San Lucas 6

U kʌ'sa winiko' Jesús ku jo'kik u wich trigo u k'ini ku je'sik u bʌjo' a judíos

(Mt. 12.1-8; Mr. 2.23-28)

1Kaj k'uchi u k'ini ku je'sik u bʌjo' a judíos#6.1 U k'ini ku je'sik u bʌjo' a judíos: A lʌji' u k'ini sábado a ku je'sik u bʌjo' a judíos ti' u t'ʌnko' K'uj., lʌji' u k'ini tʌn u mʌn Jesús yete u kʌ'sa winiko' ka tu ch'ʌkta u kori trigo, tu jo'ko' u wich trigo y tu jʌxʌk'ʌ'to' ti' u luk'sik u sor trigo ti' u jʌntko'. 2Y jujuntu a u winiko' a judíos a ku ya'batio' fariseos tu yao':

—¿Biken ka metke'x a ba' mo chaʌ' a metke'x u k'ini ku je'sa' bʌj?

3Tu nuka Jesús:

—¿Mo' ta xake'x a ba' tu meta David uchik, kaj wi'jchʌ yete a mok u yet mʌn, 4kaj oki yok'o u yatoch K'uj, y tu jʌnta aj pʌn a tiʌ yok'o pojche' tu ku kukinta' ti' K'uj, a to'o jai' chaʌ' u jʌntik a moko' ku meajo' yok'o u yatoch K'uj, y a David tu jʌnta yete a mok u yet mʌn?

5Tu ya'a Jesús:

—U Ti'a Xi'ra lʌji' u Ts'uri u k'ini ku je'sik u bʌjo' a judíos.

A xi'ra a mo' uts u k'ʌ'

(Mt. 12.9-14; Mr. 3.1-6)

6Kaj k'uchi u jer u k'ini ku je'sik u bʌjo' a judíos, Jesús oki ix u nʌji tuku much'ik u bʌjo' a judíos u xake u t'ʌn K'uj, ij chu'mpʌ u kʌ'sa, y tita tiʌ junturi' xi'ra mo' uts u k'ʌ' a no'or (derecha). 7A ku kʌ'sa' u t'ʌn K'uj a toj u ts'ibtamʌ a Moisés uchik yete u winiko' a judíos a ku ya'batio' fariseos, tʌn u ki' chʌ'ntik a Jesús ti' u yiriko' o je' u ch'ensik a mo' uts u k'ʌ' a u k'ini ku je'sik u bʌjo' a judíos, ti' u kʌxtiko' bik u pʌk' ku pach a Jesús. 8Chen Jesús u yue a ba' ku tukriko', y tu ya'ti' a xi'ra, a mo' uts u k'ʌ':

—Lik'en ch'ikta, y xen tu chumuki, y a xi'ra lik' ch'ikta. 9Jesús tu ya'tio':

—Yʌn ba' in k'atik teche'x. ¿Baiki tsoy u meta' u k'ini ku je'sik u bʌjo' a judíos, u meta' a tsoy ba' ou meta' a ma' tsoy ba'? ¿A wʌntik u kuxta a bojo' o a kinsik a bojo'?

10Chen ts'o'ki u laj pʌktik tu woro a winik a mok tio' tu yʌn, Jesús tu ya'ti' a xi'ra a muj xit'i u k'ʌ':

—Tich'e a k'ʌ'.

A xi'ra tu tich'a u k'ʌ' y toj se'p' utsi u k'ʌ'. 11Kaj jach nej ts'iko', y chu'mpʌjo' u ketkintiko' u yoro' ti a ba' ku bin u metiko' ti' Jesús.

Jesús tu tejta doce apóstoles

(Mt. 10.1-4; Mr. 3.13-19)

12A layo' u k'ini a Jesús bini u t'ʌne K'uj ix u jo' wits y tu mʌnʌ' ak'ʌ' tu t'ʌna K'uj. 13Kaj sasi tu much'a u kʌ'sa winiko' y tu tejta doce, a to'o pachi tu t'ʌna u k'abo' apóstoles, 14a je' lʌjio' u k'abo': A Simón a bexi' ku ya'bati' u k'aba' Pedro, a Andrés lʌji' u xi'ra u bojo' a Simón, Jacobo, Juan, Felipe y Bartolomé. 15Mateo, Tomás, Jacobo u tiʌ Alfeo, Simón bexi' a ku ya'bati' u k'aba' Zelote, 16Judas lʌji' u xi'ra u bojo' a Jacobo, Judas Iscariote, a to'o lʌji' ku bin u k'ubik Jesús.

