San Lucas 12

Jesús ku kʌ'sik yok'o a mok ne ku tus

(Mt. 10.26-27)

1Tʌn u much'ik u bʌjo' jach ne pim a winik más mʌni bex a mil winik, tax jujuntu tu laj pech'ik u bʌjo' tu ne pimo'. Jesús chu'mpʌ u tsikba y lʌji' tu yʌ a'tio' ti' u kʌ'sa winik y bex tu ya'a: «Ki' kʌnʌnte a bʌje'x ti' u winiko' a judíos a ku ya'batio' fariseos, a layo' ne ku tuso'. 2Mʌnʌ' ba' a mukrʌ' mu bij laj eta', y tu woro a ba' a laj taka' binukaj laj eta' baiki. 3Tu woro a ba' ka wei'ke'x ix ts'uak'ʌ, chuk'in ku bin eta', a to' ta taka' a wei'k a ba', biu laj ete tu woro a winik.

A mok yʌnti' a jach sʌjtik

(Mt. 10.28-31)

4»In jach boje'x kin wei'k teche'x, ma' sʌjtik a mok ku kinsik a bʌk'e, chen mʌnʌ' ba' u jer u metik. 5Chen a ten bin wae teche'x mok yʌn a jach sʌjtike'x: Lʌji' ka sʌjtike'x a mok chen u ts'oko u kinsikech, k'ucha' u muk' u purke'x ix k'ak'.

6»¿Mo' ka'p'e chixtak'in lʌji' u bo'ri cinco u yar ch'ich'? Chen a lay, K'uj muj tup'sik mix junturi'. 7Y teche'x, tu woro u tso'tse a joe'x u laj xakmʌn K'uj, ben ma' naj sʌjtik ba', a teche'x más ko'je'x y mo' bexe'x a bex a ch'ich'.

A mok mo' surak u yei'k a ten tin waksa tin wor ti' Cristo

(Mt. 10.32-33; 12.32; 10.19-20)

8»A ten kin wei'k teche'x, tu woro a mok ku laj tsikbʌtik tia' winik a ti u yaksa mʌn tu yor ti ten, bexi' ten a lʌjien u Ti'a Xi'ra kin bin in wae tu wicho' u ángeles K'uj a teche'x jach ta ki aksa ta worex ti ten. 9Chen a mok mu' k'at yei'k ti' a winik a ti u yaksa mʌn tu yor ti' ten, ten bexi' bin in wae ti' K'uj tu wicho' u ángeles, a teche'x ma' ta ki aksa ta wore'x ti ten,

10»Tu woro a mok a ku p'astiken a lʌjien u Ti'a Xi'ra, K'uj je'e u sa'sik ti', chen a mok ku yei'k mo' tsoy ba' ti' u Pixʌn K'uj, a lay mʌnʌ' u sa'sa' u si'pi ten K'uj.

11»Tuk'in ka u bise'x yok'o u nʌji tuku much'ik u bʌjo' a judíos u xake u t'ʌn K'uj o yok'o tu tio' u much'o' u bʌjo' a jak'o' u kucho', ma' tukrike'x bik taba o bik ka bin a nuke'x tio', o bay ka bin a wa'ex tio'. 12A lʌji' u k'ini u Pixʌn K'uj, je' u yei'k tech baij ka ba' a wa'ex ti'.»

Mo' tsoy a ne tukrike'x a ne ts'urchʌ

13Junturi' mok ix u pimai tiʌ, kaj u pura u t'ʌn ti' Jesús, kaj ya'a:

—Wʌjkʌ'si, a'ti' u xi'ra in bojo' ka u jʌtse ten u ba' in tet a tu p'ʌta teno' kaj kimi.

14Y Jesús tu nuka ti':

—¿Moki tu ya'a teche'x a ten ja'k'i kuch o a mok ku bin u ya'e bij ka bin a kat ka wore'x?

15Bexi' Jesús kaj u ya'tio' a mok tio' tita:

—Ki' kʌnʌnte'x a bʌje'x ti' mo' jari ka ki yakuntik a tak'ine'x, ka wirik tak ne yʌn a tak'in mo' lʌji' ku ts'ek u kuxta a winik.

16Bexi' tu kʌ'sa Jesús yete jump'e a kʌ'sa a yʌn u jer u nu'ku, tu ya'a: «Yʌn uchik, junturi' xi'ra ne ya'p u tak'in y ne ya'p ku t'ara u wich u pʌk'a. 17A xi'ra a mok jach ya'p u tak'in tu tukra ix tuku kaj ya'a: “¿Baiki bi mete beje', tu ki bin in laj li'se u wich in pʌk'a a nej t'ari?” 18Kaj ts'o'k u tukrik a baij ku bin u metik kaj ya'a: “In we' ba' kin bin in metik, bin in laj pa'e tu woro in kʌ'che' y kin ka' metik más ne nuk ti in laj li'sik tu woro u wich in pʌk'a y tu woro a ba' a yʌn ten. 19Pachi bin in wae tin in pixʌn: Ya ne ya'p a ba' a lismʌ ti u muk'tik ne ya'p yaxk'in. Je'sa bʌj, jʌnen, uk'unen, toj mʌnen a ki' tsoykinte a wor.” 20Chen K'uj tu ya'ti' a lay a xi'ra: “A tech mʌnʌ' p'is a tuku, maj wirik toj a beje' a ak'ʌ' binukaj k'ata pixʌn tia' kimi, y a ba' a ta li'sa' ¿Ti mok ku bij p'ata?” 21Bex ku bin mʌn ti a mok jari ku ne tukrik u ne ts'urchʌ. Chen K'uj ku yirik mix kʌx yʌn u tak'in»

