Josué 8

Bix úuchic u cha'abal Hai tumen Israel

1Yuumtzile' tu ya'alaj ti' Josué: Ma' a ch'a'ic sajaquil mix u lúubul a wóol. Ch'a'a tuláacal a aj ba'atelo'obo', ca xi'iquech a ch'a'a u caajil Hai, tumen tene' bíin in beet a dzáanche'etic u ajawil Hai bey xan u cajnáalilo'ob. U caajilo'ob yéetel u lu'umile' bíin a ti'alinto'ob, 2teche' bíin a beet ti' Hai yéetel u ajawil le ba'ax ta beetaj ti' Jericó yéetel u ajawe', chéen ba'ale' bejela'e' cu p'áatal te'ex u nu'uculo'ob yéetel u yaalako'ob, bey xan le máaxo'ob bíin a dzáanche'ete'exo'. Nu'ucbes jun p'éel ba'atel ca'aliquil naayal u yóolo'ob, ooquen tu paach le caajo'.

3Josue' tu nu'ucbesaj tuláacal u aj ba'atelo'ob u ti'al j binbalo'ob u ch'a'ob u caajil Hai. Tu yéeyaj treinta mil aj ba'atelo'ob, tu túuchi'itajo'ob yéetel áakab 4tu ya'alaj ti'ob beya': U'uye'ex ma'alob: xeene'ex tu paach le caajo' ta'acbesaba'ex naadz ti', nu'ucbesaba'ex u ti'al a pulaba'ex tu yóokol. 5U yalab le máaco'obo' bíin u nadzuba'ob ti' le caajo', le quéen jóokoc le caaj u pulubáa t óokole', to'one' bíin áalcabnaco'on ti'ob je'el bix t beetilac yáaxo'. 6Leti'obe' bíin u ch'a'apachto'ono'ob le quéen áalcabnaco'on ti' le caajo', tumen bíin u tuculto'ob dzo'oc u ca'a beetico'ob c áalcab. 7Te'ex túune' bíin jóokoque'ex le tu'ux a ta'acbesmaba'exo', ca ch'a'ique'ex le caajo', tumen Yuumtzil a Kuexe' bin u ca'aj u kub te'ex. 8Le quéen dzo'ococ a ch'a'ique'exe', tóoque'ex je'el bix tu ya'alajilac Yuumtzilo'. Tumen bey tu ya'alajilaco'.

9Josué túune' tu ya'alaj ti'ob ca jóokoc u binbalo'ob, leti'obe' j bino'ob u ta'acbesmajuba'ob chúumuc ti' Betel yéetel Hai, tu chikin Hai, ca'aliquil Josue' tu máansaj áakab tu cúuchil tu'ux cu je'elelo'obo'. 10Tu láak kiine', Josuee' j líik jach piknale' ca tu t'anaj tu kaaba' u aj ba'atelo'ob. Cu dzo'ocole' j máan táanil ti'ob, láakinta'an tumen u nuuquilo'ob Israele', ca tu dzajubáa u pulubáa tu yóokol Hai. 11Tuláacal le j xiibo'obo' j náadzo'ob actáan ti' le caajo', ca j je'elo'ob j xaman ti', ca j p'áat le táax lu'umo' chúumuc ti' leti'ob yéetel ti' le caajo'. 12Josuee' tu ta'acaj míin cinco mil máaco'ob tu táancoch bejil Betel yéetel Hai, tu chikin le caajo', 13beyo' tuláacal le aj ba'atelo'obo', j t'o'oxo'ob ca'a jaatz, jun jaatze' ta'acbesa'abo'ob tu chikin le caajo', u láake' j p'áato'ob tu cúuchil tu'ux cu je'elelo'ob tu xaman. Ti' le áakabo' Josuee' j bin táanil ti'ob tac tu chúumuc le táax lu'umo'.

14Le ca tu yilaj u ajawil Hai le ba'ax cu yúuchulo', tu lep'cuntaj u yóol yéetel tuláacal u aj ba'atelo'ob u ti'al u puluba'ob u ba'atelto'ob Israel tu táax lu'umil jordán, ma' tu yojéeltaj wa yaan u láak j israelitaob u ta'acbesmajuba'ob ca'ach tu paach le caajo'. 15Josué yéetel u aj ba'atelo'obe' tu beetajo'ob bey táan u yáalcabo'ob ti'obe', ca j áalcabnajo'ob tu táan Hai tu bejil le x tocoy lu'umo'. 16Tuláacal túun u aj ba'atelilo'ob Haie' tu yu'ubo'ob u t'aanil u ch'a'apachtico'ob, le ca tu ch'a'apachtajo'ob Josuee', náachchajo'ob ti' le caajo'. 17Ma' j yanchaj mix jun túul u j xiibil Hai mix Betel ma' u jóokol u ch'a'apacht le j israelitaobo'; ba'ale' ichil u yaamyamil u ch'a'apachtajo'obe' mix máac j p'áat canantic le caajo'. 18Yuumtzil túune' tu ya'alaj ti' Josué: Dzaj u chíiculal u bino'ob yóokol Hai, tumen bin in ca'aj in kub teech. Josue' tu dzaj u chíiculal tu'ux cu ya'alic ca u puluba'ob tu yóokol. 19Le máaxo'ob u ta'acbesmajuba'obo' jóoko'ob tu séeblaquile', ca tu pulajuba'ob u ch'a'ob le caajo' ca tu t'abajo'ob.

