San Marcos 11
11
Ne tsoy oki Jesús ix Jerusalén
(Mt. 21.1-11; Lc. 19.28-40; Jn. 12.12-19)
1Tuk'in tʌn u k'uchu ix Jerusalén, yete Betfagé y a Betania, xok'o yok'o u witsi Olivos, Jesús tu tuchi'ta ka'to' u kʌ'sa winiko'. 2Y tu ya'tio':
―Xene'x ix u kʌjta winik, y pachi kʌ' bij oke'x yok'o u kʌjta, ka bin a wire'x junturi' burro, a toj mʌnʌ' mok nʌ'ko' ix u pach, pite'x y ka tasik wai. 3O yʌn mok ku k'atik teche'x: ¿Biken ka pitke'x a burro? Ka wei'k ti', ak ts'uri yʌn u k'ʌnik, y mʌnʌ' u xʌnta u sutik.
4Bino', y tu yiro' a burro, ti' maka' xok'o u to' u jor nʌj tu xur a bej, y tu pito'.
5Juntu a mok tio' tita tu ya'a: ¿Baika metke'x? ¿Biken ka pitke'x a burro?
6Y tio' tu nuko' a bex a Jesús tu ya'a, lʌji' kaj tu chao' u bino'. 7Y tu taso' a burro tu tiʌ Jesús, y tu pach a burro tu xit'o' u tep'o' ti' u kuta Jesús, ij kuraj Jesús. 8Y p'isi' ne pim tu xit'o' u tep' ix u bej, u jer tu chakunto' u le' a che', y ku laj chakintiko' ix u beri. 9A bex ku bin tu yʌj chuni y a ku taro' tu pach, tʌn u yei'ko':
—¡Hosanna! ¡Kaj k'ujinte a mok ku tar yok'o u k'aba' ak Ts'uri! 10¡K'uj jach ne tsoy ba' ku bin mete ti' u wesi ak tet David a ku tar! ¡Hosanna ix kʌ'!
11Ij oki Jesús ix Jerusalén, y to' u yatoch K'uj: Y tu laj chʌ'ta tu woro a bʌ, chen tʌn u ojk'inchʌ, lʌji' kaj bini ix Betania yete u doce u apóstoles.
2. Ix Jerusalén
(11.12—13.37)
Jesús ku yei'k ya muj bij yʌ ichʌnkʌj a che' u k'aba' higuera tu muj yira u wich
(Mt. 21.18-19)
12Kaj sasi, tuk'in ka jok'o' ix Betania, a Jesús wijchʌj. 13Y tu yira nʌchi ti ch'ikʌ' junturi' u che'i higuera y yʌn u le', y bini u yire o yʌn u wich; chen tuk'in ka k'uchi mix k'ʌs u wich tu yira to jay u le', tu mo' lʌji' u k'ini u wichʌnkʌ. 14Ka tu ya'a Jesús ti' a higuera:
—¡Mix k'ʌs mok ku bin u jʌnte a wich!
Y tu laj uo' tu woro u kʌ'sa winiko'.
Jesús ku yuts'kintik u yatoch K'uj
(Mt. 21.12-17; Lc. 19.45-48; Jn. 2.13-22)
15Pachi kaj k'ucho' ix Jerusalén, oki Jesús ix u yatoch K'uj, y chu'mpʌ u laj jarik a mok tʌn u kanik u ba', laj bexi' a mok ku mʌnik, y tu laj tech'inta u pojche' a mok a ku k'axik tak'in y tu laj lu'sa' a tu ku kuta a ku kanik aj uk, 16y mix mok tu cha'a ti u mʌsko' ba' ti u kanik to' u yatoch K'uj. 17Y pachi tu kʌ'so' y bex tu ya'a:
―¿Mo' toj ts'ibʌ' ix u t'ʌn K'uj: In watoch ku bij a'ba lʌji' u nʌji tuku t'ʌna' K'uj, ti tu woro u kʌjta a lu'm? Chen a teche'x ta waysaje'x u yatoch a ku yakra bao'.
