Jueces 19
19
Jun túul levita yéetel u x keech
1Tu kiinilo'ob mina'an ca'ach ajaw Israel, jun túul j levita caja'an jach náach ti' u pu'uquilo'ob Efraín, tu ch'a'aj bey x keechlile' jun túul x co'olel x Belenil tu lu'umil Judá. 2Leti'e' j p'u'uj yéetele' ca j bin cajtal Belén, tu yotoch u taata. Cu dzo'ocol u yantal can p'éel winalo'ob te'elo' 3le j levitao' j bin u caxant u ti'al u káatic ti' ca suunac tu yéetel, tu bisaj jun túul u j meyaj yéetel ca'a túul burro'ob, leti'e' tu kamaj tu yotoch u taata. 4Bey xan u taatae' tu kamaj yéetel qui'imac óolal, ca tu káat óoltaj ti' ca p'áatac yéetelo'ob. Le j levitao' yéetel u j meyaje' p'áato'ob óox p'éel kiin tu yotoch u taata x leti', táan u janalo'ob, táan xan yukulo'ob yéetel táan wenelo'obi', 5tu can p'éel kiine' líiko'ob ma'ili' sáasac u ti'al u binbalo'ob, le táan ca'ach u jóokol u binbalo'obe', u taata le x ch'úupalo' tu ya'alaj ti' u ja'an: jant quex chéen jun xéet' waaj ma'ili' xi'ique'exe', u ti'al ca yanac a muuke'ex.
6Tu ca'a túulalo'obe' j culajo'ob janal yéetel ukul, u taata x leti'e' tu ya'alaj ca p'áataco'ob u ti'al ca u máanso'ob le áakab yéetel qui'imac óolal. 7Quex le j levita líik u binbale' u taata leti' tu sen a'alaj ca p'áatac, ca j p'áati.
8U cinco kiinile', p'is sáaschajique' le j levitao' líik u binbal, láili' u taata le x ch'úupalo' tu káataj ti' ca u jaant wa ba'ax ma'ili' xi'ique' u ti'al ca yanac u muuk; beyo' múuch' jaano'obe tac ca j áakabchaji. 9Le ca j líik u binbal le j levita u yéetel u x keech yéetel xan u j meyaje', u taata le x ch'úupalo' tu ca'a a'alaj ca p'áataco'ob tumen táan u bin kiin ca tu ya'alaj ca u máanso'ob u láak áakab te'elo' yéetel qui'imac óolal, u ti'al ca xi'ico'ob tu láak kiin ma'ili' sáasaque'. 10Ba'ale' le j levitao' ma' tu yóoltaj p'áatal u láak áakabi', ca j bin yéetel le u x keech yéetel u j meyaj xan, yéetel ca'a túul u burro'ob dza'an u x jéequeb xéeco'ob. Le ca j kucho'ob actáan ti' Jebuse', u káat ya'ale', Jerusalén, 11le j meyajo' tu ya'alaj ti' le j Levio':
¿Teche' bix a wilic, je'el wa u páajtal j máansic áakab te tu caajil jebuso'?
12Le j levitao' tu núucaj: Ma' táan c bin ti' mix jun p'éel caaj wa ma' j israelita, co'ox xíimbalil tac Gabaa, 13yaan c ilic wa c máansic áakab Gabaa wa Ramá.
14Bey túuno' xíimbalnajo'ob, táan u t'úubul kiin ca j kucho'ob Gabaa, u caajil u ch'i'ibalo'ob Benjamín. 15Tu tzelajuba'ob túun te j bejo', ca j ooco'ob Gabaa u ti'al u máansico'ob áakab, le j levitao' bin j cutal tu kíiwiquil le caajo' tumen mix máac tu dzaj tu'ux u je'elelo'ob.
16Le ca j áakabchaje' j máan jun túul nojoch máac táan u suut ca'ach ti' u meeyjul u cool. Le nojoch máac cu taal ca'ach tu pu'uquilo'ob Efraín, cajacbal ca'ach te'elo' bey j táanxel lu'umile' tumen le caja'ano'ob ca'ach Gabaa, u ch'i'ibalo'ob Benjamín. 17Le nojoch máaco' le ca tu yilaj le u'ula' tu kíiwiquil le caajo', tu káat chi'itaj ti': ¿Tu'ux a taal? ¿Tac tu'ux ca bin?
