San Lucas 13

Sute'x a t'ʌn ti' K'uj o binakaj kime'x

1Lʌiti' u k'ini tio' tita jujuntu tʌn u tsikbʌtik ti Jesús a bai tu meta Pilato ti' u winki Galilea, a tu xak'ta u k'ik'e yete u k'ik'e a bʌk' a ku k'ubik ti u k'ujo'.

2Tu nuka Jesús: «¿Ka tukrik a jeo' galileos, a tio' ne kʌx meta', jari tio' nen ya'p u si'pi bex a tu woro a galileos? 3Ki wei'k teche'x: Mo'; a teche'x o maj sutke'x a t'ʌn, ta wore'x ka bij laj kime'x bexi'. 4A bex a layo' dieciocho juti ti' a nukuch nʌj a tu ku ch'uko' ix u kʌjta siloé, ka laj kimo' ¿Ka tukrike'x o jai' tio' ne ya'p u k'ebo' bex tu woro u winki u kʌjta Jerusalén? 5Ki wei'k tech. Mo'; o maj sutke'x a t'ʌn, ta wore'x ka bij laj kimi bexi'.»

A kʌ'sa yok'o a che u k'aba' higuera a muj u wichʌnkʌ jai' yʌn u jer u nu'ku a kʌ'sa

6Bexi' tu ya'a a je' a kʌ'sa a yʌn u jer u nu'ku: «Yʌnti' junturi' xi'ra jump'e che u k'aba' higuera u pʌk'mʌ yok'o u lu'm u pʌk'a nukuch ts'us (uva), y bini u kʌxte u wich y muj yiraj. 7Y tu ya'a u winki a kor a nukuch ts'us: “Yʌn oxp'e yaxk'in ki woro ta y kʌxte a je' u wich in pʌk'a higuera, y mix ki wirik; toj xat'e ¿Ba'wi ku k'ʌnik a lu'm?” 8A ti tu nuka a mok ku kʌnʌntik u lu'mi a nukuch ts'us, tu ya'ti': “Ts'uri, p'ʌte a je' a yaxk'in, ki yʌ sut pʌntik u xur u chun, y ki but'ik u tu'i che'. 9Pachi o ku ki ichʌnkʌj ka p'ʌtik, o muj ichʌnkʌj ka xat'ik.”»

Jesús ku ch'ensik junturi' ch'upra u k'ini ku je'sik u bʌjo' a judíos#13.10 U k'ini ku je'sik u bʌjo' a judíos: A lʌji' u k'ini sábado a ku je'sik u bʌjo' a judíos ti' u t'ʌnko' K'uj.

10Tʌn u kʌ'sa Jesús yok'o u nʌji tuku much'ik u bʌjo' a judíos u xake u t'ʌn K'uj u k'ini ku je'sik u bʌjo' a judíos; 11Y tiʌ tita junturi' ch'upra yʌn dieciocho yaxk'in mo' uts, yʌnti' kisin tu yok'o, la'jen p'uxukba u mʌn, y mo' bik u tajkintik u bʌj. 12Tuk'in Jesús tu yiraj, tu t'ʌna y tu ya'ti':

—Ch'upra, beje' a ya'ji tu siptech.

13Y tu tʌk'a u k'ʌ' tu yok'o; y ti' tu tajkinta u bʌj ij chu'mpʌ u yei'k ne tsoy ba' ti' K'uj. 14Chen u ts'uri u nʌji tuku much'ik u bʌjo' a judíos tuku xakik u t'ʌn K'uj, ts'ikchʌ tu tu ch'ensa winik a Jesús u k'ini ku je'sik u bʌjo' a judíos, y ti' tu ya'ti' a winik:

—Taju yʌn k'aj (seis) k'in yʌn ti' ak meaj; a jeo' u k'inio' je' a tar ti' u ch'ensa a ya'je'x chen u k'ini ku je'sik u bʌjo' a judíos, mo' tsoy.

15Ak Ts'uri tu nuka y tu ya'ti':

—A tech ka metik a bʌj ne tsoy a tuku chen tusaka', jujuntu teche'x ¿maj pitke'x a wʌrʌk' wakʌx u k'ini ku je'sik u bʌjo' a judíos o a wʌrʌk' tsimin to' u yatoch y ka purik tu yuk'u? 16Ia je' u ch'upra u tia' u nuki abraham, a k'ʌxʌ' ten a kisin a u k'aba' Satanás dieciocho yaxk'in, ¿mo' tsoy u pita' tu' k'axa' u k'ini ku je'sik u bʌjo' a judíos?

17Kʌ' tu ya'ti' a je' a ba', tu pʌjusu'ta tu woro u yʌjp'akti; y tu woro a winiko' ne tsoy u yoro' tu tu meta' a jach ne tsoy a ba'.

