San Marcos 4
4
Jesús ku tsikbʌtik a mok ku nʌj meaj ix kor jay yʌn u jer u nu'ku u kʌ'sa
(Mt. 13.1-9; Lc. 8.4-8)
1Jesús ka' chu'mpʌ u kʌ'sa yok'o u xur a peta', tu much'a u bʌj ne pim winik tu ti'a Jesús, ben ka nʌ'ki Jesús yok'o chem y ti' kuraj tu tsikba yok'o a peta' y tu woro a winik tu much'a u bojo' tu xur a peta' u ch'exto' u tsikba. 2Jesús tu kʌ'sa' ne ya'p ba' yete a yʌn u jer u nu'ku.
Y bex tu kʌ'sa: 3«Ue'x a baij kin kʌ'sik teche'x: Junturi' xi'ra a ku nʌj meaj ix kor, bini u pʌk'e ba'; 4kaj chu'mpʌ u pʌk'ik, yʌn jun ok u nek' u pʌk'a juti ix bej y tari a ch'ich' tu laj luk'a a bich'ikba ix bej. 5U jer jun ok juti ix tunich tu ma' pim u lu'mi; toj se'p' kaj ts'eji tu jay u lu'mi, lʌji' se'p' kaj jok'. 6Chen kaj nʌ'ki k'in, u k'ak'i a kin tu toka a pʌk'a y laj tiji tu ma' tʌm bin a u mots ix lu'm. 7U jer jun ok juti ix k'i'x; kaj ch'iji a k'i'x tu laj bʌk'a u pʌk'a y tu chʌkubʌj y ma' tsayi u wich. 8Chen u jer jun ok juti tu jach tsoy u lu'mi, kaj ts'eji, ch'iji y jach ya'p tsayi u wich, yʌn u pʌk'a tsayi treinta u wich. U jer kaj u ts'a sesenta u wich. U jer kaj u ts'a cien u wich.»
9Jesús tu ka a'a tio': «A mok yʌn u xikin ti' u yui'k, u ki ue baij ki wei'k.»
¿Biken Jesús ku kʌ'sik yete u jer u nu'ku?
(Mt. 13.10-17; Lc. 8.9-10)
10Tuk'in tu juna tiʌ Jesús, toj jari yete a doce u apóstoles yete a mok a ti' yʌno' xok'o ti', tu k'ato' ti' Jesús, baiki u nu'ku u kʌ'sa a yʌn u jer u nu'ku a tu kʌ'sa. 11Jesús tu ya'tio': «A teche'x je' u ye'sa' bik taba u nu'ku tu ku wesintik K'uj a tiʌ kʌ' ti'a wetke'x u t'ʌn, a mo' nʌj ira' a ti' u tar yok'o tu ku wesintik K'uj a tiʌ kʌ'; chen a mok muj yaksik tu yor ti' ten jari ki we'sik yete a kʌ'sa yʌn u jer u nu'ku, 12Je'e u chʌ'ntko' jai' mʌnʌ' u yirko' baiki, ku bin u yuo' jai' mʌnʌ' u yetko' baiki, pati' mo' yaksik tu yoro' ti' K'uj bexi' ti' mu' sa'sa' tio' u k'ebo'.»
Jesús ku ye'sik bik taba a bex u nu'ku a xi'ra ku nʌj meaj ix u lu'mi u meaj
13Jesús tu ya'tio': «¿Maj ki' ue'x a je' in kʌ'sa a yʌn u jer u nu'ku? ¿Bik ka bin a ki ue'x tu woro a ba' ki we'sik yete a kʌ'sa a yʌn u jer u nu'ku? 14A xi'ra a ku nʌj meaj ix kor lʌji' u nu'ku ku pʌk'ik u t'ʌn K'uj. 15A juti yok'o u tʌn bej: Lʌji' u nu'ku a bex ku pʌk'a ti' u t'ʌn K'uj, chen pachi chen u ts'oko' u yui'ko', toj se'p' ku tar a kisin a lʌji' Satanás, ku tar u take tia winik a baij pʌk'a yok'o u pixʌn, ti' u tup'sik u t'ʌn K'uj. 16Bexi' aj pʌk'a tu ne yʌn tunich: Lʌji' u nu'ku a bex a mok ku yui'k u t'ʌn K'uj, toj ka u yue ne ku tsoy tu yoro'; 17chen mo' tʌm bina' u mots tu yʌn, toj muj xʌnta u kuxta, toj ka tak u tunta' u yor, ka tak kʌxmeta' tuku yuiko u t'ʌn K'uj, toj se'p' ku p'ʌtko' u t'ʌn K'uj. 18A to'o pʌk'a tu ne yʌn k'i'x: Lʌji' a mok ku yui'k u t'ʌn K'uj, 19Chen jai' ku tukrik u bʌj baij ku bin tar u metik, jai' ne ku tukrik u ts'urchʌ y ne poch u laj tenetik tu woro ba', y tu nej ya'p u ba', y ya muj cha'ba ti' u ki uik' u t'ʌn K'uj ti' u ki metik. 20A je' lʌjio' a to' pʌk'a tu ne tsoy u lu'mi: Lʌji' a mok ku yui'k u t'ʌn a K'uj y ku jach metik, ku jach tsa'ya treinta u wich, a juntu ku ts'ek sesenta u wich y a juntu ku ts'ek cien u wich.»
