San Marcos 13
13
Jesús ku yei'k bik ku bij jubu u yatoch K'uj
(Mt. 24.1-2; Mt. 21.5-6)
1Kaj jok'i Jesús yok'o u yaj yatoch K'uj, tu ya'a junturi' u kʌ'sa winik:
Wʌjkʌ'si, chʌ'te ba' tunichi y ba' nukuch nʌj.
2Jesús tu nuka ti':
—¿Ka wike'x tu woro a je' a nukuch nʌj? Jach taj kin wei'k teche'x, mʌnʌ' u nʌj p'ata kuta jump'e tunich, toj tu woro binukaj laj juba'.
U ye'sa ba' tuk'in mo' yʌj k'uchuk tu k'ini u xu' t'ʌn
(Mt. 24.3-28; Mt. 21.7-24; 17.22-24)
3Pachi bini yok'o u wits'i Olivos, Jesús kuraj tita xok'o yok'o u yatoch K'uj. Y a Pedro, Jacobo, Juan y Andrés tu k'ato' ti' a Jesús:
4Aeto' ¿Tuk'in ku bin mʌn a je' ka wei'k? ¿Y baij ku bin e'sa' ba' tuk'in xok'ok mʌn a je' a ba' a ta wa'a?
5Jesús tu nuka tio', chu'mpʌ u yei'k: «ki chʌ'te mix mok u tuske'x. 6Binukaj tar ne pim ku bin u k'ʌne in k'aba', ku bin u yao': A ten lʌjien a Cristo, y jach ne pim winik ku bin u tuse.
7»Tuk'in ka' wue'x ne ya'p ts'iki ch'ik u jer kʌjta y bexi' ka wui'ke'x ku jumintiko' tʌn u bin u chu'so' u ts'iko'; chen ma' sʌjtike'x, yʌn ti' u laj mʌn tu woro a je' ba', chen mo' lʌji' ti' u xu' t'ʌn. 8Binukaj lik'i tu ts'iki kʌjta yete u jer kʌjta, binukaj tar wi'ji, y ne pim kʌjta ku bin pek a lu'm. Chen tu woro a je' ba' ku bin mʌn, lʌji' u yʌj chuni ku bin u yue ne yaj a winiko'.
9»Ki kʌnʌnta bʌje'x, bexi' turu laj k'upke'x ti a jak'o u kuch, y yok'o u nʌji tuku much'ik u bʌjo' a judíos u xake u t'ʌn K'uj, ku bin u jʌts'e'x. Bexi' ku laj bin u pure'x ti u ts'uri a lu'm y bexi' ti u wesi, che yok'o ten ka laj bin pure'x ti y bex ka bin a tsikbʌte a baij ti meta. 10A mo' yʌ k'uchuk u xu' t'ʌn, yʌnti' u laj kʌ'sa' u jach tsoyi u t'ʌn K'uj ch'ik tu woro u kʌjta lu'm. 11Y tuk'in ka' u k'ube'x ti a mok jak'o u kuch, ma' sʌjtike'x a t'ʌnex o baij ka bin a wa'ex ti, chen K'uj ku bin u ts'ate'x a ba' bik u nuko' ka bin a wa'ex ti. Jach taj kin wei'k teche'x, mo teche'x ka bi t'ʌnex, a ku bij tʌn lʌji' u Pixʌn K'uj yok'o teche'x. 12Y u bojo' ku bin u ts'ae u kinsa' u ka wʌsʌk' bojo', y a tet u wʌsʌk' ti'a; y u ti'a ku ka' bij lik'i ti' u kʌxmetik u tet y bexi' ku bin u kinse. 13Tura a laj p'akte'x ti tu woro winik, chen yok'o ten; chen a mok ku jach muk'tik u ki metik u t'ʌn a K'uj turu u laj ts'oko tu woro a ba' a lay jeu bin ix kʌ'.
