San Marcos 3
3
A xi'ra a muj xit'i u k'ʌ'
(Mt. 12.9-14; Lc. 6.6-11)
1Kʌ' oki Jesús yok'o u nʌji tuku much'ik u bʌjo' a judíos u xake u t'ʌn K'uj; tita tiʌ junturi' xi'ra a muj xit'i jump'eri' u k'ʌ'. 2Y tʌn u ch'ukta' Jesús wa ku ch'ensik a xi'ra a muj xit'i u k'ʌ' u k'ini ku je'sik u bʌjo' a judíos ti' u pʌk'a u pach. 3Jesús tu ya'ti' a xi'ra a muj xit'i u k'ʌ':
—Lik'en ch'ikta y xen tu chumuki a winik,
4Pachi, Jesús tu k'ata tio':
—¿Baiki tsoy u meta' u k'ini ku je'sa' bʌj, u meta' a tsoy ba' ou meta' a mo' tsoy ba', a wʌntik u kuxta a bojo' o a kinsik a bojo'?
Chen mix mok tu nuka ti' Jesús. 5Ts'ik u wich a Jesús ka tu pʌktaj tu woro a mok tiʌ tu yʌn y ne mo' tsoy u yor ka tu yira ne chich u pixʌno' y Jesús tu ya'ti' a xi'ra a muj xit'i u k'ʌ':
—Tich'e a k'ʌ' kʌ'nʌ.
A xi'ra tu tich'a u k'ʌ' y toj se'p' ch'eni u k'ʌ'. 6Chen tu woro a u winiko' a judíos a ku ya'batio' fariseos se'p' jok'o tu tiʌ Jesús, ij bino' u kato' u yor yete u winik a Herodes ti' u kinsiko' a Jesús.
Ne pim a winik tiʌ tu xur a peta'
7Jesús bini yete u kʌ'sa winiko' ix u xur peta' y ne pim u winki u lu'mi Galilea yete u winki u lu'mi Judea bini tu pach Jesús, 8Yete u winki u kʌjta Jerusalén, u winki u lu'mi Idumea, bexi' yete u winki a ti' u tar ch'ik tu pach u uk'un u k'aba' Jordán, bexi' a ti' u tar u kʌjta Tiro yete u kʌjta Sidón, jach pim taro' tu yʌn Jesús tu tu yuo' jach ya'p tsoy ba' tʌn u metik Jesús 9Jesús tu ya'ti' u kʌ'sa winiko' ka u toj kʌxto' jump'e chem ti' tsoy u tsikba, ti' mu' yup'a' tu ne jach pim a winik tari tu yʌn. 10Tu ne ya'p tu ch'ensa u ya'ji a winik Jesús; a winiko' a mok mo' uts, chu'mpʌjo' u purkubʌjo' tu yok'o Jesús tu ne poch u tʌrko' Jesús ti' u ch'eno'
11Tuk'in tu woro a kisin a akʌ' tu yok'o a winik, kaj u yiro' a Jesús, tu laj xonkintubʌjo' tu tiʌ Jesús y k'ʌ'm tʌn u yaboto', tʌn u yei'ko':
—¡A tech lʌji' u Ti'a K'uj!
12Chen Jesús tu jach chich k'eya a kisin a akʌ' ti' a winik, ti' u mu' yueta' moki a Jesús.
2. A ba' mo' nʌj ira' yok'o u kʌjta K'uj
(3.13—6.6)
Jesús ku tejtik doce apóstoles
(Mt. 10.1-4; Lc. 6.12-16)
13Pachi Jesús nʌ'ki ix jo' wits, y tu pʌya a mok poch u pʌyik, ij taro' tu tiʌ Jesús 14Jesús tu tejta doce xi'ra ti' u mʌn yete, ti' u tuchi'tik u tsikbʌtej u t'ʌn, 15y tu ts'a u muk' tio', ti' u ch'ensik tu woro ya'jo' a winiko' a mok mo' utso' y ti' u jarik kisin a mok akʌ' ti'. 16A je' lʌji' u k'aba' a doce xi'ra a tu tejta Jesús: Simón lʌji' tʌk'a u jer u k'aba' Pedro; 17A juntu u k'aba' Jacobo lʌji' u ti'a Zebedeo, a juntu u k'aba' Juan lʌji' u yits'in a Jacobo a lʌji' tu tʌk'a u k'abo' Boanerges lʌji' u nu'ku, «u ti'a a bex ku jats' K'uj»; 18a juntu tu tejta u k'aba' Andrés, a juntu u k'aba' felipe, a Bartolomé, a Mateo, a Tomás, a Jacobo u ti'a Alfeo, a Tadeo, a Simón a lʌji' u winik a cananeos, 19A juntu tu tejta u k'aba' Judas Iscariote a mok pachi lʌji' ku bin u k'ube Jesús ti' u kinsa', pachi ka ts'o'k u tejtik Jesús, sutbʌjo' ix yatoch yete Jesús.