Jesús ku ye'sik a bex u nu'ku a bex a kip'
(Lc. 8.16-18)
21Bexi' Jesús tu ya'tio': «¿Yʌn wa mok ku yaksik u kip' wa t'ʌbʌ' ix u yarʌn u lek o ku yaksik tu yarʌn u ch'ak? ¿Mo wa ku t'ʌbik y ku kukitik ti' u tichk'a? 22Lʌiti' a bex a tu woro a ba' a mukutaka' jeu' laj eta' baiki; mʌnʌ' ba' ku p'ata muj bin u laj eta' baiki. 23Wa mok yʌn u xikin ti' u yui'k ba', u ki ue.»
24Bexi' tu ya'tio':
«Ki ch'exte a wue'x baij ka wui'ke'x; a bex ka p'isik ti' a bojo' bex ku bin u p'ise tech K'uj y hasta más ku bin u p'ise teche'x. 25Chen a mok yʌn ti', más ya'p ku bij ts'abati' y a mok mʌnʌ' ti' tak tiʌ chichin ti' binukaj laj taka' ti'.»
Jesús ku kʌ'sik yok'o a ku ch'iji u nek' tu woro ba' jai' yʌn u jer u nu'ku u kʌ'sa
26Jesús bexi' tu ya'a: «A tu ku wesintik K'uj a tiʌ kʌ' bex bixa a junturi' xi'ra ku pʌk'ik u nek' u pʌk'a ix lu'm: 27Tak a xi'ra ku wene y ku lik'i ak'bi o chuk'in, u nek' u pʌk'a ku ts'eje y ku ch'iji y mix ku yirik bik ku ch'iji. 28Toj u bʌji' a lu'm ku ts'ek u ch'iji a baij pʌk'a ti', ku yʌ tichi u muni u le' pachi chen u ts'oko u ch'iji, ku ts'ek u top' pachi ku tsa'ya u wich. 29Tuk'in ku tʌjʌ u wich, u winki ku yirik k'uchi u p'is u t'aka ku t'akik.»
Jesús ku tsikbʌtik u wich a mostaza jay yʌn u jer u nu'ku u kʌ'sa
(Mt. 13.31-32; Lc. 13.18-19)
30Jesús bexi' tu ya'a: «¿Ba' yete p'is lʌiti' a bex tu ku wesintik K'uj a tiʌ kʌ'? 31Bex bix u nek' a mostaza, tuk'in ku pʌk'a yok'o lu'm, lʌji' ne cho mijin y mo' bay a bex a yʌno' yok'o tu woro a lu'm, 32chen tuk'in ku pʌk'a y ku ch'iji, lʌji' ku ne jach ne nuktaj u ch'iji, ku jach ne jok'o u k'ʌ', y a chich ku tar u meto' u k'uo' yok'o u bo'i u k'ʌ', chen ku sut u jer pʌk'a, cho chichin ku p'ata.»
Jesús ku kʌ'sa yete a kʌ'sa a yʌn u jer u nu'ku
(Mt. 13.34-35)
33Jesús tu tsikbʌta u t'ʌn K'uj yete ne ya'p a kʌ'sa a yʌn u jer u nu'ku ti' tsoy u ki uiko' a winiko'. 34Jesús muj tsikbʌtik u t'ʌn K'uj wa muj kʌ'sa yete a kʌ'sa a yʌn u jer u nu'ku; Chen ti' u kʌ'sa winiko' toj ku ki kʌ'sik to' u taji tu woro ba' tuk'in tiʌ tu juna yete tio'.
Jesús ku xurik ne k'ʌ'm u yik'i ix peta'
(Mt. 8.23-27; Lc. 8.22-25)
35Lʌiti' u k'ini kaj ʌk'ʌche tu ya'a Jesús ti' u kʌ'sa winiko':
―Ko'xe'x ak ch'ʌkte tu pach a peta'.
36Jesús tu p'ʌta a ne pim a winik, y nʌ'ko' u kʌ'sa winiko' a Jesús yok'o chem toj tu ti'a Jesús ij bino'; bexi' u jer winiko' bino' yete u jer chem. 37Lʌji' kaj lik'i ix petaj ne k'ʌ'm u yik'i, lik'i ne nuk yʌ'mi a petaj ka chu'mpʌ u yoko ix chem ne ya'p u ya'ri. 38Chen Jesús tiʌ tu pach a chem wenuka' u t'ʌkumʌ u jo' yok'o jump'e k'öjö'; ij ʌ'sa' ij a'bti' ten u kʌ'sa winiko':
―¡Wʌjkʌ'si! ¿Ma' wa ka tukrik ij kimo'?
39Y lik'i Jesús, y tu li'sa' u t'ʌn ti'a ik' y tu ya'ti':
―¡Xure ik'! ¡Ma' a tar!
Ij xu'ri u ne k'ʌ'm u yik'i, ij p'atij mix u yʌ'mi a peta' 40Jesús kaj u ya'ti' u kʌ'sa winiko':
―¿Biken ne ja'k' a wore'x? ¿Maj ki waksaje'x ta wore'x ti K'uj?
41U kʌ'sa winiko' tu jach sʌjto', kaj yao' yete u bojo':
―¿Moki a je' a xi'ra, ku yua u t'ʌn ti'a ik' y a peta'?
Currently Selected:
San Marcos 4: PLacNaha
Highlight
Share
Copy
Want to have your highlights saved across all your devices? Sign up or sign in
Sociedad Biblica de México AC