18Le j levitao' tu núucaj: Chéen u'ula'on, ti' c taalbal Belén tu lu'umil Judae', táan c bin náach tu pu'uquilo'ob Efraín tu'ux yaan in cajtalil, cajlajen ca'ach Belén, táan in suut tin wotoch, ba'ale' mix máac tin nactáantaj máax dzáic ti' teen tu'ux in je'elel te j cúuchila'. 19Yaan to'on ba'al u ti'al u jaant in burro'ob yaan waaj c jaante', bey xan vino u ti'al c uke, in káat in wa'ale' u ti'al in watan, u ti'al in j meyaj yéetel in ti'al. Mix ba'al cu bineltic to'on.
20Ba'ale' le nojoch máaco' tu núucaj ti': Utz a taalique'ex. Teen bíin in beet ca yanac teech tuláacal le ba'ax kabéet teecho'. Ma' bíin in cha'a' ca a máans áakab te j kíiwica'.
21Le nojoch máaco' tu bisaj tu yotoch, ca'aliquil táan u p'o'ico'ob u yooco'ob le u'ulabo', táan ca'ach u janalo'ob, yéetel táan u yukulo'obe', leti'e' tu dzáa u janal le burro'obo'. 22Ti' le súutuc sen qui'imac yóolo'obe', dze'edzec u loolob wíiniquilo'ob le caajo' tu bakpachtajo'ob le najo' ca j jo'op u kopico'ob le jool najo', táan u ya'alico'ob ti' le nojoch máaco', u yuumil le najo': ¡Jóokes le máac a wu'ulabo'! ¡J káat chital yéetel!
23Ba'ale' le u yuumil le najo' tu sen káat óoltaj: ¡Ma', in wéet caajale'ex, quin káat óoltic ti' te'ex! ¡Ma' a beetique'ex le talam kaasa', tumen le máaca' in wu'ulab! 24Ile'ex way yaan in x sujuy ch'úupala'. Bey xan te yaan u x keech le máaca'. In ca j in jóokeso'ob u ti'al ca pa'aje'ex u subtalo'ob yéetel ca a beete'ex x yéetelo'ob je'el ba'axac a káate'exe'. Ba'ale' yéetel le j xiiba' ma' a beetique'ex kaas.
25Ba'ale' leti'obe' ma' tu yóoltajo'ob u yu'ubjo'ob le ba'ax a'ala'ab ti'ob tumen le nojoch máaco', le j levitao' tu ch'a'aj u x keeche' ca tu léench'intaj táancab, le máaco'ob túuno' tu pajo'ob u subtal, ca j chilajo'ob x yéetel bul áakab tac táan tíip'il kiin ca túun tu p'atajo'ob 26Táan ca'ach u tíip'il kiine' le co'olelo' suunaj tu yotoch le nojoch máac tu'ux yaan ca'ach u yíichame', ca j lúub quimen tu táan jool naj 27Le ca j líik u yíichame' bin u je'e le jool naj u ti'al u binbale', ca tu yilaj u x keech tudzucbal tu jool le najo', yéetel u kabo'ob tu yóokol le pacabilo'.
28Ca tu ya'alaj ti': líiken, co'one'ex. Ba'ale' leti'e' ma' tu núucaji'. Leti' túune' tu dzaj le x quimen yóokol u burroo', ca tu dzajubáa tu beel u yotoch. 29le ca j cóoje', tu ch'a'aj u xotobe' ca tu xotaj le u quimen wíinclil u x keecho' ca tu jóokesaj doce u xóot'ol, ca tu túuxtaj ti' tuláacal u caajilo'ob Israel. 30Tuláacal máax j ile' tu ya'alaj: likul jóokoco'ob le j israelitaob tu lu'umil Egiptoe', mix jun téen ila'ac ba'al beya'. Yaan c tucultic le ba'alo'oba' u ti'al c a'alic ba'ax bíin c beet tu yo'olal le ba'ala'.
Currently Selected:
Jueces 19: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992