Jesús ku kʌ'sik ne pim winik

(Mt. 4.23-24)

17Kaj ts'o'k u tejtik u kʌ'sa winiko' Jesús, emi tu ʌkʌ' a lu'mi. Ti'a jach pim u kʌ'sa winiko', y ne pim winik ti' u tar lu'mi Judea, bexi' tiʌ u winki Jerusalén, bexi' u winki Tiro y Sidón, lʌji' laj taro' u ch'exte u kʌ'sa Jesús, y ti' u k'atko' u ch'ensa u ya'jo'. 18A mok a ku jach kʌx meta' ten kisin tu yok'o, Jesús tu jara tio'. 19Y Tu woro a winik u k'ato' u tʌrko' a Jesús ti' u ch'ensa u ya'jo', a tu tu yiro' jach yʌn u muk' Jesús.

A ba' ku jach tsoykintik u yor a winik y a ba' a jach yaj ku bin u yuo'

(Mt. 5.1-12)

20Jesús ka tu pʌktaj u kʌ'sa winiko', tu ya'tio':

«Ku jach bij tsoy a wore'x a teche'x a mʌnʌ' u tak'ine'x, tu teche'x yʌni tu ku wesintik K'uj a tiʌ kʌ'.

21»Ku jach bij tsoy a wore'x a teche'x a mok wi'j beje', binukaj laj ts'aba ne ya'p a wo'che'x

»Jach tsoy a wore'x a teche'x a mok ku yok'o beje', binukaj laj tsoy ta wore'x.

22»Ku jach bin tsoy a wore'x a teche'x tuk'in ka u p'akte'x a bojo', ka u jare'x, ka u k'eye'x yok'o u k'aba' u Ti'a Xi'ra. 23Jach ki tsoykinta worex ti' a lay u k'ini, a teche'x jach ya'p ba' ku bij ts'aba teche'x ix kʌ', ka wirik a tete'x toj bex tu kʌxmeto' a profetas.

24»Chen ¡jach yaj ba' ka bin a wue'x a teche'x a to'o ne yʌn a tak'ine'x!

Teche'x ta toj ki tsoykinta a wor yok'o lu'm.

25»¡Jach yaj ba' ka bin a wue'x a mok jach ya'p u ba' beje'!

»¡Jach yaj ba' ka bin a wue'x a mok beje' ku tus che'e! A lay u k'ini ku bin u yak'tik u bʌj.

26»¡Jach yaj ba' ka bin a wue'x a ku yei'k, jach tsoyech! Bexi' uchik ku metik a tete'x ti a ku tus ei'ko' lʌji' profetas.

Yʌnti' a yakuntik a mok p'ek u yirike'x

(Mt. 5.38-48; 7.12)

27»Ki ch'extex a ba' kin wei'k teche'x: Yakunte a mok p'ek yirike'x, mete'x tsoy ba' ti a mok ku kʌxmetike'x. 28A'e'x u yʌnta ti' K'uj a mok ku yei'k mo tsoy ba' ti teche'x, t'ʌnex K'uj ti' a mok ku kʌxmetike'x. 29A mok ku jʌts'ik jump'e a p'uk bexi' ts'ati' a jump'e a p'uk; y a mok ku takik a nukuch tep' bexi' cha'e u cheik a nok'. 30A mok ku k'atik teche'x ba', ts'ati'; a mok ku ch'eik a ba', ma' yʌ k'atik u sutik tech. 31Bex a k'at u meta' teche'x bex ka metik ti a boje'x,

32»A teche'x wa jai' ka yakuntik a mok jai' ku yakuntike'x ¿Yʌn tsoy ba' ka metke'x? Laj bexi' ku metik a mok ne yʌn u k'ebo'. 33Wa jai' tsoy ba' ka metik tio' a mok ku metik tsoy ba' ti teche'x ¿Yʌn tsoy ba' ka metke'x? Laj bexi' ku metik a mok ne yʌn u k'ebo'. 34Wa ka mʌjʌntik ba' ti a bojo' to jai' ka ts'ekti' a mok yʌn ba' ku ka bin u ts'atech, ¿yʌn tsoy ba' ka metke'x? Laj bexi' ku metik a mok ne yʌn u k'ebo'. 35Yakunte a mok ku p'aktike'x, mete'x tsoy ba', mʌjʌnte a ba' y ma' ch'uktik u ka sutik teche'x yete u bo'ri, bex jach ya'p ba' ku bin u sije teche'x K'uj y teche'x ka bij waye'x u tie'x K'uj a mok ne chich u muk' y bexi' ti' ne tsoy u tuku ti' a winik a mok mo' tsoy u tuko' y mix ku yei'k ti K'uj tsoy ba'. 36Ch'ae'x otsi tia boje'x bex a Tet K'uj ku ch'eik otsi ti'a winik.

