Josué 7

Bix chu'uquic Acán ti' u keban

1Ba'ale' jun túul máac ti' u ch'i'ibalo'ob Judá, cu kaaba'intic Acán u paal Carmi, u yáabil Zabdi u ca'a áabil Zarae', tu ch'a'aj dze'edzec ba'alo'ob a'ala'an kabéet u láaj xiixcunta'alo'ob, tu yo'olale' láaj si'ipilnajo'ob le j israelitaob tu táan Yuumtzil iquil tu ch'a'ajilac ba'ax u ya'almaj Yuumtzil ca láaj xiixcunta'ac. Tu yo'olal lelo' seten j p'u'uj Yuumtzil.

Tu yo'olal kebane' cu pa'abal u muuk Israel

2Josuee' dzo'oc ca'ach u túuxtic dze'edzec j xiibo'ob líikbalo'ob Jericó, ca xi'ico'ob tu caajil Hai, le yaan ca'ach tu lakin Betel naadz ti' Bet-avén, u ti'al ca xi'ico'ob u xakal ilo'ob le cúuchilo'. Leti'obe' j bino'obe' ca tu xakal ilajo'ob Hai, 3le ca j suunajo'obe' tu ya'alajo'ob ti' Josué: Ma' kabéet ca xi'ic tuláacal le caaj u ti'al ca u ba'atelt u caajil Haii', chéen yéetel dos mil wa tres mil j xiibo'ob u ti'al chi'ico'ob le caajo', tumen ma' ya'abo'ob máaxo'ob canantic le caajo'.

4Bey túuno' óoli' tres mil j xiibo'ob j bino'ob u ba'atelo'ob Hai. Ba'ale' j pa'ab u muuko'ob tumen u j xiibilo'ob Haie' ca j áalcabansa'abo'ob, 5quíimsa'ab míin treinta yéetel seis j israelitaobe', ca j ch'a'apachta'ab u chuca'ano'ob líikbal tu jool le caajo' tac tu cúuchil u póola'al tuunicho'obo', ca j ki'itbesa'abo'ob tu'ux cu yéemel le bejo'. Tu yo'olal lela' le máaco'obo' j lúub u yóolo'ob, ca tu ch'a'ajo'ob sajaquil.

6Josué yéetel u nuuquilo'ob Israele', tu jataj u nooko'obe', ca tu tóos lu'umto'ob u poolo'ob u chíiculal yaj óolal, cu dzo'ocole' noclajo'ob j lu'um tu táan u ba'asche' Yuumtzil, tac u yocbal kiin. 7Cu ya'alic ca'ach Josué:

¡Way, in Yuumtzil! ¿Ba'axten ta beetaj u ch'actic u yáalcab ja'il le Jordán le caaja'? ¿Ta beetaj wa u ti'al a kubico'on ti' le j amorreob u ti'al ca u láaj quíimsicono'ob? ¡Buca'aj ma'alobil wa ca p'áataco'on ca'ach tu táanxel tzéelil le Jordano'! 8¡In Yuumtzil! ¿Ba'ax je'el u páajtal in wa'alic bejela'a' ti' le j israelitaob dzo'oc u yáalcabo'ob ti' le u aj p'eeco'obo'? 9Le j cananitaob yéetel tuláacal le cajnáalo'ob ti' le cúuchila', le quéen u yojéelto'ob le ba'ax dzo'oc u yúuchulo', bíin u much'uba'ob u ba'atelteno'ob, ma' bíin p'áatac túun mix máac u ti'al ka'ajsajili'. ¿Bix bíin dzo'ococ túun a nojoch kaaba'?

