1 Corintios 4

I kichak i apostolab'

1Chiwetamaj uri chi yoj xa oj rajchak i Cristo, xa oj ajb'il re chiwe ni'pa i unojb'al i Dios chi u'anom loq uwam te'eq uwach chke i winaq. 2Xwiri, jun we yatal jun anik chuqul, o ni uchak chu'ana na lik pacha b'ital che rumal i rajaw uchak, k'utb'al re chi utz laj ajchak. 3Yin kink'achir ti che wach kich'ob' yix che inchak; wach taq kub'ij jun atb'al tzij re uwach jyub' ta'aj chwe, we utz inchak o we utz taj, xaq mitene yin kin-at taq tzij pinwi. 4Yin kinna pink'ux chi lik utz in-anom, xwiri ru' ile i Dios kub'ij taj we nti inmak. Man weta'am chi are i Ajwal k-ataw tzij pinwi. 5Rumali mi'at tan tzij yix puwi jun chik; chiwoy-ej na k'a kk'un ni Ajwal. Ire kusaqij ni ronojel i b'iroxik chqe chi qatom ti usuk' yoj, ile are ni'pa i qach'ob'om qonojel pqak'ux; ku'aljinsaj wach usuk' i kojtijin chu'ankil. Te'uri i Dios kuya ni qa'ij pacha kmajaw chqe chqajujunal.

6Wachalal chwach i Cristo, xinlap iri chiwe, chi xin-an yin, xaq i xu'an i ma Apolos, man re k-onb'ej utz chiwe yix. Kwaj kixnaw uri che chi o uchak ki'an yix pacha i tz'ib'tal kan chupam uwuj i Dios. Kwaj kixnaw che chi utz taj kiya ik'ux che jun ajchak re i Dios. Utz taj we o jun kub'ij: Utz in-anom man yin in teren chrij i achi ri, xwiri i jun le utz taj, mib'ij uri ile man utz taj. 7We keje kib'i ile utz taj. ¿Pachin x-anaw mas utz chiwe yix chkiwach? Mijun. Ni'pa i o iwu' wo'or, are i Dios yawnaq chiwe. B'ay, we are Ire uya'om, ¿B'uchak ut laj ki'an nim che iwib'? ¿Pacha taq iriqom yix ile piwach wi?

8¿Kich'ob' taq wa yix nti chik o rajwaxik chiwe? ¿Xatab'a ix b'eyom chik chwach i Dios? ¿Xatab'a ix nimaq taq ajawinel chik? ¿Xatab'a xixnab'ej chqawach yoj? Utz te ri we qas ix ajawinelab' chik, man xaq keje ne te yoji, oj ajawinelab' junam iwu'. 9Kwil yin, yoj chi oj apostolab', i Dios u'anom chqe chi nti qa'ij. Xa pacha oj ajprex chi kojkamsax ni chkiwach konojel i winaq. Kojkitaqej konojel i winaq pacha kki'an jun ka'ay chqe, xaq chkiwach konojel i ángel. 10Yoj chi oj apostolab' pacha nti qano'oj kojkil i winaq, man lik qaya'om qak'ux che i Cristo; xwiri yix, lik chitioxij man rumal ix teren chrij i Cristo xix-on b'iw, xwiri i yoj nti qas qa'ij chiwach yix, yix lik mas o i cho'ab', kib'ij. I winaq kojkaj ti yoj, xwi yix kkikoj i'ij. 11K'a are o wi wo'or, yoj qatijom numik, qatijom k'atik, qatijom nti qa'u', xaq kqatij i k'ax kumal i winaq; xaq nti jun qachoch ipa kojjeqi wi; 12xaq lik kojkos che i chak chi kqa'ano ch'akb'al re i qawa. Are kojyo'yax kumal i winaq, xa kqatz'onoj i utz re i Dios pkiwi; kqatij i k'ax kumal i winaq, xwiri kqach'ijo. 13Are kkib'ij k'ax chqe, yoj kqab'ij i utz chke. Kki'an chqe pacha oj tz'il chi mestal b'ik, pacha i ch'am taj chi kkik'aq b'i i winaq pa es. Keje ki'anom ile chqe, xaq k'a are o wi wo'or.

14Kintz'ib'aj iri chiwe re ti yab'al ik'ix; xa re kixinpixb'aj pacha lik ix wak'al lik k'ax kixinna'o. 15Tupu je o jo'mo' juchiy (10,000) tijonelab' iwu' ketijin chuk'utik utzij i Cristo chiwe, ike ne te iqajaw, xwi yin, man wumal yin xita i utz laj tzij k'ak' re i Dios, xaq lik xikub'a ik'ux che i Jesucristo. 16Rumali, lik kinb'ij chiwe chi'ana yix pacha i kin-an yin.

17Rumal ile xintaq b'i a Timoteo iwu'. Are ire pacha wak'al rumal i Ajwal, lik k'ax kinna'o. Are kupon ire iwu' kuk'unsaj chik'ux wach ink'aslemal yin chwach i Cristo, chi xaq kintijin chuk'utik chke konojel i jutaq tzob'aj re i Dios ipa kinik'aw wi. 18Je o jujun chiwe yix, to' nim ki'anom chik che kib'; kkib'ij ike chi kinupon ti chiwilik#4.18 Man kinxij chik wib' chke, kkib'ij ike.. 19Xwiri we xraj i Dios ya kixewila. Te'uri kwil na we qas o i kicho'ab' ike chi ki'anom nimaq che kib', moqxa to' kichi'. 20Man i usuk' i ajawinik re i Dios pqak'ux are ti wach taq kqab'ij, lik are i cho'ab' chi o qu'. 21¿Wach kiwaj yix kin-ano are kinupon iwu'? ¿Kiwaj kixeinyaja? ¿O kiwaj kinupon iwu' ru' k'axnab'al ink'ux, chi lik utz che ik'ux yix?

Currently Selected:

1 Corintios 4: ACHICUB

Highlight

Copy