Jesús ku kʌ'sik yok'o a winik a ku yei'ko' mo' tsoy ba' ti' u Pixʌn K'uj
(Mt. 12.22-32; Lc. 11.14-23)
20Ka' tar u jer ne pim a winik tu tiʌ Jesús, toj mix cha'bo u k'ʌs jʌno'.
21Ka tu yuo' u bojo' Jesús baij ku metko' a winik, taro' u chuko' a Jesús, tʌn u yei'ko' sa'ti u tuku a Jesús.
22Chen a ku kʌ'sko' u t'ʌn K'uj a toj u ts'ibtamʌ a Moisés uchik a ti' u taro' ix u kʌjta Jerusalén, tʌn u yei'ko'; «ok ti' a Jesús u Ts'uri a kisin u k'aba' Beelzebú y yete u muk' a kisin ku jarik ti'a winik a mok akʌ' kisin tu yok'o.»
23Y Jesús tu pʌya a mok tʌn u yei'ko' ba' ti', ka u ye'sa' tio' a kʌ'sa a yʌn u jer u nu'ku, y tu ya'a: «¿Yʌn wa a kisin u k'aba' Satanás jeu' jarik u bʌj wa akʌ' yok'o winik? 24Maj wirik, wa yʌn jump'e kʌjta wa u winki ku ts'iko' yete u yet bojo', a lay u kʌjto' jeu' laj ts'oko. 25Wa ti' kʌjʌ' winik yok'o jump'eri' nʌj, wa ku chu'mpʌjo' u ts'iko' yete u yet bojo', a layo' binukaj ts'oko u kʌjto' ket. 26Wa a kisin u k'aba' a Satanás ku lik'o tu ts'iki yete u yet bojo' y ku jʌtsik u bʌjo', mʌnʌ' u ya'p kuxto' y ti ku bin k'uchu tu k'ini u ts'oko a kisin.
27»Mix mok ku yoko tu yatoch u bojo' u yakre u ba', wa u winki a nʌj ne chich u muk', yʌnti' u yʌ k'ʌxik, y pachi je'e u yakrik.
28»Jach taj kin wei'k teche'x, tu woro a winik a mok ne yʌn u k'ebʌn binukaj laj sa'sa' ti', tak yʌn ba' tu ya'a ne mo' tsoy, jeu' laj sa'sa' ti', 29chen wa mok ku yei'k mo' tsoy ba' ti' u Pixʌn K'uj, a lay mʌnʌ' u sa'sa' ti', ku bin p'ata ne yʌn u si'pi ti' K'uj tu woro k'in.»
30A tu tu yao' a winiko' yʌn kisin tu yok'o Jesús, ben Jesús bex tu ya'a bex.
U nʌ' a Jesús y yete u yits'ino'
31Pachi taro' u yits'ino' yete u nʌ' a Jesús tu tiʌ Jesús, jari tij p'ato' ch'ikta jaknʌki, jai' tu tuchi'to' u t'ʌno' a Jesús. 32A winiko' a mok kurukbʌjo' yete Jesús, tu yao' ti' a Jesús:
—A nʌ' yete a wits'ino' tiʌ jaknʌki, tʌn u kʌxtikech.
33Jesús tu nuka tio':
—¿Moki in nʌ' y moki in wits'ino'?
34Kaj u pʌktaj Jesús tu woro a mok u yet kuta, kaj ya'a:
—A je' lʌji' in nʌ', a je' lʌji' in wits'ino'. 35A mok ku jach metik a baij u k'at K'uj, a lay lʌji' in wits'ino', y lʌji' in nʌ'.
Currently Selected:
San Marcos 3: PLacNaha
Highlight
Share
Copy
Want to have your highlights saved across all your devices? Sign up or sign in
Sociedad Biblica de México AC
