San Lucas 15

A kʌ'sa a yʌn u jer u nu'ku yok'o aj me' aj sa'ti

(Mt. 18.10-14)

1Tu woro a mok ku k'atik u bo'ri u ba' u bojo' yete a mok ne yʌn u k'ebʌn laj xok'i ti' Jesús ti' u ch'extik u tsikba, 2A u winiko' a judíos a ku ya'batio' fariseos yete a ku kʌ'sko' u t'ʌn K'uj a toj u ts'ibtamʌ a Moisés uchik, tʌn u tsu'tsus'tiko' a Jesús kaj yao':

—A je' a xi'ra ku mʌn yete a mok ne yʌn u k'ebʌn y ku jʌnʌ yete.

3Jesús tu kʌ'so' yete a je' a kʌ'sa a yʌn u jer u nu'ku: 4«¿Wa junturi' teche'x, wa yʌn cien uj me' o ku sa'ta'ti' junturi' u me', mu jʌnch p'ʌtik a noventa y nueve tu nikʌ' tu jʌno' y ku bin u kʌxte aj sa'ti y tuk'in t'upti' u yik, ku sut yete? 5Tuk'in ku yirik, jach tsoy u yor u k'oche tu karembak. 6Ka k'uchuk ix yatoch, ku laj much'ik u bojo' a yet mʌn y yete a mok kʌjʌ' xok'o yete, ku yei'k tio': “Tsoykinta wore'x yete ten, ki wei'k teche'x, beje' tin wira in wʌrʌk' me' aj sa'ti.” 7Ki wei'k teche'x, bexi' ix kʌ' ku bin mʌn, más ku bin u tsoy tu yoro' ix kʌ' wa junturi' ku k'axik u tuku a mok ne yʌn u k'ebʌn y mo' bex ku bin u yuo' u bʌjo' ti' a noventa y nueve a toj tsoy u tuko' y ya mo' sik u k'axko' u tuko'.

A kʌ'sa a yʌn u jer u nu'ku yok'o a tak'in aj sa'ti

8»¿Ba' ch'upra o yʌnti' diez a sʌk tak'in o ku sʌtik junts'iti' u sʌk tak'in, ma' t'ʌbik u kip' y ku mistik u yatoch y ku kʌxtik hasta ku t'ubuti' u yirik? 9Tuk'in ku yirik, ku much'ik a u yet ch'upra a u yet mʌn yete a mok kʌjʌ' xok'o yete y ku yei'k ti'o': “Tsoykinta wore'x yete ten beje' ki wei'k teche'x, tin wira in sʌk tak'in a sa'ti.” 10Ki wei'k teche'x, bexi' ku jach tsoykintik u yoro' u ángeles K'uj, wa ku k'axik u tuku a mok ne yʌn u k'ebʌn.»

Jesús ku tsikbatik a kʌ'sa a yʌn u jer u nu'ku yok'o junturi' xi'ra ku sa'ta u ti'a

11Jesús bexi' tu ya'a: «Yʌn junturi' xi'ra yʌn ka'to' u xi'ra u ti'a, 12a its'inbi u ti'a tu ya'ti' u tet: “Tet, jʌtse ten a ba' to' ti' ten yʌni, a ka ba' p'ʌte tuk'in ka bin kimi,” y u tet tu jʌtsa u ba' ti' u ti'a a ku bin u p'ʌte tio'. 13Pachi mʌni ma' ya'p u k'ini, a its'inbi tu laj much'a u ba' a ts'abti' ten u tet, bini tu ne nʌch u jer kʌjta y tita tu laj xupaj tu woro u ba' ts'abti' tuku mʌn u mete mo' tsoy ba' y tu muj ki k'ʌnaj. 14Kaj ts'o'ki u xupik tu woro u tak'in, tari ne ya'p wi'ji yok'o a lay u lu'mi u kʌjta y chu'mpʌ u wijchʌj. 15Bini u k'ate u meaj ti' junturi' winik a ti' kʌjʌ' ix a lay u lu'mi, y ts'abti' u meaj, kaj tuchi'ta' ix u lu'mi ti' u kʌnʌntik kay k'ek'en. 16Tu jach ne ts'i'ota u jʌntik u yo'ch a kay k'ek'en a ku ts'abati' u jʌnte u k'aba' algarrobas, chen mix mok tu ts'ati'. 17Kaj u tukra u bʌj, kaj ya'a: “¡Bon u winik a ku meaj ti' in tet a tiʌ ix u yatoch, jach ya'p u yo'ch yʌnti', chen ten way kimika' tin in wi'ji! 18Binika' sut ix u yatoch in tet y bin wa'ti': Tet, a ten yʌn in k'ebʌn ti' K'uj y bexi' ti' tech. 19A ten ne mo' tsoyen ti' u t'ʌnen a ti'en: Jai' ts'ae y meaj a bex a winik ku meaj ti' tech.” 20Lʌji' Kaj lik'i y sutpʌji ix yatoch u tet.