18Y tu laj ua a ku kʌ'sko' u t'ʌn K'uj a toj u ts'ibtamʌ a Moisés uchik y u t'ojio' a moko' ku meajo' yok'o u yatoch K'uj, y tʌn u kʌxtiko' bik u kinsiko' a Jesús; tu ku sʌjtiko' tu woro a winik a jach tsoy u yui'k u kʌ'sa a Jesús y la'jen ku sʌjtiko'. 19Chen tuk'in kaj k'uchi a ak'ʌ', Jesús jok'i yok'o a lay u kʌjta.
Tiji a higuera a moj ira' u wich
(Mt. 21.19-22)
20Kaj sasi tu yiro' a higuera laj tiji ch'ik tu chun. 21A Pedro k'ajiti' a ba' mʌni joa, ka tu ya'a ti' Jesús:
―In wʌjkʌ'si, ire, tiji a lay a higuera a ta chich t'ʌna a ku bij mʌn ti' mo' tsoy ba', lʌji' tiji.
22Kaj tu nuka Jesús, tu ya'tio':
―Ki' akse'x a wore'x ti' K'uj. 23Wa ka waksike'x ta wor ti' K'uj, jach taj kin wei'k teche'x, o ka jach t'ʌnike'x a je' a wits, ka wei'k ti': k'uyabʌj y purabʌj ix peta', y mo ka jach tukrik o jach jeu' metchʌ, toj je'e u jach metchʌ a ba' ta wati'. 24La'jen, kin wei'k teche'x, wa tu woro a ba' a poche'x ti', t'ʌnbi K'uj ka k'atik, to jay yʌnti' a tukrike'x toj ya metchʌ a ba' ta k'ata y bex jeu jach metchʌ. 25Tuk'in ka' t'ʌne'x K'uj, sa'se'x tia boje'x o yʌn ba' mo' tsoy tu meta teche'x, y bex bexi' a Tet a tiʌ kʌ' jeu jach sa'sik bexi' a k'ebo'. 26Chen wa teche'x maj sa'sike'x a ba', mix a Tet a tiʌ ix kʌ', ku bin u sa'se teche'x a k'ebo'.
A Jesús jax t'o'o
(Mt. 21.23-27; Lc. 20.1-8)
27Pachi a Jesús suti ix u kʌjta Jerusalén, y tʌn u mʌn ix u yatoch K'uj, taro' ti' u t'ojio' a moko' ku meajo' yok'o u yatoch K'uj yete a ku kʌ'sko' u t'ʌn K'uj a to'o u toj ts'ibtamʌ Moisés uchik y yete a mok nuxio' u winik a judíos, 28Y k'ata ti' a Jesús:
―¿Mok tu li'sa' u t'ʌni tech a je' a ba' ka metik y mok u ts'uri tu ya'tech a je' ka metik?
29Tu nuka Jesús, y tu ya'tio': ―Bexi' ten ki bin in k'ate teche'x ba', wa ka nukik ten, bexi' ten ki bin in wa'te'x mok tu li'sa u t'ʌni ti in metik a je' a ba'. 30A Juan a tu but'a ja' a winik ¿mok li'sik u t'ʌni ti' u metik, K'uj wo winik? Nuke'x ten.
31Kaj u chu'so' u tsikbo' bik taba ku bu nu'ku, kaj u yao': «Wa kak ei'k lʌji' tu li'sa u t'ʌni K'uj, ku bin u ka' a to' ¿Biken mo' ta cha' u t'ʌn? 32¿O kek eik, a winik tu tuchi'to'?» Chen mo' tu yao' bex, tu ku sʌjtiko' a winiko', toj u yeo' a winiko' ku yei'ko' a Juan lʌji' profeta. 33Bein tu nuko' ti' Jesús, bex tu ya'o' ti':
―Ma' in weo'.
Lʌji' kaj u nuka Jesús:
—Bexi' ten mʌnʌ' in wei'k teche'x mok tu tuchi'ten tin metik a je' a ba'.
Currently Selected:
San Marcos 11: PLacNaha
Highlight
Share
Copy
Want to have your highlights saved across all your devices? Sign up or sign in
Sociedad Biblica de México AC
