Josué 5
5
Gilgal u cúuchil tu'ux úuch je'elel
1Tuláacal le ajawo'ob amorreob yano'ob tu chikin Jordane', bey xan le ajawo'ob j cananitaob yano'ob naadz ti' le nojoch ka'anabo', tu yojéeltajo'ob Yuumtzile' tu tiquincuntaj u yáalcab ja'il Jordán ca'aliquil le j israelitaobo', táan u ch'aacato'obo', ca sen sajacchajo'ob, ma' tu yóoltico'ob j ba'atel ca'ach tu yéetelo'ob.
2Ca túun tu ya'alaj Yuumtzil ti' Josué: Beet dze'edzec xotobo'ob took u ca'ajo'ob, ca súut kupt le j israelitaob tu ca'a téeno'.
3Josuee' tu beetaj xotobo'obe' ca tu súut kuptaj le j israelitaob tu witzil Aralot. 4Tu súut kuptajo'ob tumen tuláacal le j xiibo'ob u chucmajo'ob ca'ach u ja'abil ba'atel jóoko'ob Egiptoo', dzo'oc ca'ach u quíimilo'ob tu bejil le x tocoy lu'umo'. 5Quex tumen tuláacal le máaxo'ob jóoko'ob Egipto súut kupta'ano'obo', le j síijo'ob tu bejil le x tocoy lu'umo', ma' súut kupta'ano'ob ca'achi'. 6Tu yo'olal xíimbalnajico'ob cuarenta ja'abo'ob le j israelitaob te x tocoy lu'umo', dzo'oc ca'ach u quíimil le j xiibo'ob u chucmajo'ob u ja'abil ba'atelo'. Le j xiibo'obo' ma' tu yu'ubaj t'antajo'ob Yuumtzili', let o'olal tu jalach t'antaj ma' bíin u cha'a u yilico'ob le lu'um tu séeb chi'itaj ti' u máanja'an ch'i'ibalo'ob u dzáic ti'obo', le lu'um tu'ux le leche yéetel le caabo' cu yáalcabo'ob bey ja'e'. 7Le t o'olalo' Josuee' tu súut kuptaj u paalal le j xiibo'ob je'elo'obo', le dza'ano'ob tumen Yuumtzil u ti'al u jeelintico'obo', ma' súut kupta'ano'ob ca'achi' tumen ti' yano'ob te j bej ca'acho'. 8Le ca j dzo'oc u láaj súut kupta'alo'obe', j p'áato'ob je'elel te j cúuchilo' tac ca utzchajo'ob. 9Yuumtzil túune' tu ya'alaj ti' Josué: Yéetel le súut kuptaja' dzo'oc in lukesic ti'ob u subtzilil le j egipciobo'. Let o'olale' le cúuchilo' cu kaaba'intic Gilgal#5.9 Ich hebreoe', Gilgale' chica'an ti' le t'aan cu ya'alic: luksa'ac balkesbil. tac bejela'e'.
10Le j israelitaobo', je'elo'ob Gilgal, tu catorce kiinil le meso', tu beetajo'ob u kiinkujil Táadz Máanbal tu táax lu'umilo'ob Jericó. 11Ti'ili'e' kiino' tu jaantajo'ob waaj x ma' levadura yéetel kéelbil trigo, ba'ale' tu láak kiine' tu jaantajo'ob le ba'ax cu dzáic le lu'umo'. 12Líikbal ti' le kiino', ma' j suunaj antal manai', beyo' ti' le ja'abo' le j israelitaobo' tu tzéentuba'ob yéetel le yich cu dzáic u lu'umilo'ob canano'.
Josué yéetel u noojoch u aj ba'atel Yuumtzil
13Jun p'éel kiinac ti' yaan Josué naadz ti' Jericoe', tu yilaj tu táane' jun túul j xiib u machmaj jun p'éel máascab. Josuee' j náadze' ca tu káat chi'itaj ti': ¿T éetel wa ca wantal wa yéetel c aj p'eeco'ob yanech?
14Tu núucaj le j xiibo', mix ta wéetele'ex mix tu yéetelo'ob. Tene' quin taal beyen u nojochil u aj ba'atelo'ob Yuumtzile'.
Josué túune' chinlaj tac u kuchul u táan jo'olal j lu'ume', ca tu káat chi'itaj ti': ¿Ba'ax cu túuchi'itic in Yuumtzil ti' a palitzila'? 15U nojoch u aj ba'atelo'ob Yuumtzile' tu núucaj ti': Lukes a xanab tumen le cúuchil tu'ux yanecha' quili'ich. Josuee' tu yu'ubaj t'antaj.
Currently Selected:
Josué 5: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992