1 Corintios 9

Ch'ob'onik re i elik chisaq pacha xu'an i ma Pablo

1¿Nti b'awa pin-ab' yin wach i kin-ano? In olik. ¿Xatab'a in rapostol ti Ajwal? Lik in rapostol. ¿Xatab'a wilom ti uwach i Jesús chi Qajwal? Wilom. ¿Xatab'a rumal ti inchak yin chi yix xikub'a ik'ux che i Ajwal? Lik rumal. 2O la jujun kkib'ij chi yin in apóstol taj re i Ajwal; xwiri, yix lik kikojo chi in apóstol re Ire. Lik k-aljinik chi in apóstol re i Ajwal man ire u'anom chiwe chi wumal yin xijach iwib' pu'ab' Ire.

3Are i tziji kinb'ij chke i k'ax kech'aw chwe: 4¿Xatab'a usuk' taj kinkitzuq i winaq chi je kojonnaq che i Dios? Lik usuk'. 5¿Xaq lik rajwaxik chi yin kin-ano pacha kki'an i jub'an chik apostolab'? Yin wetene o wixoqil chi kkojon che i Cristo ¿Lik utz uri we kink'am b'i wu' are kin-e chkisolixik i qachalal chwach i Cristo? Lik usuk' ile; xaqjun ru' pacha kki'an i ma Pedro, xaq i jub'an chik apostolab', xaq i je ucha' i Ajwal. 6Kib'ij yix chi xwi yin ru' i ma Bernabé o uchak kojchakunik ch'akb'al re wach i kqatijo i te'uri kqapaxsaj utzij i Dios? 7¿Ku' achiyab' chi je yij che i ch'oj? Mixat jun chke ike kutojo wach taq i kutijo. ¿I jun chi ktikanik kutij ti uri uwach i utikon? Xaq i rajaw i chikop. ¿Xatab'a kutij ti leche chi kuyitz'o? Lik kutijo.#9.7 Xinb'ij ile chiwe k'unsab'al chik'ux, chi yin o we che wach i tzuqb'al we. 8Xaq to' ti punojb'al jun winaq kpe wi i xinb'ij le, man xaq keje iri kub'ij i atb'al tzij chi tz'ib'tal kanoq. 9I wuj re i mam Moisés kub'ij: “Mikoj ub'osal jun b'oyex we ktijin che i chak chrelsaxik uwach i trigo.” (Nti k-ono we kutijo). ¿Xatab'a mas k'ax keuna i Dios i b'oyexab'? 10Are taj, lik are qumal yoj xub'ij i Dios i tzij le; lik qumal yoj tz'ib'tal kan i tzij le. Pachin kchakun pa ab'ixb'al, xaq pachin i kemolowik kmajawik chi kkitij ni uwach i kitikon. 11Xaq keje yoj, we o qatikom chiwe yix; ile are utzij i Dios. ¿Kich'ob' b'awa yix chi kumaj taj we kya' chqe wach kqatijo pacha uk'iyal i qamolonik? Lik kmajawik. 12I jub'an chi kkitijo, we keitzuqu, mas o ne qe yoji chkiwach ike che i qatzuqik. Xaq o qe yoji kqatz'onoj te'eq chiwe, xwiri xqatz'onoj taj.

Ronojel xqach'ijo man utz taj we kqa'atij i kojonik yix che i utz laj tzij k'ak' re i Cristo. 13Iweta'am ut, ni'pa i je ajpatanib' prachoch i Dios, ni'pa i je ajkojol kisipon i winaq pa sujb'al sipon chwach i Dios, xaq kya' chke wach i kkitijo; kkitzuqb'ej kib' che taq i wa chi kkisipaj i winaq chila. 14Xaq keje yoj ile, i Ajwal ub'im kanoq chi yoj, oj ajpaxsanel re i utz laj tzij k'ak' re i Dios, kqatzuqb'ej qib' che i qachak le. 15O te we yin che ile, xwiri yin intz'onom ti chiwe. I tziji chi kintz'ib'aj chiwe, tz'onb'al ti re kin-ano, we o taq kiya chwe. Intz'onom taj rumali lik kinkikotik. I kikotemal le mijun kumaj chwe; mas utz wetene kinkam rumal i numik chwach ile.

