Josué 4
4
U doce tuunichilo'ob Jordán
1Cu dzo'ocol u láaj ch'aacato'ob te j Jordano', Yuumtzile' tu ya'alaj ti' Josué: 2Yéey doce j xiibo'ob ichil le caajo', jujun túul ti'o' ichil u múuch' cajtalil le j otochnáalo'ob, 3a'al ti'ob ca u jóokeso'ob doce tuunicho'ob tu chúumuc le áalcab ja'o', te tu'ux wa'alacbal le aj kiino'obo', ca u biso'ob u much'quinto'ob te j cúuchil tu'ux bíin je'eleco'ob ti' le áakaba'. 4Josué túune' tu t'anaj le doce j xiibo'ob tu yéeyajo', 5ca tu ya'alaj ti'ob: Oquene'ex tu chúumuc le Jordano', tu táan u ba'asche' Yuumtzil a Kuexo', ta jujun túulile'exe' cúuchqueléembalte'ex jujun p'éel tuunich tu yo'olal u jujun p'éelil u múuch' cajtalilo'ob yotochnáalo'ob Israel, u ti'al ca u chuc doce tu pa'ate'il. 6Le tuunicho'oba' bíin meyajnaco'ob bey chíiculalile' le kiin bíin u káat te'ex a paalale'ex: ¿Ba'ax cu chíicultic le tuunicho'oba'? 7te'exe' bíin a núuque'ex ti'ob: Le ca tu ch'actaj le Jordán u ba'asche' Yuumtzile', le áalcab ja'o' buj ca'a jaatzil tu táan le ba'asche'o'. Le tuunicho'oba' cu meyaj ti' le j israelitaob u ti'al u ka'ajsico'ob ba'ax úuch te'ela'.
8Leti'obe' tu beetajo'ob le ba'ax j a'ala'ab ti'ob tumen Josue'. 9Cu dzo'ocole' Josuee' tu much'quintaj u láak doce tuunicho'ob ichil le áalcab ja'o', le tu'ux wa'alajo'ob le aj kiino'ob cu bisico'ob ca'ach u ba'asche' Yuumtzilo'. Le tuunicho'obo' ti' yano'ob tac bejela'e'.
10Le aj kiino'ob bisico'ob ca'ach u ba'asche'il le nup t'aano' j p'áato'ob tu chúumuc le Jordán ca'aliquil le j israelitaobo', táan u beetico'ob ca'ach le ba'ax tu túuchi'itaj Yuumtzil ti' Josueo'. Tuláacal j beeta'ab je'el bix tu túuchi'itajil Moisés ti' Josuee'. Le máaco'obo' séeb ch'aacatnajico'ob, 11cu dzo'ocol u láaj ch'aacato'ob tu táanxel tzéelilo', ch'aacatnajo'ob le aj kiino'ob yéetel u ba'asche' Yuumtzilo', ca tu dzajuba'ob táanil ti' le caajo'. 12Ch'aacatnajo'ob xan te j áalcab ja' u aj ba'atelo'ob u múuch' cajtalilo'ob yotochnáalo'ob Rubén, Gad yéetel u táancoch ch'i'ibalo'ob Manasés. U ch'a'amajo'ob u nu'uucul u ba'atelo'ob, j bino'ob xan táanil ti' le j israelitaobo', je'el bix tu túuchi'itajil Moiseso'. 13Óoli' cuarenta mil j xiibo'ob u ch'a'amajo'ob u nu'uucul ba'atel ti' u yóolo'ob te j ba'atelo' j máano'ob tu tzoolol máanico'ob tu táan Yuumtzil, ca j bino'ob tu táax lu'umilo'ob Jericó. 14Ti' le kiino'obo' Yuumtzile' tu beetaj u yutzul pacta'al yéetel u tzi'iquil Josuee', je'el bix tu beetaj u tzi'iquil Moisés ca'aliquil cuxa'ane'.
15Yuumtzil túune' tu ya'alaj ti' Josué: 16A'al ti'ob le aj kiino'ob cu bisico'ob u ba'asche'il le nup t'aano', ca jóokoco'ob ichil le Jordano'.
17Josuee' tu ya'alaj ti'ob ca jóokoco'ob, 18tu séeblaquil jóokico'ob le aj kiino'ob le ca tu t'alcuntajo'ob u yooco'ob ti' tiquin lu'ume', u ja'il le áalcab ja'o' j suunaj tu cúuchil, ca j áalcab tuulnaj je'el bix ca'ache'.
19Le j israelitaobo' jóoko'ob ichil le Jordán tu diez kiinil le yáax meso', ca je'elo'ob Gilgal tu lakin Jericó. 20Te'elo' Josuee' tu tzolaj le doce tuunicho'ob jóoksa'abo'ob ichil le Jordano', 21ca tu ya'alaj ti' le j israelitaobo': Ti' le kiino'ob cu taalo'obo', le quéen káatac te'ex: ¿ba'ax cu chíicultic le tuunicho'obo'?, 22tzicbalte'ex ti'ob bix úuchic u ch'aacat Israel tu yáalcab ja'il Jordán yóokol tiquin lu'um, 23bey xan bix tiquincunta'abic u ja'il Jordán ca'aliquil táan a ch'actique'ex je'el bix tu tiquincuntilac ca'ach le chac ka'anab ca'aliquil táan c ch'actico'. 24Beyo' tuláacal u caajilo'ob yóokolcaabe' bíin u yojéelto'ob u nojoch páajtalil Yuumtzil, te'ex xane' bíin a nojbe'encunte'ex Yuumtzil Ku u ti'al mina'an u xuul.
Currently Selected:
Josué 4: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992