San Marcos 12

A mok ne mo' tsoy u meajo'

(Mt. 21.33-46; Lc. 20.9-19)

1Jesús chu'mpʌ u kʌ'sa yete a kʌ'sa a yʌn u jer u nu'ku: «Junturi' xi'ra tu meta u lu'mi meaj ti' u pʌk'ik u yo'ch nukuch ts'us (uva), tu sutmʌkta y tu meta u nʌji tuba u metik ya'ri aj nukuch ts'us, y tu meta u nʌji tiu kʌnʌntik, pachi tu ts'a u mʌjʌnte y ti' bini nʌchi. 2Kaj k'uchi u k'ini tu tuchi'ta junturi' u k'ʌni' tia ku meaj yok'o u lu'mi nukuch ts'us, ti u ts'abati' a je' u wich a nukuch ts'us. 3Chen a layo', tu chuko', y tu laxo', y tu ka tuchi'to' y mix k'ʌs ba' tu cha'a u ch'eik. 4Y tu ka tuchi'ta u jer u k'ʌni'; y jai' ch'ina' yete tunich yok'o u jo' y laj bexi' tu tuchi'to' mix k'ʌs ba' tu cha'a u ch'eik. 5Tu ka' tuchi'ta u jer, y a je' kinsa' y ch'ik pim tu tuchi'ta u jer, chen tu laj laxao' y tax jujuntu laj kinsa'.

6»Y ya u ts'ok tiʌ junturi' a lʌji' u xi'ra u ti'a a jach otsi u yik, tu tuchi'ta laj bexi', y yok'o u tuku ku yei'k: Jeu' yua' u t'ʌn u ti'a y mʌnʌ' u kʌxmeta'. 7Chen a mok a ku kʌnʌntiko' u lu'mi tu p'ʌk'ʌ u nukuch ts'us u winki a lu'm, ka tu yiro' u ti'a u winki a lu'm, tu yao' yete u bojo': “A je' lʌji' u ti'a u winki a lu'm a ku bin u p'ʌte u lu'mi u p'ʌk'ʌ nukuch ts'us ka kimik, ka ʌk kinse, y ti' to' ku bij p'ʌta u lu'mi u p'ʌk'ʌ a nukuch ts'us. 8Y tu chuko' u ti'a u winki a lu'm, tu kinso' y tu jaro' tu lu'mi u p'ʌk'ʌ a nukuch ts'us.

9»¿Baij ku bin u mete u winki a lu'm ti' a ku kʌnʌntik u lu'm u p'ʌk'ʌ a nukuch ts'us? Jeu' tar y ku laj bin u kinse a ku meaj tita, y ku bin u ts'ae u lu'mi tuku pʌk'a nukuch ts'us ti u jer winik.

10»¿Ma' wa ja' xakmo'ex a ts'ibʌ' yok'o u t'ʌn K'uj? A je' ku yei'k:

A tunich a mo' tsoy ira' ten a winik a mok ku meaj nʌj,

beje' lʌji' wayi a tunich,

a jach lʌji' ne tsoy ti' u kukinta' yok'o nʌj ti' u chixta u muk' a nʌj.

11A je' lʌji' tu meta ak Ts'uri y ne jach tsoy tak iraj.»

12Y u ts'uri a mok ku kʌnʌntik u yatoch K'uj, yete a mok ku kʌ'sik u t'ʌn K'uj a to'o u toj ts'ibtamʌ Moisés uchik y yete a mok u t'oji a lay u kʌjta poch u chujko' a Jesús tu tu yuo' a u kʌ'sa a Jesús a yʌn u jer u nu'ku lʌji' ku ya'ba tio', chen sajako' ti' a winiko', ben tu p'ʌto' ij bino'.

Jesús ku tsikbʌtik bik ʌk bo'tik u bo'ri a ku k'atik aj wes

(Mt. 22.15-22; Lc. 20.20-26)

13Tu tuchi'to' mo' ne pim u winiko' a judíos a ku ya'batio' fariseos yete u winiko' a Herodes, ti u k'atko' ti Jesús ba', ti' kʌxko' baij ku jok'o u yei'k mo taj y bex jeu payta'. 14Bino' tu tiʌ a Jesús y tu k'ato' ti':

—Wʌjkʌ'si, in weo' a tech tu woro a ba' ja' wei'k jach tu jay, jach lʌji' u t'ʌn K'uj ka kʌ'sik, maj tukrik baij ku ya'ba tech, ma' wei'k ti' a winik baij poch u yui'k. A'e teno' bik a wik tech, ¿tsoy in bo'tik ti' in lu'm ti u wesi Roma a César o mo' tsoy in bo'tik?

