San Lucas 14

Jesús ku ch'ensik junturi' mo' uts yʌnti' u ya'ji u k'aba' hidrópico

1Jump'e u k'ini ku je'sik u bʌjo' a judíos, Jesús oki tu jʌnʌ yok'o u yatoch jump'e wes a lʌji' u winik a judíos a ku ya'bati' fariseo, y u jero' a fariseos tʌn u muku ch'uktik a Jesús. 2Bexi' tiʌ ʌkʌtʌn ti' junturi' xi'ra mo' uts yʌnti' u ya'ji a ku ya'bati' hidropesía. 3Y Jesús tu k'ata tio' a u winiko' a judíos a ku ya'batio' fariseos yete a ku kʌ'sik u t'ʌn K'uj a toj u ts'ibtamʌ a Moisés uchik:

—¿Tsoy o mo' tsoy in ts'ʌkik winik u k'ini ku je'sa' bʌj?

4Chen a tio' mo' tu nu'ku. Y Jesús tu chuka u k'ʌ' a mo' uts, tu ts'ʌka' y tu ya'ti' u bin. 5Y pachi Jesús tu ya'tio' a fariseos:

—¿Yʌn wa teche'x maj jarik se'p' o ku lubu u wakʌx yok'o jump'e u jor a ne tʌm tuku jara ja', tak u k'ini ku je'sa' bʌj?

6Y tio' mo tu nuko' tu mu' k'ato' u nujko'.

A mok pʌya tu jʌnʌ tuku ch'ei'ko' u bʌjo'

7Tuk'in a Jesús tu yiraj a to'o mok ku k'ucho' tu jʌno' ku tejtiko' u k'ʌnche' a más tsoy tu ku bin kuto' tu jʌno'. Lʌji' ka tu ya'tio' jump'e a kʌ'sa a yʌn u jer u nu'ku:

8—Tuk'in ku pʌyech ta jʌnʌ tuku ch'eik u bʌjo', maj tejtik u k'ʌnche' a to' ne tsoy, chen ma' we wa yʌn mok más t'o'o ku bin tar y tita ku bin kuta. 9A mok tu pʌyech binukaj tar u ya'tech: “Ch'ae u kuta tu kure'ch.” Y yete a su'raki ti ka ka' bij kuta ch'ik tu xur. 10Ben, tuk'in ku pʌyech, xen ta kuta ch'ik tu xur o ch'ik tu pach, tuk'in ka tak a mok tu pʌyech bi u ya'tech: “Bojo', mʌnen ta kuta tu ne tsoy a k'ʌnche'” y bex ku bin ki tsoy tu yoro' ti tech a mok a wet kuta yok'o u pojche'. 11Tu woro a mok ne t'o'o ku yui'k u bʌj, K'uj ku bin u wayse ne mʌnʌ' y a mok ku yui'k u bʌj mo t'o'o, K'uj ku bin u mete ne t'o'o

12Pachi a Jesús tu ya'ti' a xi'ra u yʌjpʌyi tu jʌnʌ:

—Tuk'in ka metik a wo'ch, ma' pʌyik a bojo' mok a nʌj et mʌn, mix u xi'ra a boje'x, mix a mok lʌiti' u bojo' a tet o a nʌ', mix a mok xok'o kʌjʌ' yete tech a lʌji' ne yʌn u tak'in, wa bex ka metik tio' bexi' tio' bin u pʌyech, y bex ku bin u toj bo'te tech a tu taj pʌya 13Ben tuk'in ka metik ne ya'p a wo'ch, ka bin a pʌyik a mok mʌnʌ' u tak'in, a mok mʌnʌ' u k'ʌ', a mok muj xima y a mok muj yirik u ber, 14y bex tsoy a wor ka bin mʌn; tu tio' mo bik u bo'tik a ba' a ta ts'ati', chen tech binukaj ts'aba u bo'ri tech tuk'in ka laj lik'ik tu ka' kuxta a mok tu ki meta tsoy ba'.

A kʌ'sa a yʌn u jer u nu'ku tuk'in ka' metak ne ya'p o'chi

(Mt. 22.1-10)

15Ka tu yua junturi' a kurukba yok'o pojche', tu ya'ti' a Jesús:

—¡Binukaj jach tsoyta u yor a mok ku jʌnʌ yok'o tu ku wesintik K'uj a tiʌ kʌ'!

