Hechos 1

I sujunik re uk'unik i Lo'laj Utewal i Dios

1Che i nab'e wuj#1.1 I xtz'ib'aw i wuji are i San Lucas. xintz'ib'aj chawe, nim laj winaq mam Teófilo, xinb'ij ronojel wach taq i xu'an i Jesús, xaq wach taq i xuk'ut kanoq k'a chuxeb'al loq, 2k'a che i ij are xel b'i chikaj. Xwiri chuxe'el u'enam, xeu'ul kan apostolab' ru' i Lo'laj Utewal i Dios xaq xuk'ut chke wach rajwaxik chi kki'ano. 3Chrijil chik ukamik lik saqil xuk'ut chik rib' chke, k'utb'al re chi lik k'aslik. Kawinaq (40) ij xuk'ut rib' chke xaq xulap chke wach taq usuk' i ajawinik re i Dios.

4I Jesús are k'a o ku' apostolab' xub'ij chke chi ke'el ti tan pa tinimit Jerusalén. Keje iri xub'ij chke:

—Chiwoy-ej na chi k-antaj ni pacha usujum Inqajaw chi xinlap yin chiwe. 5Qatzij ne ri chi ma Wan xuqajsaj ya pkiwi, xwiri ya kuriq i ij chi i Dios kuqajsaj ni i Lo'laj Utewal Ire piwi yix.

Relik b'i i Jesús chikaj

6I winaq are kimolom kib' ru' i Jesús, xkitz'onoj che:

—Ajwal, ¿Lik wo'or kaya chik i ajawinik pki'ab' aj Israel? —Xecha. 7I Jesús xula' uwach chke:

—Lik rajwaxik taj kiwetamaj yix pachike taq ij xaq junpa ku'an Inqajaw ronojel ni'pa i b'iroxik chi xwi pu'ab' Ire o wi u'anik. 8Xwiri are kk'un i Lo'laj Utewal i Dios piwi, kuya ni icho'ab' xaq kkowir ni ik'ux chub'ixkil in pachin yin, kib'ij ni pa tinimit Jerusalén, pa taq tinimit Judea, pa tinimit Samaria xaq chwach ronojel i jyub' ta'aj.

9Are xb'itaj ile chke, tz'aqat ike je o chutaqexik, are uri i Jesús xk'am b'i chikaj chupam jub'an sutz', lik xuch'uq rij rumali lik xkil ti chik uwach. 10Are lik k'a ketijin chutaqexik wach relik b'i i Jesús chikaj, are uri xewinaqir keb' achiyab' ku', chi lik saq ki'u'. 11Xkib'ij chke:

—Winaq aj Galilea, ¿B'uchak chi kixtaqen b'i chikaj? I Jesús le chi xk'iji chixol chi xaq xk'am b'i chikaj wo'or, lik kk'un chik, pacha u'enam xiwilo le keje ku'an tan chik ile are kk'unik; xecha.

U'ulik ma Matías puk'exel ma Judas Iscariote

12Chrijil chik ile, i apostolab' xeqaj li puwi i jyub' Olivos ipa je o wi te'eq, xetzalij chik pa Jerusalén. I jyub' le naqaj o wi che i tinimit Jerusalén, i unajtil o chupam i atb'al tzij chi kya' chke re keb'in che jun ij sábado. 13Are xeupon pa tinimit, xe'el b'i k'a che ukab' le chila ipa o wi kiposar. I tijoxelab' le je are iri: Ma Pedro, ma Jacobo, ma Wan, ma Andrés, ma Felipe, ma Tomás, ma Bartolomé, ma Mateo, ma Jacobo chi uk'ojol ma Alfeo, ma Simón chi aj Zelote xaq i ma Judas chi ucha' ma Jacobo. 14Konojel ike le, lik arewi kkimol kib' ku' jub'an ixoqib', ru' ati Mariy chi uchuch i Jesús xaq ku' ucha' man kelapan ru' i Dios.

15Che taq i ij le, xkimol kib' ni'pa i kekojon che i Dios chi kolo je waqwinaq (120) winaq, are uri ma Pedro xub'ij chke: 16Ix, wachalal chwach i Cristo, lik rajwaxik k-antaj na wach xub'ij mam David ujer rumal Lo'laj Utewal i Dios, i mam David xutz'ib'aj kan chupam uwuj i Dios wach taq ku'an ni ma Judas chi xnab'ej b'i chkiwach i jub'an chi xechapaw i Jesús. 17I ma Judas le qachi'il te'eq yoj xaq lik o te'eq re che i chak chi kqa'ano. 18Are uri x-e chulo'ik jun ulew ru' i pwaq#1.18 I ma Judas le are xk'ayiw i Jesús. chi xya' che rumal i utz taj chi xu'ano; xwiri che i k'ijib'al le, ire xxulk'atij loq lik are ujolom xuqajb'ej, xraqch'ij upam xaq xel li rixkol. 19I winaq aj Jerusalén are xketamaj ronojel ni'pa i xk'ulmaxik le, xkiya pub'i i ulew le: Acéldama, chi pkich'ab'al ike ke'eloq: “Ulew re kik'.” 20Man chupam i wuj re i Salmos keje iri kub'ij:

Kkanaj kan i rachoch pacha jun tz'inilik jyub' chaqij

xaq lik mijun kk'iji chik chupam.

Xaq kub'ij iri:

Chi jun chik kkanaj ni kan che upatan.

21K'a je o achiyab' qu' waral chi ax oj kachi'ilam wi, che taq i ij are k'a o i Ajwal Jesús chqaxol, 22are xuqajsaj ya i ma Wan puwi i Jesús xaq k'a are xel b'i chikaj. Rumali lik rajwaxik chi jun chke ike le k-ax chqaxol yoj, man keje ile k-e ni qu' chub'ixkil chi i Jesús xwalij che i kamik. Xcha ma Pedro.

23Are uri xeki'ul keb' achiyab' chi je are iri: Ma Matías xaq i ma José chi kb'ix ma Barsabás che, xaq kb'ix ma Justo che. 24Te'uri xe'ok che i lapanik ru' i Dios ru' i tziji: Ajwal, yet chi aweta'am i kanima konojel i winaq, chak'utu chqe pachin a'ulum yet chke i keb' winaqi, 25man keje ile are kkanaj ni kan upatan ma Judas chuqul chi apóstol, chi xro'taj kan ire are x-e che jun chik k'ijib'al chi kmajaw che rumal umak chi xu'ano.

26Te'uri xe'ok chu'anik i sakinik, are uri i sakinik le xtzaq puwi ma Matías; are u'anik uri chi che i ij le lik xkanaj ma Matías chu'anik upatan junam ku' i julajuj apostolab'.

Currently Selected:

Hechos 1: ACHICUB

Highlight

Copy