San Marcos 2

Jesús ku ch'ensik junturi' xi'ra a muj ch'ikta

(Mt. 9.1-8; Lc. 5.17-26)

1Chen mʌni mo' ya'p u k'ini, Jesús ka' oki ix u kʌjta Capernaum, ka tu yuo' a winik tiʌ Jesús. 2Toj se'p' tu much'a u bojo' ne ya'p, toj mix laj oki yok'o u jor u nʌji tu tiʌ Jesús; y Jesús chu'mpʌ u tsikbʌtik u t'ʌn K'uj. 3Kaj tari cuatro xi'ra u kuchbo' u bojo' a muj ch'ikta 4Tu yiro' mo' bik u xok'o tu' yʌn a Jesús tu ne pim a winik tiʌ, ij nʌ'ko' tu pach u nʌji ti' u lʌkik u pach a nʌj, pachi ka tu lʌko', tu yenso' u ch'aki tu cha' u bojo' a to'o muj ch'ikta. 5Jesús kaj u yira bik tu jach ki aksa tu yoro' ti' a cuatro xi'ra, tu ya'a ti a mok muj ch'ikta:

—Ti'a, tu woro a k'ebʌn ki laj sa'sik tech

6Chen a ku kʌ'sko' u t'ʌn K'uj a toj u ts'ibtamʌ a Moisés uchik, kurukbʌjo', tʌn u yei'ko' tu tuko': 7«¿Biken ku t'ʌn bex? Tʌn u pach'ik K'uj. ¿Toj jari K'uj ku sa'sik u k'ebo'?.» 8Chen se'p' tu k'ok'ota Jesús a baij ku tukriko', y tu ya'tio':

—¿Biken bex ka tukrike'x yok'o a pixane'x? 9¿Baij kin tsoy in wei'k ti' a je' xi'ra a muj ch'ikta: “tu woro a k'ebʌn ti' laj sa'sa' tech” o wei'k ti': —“Lik'en, li'se a ch'ak y xen”? 10—Bin in we'sik teche'x beje', tia' wirik jach yʌn u muk' u Ti'a Xi'ra way yok'o lu'm, ti' u sa'sik u k'ebo' a winik.

Tu ya'ti' a xi'ra a muj ch'ikta:

11—Ti' tech ki wei'k tech: Lik'en, li'se a ch'ak y xen ta watoch.

12A xi'ra a muj ch'ikta toj se'p' lik' ch'ikta, tu li'sa u ch'ak y ximuka' kaj jok'i tu tiʌ a winiko' y tu woro a winiko' jach peknʌ u yoro' ka tu yiro' ch'eni a xi'ra, ij chu'mpʌjo' u yei'ko':

—Jach chich a muk' a tech K'uj kaj wirik mix mok in wirbo' u ch'ensa a bex beje' tin wiro'.

Jesús tu pʌya a Leví

(Mt. 9.9-13; Lc. 5.27-32)

13Pachi Jesús ka' bini tu xur a peta'; tu woro a winik tari tu yʌn a Jesús, y Jesús tu kʌ'so'. 14Y ka tʌn u mʌn Jesús, tu yira a Leví u ti'a Alfeo kurukba yok'o u pojche' tuku k'atik u bo'ri u ba' u bojo' y tu ya'ti':

—T'u're in pach.

Y lik'i a Leví y bini tu pach Jesús.

15Pachi, bini Jesús tu jʌnʌ ix u yatoch a Leví, y ne pim a mok ku meaj tij wes a ku k'atik u bo'ri u ba' u bojo', yete a mok ne yʌn u si'pi u yet kuta Jesús y u kʌ'sa winiko'; jach ne pim winik tari tu pach Jesús. 16Kaj u yiro' u winiko' a judíos a ku ya'batio' fariseos yete a ku kʌ'sko' u t'ʌn K'uj a toj u ts'ibtamʌ a Moisés uchik yete a mok ku meaj ti' wes a ku k'atik u bo'ri u ba' u bojo' yete a mok ne yʌn u si'pi, tu yao' ti' u kʌ'sa winik Jesús:

—¿Baij ka je' kin wirko', biken Jesús ku jʌnʌ yete a mok ku meaj ti' wes a ku k'atik u bo'ri u ba' u bojo' yete a mok ne yʌn u si'pi?