Ma' wei'k ba' ti' a boje'x wo taj o mo' taj ku metik

(Mt. 7.1-5)

37»Ma' wei'k ba' ti' a boje'x wo taj o mo' taj ku metik y bex K'uj muj bin u ya'e ti teche'x mo' taj ka metke'x o mo' taj, ma' wei'ke'x ti' a boje'x yʌnti' u bo'tik u k'ebʌn y bex K'uj muj bin u ya'e yʌnti' a bo'tik a k'ebʌn, sa'se'x ti' a boje'x y bex K'uj je'e u sa'sik teche'x. 38Ts'ae'x ti a boje'x y K'uj jeu' ts'ek teche'x, a bex u ya'p'i ka ts'ek tia boje'x bexi' K'uj ku bin u ts'ae teche'x, ku bin u ts'atech jach ya'p, jach k'ʌxk'ʌxʌk y jach turu.»

39Jesús tu ye'sa tio' jump'eri' a kʌ'sa a yʌn u jer u nu'ku: «¿A mok muj yirik ba' jeu' u ki e'sik u beri ti' u jer u bojo' a muj yirik u ber? ¿Muj bij k'opo tu ka'to' ix u jor lu'm? 40A mok ku kʌ'sa' mo lʌji' más u yue a bex u yʌj kʌsi, chen ka laj ts'o'k u kʌ'sa' bex ku bij waya bex u yʌj kʌsi.

41»¿Biken jai' ka chʌ'ntik u tsatsa a che' a yʌn tu wich a bojo' y maj wirik a tech yaj yʌn ta wich u yaj chun che'? 42Si maj wirik u yaj chun a che' a yʌn ta wich, ¿bij ka bin a wae tia bojo': “Cha'e u jarik tech u tsatsa a che a yʌn ta wich”? ¡Xure a tus! Yʌj jare ta wich u yaj chun a che' y bex ja' ki irik u tsatsa a che a yʌn ti a bojo' ti' a jarik ti'.

A che' ka k'oo'tik yok'o u wich

(Mt. 7.17-20; 12.34-35)

43»Jesús bexi' tu ya'tio': mix k'ʌs yʌn che tsoy ku ts'ek k'as u wich, y mix a che' mo tsoy ku ts'ek u wich ne uts 44tu woro a che' ka k'oo'tik yok'o u wich, maj takik higos yok'o che a k'i'x u ka', mix ka much'ik a nukuch ts'us yok'o u che'i u k'aba' zarzas a bexi' k'i'x u ka' 45A xi'ra a tsoy u tuku tsoy ba' ku yei'k tu tsoy ba' yʌn tu pixʌn, y a xi'ra a mo' tsoy u tuku ne ku yei'k k'as ba' tu toj yʌn yok'o u pixʌn ne mo' tsoy ba',

Ka'p'e nʌj

(Mt. 7.24-27)

46»¿Biken ka t'ʌnken, “Ts'uri, Ts'uri”, si mix ka metke'x a ba' ki wei'k a metke'x? 47Tu woro a mok a ku tar ti' ten y ku yui'k in t'ʌn y ku metik, bin wae teche'x p'is moke'x. 48P'is bex junturi' xi'ra ka tu meta' u yatoch, tʌm tu pʌk'a u yok yatoch y tu kukinta yok'o a tunich, kaj tari ch'ikyʌn buru, jach chich k'uchi ti' a lay a nʌj, chen mix k'ʌs peknʌ tu menʌ', a tu tu kukinta yok'o a tunich 49A mok tu yua in t'ʌn y muj meta', bix bex junturi' xi'ra a tu meta u watoch yok'o lu'm y mix tu ki kukinta u yok y kaj ch'iji a uk'un jach chich k'uchi ti' a lay a nʌj, laj jupchʌ tu woro u yatoch.»

Currently Selected:

San Lucas 6: PLacNaha

Highlight

Copy