San Mateo 27
27
Jesús ku bisa' ti Pilato
(Mr. 15.1; Lc. 23.1-2; Jn. 18.28-32)
1Kaj sasi, tu woro u t'ojio' a moko' ku meajo' yok'o u yatoch K'uj y tu woro a jak'ʌ u kucho' ti' u winik a Judíos tu ka'to' u yoro' ti' u kʌxtiko' bik u kinsiko' a Jesús. 2Jesús k'ʌxʌ' kaj bisa' y tu ts'ao' ti' a poncio Pilato, a lʌji' u wesi a Roma.
Judas ku kimi
3A Judas a to'o tu k'uba' a Jesús, ka tu yira binukaj kinsa' a Jesús, tu jach ka tukrubʌj y tu ka sutaj a treinta chixtak'in a menʌ' plata ti' u t'ojio' a moko' ku meajo' yok'o u yatoch K'uj y ti jak'ʌ u kucho' ti' u winik a Judíos, 4Tu ya'tio':
—Tin kʌxta in si'pi a tu tij k'uba' junturi' xi'ra a mix k'ʌs mʌnʌ' u si'pi.
Chen tio' tu nuko':
—¿Ba'wi kin tukrik a teno'? ¡A lay tech a wue! 5A Judas tu pura aj chixtak'in a menʌ' plata ix u yatoch K'uj ij bini y tu jich'a u k'o'ch.
6U t'ojio' a moko' ku meajo' yok'o u yatoch K'uj tu much'o' a chixtak'in a menʌ' plata y tu yao':
—A je' a tak'in lʌji' u bo'ri u kuxta jump'eri' xi'ra, mo tsoy ak but'ik yok'o u k'uchi tuku ts'abati' K'uj.
7Pachi chen ts'o'ki u katko' u yoro', tu mʌno' yete a lay a tak'in jump'eri' lu'm u k'aba', u lu'm a ku pʌtk'ʌt, lʌji' tuku bin u mukik a mok u tar u jer u kʌjto' wa ku kimi. 8Ben a lay a lu'm tak beje' u k'ini u k'aba' a lu'm: u lu'mi k'ik'. 9Bex metchʌ a bex tu ya'a a Jeremías uchik a lʌji' profeta, a tu ya'a: «Tu ch'ao' treinta chixtak'in a menʌ' plata a lʌji' u bo'ri a tu yao' u winik Israel, 10y yete a lay tak'in tu k'ʌno' ti u mʌnik u lu'm a ku pʌtk'ʌt, a bex tu li'sa' u t'ʌn ak Ts'uri u meta'.»
A Pilato ku chich k'atik ti' Jesús
11Jesús bisa' tu tiʌ aj wes, kaj k'ata ti' Jesús:
—¿A tech lʌji' u wesiech a judíos?
Jesús tu nuka:
—Techi ta wa'a. 12Jesús muj naj nuka ka tʌn u payta' teno' u t'ojio' a moko' ku meajo' yok'o u yatoch K'uj y a mok jak'ʌ u kucho' ti' u winik a Judíos. 13Ben Pilato tu k'ata ti' Jesús:
—¿Maj wui'k baij ku ya'ba tech? 14Chen Jesús mu naj nuka mix ts'ets'i', y aj wes peknʌ u yor a tu tu yira muj p'isik u bʌj a Jesús.
Jesús ku li'sa' u t'ʌni u kinsa'
(Mr. 15.6-20; Lc. 23.13-25; Jn. 18.38—19.16)
15U k'ini tuk'in tʌn u metko' u yo'cho' a lʌji' u k'ini Pascua, t'ʌrʌ' u siptiko' a mok chuka mʌkʌ' a to'o u k'ato' a winiko'. 16Y tiʌ junturi' xi'ra mʌkʌ' u k'aba' Barrabás, a lay ne ya'p t'ʌn ti' tuku yakraba'. 17U much'mu u bʌjo' a winiko', a Pilato tu k'ato' ti':
—¿Moki a k'ate'x in siptik: a Barrabás o a Jesús a ku ya'bati' Cristo?
18A Pilato toj u yue k'uba' ti' a Jesús, tu k'ex u yoro' ti' Jesús.
19Kurukba Pilato yok'o u k'ʌnche' wes tuku li'sik t'ʌn baij ku bij meta', u lak' a Pilato tu tuchi'ta u t'ʌn ti' lak' y bex tu ya'a: «Ma' tʌkik a bʌj yete a je' a xi'ra a mix k'ʌs yʌn u si'pi, ka wirik a beje' aj mʌni a ak'ʌ' ne mo' tsoy wek'nen yok'o ti'.»
20Chen u t'ojio' a moko' ku meajo' yok'o u yatoch K'uj y a jak'ʌ u kuch ti' u winik a Judíos tu kuna u jo'o a winik tiu k'atik u sipta' a Barrabás y ka u yao' u kinsa' a Jesús. 21Aj wes tu ka' k'ata ti' a winiko':
—¿A je' a ka'to' to' poch a wirke'x in siptik?
A tio' tu nu'ku:
—¡A Barrabás!