Jesús ku tsikbʌtik u wich a mostaza jay yʌn u jer u nu'ku u kʌ'sa

(Mt. 13.31-32; Mr. 4.30-32)

18Y tu ya'a: «¿Baika lʌiti' tu ku wesintik K'uj a tiʌ kʌ', y yete baiki ki bin katkinte? 19Lʌiti' bex u nek' a mostaza, junturi' xi'ra tu ch'a y tu pʌk'a to' u lu'm u pʌk'a; y ch'iji, y tu meta u bʌj ne nukuch che', y a ch'ich'o' tu meto' u k'u' yok'o u k'ʌ' a che'.»

Jesús ku tsikbʌtik u ts'aki aj pʌn ti' u si't'i jay yʌn u jer u nu'ku u kʌ'sa

(Mt. 13.33)

20Y tu kʌ' a'a: «¿ba' yete ki bin katkinte tu ku wesintik K'uj a tiʌ kʌ'? 21Lʌiti' a bex u ts'aki a tu ku si't'i aj pʌn, a junturi' ch'upra tu ch'a y tu xak'ta yete chumuk koxta harina ti' u si't'i tu woro.»

A ts'ots' u jor

(Mt. 7.13-14,21-23)

22Ti' u wich u bin Jesús ix Jerusalén, tʌn u mʌn tu yʌn u kʌjta y bexi' tu mo ne yaja kʌjta. 23Yʌn mok tu k'ata ti' Jesús:

—Ts'uri, ¿mo' pim winik a ku bij bin ix kʌ'?

Y Jesús tu nuka:

24—Jach p'isa bʌje'x a woke'x tu mo' yaja u jor u nʌji, ki wei'k tech; jach ne pim ku bin u tunto' u yoko chen muj bin k'uchuk u muk'o u yoko. 25Pachi u t'oji a nʌj, ka lik'ik, ka u k'ʌrre u jor u yatoch, y teche'x tak ka chu'ske'x a t'ʌnex tu jor u nʌji y ka wei'ke'x: “Ts'uri, Ts'uri,” jeu jor ti' teno', “ti' ku bin u nuke teche'x: mi' wue tuba a tare'x.” 26Bi a chu'se'x a wei'ke'x: “Ket jʌno' y ket uk'uno', y kʌ'sʌnech yok'o u beri in kʌjto'.” 27Ti' ku bin u nuke teche'x: “Ki wei'k teche'x mi' wue tuba a tare'x; tu woro a teche'x k'uye a bʌje'x ti' ten, a teche'x ne mo' pajtie'x.” 28Tita ka bij ok'e'x y a k'uxe a koje'x yete u yʌyi, tuk'in ka wire'x a Abraham, a Isaac, a Jacob y tu woro a profetas tiʌ ichi tu ku wesintik K'uj a tiʌ kʌ' y teche'x tij p'ate'x jaknʌki. 29Binukaj tar winik yok'o u nu'ku tuku tichi k'in, bexi' tuku bi k'in, bexi' tuku ta xʌmʌn y ix nojo (sur) y binukaj kuto' tu jʌno' yok'o u pojche' tu yʌn tu ku wesintik K'uj a tiʌ kʌ'. 30Chen tax jujuntu a ku yui'k u bʌj ne to'o a lay u k'ini mix ku yu'e u bʌ ne t'o'o y a mok beje' mo' t'o'o ku yui'k u bʌj a lay u k'ini t'o'o ku bi u yue u bʌj ix K'uj.

Jesús ku yak'tik u bʌj yok'o Jerusalén

(Mt. 23.37-39)

31Lʌiti' u k'ini, k'uchi ma' ya'p u winiko' a judíos a ku ya'batio' fariseos, tu yao' ti' Jesús:

—Jok'en way y xen, a Herodes poch u kinsikech.

32Jesús tu nuka tio':

—Xen a'e'x ti' bex a lay a ch'ʌmʌk: “Ch'ex ta wue in wei'k tech, ki jarik kisin tu yok'o ti'a winik, ki ts'ʌkik winik beje' y sʌmʌ y ka k'uchuk oxp'e kin, ya ku ts'oko y meaj.” 33Chen yʌnti' metik in meaj beje', sʌmʌ y ka'be turi in k'uchu ix Jerusalén. Ki wei'k tech, mo' tsoy u kimi junturi' profeta jaknʌki ix Jerusalén.

34Jesús tu ya'a: »¡Jerusalén, Jerusalén, a teche'x ka kinsike'x a profetas, ka ch'inke'x tu jo'o tunich a mok tuchi'ta' ten K'uj! ¡Bon wʌts' in k'at in much'e a ti'e'x, bex a kax ku jukintik u yar ti' u kʌnʌntik, chen a teche'x mo' ta chae'x! 35Ch'ex ta wue in wei'k teche'x, a wato'che'x binukaj p'ata tu juna, ki wei'k teche'x mʌnʌ' a ya iken beje', ja' ka iken ka k'uchuk u k'ini ka wei'ke'x: “¡Kaj k'ujinte a ku tar a je' aj tuchi'ta ti ik Ts'uri!”»

Currently Selected:

San Lucas 13: PLacNaha

Highlight

Copy