14»A mok ku xakik a je' a t'ʌn u ki ue bik taba a baij tu ts'ibta uchik a Daniel a lʌji' profeta, ti' tu ya'a, tuk'in ka wire'x a meta ne mo tsoy ba' yok'o u yaj yatoch K'uj a tu' mo' tsoy u mʌn tita, a mok tiʌ ix u kʌjta Judea, ka puts'uk ix a wits. 15A mok tiʌ ix u jo' u yatoch, mu yeme ix u yatoch y mix u ch'ae u ba' a tiʌ ichi ix yatoch. 16Y a mok tiʌ tu meaj ix u kor, mu sut u ch'ae u nok' ix yatoch 17¡Jach otsi a ch'uprao' a mok mo uts'k'inti' y a mok yʌnti' u ti'a u yʌj chu'chʌntʌ a lay u k'inio'! 18T'ʌne'x K'uj ti a lay u k'ini ka puts'ke'x mo' u k'in sisi. 19A lay u k'ini, jach ne ya'p yaj ba' ku bin u yue a winiko' a bex mo' nʌj mʌnʌ' toj ka tu meta a lu'm K'uj hasta beje' y mʌnʌ' u yʌ mʌn pachi. 20Wa K'uj mu' komkintik a lay u k'inio', mix mok ku bin ix kʌ', chen yok'o u winik a to' tu tejta, lʌji' ben tu komkita a lay u k'ini.
21»Wa mok ku yei'k teche'x: Ire'x way tiʌ a Cristo, o ire'x tiʌ te', ma' ch'eike'x u t'ʌn. 22Binukaj lik'i a winiko' a mok ku tus ei'ko' lʌji' a Cristo, y juntu ku yei'k lʌjio' a profetas, y bi u ye'so' ne ya'p ba' ix kʌ' y bi u meto' ne ya'p tsoy ba', to jai' ti' u tusik a winik, bexi' bi u tunte u tusik a mok toj ya tejta ten K'uj. 23¡Ki' kʌnʌnte'x a bʌje'x! In toj ki' a'ba teche'x baij ku bin mʌn.
Tuk'in ka' sutuk u Ti'a Xi'ra
(Mt. 24.29-35,42-44; Mt. 21.25-36)
24»Chen a layo' u k'ini ka' ts'o'kok u yui'k yaj ba' a winik a lay u k'ini, a k'in binukaj ak'ʌ'chʌ, y aknʌ' binukaj ts'oko u tichk'a, 25a ba'kʌo' binukaj laj juto', tu woro a ne nuk ba' a tiʌ ix kʌ' binukaj laj pesa'. 26Bin a wire'x u Ti'a Xi'ra u tar ix k'ʌ' yok'o muyaj, yete tu woro u muk' y yete jach k'ux tsoy u sasiri. 27Bi u tuchi'te pim a ángeles a ch'ik tu woro lu'm y ch'ik tu xur a kʌ', ti u laj much'ik tu woro a winik a to' toj u tejtamʌ.
28»Ki kʌne'x a bex kʌ'sa a yʌn u jer u nu'ku yok'o a che' u k'aba' higuera: tuk'in ka wire'x ku jok'o u muni u k'ʌ' y ku chu'mpʌ u jok'o u le', ka wike'x nej taki u yoko chʌkʌr k'in. 29Bexi' ka' wire'x u mʌn tu woro a ba' a ti tsikbʌta, ete'x nej taki u ka sut u Ti'a Xi'ra. 30Jach taj kin wei'k teche'x, yʌnti' u yʌ mʌn pʌten a je' ba' a tin tsikbʌta, tu mo' yaj kimik a je' a winiko' kuxo' beje'. 31Tu woro a kʌ' y tu woro a lu'm ku bin ts'oko', chen in t'ʌn mʌnʌ' u ts'oko.
32»Chen a lay u k'ini mix mok u yej, mix a ángeles a tiʌ kʌ', mix u Ti'a K'uj, toj jari ak Tet.
33»Ki ch'ukte'x tu woro k'in, ma' wene'x, t'ʌne'x K'uj: tu ma' a we'x tuk'in ku bij k'uchu u k'ini. 34Bex bix a tiʌ junturi' xi'ra binukaj tu jer ne nʌch kʌjta, chen tu yʌj ts'ati' u winik u kʌnʌnta u yatoch u ki irik, y tu woro tu ya'ti' to baij ku bin u mete y a mok ku kʌnʌntik u jor tu ya'ti' u ki kʌnʌntik y a u kʌnʌntik u yatoch. 35Ki' ch'ukte'x tu woro k'in, ire ma' a we'ex tuk'in ka bin tak u jach Ts'uri a nʌj, wa ojk'in ku yu', wa ix chumuk ak'bi ku yu', wa ix ti' ku yu' tuk'in ku k'ay aj t'er, wo ja'ts'ka' ku yu', 36ti tuk'in ku yu' muj yirike'x wenaka'e'x. 37A ba' kin wei'k teche'x, kin wei'k ti' tu woro mok: ¡Ki' p'ire'x a wiche'x!»
Currently Selected:
San Marcos 13: PLacNaha
Highlight
Share
Copy
Want to have your highlights saved across all your devices? Sign up or sign in
Sociedad Biblica de México AC