22Pilato tu k'ata tio':
—¿Baij ki bin in mete ti' a Jesús, a ku ya'ba ti' Cristo?
Tu woro tu nuko':
—¡Bʌje yok'o cruz!
23A Pilato tu ya'a:
—A'e'x ten ¿baiki mo' tsoy ba' tu meta teche'x?
Chen a winiko' más k'ʌ'm abotno' y bex tu yao':
—¡Bʌje yok'o cruz!
24Ka tu yira a Pilato mʌnʌ' ba' u mete, chen jai' más tʌn u k'ʌ'm jumo' a winiko', tu tuchi'ta tasa ja' ti' y ti' tu p'o'a u kʌ' y tu ya'a ti' a winiko' a nikʌ' tita:
—Ten mʌnʌ' in si'pi tuku bij kinsa' a je' a xi'ra, ti' teche'x ku bij p'ata a si'pie'x.
25Tu woro a winiko' tu nuko':
—Ti to'o ku p'ata a lay a si'pi y ti ak ti'o'.
26Tu sipto' a Barrabás y chen ts'o'k u jʌts'a' a Jesús yete sum, pachi tu ts'a u bʌja' ix cruz.
27Y u ba'kʌyo' aj wes, tu biso' a Jesús tu ku nikto' tu woro a ba'kʌi y tu laj much'a tu woro u bojo'. 28Tu jito' u nok' y tu tap'o' yete jump'e chʌk nok', 29y tu tʌko' yok'o u jo' a Jesús a bex ku tʌke tij wes a u k'aba' corona chen a lay menʌ' yete k'i'x y bexi' ts'abti' jump'e che' y tus tu woro tu wuts'o' u pix ti Jesús jai' ti u p'astiko' y tʌn u yei'ko':
—¡Ka' kuxtak uj Wesi a judíos!
30Bexi' tup'a u wich y jʌts'a' u jo' yete a che' a ts'abu u chuke. 31Kaj kʌ'no' u kʌxmetko', jita'ti' a u nok' a tu tʌko' ti' y tu ka' ts'ao' a u nok'i, pachi tu biso' u bʌjo' yok'o cruz.
Kaj bʌja' a Jesús ich cruz
(Mr. 15.21-41; Lc. 23.26-49; Jn. 19.17-30)
32Ka tʌn u bino', ira' junturi' xi'ra u winik Cirene u k'aba' Simón, a lay a xi'ra, ts'ʌra' u pach u cheik a cruz.
33Kaj k'ucho' yok'o u lu'mi u k'aba' Golgota, u nu'ku ku ya'bati': «U lu'mi Calavera.» 34Ts'abu u yuk'e a Jesús au ya'ri vinagre xak'ʌ' yete u ya'ri a che' a ne k'aj, chen ka tu tunta', ya mu' k'at u yuk'e.
35Kaj ts'o'ki u bʌja', chu'mpʌjo' u yʌrʌk'tiko' u nok' a Jesús ti u yik mok ku ch'eik, ti' u metchʌ a tu ya'a uchik a profeta y bex tu ya'a: Tu yʌk'to' in nok' ti' u yirik mok ku ch'eik. 36Y tita kuro' a ba'kʌyo' u kʌnʌnto'. 37Yok'o u jo' tuj bʌja' a Jesús, nich'kunta' jump'e ba' tu ts'ibʌ' bex: «A JE' A JESÚS, LɅJI' U WESI A JUDÍOS.»
38Bexi' bʌja' yete kato' xi'ra a ku yakraba', junxet' bʌja' a juntu y junxet' a juntu. 39A winiko' a ku mʌn xok'o tita, ku p'astiko' a Jesús y ku pesiko' u jo'o, 40ku yei'ko':
—A ta wa'a a jubik u yatoch K'uj y oxp'e k'in ka ka' laj metik u jer tumen, wa jach a tech u Ti'ech K'uj, takabʌj y emen tuj bʌjech yok'o cruz.
41Bexi' a mok u t'ojio' a moko' ku meajo' yok'o u yatoch K'uj yete a ku kʌ'sko' u t'ʌn K'uj a toj u ts'ibtamʌ a Moisés uchik bexi' yete a winik a judíos a ku ya'bati' fariseos, tʌn u yei'ko':
42—U jer tu taka' y u bʌji' muj tajkubʌj, wa jach u Wesi a Israel, ka u yensubʌj tu tiʌ ix cruz y bex je'e ak ch'eik u t'ʌn. 43Tu ch'a u t'ʌn K'uj: ¡Ka' takak ti' K'uj beje' wa jach otsi u yira'! ¿Mu' ya'e to', a ti' jach lʌji' u Ti'a K'uj?
44Bexi' laj p'asta' a mok ku yakrabao' aj bʌja' yete a Jesús.
Kaj kimi a Jesús
(Mr. 15.33-41; Lc. 23.44-49; Jn. 19.28-30)
45Kaj k'uchi k'ak' chuk'in, laj ak'ʌ'chʌ tu woro u lu'm, ka' sasichʌ hasta ka tʌn ts'arkubʌ k'in (tres de la tarde). 46Tʌn u bin k'uchu u ne ts'arkubʌj k'in (tres de la tarde) Jesús abotnʌj y bex tu ya'a: «Elí, Elí, ¿lama sabactani?» A je' u nu'ku ku yei'k: «In K'uj, In K'uj, ¿biken ta p'ʌten?»