15Chen Jesús toj u k'omʌ to jay tʌn u tuso' tus ku metko' u bʌj a mo' jach lʌjio', y tu ya'a tio':

—¿Biken ka tuntke'x in wor? Tase a chixtak'in a tuka bo'tik a lu'm tia wes ti' in wirik.

16Ij tasa ti' jump'eri' a chix tak'in, y Jesús tu ya'a:

—¿Moki u yochi tʌk'ʌ y moki u k'aba' ts'ibʌ'?

Tu nuko':

—A César u jach u t'oji u wesi a Roma.

17Jesús tu ya'a:

—Ts'ae'x ti' a César a toj lʌji' yʌni a César u wesi Roma, y ts'ae'x ti' K'uj a toj lʌji' yʌni K'uj.

Ka tu yuo' u nukik Jesús bex, laj peknʌ u yoro'.

Ku tar u k'ata' ti Jesús bik taba a mok ku ka lik'i tu kuxta

(Mt. 22.23-33; Lc. 20.27-40)

18Pachi taro' a saduceos a ku yei'ko' ti'o' a mok kimen mʌnʌ' u ka lik'i kuxta, ben tu k'ato' ti Jesús:

19—Wʌjkʌ'si, a Moisés tu ts'ipta' ti' to': Wa yʌn mok ku kimi u xi'ra u bojo' y yʌn u lak', y moj ti'anʌ, u ka xi'ra u bojo' lʌji' ku ka bin u cheik u lak' u xi'ra u bojo' a kimen, ti' u yʌnta u ti'a a kimen u xi'ra u bojo'. 20Yʌn junturi' xi'ra suku'ubi yʌn seis u yits'ino', a suku'ubi, lʌji' tu yʌn ch'a u lak', chen kaj kimi moj nʌj ti'ʌnʌj. 21A its'inbi lʌji' tu kaj ch'a u lak' u suku'un, bexi' kimi moj nʌj ti'ʌnʌj, y laj bexi' u ka jer a its'inbi. 22Tura kaj laj nup u laj ch'eik u yits'ino' u lak' u bojo', y tu woro laj kimo' moj nʌj ti'anʌjo', y pachi k'uchi u k'ini bexi' a ch'upra laj kimi. 23Ka' k'uchuk u k'ini tuk'in K'uj ku ka' li'sik tu woro tu ka' kuxta a mok kimen, ¿mok ku ka bin u cha'e a ch'upra, ka wirik tu woro a siete xi'ra laj mʌni u ch'eik?

24Chen Jesús ka tu nuka:

—Toj mo' taj ka wei'ke'x tu mo' a ki' k'omo'e'x u t'ʌn K'uj y mix u muk'. 25Chen ka' k'uchuk u k'ini ku lik'i tu woro tu ka' kuxta a mok kimo', ch'ikta mʌnʌ' u ch'eik u lak'o a xi'ra yete ch'upra, laj ket ku bin meta a bex a ángeles a tiʌ kʌ'. 26Yok'o a mok ku bij lik'i tu ka kuxta, ¿yʌn ma' xakbe'x tu ts'ibʌ' tuku ts'ibta Moisés bik t'ʌna' ten K'uj yok'o a zarza, tuku ya'a: A Ten Lʌjien u K'ujen a Abraham, a Isaac y a Jacob? 27K'uj mo' lʌji' u K'uj a kimen winik, K'uj lʌji' u K'uj a mok kuxʌ', a teche'x ne mo' taj ka wei'ke'x.

U t'ʌn K'uj a to'o lʌji' u yʌj chuni yʌnti' u jach meta'

(Mt. 22.34-40)

28Junturi' a lʌji' ku kʌ'sik u t'ʌn K'uj a ts'ibʌ' tea Moisés uchik, a to'o tu yua a ba' ku yei'k y tu yua taj tu nuka Jesús, a lay xok'i ti' Jesús y tu k'ata ti':

—¿To'o bay lʌji' u yʌj chuni u t'ʌn K'uj a ts'ibʌ' tea Moisés uchik?

29Jesús tu nuka ti':

―A je' lʌji' u yʌj chuni u t'ʌn K'uj a yʌnti' u jach meta' a ba' tu ts'ibta a Moisés: Ue'x tu woro u winki Israel: Ak Ts'uro' K'uj, toj ja'ri' lʌji' ak Ts'uri. 30Y jach ki' yakunte a Ts'uri a K'uj yete tu woro a pixʌn y yete tu woro a tuku y yete tu woro a muk'. A je' lʌji' a toj u yʌj chuni yʌnti' a jach metik a tu li'sa u t'ʌn K'uj. 31Chen a juntu jach bexi' lʌiti': Yakunte a bojo' bex tech ka yakuntik a bʌj. Mʌnʌ' to u jer u t'ʌn K'uj a bex a je' a to'o lʌji' u yʌj chuni jach yʌnti' u meta'.