20Le ca tu sutaj u yicho'ob u j xiibilo'ob Haie', tu yilajo'ob u buudzil le caaj cu líikil tac ca'ano'. Mix tu'ux yanchaj u yáalcabo'ob, tumen le j israelitaob cu yáalcabo'ob ca'ach te x tocoy lu'umo', tu sutuba'ob u ti'al u pulicuba'ob tu yóokolo'ob. 21Tumen le ca tu yilaj Josue' yéetel tuláacal le j israelitaob dzo'oc u jóokol le máaxo'ob u ta'acbesmajuba'ob u ch'a'ob le caaj bey xan dzo'oc u t'abico'obo', tu sutuba'ob u puluba'ob tu yóokol Hai. 22Cu dzo'ocole' le máaxo'ob j ch'a'a le caajo' jóoko'ob, let o'olale' le hailo'obo', j ka'al u beelo'ob tumen ca'a jaatz j israeliltaob, lelo'oba' tu pulajuba'ob tu yóokolo'ob tac ca tu láaj quíimsajo'ob. 23Chéen u ajawil Hai tu p'atajo'ob cuxa'an, tu machajo'obe' ca tu bisajo'ob ti' Josué.

24Cu dzo'ocol u láaj quíimsico'ob yéetel u yej máascab le hailo'ob jóoko'ob ch'a'apachtico'obo', le j israelitaobo' j suunajo'ob Haie' ca tu láaj quíimsajo'ob le máaxo'ob p'áatalo'obo'. 25Le kiinaco' j quíim u doce mil máaco'ob Hailo'ob, j xiibo'ob yéetel x co'olelo'ob, 26tumen Josuee' ma' jáaw u nu'uctic le ba'atel te j caaj tac ca láaj quíimsa'ab u cajnáalilo'obo'. 27Le j israelitaobo' j p'áato'ob yéetel u ba'alche'ilo'obo' bey xan yéetel le ba'alo'ob yano'ob te j caajo', je'el bix tu ya'alajil Yuumtzil ti' Josuee', 28Josuee' tu tóocaj Haie' ca tu p'ataj x lab caajil jun puli', je'el bix u yila'al tac bejela'o'. 29U ajawil Haie', j ch'uyquinta'ab ti' jun cúul che' tumen Josué tac u yocbal kiin, le ca áakabchaje', tu túuxtaj éemsbile' ca j pu'ul u j quimen wíinclil actáan ti' le caajo', bey xan tu beetaj u much'quinta'al tuunich tu yóokol. Le tuunicho'obo' ti' much'ucbalo'ob tac bejela'e'.

Josuee' cu xoquic u ju'unil a'almaj t'aan tu witzil Ebal

30Josuee' tu beetaj tu witzil Ebal jun p'éel u multuunil kultaj u ti'al Yuumtzil, u Kuil Israel, 31je'el bix u ya'almajil Moisés u palitzil Yuumtzil ti' le j israelitaobo', bey xan je'el bix dzíibta'anil tu ju'unil u ya'almaj t'aan Moiseso': Jun p'éel multuunil kultaj ma' póola'an u tuunchilo'obi. Le j israelitaob túuno' tu táanbesajo'ob láaj tóocbil ba'alche'ob tu yóokol u multuunil le kultajo', tu táanbeso'ob xan u quíimsbil ba'alche'ilo'ob ca'a bisajbáil. 32Cu dzo'ocole' tu táan yich le j israelitaobo', Josuee' tu dzíibtaj ti' u tuunichilo'ob u multuunil kultajo', le a'almaj t'aan tu dzaj Moiseso'. 33Tuláacal túun le caajo', u ch'i'ibalo'ob Israel bey le j táanxel lu'umilo'obo', tuláacal u nuuquilo'ob, u jo'ol poolilo'ob bey xan u aj ilaj tac poolilo'obe', tu dzajuba'ob tu tzéel u ba'asche'il u nup t'aan Yuumtzil, actáan ti' le aj kiino'ob levitaob máaxo'ob bisic cúuchquelembalil. U ti'al u dza'abal u qui' t'aanil u caajil Israele', táancoche' ti' yanchaj tu witzil Gerizime', u láak táancoche' tu witzil Ebal, je'el bix tu yáax a'alajil Moisés u palitzil Yuumtzile'.

34Cu dzo'ocole' Josuee' tu xocaj tu jujun p'éelil u t'aanilo'ob u ju'unil le a'almaj t'aano', je'el bix le qui' t'aano'obo', bey xan le loolob t'aano'obo'. 35Ma' j yanchaj mix jun p'éel ti' le ba'axo'ob u ya'almaj Moisés tu táan u caajil Israel wa ma' tu xocaj Josueo', u'uya'ab tac tumen u co'olelilo'ob yéetel u mejen paalalilo'ob, bey xan le táanxel lu'umilo'ob cajnáalo'ob ichilo'obo'.

Currently Selected:

Josué 8: MAYABI

Highlight

Copy