1 Corintios 8

Ch'ob'onik chrij i etamanik

1Wo'or kinla' uwach i tz'onb'enik chi xi'an chwe, chrij utijawik i wa chi sujtal chkiwach i tiox. Qonojel yoj lik keta'am ile, xwiri, rajwaxik chi kqetamaj chi i nojb'al k-on to' nim che jun winaq, xwiri i k'axnab'al k'uxij lik ku'an utz che i qak'aslemal chwach i Dios. 2I jun chi kub'ij chi lik o uno'oj, alaj uri k'amaja kretamaj usuk' i saqil laj nojb'al. 3Xwiri, jun we k'ax kuna i Dios, i Dios reta'am chi i jun le re ire.

4Wo'or ut kinb'ij usuk' chiwe chrij i wa chi sujtal chkiwach i tiox: Yoj qeta'am chi tiox xaril je antalik, ile nti ki'ij chwach i jyub' ta'aj, xa jun Dios olik, nti chik jun chik. 5Je o i winaq kkib'ij tiox xaq kajwal chke i jalajuj taq b'iroxik chi o chikaj xaq ni'pa o chwach i jyub' ta'aj. 6Xwiri, chqe yoj, xa jun Dios olik, Ire are i Qaqajaw chikaj. Are ire anawnaq ronojel wach i olik, xaq yoj lik oj re Ire. Xaq xa jun i Ajwal, are i Jesucristo. Are ire yijb'awnaq ronojel i o chwach i jyub' ta'aj, xaq xa rumal ire o qak'aslemal yoj.

Ch'ob'onik chrij i k'axnab'al k'uxij

7Xwiri, konojel taj keta'am ile. O jujun chke i qachalal, u'onom loq ike lik xkikoj ki'ij taq i tiox, xaq wo'or, kkina ike kemakunik we kkitij i ti' sujtal chwach jun tiox. We kkitij i ti' le, ketijin chukojik u'ij i tiox kkina ike, man ike k'amaja qas jikil kik'ux. 8Qatzij, are ti wach i kqatijo k-anaw chqe we utz kojril i Dios, xaq we oj utz taj. Nti k-ono we kqatijo, o we kqatij taj; 9Tupu utz, chi kqatij ronojel ni'pa i b'iroxik ile, xwiri chikojo retalil che, moqxa xa rumal i ki'ano le keitzaqsaj i winaq chi kekojon che i Dios chi qas ti jikil kik'ux. 10Yix chi iweta'am usuk' ile, moq kixok prachoch jun tiox, kixupon chutijawik i wa ku' i kki'an u'ij i tiox. We jun qachalal chwach i Cristo kixrilo, chi qas ti jikil uk'ux, moq ire xa kukowij uk'ux chutijawik i ti' le chi antalik re kojb'al u'ij i tiox 11Xa rumal wach iweta'am yix le, kitzaqsaj uri i qachalal chwach i Cristo, xaq kuch'ob' ire chi utz chi kukoj u'ij i tiox, kumayij uri ukojik u'ij i Cristo chi xkam rumal i qamak. 12Yoj are kqa'an jun utz taj che jun, chi qachalal chwach i Cristo, chi k'amaja kketamaj ni'pa i utz xaq ni'pa i utz taj, ile ke'eloq chi kqa'an i utz taj che i Cristo. 13Rumali, yin, we o jun qachalal chwach i Cristo, ktzaq chupam umak xa rumal wach i kintijo, kinmayij uri utijawik i ti' rumal ire.

Currently Selected:

1 Corintios 8: ACHICUB

Highlight

Copy