17Ka tu yua Jesús u yei'ko' bex, tu ya'tio':

—A mok ne utso' mo' sik u kʌxta' ti' a mok u ye ts'ak ti' u ts'ʌka', jai' ku kʌxta' ti' a mok mo' utso'. A ten moj taren in kʌxte a mok mʌnʌ' u si'pi, a ten taren in pʌye a mok ne yʌn u si'pi ti' u k'axko' u tuko'.

Ku k'ata' ti' Jesús biken ku jach muk'tiko' u jʌno'

(Mt. 9.14-17; Lc. 5.33-39)

18U kʌ'sa winik a Juan yete u winiko' a judíos a ku ya'batio' fariseos tʌn u muk'tiko' u jʌno'; ij taro' u winik tu ti'ʌ Jesús u k'ato' ti':

—¿Biken jari tʌn u muk'tiko' u jʌno' au kʌ'sa winik a Juan yete u winik judío a ku kʌnʌntik u t'ʌn a Moisés, y a tech a kʌ'sa winik mʌnʌ' u muk'tiko' u jʌno'?

19Jesús tu nuka tio':

—¿Wa je'e u muk'tiko' u jʌno' a mok pʌya' tu jʌnʌ tuk'in tʌn u chei'ko' u lak' wa ti'ʌ a xi'ra yete tio', a lʌji' u lak' a ch'upra? Chen beje' ti'a xi'ra u lak' a ch'upra, ben mʌnʌ' u muk'tiko' u jʌno'. 20Binukaj tar u k'ini ku bin taka' ti' u xi'rai a ch'upra, a lay u k'ini jeu' u muk'tiko' u jʌno'.

21»Mix mok ku ch'eik u xo't'o nok' a tumen ti' u ch'eik u pʌk'e yok'o jump'e nok' a ne uchmen, wa ku pʌk'ik au xo't'o a tumen nok' bin u más jʌte a uchmen y bin u más koxta tu jata. 22Bexi' mix mok ku t'ʌjik a tumen u ya'ri ts'us yok'o jump'e uchmen ba'ay a menʌ' u yot'e bʌk'; wa ku t'ʌja', a tumen u ya'ri a ts'us jeu' laj jʌntik a uchmen a ba'ay a menʌ' u yot'e bʌk', jeu' laj jochbʌ u ya'ri a ts'us, bexi' ya mu bin k'ʌna' a uchmen a ba'ay a menʌ' u yot'e bʌk', ben toj jari ku t'ʌja' tumen u ya'ri a ts'us yok'o tumen a ba'ay.

U kʌ'sa winiko' a Jesús tʌn u jo'kik u wich a trigo u k'ini ku je'sik u bʌjo' a judíos

(Mt. 12.1-8; Lc. 6.1-5)

23Kaj tʌn u mʌn Jesús yok'o u lu'mi tuku pʌk'a a trigo, lʌji' u k'ini ku je'sik u bʌjo' a judíos#2.23 U k'ini ku je'sik u bʌjo' a judíos: A lʌji' u k'ini sábado a ku je'sik u bʌjo' a judíos ti' u t'ʌnko' K'uj., u kʌ'sa winik a Jesús chu'mpʌjo' jo'kik u wich a trigo. 24A u winiko' a judíos a ku ya'batio' fariseos tu yao' ti' Jesús:

—Ch'exte a wue in wei'k tech, ¿biken a kʌ'sa winiko' ku metko' a ba' mo chaʌ' a meta' u k'ini ku je'sa' bʌj?

25Chen Jesús tu nuka tio':

—¿Ma' wa xakbe'x tu ku yei'k a baij tu meta David uchik, ka wijchʌj ket yete a mok u yet mʌn; 26kaj oki yok'o u yatoch K'uj a menʌ' yete nok', u k'ini lʌji' ku meaj Abiatar u jach t'oji a mok ku meaj yok'o u yatoch K'uj a menʌ' nok', a David tu jʌnto' uj pʌni a ti' yʌn yok'o u pojche' a ku ts'abati' K'uj, a ma' tsoy u jʌntko' u jer winik toj jari ku jʌntko' a mok ku meaj yok'o u yatoch K'uj, ka wirik David lʌji' tu jʌnta yete a mok u yet mʌn?

27Bexi' Jesús tu ya'tio' u jer ba':

—U k'ini ku je'sik u bʌjo' a judíos lʌji' meta' ti' u tsoykintik u yor a winik, moj meta' a winik ti' u tsoykintik u yor jari a lay u k'ini. 28Ben a u Ti'a Xi'ra, lʌji' u Ts'uri u k'ini ku je'sik u bʌjo' a judíos.

Currently Selected:

San Marcos 2: PLacNaha

Highlight

Copy