma Lot pa Zoar. 24Te'uri i Ajwal xutzaqsaj li asufra xaq i a' puwi i tinimit Sodoma xaq i Gomorra, chi lik ktoqowik. 25Keje uchupik uwach i keb' tinimit ile xu'an i Ajwal, xuchup uwach ronojel i ta'aj, ronojel i tikon chi o chwach xaq konojel i winaq. 26Xwiri i rixoqil ma Lot teren kanoq xaq xtzun chrij, are uri juntir x-on kan jun tak'tik atz'am.
27Chukab' ij we' xwalij b'i mam Abraham, x-e chik chila ipa xelapan wi ru' i Ajwal. 28Xtzun b'i puwi i Sodoma xaq puwi i Gomorra, xaq puwi ronojel ulew chi lik tik'tik ta'aj; are uri xrilo chi kb'uquq i sib' chwach ulew chi kel b'i chikaj pacha sib' re jub'an rosa. 29Keje uchupik uwach i keb' tinimit ile xu'ano, xaq xk'un utzij mam Abraham chuk'ux, rumali xresaj ma Lot chwach i tojpen chi xpe puwi i tinimit ipa o wi te'eq.
Kixeb'al li aj Moab xaq i aj Amón
30I ma Lot rumal uxib'rikil xjeqi ti chila Zoar, junam ku' i keb' umi'al xe'e jeqi chwi jyub'. Chila xejeqi wi chupam jun pek. 31O juyak, i atz xub'ij che ucha':
—I qaqajaw lik rij chik, xwiri waral che i jyub'i nti jun achi re kk'uli qu', pacha kki'an konojel i winaq chwach i jyub' ta'aj. 32Wo'or chqa'ab'arsaj qaqajaw te'uri kqamin qib' ru', man keje ile kealax ni qak'al rumal ire —Keje ile xub'ij che ucha'.
33Lik che a'ab' le xki'ab'arsaj kiqajaw, are uri xok b'i atz, xumin rib' ru' uqajaw, xwiri i uqajaw le xunab'ej taj are xok b'i umi'al ru' xaq xunab'ej taj are xel loq. 34Chukab' ij, i atz xub'ij che ucha':
—Yin cha'ab' xinmin wib' ru' qaqajaw; wo'or chqa'ab'arsaj chik che i a'ab'i, te'uri katok chub'i yet xaq chamina awib' ru', man keje ile chojkeb' kealax ni qak'al rumal ire —xcha.
35Are u'ankil uri chi xki'ab'arsaj chik kiqajaw che a'ab' le, are uri xok chub'i cha'xel, xaq xumin rib' ru' uqajaw; xwiri i uqajaw le xaq xunab'ej taj are xok b'i umi'al ru' xaq xunab'ej taj are xel loq. 36Lik chekeb' altom le xek'aqtaj rumal ma Lot chi kiqajaw. 37Are uri i atz xalax jun ralab', xuya pub'i a Moab, ire le are kiqajaw aj Moab wo'or. 38I cha'xel xaq xalax jun ralab', xuya pub'i a Ben-ammi, ire le are kiqajaw aj Amón, k'a are o wi wo'or.
Currently Selected:
G%E9nesis 19: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