32A ku kʌ'sko' u t'ʌn K'uj a toj u ts'ibtamʌ a Moisés uchik tu ya'a ti:

―Jach taj kaj wei'k, Wʌjkʌ'si. Toj jay junturi' K'uj yʌn, y mʌnʌ' u jer. 33A yʌnti' a jach a yakuntik a Ts'uri a K'uj yete tu woro a pixʌn y tu woro a muk' y tu woro a tuku y yʌnti' u yakuntik a bojo' bex techi' ka yakuntik a bʌj, lʌji' a to'o más tsoy y mo' ne k'uch bex a ku meta tuk'in ku k'uba ba' ti' K'uj y bex ku toka' ba' ti'.

34Jesús ka tu yira tsoy a bik tu nuka, lʌji' ka tu ya'ti':

―Mo' ne nʌch tie'x ti tu ku wesintik K'uj a tiʌ kʌ'.

Y ya mix mok tu tunta' u ka k'ata ba' ti'.

¿Mok u ti'a a Cristo?

(Mt. 22.41-46; Lc. 20.41-44)

35Jesús tʌn u kʌ'sa' yok'o u yatoch K'uj, y ku yei'k:

—¿Biken ku yei'ko' a ku kʌ'sko' a u t'ʌn K'uj a to'o u ts'ibtamʌ Moisés uchik, a Cristo lʌji' u ti'a a David? 36Ka wirik, u bʌji' David, yete u pixʌn K'uj tu ya'a:

Tu ya'a ak Ts'uri ti in Ts'uri:

kuren tin xax,

hasta ku k'uchu tu k'ini in laj chesik

ta wok a mok ku p'aktikech.

37Wo a David ku yei'k lʌji' u Ts'uri; ¿Biken ka wei'ke'x lʌji' u ti'a David?

Y a ne pim a winik u kʌjta ne tsoy u yui'ko' u tsikba a Jesús.

Jesús ku yei'k, a ku kʌ'sik u t'ʌn Moisés a tio' mo' taj ku kʌ'sik a winik

(Mt. 23.1-36; Lc. 11.37-54; 20.45-47)

38Y Jesús yok'o u kʌ'sa bex tu ya'tio': «Kʌnʌnte'x a bʌj, ti' ma' a kʌnike'x u ba' ku metik a ku kʌ'sko' u t'ʌn K'uj a toj u ts'ibtamʌ a Moisés uchik, ka wirik a ku kʌ'sik u t'ʌn Moisés, jach tsoy u nok' ku mʌno' ti' u tus tukriko' u bʌjo' jach t'ojo', jach tsoy yoro' u yiriko' u ki t'ʌna' ten u bʌjo' tu ku naj kanik u bao' a winik, 39bexi' ku tejtiko' u k'ʌnche' tu ku kuta a jach t'ojo' yok'o u nʌji tuku much'ik u bʌjo' a judíos u xake u t'ʌn K'uj, bexi' ku tejtik u k'ʌnche' tuku ki ts'aba tio' ki o'chi; 40ku takik tu woro u ba' a ch'upra a mok kimen u lak', chen tus ku t'ʌnik jach ya'p K'uj ti' u yiraj jach ku ki t'ʌnik K'uj, bein to' a layo' jach ya'p ku bin u bo'tik u si'pi ti' K'uj»

A ch'upra a kimen u lak' tu ts'a u tak'in ti' K'uj

(Lc. 21.1-4)

41Tuk'in kurukba Jesús ʌkʌtʌn ti u kuchi tuku but'ko' u tak'in K'uj, ti ku yirik bik u but'ko' a winik u tak'in yok'o u kuchi y ne pimo' a mok yʌn u tak'in ku but'ko' bexi'. 42Bexi' ka tu yiraj junturi' ch'upra a kimen u lak' jach bik tu but'a u tak'in y mo' tak'in u ka', tu but'a ka'p'e chixtak'in a to'o ne mo' ya'p. 43Lʌji' Jesús ka tu pʌya u kʌ'sa winiko', y tu ya'tio':

—Jach taj kin wei'k teche'x, A je' ch'upra a kimen u lak', jach k'ux ya'p tu but'a y mo bex, bex teche'x ta but'e'x. 44Chen tu woro a mok tu but'a u tak'in woro lʌji' u yʌra' u tak'in; y a je' a ch'upra to' a mʌnʌ' u tak'in tuj laj but'a tu woro u tak'in a tu ku jʌnʌ.

Currently Selected:

San Marcos 12: PLacNaha

Highlight

Copy