K'uj ku kʌnʌntik u ti'o'

(Mt. 6.25-34)

22Kaj ts'o'k u kʌ'sik Jesús a pim, pachi kaj u ya'ti' u kʌ'sa winiko': «Kin wei'k teche'x, ma' tukrike'x baij ka bin jʌnte'x ti' a kuxte'x. Ma' tukrike'x baij ka bin a bukinte'x. 23Ka wirik, jach ko'o a kuxte'x, chen a wo'che'x mo' ko'o, a bʌk'e'x más ko'o, chen a nok'e'x mo' ko'o. 24Chʌ'te'x a wire'x a u ch'ich'i kaj, ma' u pʌk'ik ba', y mix yʌn u lu'mi tu ku bin t'akik u yo'och, mix yʌn u kʌ'che' tuku li'sik u yo'cho', chen K'uj lʌji' ku ts'ek u yo'ch. ¡A teche'x más ko'je'x y mo' bexe'x a bex ch'ich'o'! 25¿A tukrike'x a teche'x, tak ne ka tuke'x, yʌn wa je'e a ti'psik bake'x ka' nʌp' ku ta chumuk (medio metro)? 26Che mix k'ʌs ku k'uchu a muk'e'x a metik a chichin ba', ¿biken kaj tukrike'x yoko' a yʌno'?

27»Ki' tukre'x a ba' kin bin in wei'k teche'x. Kaj a wirke'x bik ku ch'iji u top' a chʌk che' a jach tsoy u top', a tio' muj meajo', muj chuyo', chen ten kin wei'k teche'x, aj wes a lʌji' Salomón, tak u bukimʌ u nok' uch jach tsoy y ne ko'o, chen moj jach kuchi ket u tsoyi yete a chʌk che', tarak lʌji' aj wes. 28Wa K'uj bex ku ki metik jach ne tsoy a topche' y pachi ku tiji y ku tokik ix k'ak' ¿Mo' bex je'e u jach metik teche'x a maj ki' waksik ta wor ti'? 29Ben ma' ne tukrik a bʌje'x baij ka bin a jʌnte'x, mix baij ka bin a wuk'e'x. 30Toj jari a je' a ba' ku tukriko' a mok mu' k'omʌ K'uj, chen teche'x a Tet toj u yue a k'at tu woro a je' a ba'. 31Yʌj kʌxte'x tu ku wesintik K'uj a tiʌ kʌ', tu woro a ba' a ta wue'x bexi' je'e u ts'ekte'x.

Kʌxte'x a ts'urchʌ ix kʌ'

(Mt. 6.19-21)

32Jesús kaj u ya'ti' u kʌ'sa winiko':

»Ma' sʌjtik tarak mo' pime'x, ka wirik, jach tsoy kaj u tukra a Tete'x K'uj u yaksike'x a wesinte'x yok'o tu ku wesintik K'uj a tiʌ kʌ'. 33Kʌne'x u bar a bʌj a yʌn teche'x y ka a ts'ae ti' a mok mʌnʌ' u tak'in, mete'x a poxa a muj la'p'a, kʌxte'x a ts'urchʌ ix kʌ' a muj ts'oko, tu ba' muj k'uchu a mok ku yakra ba' y tu muj yoko aj k'ʌmʌs. 34Tu ka ts'urche'x teche'x, tita tiʌ a pixʌne'x

Toj ki' ch'ukte'x ka ka' sutuk Jesús

35»Teche'x yʌnti' a toj ki ch'uktik u tar ak ts'uri, y a kip'ex toj t'ʌbʌ'; 36A teche'x bex a metke'x bex a xi'ro' a ku ch'uktik u ts'uri u sut a tu ku cheik u bojo', a tuk'in ku k'uchu y ku t'ʌn, ka jei u jor ti'. 37Jach ku bin tsoyta u yoro' a mok ku k'ʌna', wa a ka' u'ruk u ts'uri, wa ku yirik u winik tʌn u ch'uktik u ts'uri, jach ki wei'k teche'x, u ts'uri bi u ya'ti' u k'ʌnio' ka kurak ix u pojche' y lʌji' ku bin u mʌse u yo'cho'. 38A layo' ku jach bin tsoy ta u yoro' wa ka' u u'ruk u ts'uri, tak chumuk akʌ', o tak tʌn u bij sasta. 39Ue'x a je' a ba' kin wei'ke'x teche'x: Wa u winki jump'e nʌj u ye tok'in ku bin tar a ku yakrik ba' mʌnʌ' u cheik u yoko u yakra u ba' yok'o u yatoch. 40A teche'x bexi' ki' mete'x y ki' ch'ukte'x; u Ti'a Xi'ra ku bin sut tuk'in mix mok u yue.»