»Ti' toj nʌch tiʌ, kaj i'ri ten u tet, ch'ab otsi ti' ten u tet y tu k'ʌnaj u yok u tet u mek'e u ti'a y tu ts'u'ts'a u p'uk.

21U ti'a a its'inbi tu ya'ti' u tet: “Tet, a ten yʌn in k'ebʌn ti' K'uj y bexi' ti' tech, y ya mo' tsoyen ti' u t'ʌnen a ti'en.” 22U tet tu ya'ti' u winik u ne k'ʌni': “Jare se'p' a to' ne jach ne tsoy a nok', y tʌke'x ti'; bexi' tʌke'x ti' jump'e u yuji u k'ʌ' a ku bin yok'o u tuch'u' y bexi' tʌke'x ti' u pechek xʌnʌ' yok'o u yok. 23Tase in wʌrʌk' me' a ne bu't' y kinse'x, kox ki jʌne'x y ka ki tsoykintik aj kore'x; 24A je' in ti'a p'is kimi y suti beje' kuxʌ'; ka'chik sa'ti y beje' ka' u'ri.” Y chu'mpʌ u tsoykintik u yoro'.

25»A suku'ubi u ti'a ti yʌn ix u lu'mi tuku meaj; kaj suti, k'uchi xok'o yok'o u yatoch, tu yua k'ay y ok'ot. 26Tu t'ʌnʌ junturi' u winik a u ne k'ʌni' u tet, tu k'ata ti', baij ku metko'. 27U ne k'ʌni' u tet tu ya'ti': “A wits'in u'ri; a tet tu ya'a u kinsa' uj me' a ne but' tuj u'ri ne uts y kuxʌ' a wits'in.” 28Chen a suku'ubi ne ts'iki y mo' poch u yoko ix nʌj. Jok'i u tet y tu p'isubʌj u ya'ti' ka okok. 29Kaj u nuka ti' u tet: “Ch'ex ta wue in wei'k tech, ne ya'p yaxk'in ki meaj ti' tech, tin ki' ua a t'ʌn y ten mix a ts'abaten mix junturi' a wʌrʌk' me' ti' ki' tsoykintik in woro' ti in jʌno' yete a mok in wet mʌn in bojo'. 30Chen ka ta wira u'ri a je' a ti'a, a tu laj xupaj a tak'in yete a ch'upra a ku kanik u bʌjo', a ti' ta kinsa' ti' a wʌrʌk' me' a ne bu't'.”

31»U tet tu nuka ti': “A tech in ti'ech, tu woro k'in ti' yʌnech tin wiknʌ, y tu woro in ba' tech yʌni. 32Ben ti' meta' a ka wirik, ti' a ki jʌnʌ y ti' a ki' tsoykintik aj kor, tu u'ri a wits'in, a uch p'is kimi y suti beje' kuxʌ'; ka'chik sa'ti y beje' ka' u'ri.”»

Currently Selected:

San Lucas 15: PLacNaha

Highlight

Copy