10Yuumtzile' tu núucaj: Líiken. ¿Ba'ax ca beetic te j lu'umo'? 11Le j israelitaobo' dzo'oc u kebanchajalo'ob, dzo'oc xan u mix ba'alcuntico'ob le nup t'aan tin beetaj yéetelo'obo'. Tu ch'a'ajo'ob le ba'axo'ob unaj u xiixcunta'alo'obo', tu yoclajo'ob quex tumen u yojelo'ob kaas ba'ax cu beetico'ob, tu ta'acbesajo'ob ichil u nu'uculo'ob. 12Let o'olal le j israelitaobo' ma' tu páajtal u ba'atelo'ob tu táan u aj p'eeco'ob. Bíin áalcabnaco'ob tu táano'ob, tumen bejela'e', leti'ob cu najmatico'ob u xiixcunta'alo'ob. Wa tumen te'ex ma' ta xiicuntique'ex ba'axo'ob in wa'almaj ca xiixcunte'exe', ma' bíin ca'a yanaquen ta wéetele'exi'. 13Líiken, much'quint le caajo'. A'al ti'ob ca u líiksuba'ob u ti'al u much'talo'ob sáamal tin táan, tumen teen Yuumtzil u Ku Israele', quin wa'alic beya': Teche' Israel dzo'oc a ch'a'ic le ba'axo'ob unaj u xiixcunta'alo'obo', ba'ale' ca'aliquil ma' a xiixcunt u ti'al a tzelic ta wicnale', ma' bíin páatac a ba'atel tu táan a aj p'eeco'obi'. 14Co'otene'ex sáamale' much'aba'ex jujun p'éel Múuch' cajtalilo'ob le j otochnáalo'obo', le múuch' cajtalil j otochnáalo'ob bíin in we'ese', bíin u dza'ob tin táan tu jujun túulil chuun ooquil u yotochnáalilo'obo', le chuun ooquil otochnáal bíin in we'ese', bíin u dza'ob tin táan t jujun múuch' u láaktzilo'ob, le múuch' láaktzililo'ob bíin in we'ese' bíin u dzáa tin táan tu jujun túulil u j xiibilo'ob. 15Ti' le máax yaan ba'ax unaj u xiixcunta'ale', bíin tóoca'ac pa'ate' yéetel u yéet otochnáalo'ob bey xan tuláacal ba'ax yaan ti', tumen tu beetaj jun p'éel ba'al subtzil tu caajil Israel, tumen ma' tu dzo'ocbesaj u nup t'aan Yuumtzili'.

Cu xot kinta'al Acán tu yo'olal u keban

16Tu láak kiine' Josuee' j líik jach piknal u taal u sáastale', ca tu ya'alaj ti' tuláacal le máacobo', ca xi'ico'ob le múuch' cajtalilo'ob le otochnáalo'ob tu táan. Ca tu ye'esaj Yuumtzil u ch'i'ibalo'ob Judá. 17Josué túune' tu beetaj u yantal tu táan tuláacal u chuun ooquil u ch'i'ibalo'ob Judá, j e'esa'ab u chuun ooquil u yotochnáal Zara. Ti' u chuun otochnáalilo'ob Zarae', tu ye'esaj u yotochnáalo'ob Sabdi. 18Le ca tu nadzajuba'ob u j xiibilo'ob u yotochnáalo'ob Sabdie' tu ye'esaj Acán u paal Carmi, u yáabil Sabdi, u ca'a áabil Zara, ti' u ch'i'ibalo'ob Judá.

19Josué túune' tu ya'alaj ti' Acán: In paal, dzáa nojbe'enil yéetel qui'iqui' t'aan ti' Yuumtzil u Ku Israel, a'al teen ba'ax ta beetaj. ¡Ma' a ta'acbesic teen! 20Acane' tu núucaj: Tu jaajile', quin cáantic kebanchajen tu táan Yuumtzil u Kuil Israel. Je'el ba'ax tin beetaja': 21Ichil le ba'alo'ob t ch'a'aj jericoo', tin wilaj jun p'éel buclis nook beeta'an Babilonia, docientos sac taakino'ob yéetel jun cáach oro táancoch kilo aalil. Utzchajo'ob tin wiche', ca tin ch'a'ajo'ob, ca tin mucajo'ob tu yáanal in chuybil naj, le taakino' tin dzaj tu taamil.

22Josue', tu séeblaquil tu túuchi'itaj dze'edzec j xiibo'ob tu chuybil naj Acán, leti'obe' tu nuptáantajo'ob tuláacal le ba'ax ta'acano'obo', ti' yaan le plata tu taamilo'. 23Tu ch'a'ajo'obe' ca tu bisajo'ob ti' Josué yéetel ti' le j israelitaobo', leti'obe' tu dzajo'ob tu táan Yuumtzil. 24Cu dzo'ocole' j bisa'ab Acán tu táax lu'umil Acor pa'ate' yéetel le platao', le buclis nooko', le jun cáach oro', u j xibil paalal, u x ch'upul paalal, u wacaxo'ob, u j tamano'ob, u chuybil naj yéetel tuláacal ba'ax u ti'alo'.

25Josue' tu ya'alaj ti': ¿Ba'axten ta taasaj le loob t óokola'? Bejela'e', u beet Yuumtzil u lúubul ta wóokol le loob ta taasaj to'ono'. Le ca tu ya'alaj lela', tuláacal le j israelitaobo' tu quíimsajo'ob Acán yéetel ch'iin pa'ate' yéetel u paalal, cu dzo'ocole' j tóoca'abo'ob. 26Bey xan, j much'quinta'ab ya'abcach tuunich tu yóokol, tac bejela'a' much'ucbal le tuunicho'. Let o'olal tac bejela'a' cu kaaba'intic u táax lu'umil Acor. Beyo', jáaw u p'uja'anil Yuumtzil ti' Israel.

Currently Selected:

Josué 7: MAYABI

Highlight

Copy