47Ka tu yuo' u t'ʌn a Jesús a mok tio' tita, tu yao':
—Tʌn u t'ʌnik a Elías.
48Toj se'p' junturi' tu ch'a nok' be tʌmʌn y tu ch'ura yete u ya'ri a vinagre a pʌj y tu tʌka yok'o che, ka tu nʌsa' ti' u ts'ek u yuk'e a Jesús. 49Chen a yʌno' tʌn u yei'ko':
—P'ʌte, kak ire wa a Elías ku tar u take. 50Y Jesús ka' abotnʌj, y pachi tu ts'a u pixʌn ti K'uj. 51Lʌji' kaj jati ka' xot' ch'ik kʌ'nʌ y kaba u yaj nok'i au yatoch K'uj y bexi' tu woro a lu'm laj peknʌ y laj bujchʌ a tunicho', 52y laj je'chʌ tu woro u mukra a winik y ne pim winik a kimen a u yaksʌmʌ tu yor ti' K'uj ka' laj lik'i kuxta. 53A mok ka' laj lik'o kuxta, jok'o tu mukra a winik, chen ts'o'ki u ka' lik'i kuxta a Jesús, taro' yok'o u kʌjta u k'aba' Jerusalén y tio' ne pim winik tu ye'sa u bʌjo'.
54U ts'urio' a ba'kʌi yete u ba'kʌyo' a tʌn u kʌnʌntik a Jesús, ka tu yiro' u pek a lu'm y a tu woro a ba' mʌni, ne jak'o' u yoro' y tu yao':
—¡A je' a xi'ra jach lʌji' ka'chik u Ti'a K'uj!
55Tio' tita ne pim ch'upra tʌn u chʌntko' baij ku mʌn, a lʌjio' tu t'u'ro' u pach a Jesús, a tij ch'ik lik'o Galilea, a to'o tu yʌnto' a Jesús. 56Tita ti'ʌ a María Magdalena, a María u nʌ' a Jacobo y a José y bexi' u nʌ' u ti'aro' a Zebedeo.
Kaj muka' a Jesús
(Mr. 15.42-47; Lc. 23.50-56; Jn. 19.38-42)
57Kaj ak'ʌ'chʌ, tari junturi' xi'ra a ne yʌn u tak'in u k'aba' José, a lʌji' u winki Arimatea, a bexi' laj lʌiti' u kʌ'sa winik a Jesús. 58A je' a xi'ra bini tu tiʌ a Pilato y tu k'ata u bʌk'e a Jesús y a Pilato tu cha'a u ch'eik. 59Ka tu ch'a a José u bʌk'e a Jesús, tu tap'a yete jump'eri' a ne ki' a nok', 60y tu but'a u bʌk'e yok'o jump'e u jor u mukra winik, a toj menʌ' ne tumen, a tu meta yete ne tsoy tunich, pachi tu bʌk'ʌsta yok'o u jor ti' u mʌkik tuku muka' winik yete ne nukuch tunich y pachi bini. 61Y tita tiʌ a María Magdalena y bexi' a juntu a María, ti' kurukbʌjo' yok'o tuku mukra winik.
A mok ku kʌnʌntik tuj muka' a Jesús
62Kaj k'uchi u jer k'in, a lʌji' u k'ini a ku je'sik u bʌjo' a judíos, tu much'a u bʌjo' u t'ojio' a moko' ku meajo' yok'o u yatoch K'uj y u winiko' a judíos a ku ya'batio' fariseos, bino' u yiro' a Pilato, 63ti u yei'ko' ti':
—Ts'uri, k'ajito' a baij tu ya'a a lay a xi'ra a tu tusa' a winik a tu ya'a tuk'in kuxʌ' ka'chik: Chen u mʌn oxp'e kin binikaj ka' lik'i kuxta. 64Ben kin k'atko' tech, ka' tuchi'te u ki kʌnʌnta' u jor tu muka' a lay a xi'ra turu u laj mʌn oxp'e k'in, ti' mu' taro' u kʌ'sa winik u yakre u bʌk'e a Jesús y ku bin u yao', ka' lik'i tu kuxta, wa bex ku mʌn, más binukaj aʌ' ne ch'ikyʌn tus y mu bin ne k'uchu bix ka'chik aʌ'.
65Y a Pilato tu ya'tio':
Tiʌ a lay a ba'kʌi y bise'x ti u ki kʌnʌnta' a bex a k'ate'x.
66Y tio' tu ki' mʌka u jor tu muka' u bʌk'e a Jesús y bexi' tu p'ʌto' tita ba'kʌyo' ti u ki kʌnʌnta u jor.
Currently Selected:
San Mateo 27: PLacNaha
Highlight
Share
Copy
Want to have your highlights saved across all your devices? Sign up or sign in
Sociedad Biblica de México AC