16Yin kin-an ti nim che wib' rumal in ajpaxsanel i utz laj tzij k'ak' re i Dios, man kinna yin chi lik chinqul o wi ub'ixkil. ¡To' inwach yin we kinpaxsaj ti utzijol i utz laj tzij k'ak' re i Dios! 17Wetene to' inrayijb'al yin kin-an i chak le, kintoj ni rumal utzijoxik i utz laj tzijonik. Xwiri kin-an inchak le man lik chinwach o wi u'ankil, i Dios uya'om u'anik chinqul. Rumali kintijin chu'ankil. 18¿Wach i tojb'al we ut kinriqo? Are i tojb'al we are i kikotemal chi kpe pinwi are xinpaxsaj i utz laj tzij k'ak' re i Dios chi nti tojb'al we xintz'onoj. Kinkikotik man kintz'onoj taj wach kya' chwe rumal inchak chi kinpaxsaj utzijol i utz laj tzij k'ak' re i Cristo.

19Yin, nti jun winaq o pinwi chi kinutaqo; xwiri in-anom che wib' in kimokom konojel i winaq anb'al re chi kkijach ni kib' che i Cristo. 20Are in o ku' i aj Judío winaq, kin-an che wib' pacha ike, man keje ile kkijach kib' che i Cristo. Tupu yin in o ti chik pu'ab' i atb'al tzij chi utz'ib'am kan i mam Moisés, xwiri are in o ku' i aj Judío, xaq kinya wib' pu'ab' i atb'al tzij le anb'al re chke chi kkijach ni kib' che i Cristo. 21Xaq are in o ku' i ne te aj Judío winaq, xaq kin-an che wib' pacha ike, kinkoj ti retalil i atb'al tzij ke i aj Judío. Keje ile kin-ano anb'al re chke chi kkijach ni kib' che i Cristo. Xwiri lik kinkoj i atb'al tzij re i Dios man inya'om wib' pu'ab' i atb'al tzij re i Cristo. 22Xaq are in o ku' i qachalal chi qas ti jikil kik'ux, xaq kin-an che wib' pacha ike xa tob'al ke. Ke'el uri chi in-anom che wib' pacha taq i utz kkil konojel, ch'akb'al jujun chke man keje ile ketotajik. 23Ronojel ile kin-ano rumal upaxsaxik i utz laj tzij k'ak' re i Dios; kwaj yin junam kqariq ni utz chi kpe pqawi rumal i tzij le.

24Iweta'am yix, ni'pa i kkipaj kib' che i anem, je k'i ke'e pa'anem, xwiri, xa jun chke kuch'ak i sipon. Xaq keje yix ile, chib'isoj uch'akik i sipon chi kuya i Dios. 25Ni'pa i kkiyijb'a kib' che i anem, ike lik kkijek' kib' che ni'pa i utz taj chke, man keje ile kk'iyar kicho'ab'. Lik uyej kki'an chuch'akik jun koron tupu knajtin taj. Xwiri i sipon chi kqach'ak ni yoj oj re i Cristo, lik ronojel ij saq uwach. 26Rumali, yin lik kintij in-ij chuch'akik i sipon le; kin-e pa'anem, suk'ulik kin-e k'a ipa kek'is wi i b'e, i keje ile kin-ano, to' ti kinetz'anik; lik ru' ronojel incho'ab' kin-ano. 27Are i kin-ano, lik kinya inch'akul pa k'ax, lik kintiki chupek'ik i utz taj che inch'akul. Keje kin-an ile, man moqxa kinriq ti chik i sipon re i Dios. Yin ne ink'utum chke i winaq wach i kitotajik, rumali, to' inwach uri we kinriq ti chik we yin.

Currently Selected:

1 Corintios 9: ACHICUB

Highlight

Copy