U k'ʌni' a muj ki metik u t'ʌn u Ts'uri

(Mt. 24.45-51)

41Ka tu ya'a Pedro:

—Ts'uri, ¿ka wei'k a je' a kʌ'sa a yʌn u jer u nu'ku ta kʌ'sa, jai' ti to', o ti tu woro a winik?

42Jesús ka tu ya'a: «¿To' baij a ku kʌnʌ nʌj ne tsoy u meaj y ne u yej meta ba'? Laj a to'o ku li'sa t'ʌn ten u ts'uri u ts'ek u yo'ch a mok tiʌ tu yatoch yete u p'is u hora a bex a'bti'. 43Ku jach bij tsoy u yor a ku k'ʌna': wa ku yira ten u ts'uri tʌn u meaj ka u'ruk a bex a'bti'.

44Jach taj kin wei'k teche'x, u ts'uri a nʌj je' u ka ts'ekti' u kʌnʌnte tu woro u ba' a ti' yʌn ix yatoch. 45Chen a lay u k'ʌni', wa ku tukrik ku bij xʌnta u sut u ts'uri, y ku laj kʌxmetik u bojo', y ku kuta tu jʌno' y u yuk'ik u yo'och. 46Ku bij sut u ts'uri tuk'in u k'ini ma' tʌn u ch'uktik y tuk'in mu yue to' k'in, y biu ts'ae u bo'tik u si'pi y ti ku bin u pure tu tio' a muj ki metik u t'ʌn u ts'uri.

47»Chen u k'ʌni' au yue a baij u k'at u ts'uri, mo' tu ki ch'ukta' y muj meta u t'ʌn a ba' aa' ti' a bai u k'at u ts'uri, a lay binukaj ne ya'p ji'xta'. 48Chen au k'ʌni' a mu yue tu che meta ba' jay yʌnti' ti' u bo'tik u si'pi, a lay ku bij jʌts'a' u pach ten u ts'uri más k'ʌs chichin, a mok más ya'p ku ts'aba ti' más ya'p ku bij k'ata' ti' y a mok más ya'p k'uba' u kʌnʌnte más ya'p ku bij chich k'ata' ti'.

Jesús, ku ts'ek u jʌtsik u bʌjo' a winik

(Mt. 10.34-36)

49»Taren y t'ʌbe k'ak' ix lu'm; ¡Ne poch in wirik wa toj t'ʌbʌ' beje'! 50Chen yʌnti' y mʌsik jach yaj ba' ¡jach ne mo' tsoy in wor tu mo' k'uchuk a lay u k'ini! 51¿Teche'x ka tukrike'x taren in tsoykinte u yor a lu'm? Ki wei'k teche'x mo'o, a ten taren in ts'ae u jʌtsik u bʌjo' a winik. 52Chen beje', cinco a mok kʌjʌ' yok'o nʌj biu jʌtse u bʌjo', ku bij ts'iko', oxto' yete kato' u bojo' y juntu kato' yete oxto' ku bij ts'iko'. 53U tet ku ts'iki ti' u ti'a, u ti'a ku ts'iki ti' u tet, u nʌ' ku ts'iki ti' u ch'upra u ti'a y u ch'upra u ti'a ku ts'iki ti' u nʌ', u yixkit ku ts'iki ti' u yixkit u lak' u ti'a y u yixkit a u lak' u ti'a ku ts'iki ti' u yixkit.»

U ye'sa' a ba' a baij ku bin mʌn

(Mt. 16.1-4; Mr. 8.1-13)

54Kaj u ka a'a Jesús ti' a pim:

«Ka wike'x u nʌ'kʌ u muyaj tu ku bin k'in, ka wei'ke'x je' u tar ya'ri, y ku jach tar ya'ri. 55Wa ku tar u yik'a ix nojo (sur), ka wei'ke'x; binukaj jebe k'in, y jach bex ku mʌn. 56¡A teche'x ka metke'x a bʌje'x ne tsoy a tuke'x chen tusaka'e'x! A we'ex a wirik a kʌ' yete a lu'm ¿Bik ma' wetke'x baiki a beje' u k'ini tie'x?

Tsoykinte a wor yete a mok a p'ek u yirikech

(Mt. 5.25-26)

57Jesús kaj ya'a:

»¿Biken mo' a bʌje'x ka tukrike'x ta tuke'x a metke'x u taji? 58Tuk'in ka bin yok'o a jak'a u kuch yeta a mok ts'ikech yete, toj yʌj k'ate a wor yete, ti' mu bin u purech yete uj juesi tribunal, y uj juesi tribunal ku purkech yete a ku chukwinik y a ku chukwinik ku bin u b'utech tuku chuka mʌka' winik. 59Ki wei'k tech, mʌnʌ' u cheik a jok'o tech hasta ka laj bo'tik a bo'.»

Currently Selected:

San Lucas 12: PLacNaha

Highlight

Copy