1 Corintios 5

Atb'al tzij xaq pixb'anik chrij jun anik chi utz taj

1Konojel i winaq keta'am chi o jun chiwe u'anom rixoqil che ukab' uchuch. Ile, lik utz taj, lik nim laj mak chke; keje tene kki'an i winaq ile chi ne te ajkojol u'ij i Dios. 2Xwiri, ¡Yix to' ki'an nim che iwib'! ¿B'uchak xa kixb'ison ti che ile? I achi chi ktijin chu'anik ile. ¡Rajwaxik kiwesaj chixol! 3Yin, qatzij in o ti chila iwu', xwiri i wanima lik o iwu'. Ya inch'ob'om chik wach i tojb'al umak i achi le, lik pacha in o iwu' 4Yix chimolo iwib'; yin tupu naj in o wi i wanima lik o iwu', chitz'onoj tob'al iwe che i Qajwal Jesucristo; i ucho'ab' Ire lik o ni uri iwu'. 5I achi le; chiya pu'ab' i Satanás, man keje ile uch'akul ksachsax ni uwach; xwiri i ranima ktotaj na are kk'un i Ajwal Jesucristo. 6Yix kumaj taj ki'an taq nim che iwib'. We o jun chixol lik ktijin chu'anik umak, we kiwesaj taj, xa kki'an tan chik ke i jub'an. Ke'eloq pacha i tzij chi lik iweta'am yix: “I kunb'al re i wa re trigo, we koksax jub'i' che, lik juntir k-e chupam ronojel i or, xaq lik kuk'iysaj.” 7Lik chijos-ij iwib' che ujer laj kunb'al le, man kwaj yin ix jutzob'aj lik ix ch'am. Ix pacha i wa re trigo chi ktijaw chupam qanima'ij Pascua; i wa re trigo le k-an ni che i or k'ak', nti pich' kunb'al kok taq che. Yoj, wachalal, are i nima'ij Pascua o pqatinimit, man i qak'exel yoj ya kamsam chik. Are i lo'laj Qajwal Cristo chi x-an sipon che tojb'al re i qamak yoj. 8Rumali, kqa'an che i qak'aslemal ij ij pacha jun nima'ij Pascua chwach i Dios; kumaj taj kqa'an i utz taj pacha i ujer. Chqamayij u'ankil ile, xaq ni'pa taq i mak atzalal. Are chqa'ana i utz i chom ronojel qak'ux; mqa'an keb' che qapalaj.

9Che chik i jun inwuj chi xintaq b'i nab'e, inb'im chiwe chi miwachi'ilaj iwib' ku' i winaq chi chwach kich'akul kich'ak wi kimer. 10Xinb'ij taj we su' kix-el chkixol konojel i je o chwach i jyub' ta'aj, ile kkich'ak kimer chwach kich'akul, xaq ni'pa i to' kkaj kk'iyar kib'eyomal, xaq ni'pa i kki'an ela', xaq ni'pa i kkikoj ki'ij i tiox chi xaril antalik. Ike le nti rumal we kix-el chkiwach, xwi we lik su' kix-el chi chwach i jyub' ta'aj. 11I usuk' i xinb'ij le are iri: Miwachi'ilaj iwib' ru' jun chi pacha taq ku'an che rib' chi qachalal chwach i Cristo, xwiri xa kuch'ak umer chwach uch'akul, xa kurayij uwach ub'itaq re jun chik, xaq ni'pa i kkikoj u'ij tiox chi xaril antalik, xaq ni'pa i k'ax kech'awik; xaq ni'pa i je ab'arel laj taq winaq, xaq ni'pa i je ili'om; lik mitij i wa ku' taq ike le. 12Man yin taj kin-at tzij pkiwi i je re ti Dios; are i Dios k-ataw tzij pkiwi ike. 13Xwiri yix, chiqul o wi u'atik tzij chke i jutaq tzob'aj re i Dios, rumali lik chiwesaj achi le chixol chi aj-anol mak.

Currently Selected:

1 Corintios 5: ACHICUB

Highlight

Copy