16A Jesús tu nuka ti':

—Junturi' xi'ra tu meta ne ya'p u yo'ch y tu pʌya ne pim winik. 17Y kaj k'uchuk tu p'is u jʌno' tu tuchi'ta u k'ʌni' ti' u yei'k ti' tu woro a tu pʌya: “Ko'tene'x, ya tu woro laj ts'o'k u meta'.” 18Y tu woro chu'mpʌ u tus eik. A u yʌj chuni tu ya'a: “Ti mʌna jump'e lu'm, y yʌnti' in bin y wire, in k'atik tech a sa'sik ten.” 19U jer tu ya'a: “Ti mʌna cinco u bojo' tsimin, y yʌnti' y bin y tunte; in k'atik tech a sa'sik ten.”. 20U jer tu ya'a: “Tʌntʌ in ch'eik in lak'; a'ti' mo' bik in bin.” 21A u k'ʌni' suti y tu ya'ti' u ts'uri tu woro a ba' y u ts'uri ts'iki y tu ya'ti': “Xen yok'o bej y a nukuch bej y tase tu jʌnʌ a mok mʌnʌ' tak'in a mok muj yik u ber y a mok muj xima.” 22Kaj ts'o'k u metik a ba' aʌ' ti' ten u jach Ts'uri kaj ka bin tu yʌn u jach Ts'uri, kaj ya'ti': “In jach Ts'uri, kaj in toj meta a ba' ta wa'a ten, chen mo' turuk a watoch.” 23A u ts'uri tu ya'ti' u winik: “Xen a laj pʌye tu pach u kʌjta tarak tu ku mʌno' ix bej y tu sutmʌktʌ'. Chich pʌye ka tarko' tu jʌno'. Ti' u laj turu in watoch. 24Bein kin wei'k, a winik a to'o tin yʌn pʌya tu jʌno', ya mʌnʌ' u jʌntko' in wo'ch.”

Bon u jach yaji a t'u'rik a Cristo

(Mt. 10.37-38)

25Jach ne pim winik u yet bin a Jesús y lʌji' kaj u sutaj u bʌj u yire y kaj u ya'tio': 26«A mok poch u tar tin pach ti' u kʌnik in t'ʌn, wa más ne ku yakuntik u tet o u nʌ' o u ti'a o u xi'ra u bojo' o u ch'upra u bojo' y bexi' jay ti ne otsi u yik u bʌj, y ten ts'ets'i' ku yakuntiken a lay mo' bik u waya in kʌ'sa winik. 27A mok mo' poch u ch'eik u cruz y ku tar tin pach, mo' bik u waya in kʌ'sa winik. 28Wa yʌn mok yok'o teche'x, u k'at u metik nukuch nʌj a tu ku ch'uko' ¿Mo' ku yʌn tukrik u bʌj bon u bo'ri ku bin u xupe tu woro, ti' yirik wa k'ucha' u muk' u ts'osik tu woro? 29Wa ku che chunik u metik chen pachi moj k'uchu u muk' u ts'osik, tu woro a mok ku bin u yiro' bi u chu'so' u p'asta', 30Ku bin u yao': “A je' xi'ra kaj u yʌj chuna u metik u nukuch nʌj a tu ku ch'uko' chen moj k'uchu u muk' u ts'osik.” 31Jesús kaj u ya'ti' a pim, a mok taro' tu pach:

—Wa yʌn junturi' wes, ku bin tu kinsa' ti' u jer wes, ¿mo ku yʌn ki' tukrik wa k'ucha' u muk' ti' chu'sik u kinsa' yete a juntu wes a lʌji' yʌnti' veinte mil u ba'kʌi y ti' jay diez mil ba'kʌi? 32Wa ku yirik mo' k'ucha' u muk' ti' a juntu wes, ti' toj nʌch tʌn u tar a juntu wes, bi u tuchi'te junturi' u winik ti' u yei'k ti mu' k'at kinsa' to jay u k'at ka u tsoyta u yoro'. 33Bein wa ma' a k'at a p'ʌtke'x tu woro a ba' a yʌn teche'x, mo bik u waya in kʌ'sa winik.

Tuk'in a ch'och' ku luk'u u ch'och'i

(Mt. 5.13; Mr. 9.50)

34»Jesús tu ya'a:

—A ch'och' ne tsoy, chen wa ku luk'u u ch'och'i. ¿Ba' yʌn ak mete ti' u ka tar u ch'och'i? 35Mix ti a lu'm mix ti u tu'i che' tsoy, to jay ku pura'. ¡A mok yʌn u xikin u ki ch'exte u yue!.»

Currently Selected:

San Lucas 14: PLacNaha

Highlight

Copy