Jueces 18
18
Micaía yéetel u ch'i'ibalo'ob Dan
1Ti' le kiino'obo' mina'an ca'ach ajaw Israel. U múuch' cajtalil u yotochnáalo'ob Dane' mina'an lu'um u ti'alinto'ob, le beetic táan ca'ach u kaxtico'ob tu'ux u cajtalo'ob. 2Let o'olal le j Danilo'obo' tu túuxtajo'ob líikbal Zora yéetel Estaol cinco u asab jach j xiibil cajnáalilo'ob u ti'al u xakalt ilo'ob u múuch' cajtalilo'obo' le cúuchilo'. Le cinco xiibo'oba' j bino'ob tu pu'uquilo'ob Efraín ca j kucho'ob tu yotoch Micaía, tu'ux j p'ato'ob u máanso'ob le áakabo'. 3Táan u náadzalo'ob tu yotoch Micaía ca tu yu'ubajo'ob u t'aan jun túul xi'ipal ca tu kaj óolto'ob jun túul j Leví, ca j bino'ob u káat chi'ito'ob ti': ¿máax taasech waye'? ¿Ba'ax o'olal yanilech waye'? ¿Ba'ax ca caxtic te'ela'?
4Le j levio' tu tzicbaltaj ti'ob le kax t'aan tu beetaj yéetel Micaía je'el bix xan le nup t'aan u ti'al ca u beetubáa bey u aj kiine'. 5Leti'ob túune' tu ya'alajo'ob ti': Káatchi'it ti' Ku, u ti'al ojéeltic wa je'el u bin to'on utz ti' le xíimbala'.
6Tu núucaj le aj kiin levio': Xeene'ex x ma' sajaquil, Yuumtzil bíin u yáante'ex je'el tu'ux ca máanaque'exe'.
7Le cinco xakal ilaj lu'umo'oba' j bino'ob tac Lais. U cajnáalilo'ob le cúuchila' jach jedzecnac cajacbalico'ob, je'el bix suuc ti' le j sidonitaob; x ma' sajaquil caja'anilo'ob, jach jedzecnac; yaan jéedzel ca'achi ti'ob, mix máac cu ba'atel yéetelo'ob, mix cu yocsicuba'ob yéetelo'ob tuláacal ba'ax yaan ti'ob. Le j sidonitaobo' náach caja'ano'ob, let o'olal yéetel mix máac cu bisicuba'ob. 8Le cinco xakal ilaj caajo'ob túuno' suunajo'ob tu caajilo'ob Zora yéetel Estaol, tu'ux j p'áato'ob u yéet xíimbalo'obo', ca j káat chi'ita'ab ti'ob: ¿Bix binic te'ex?
Leti'obe' tu núucajo'ob: 9Xíimbaltaj le múuch' cajtalo'obo' ca t ilaj le lu'umo' sen ma'alob. ¡Líikene'ex! ¡co'ox ba'ateltico'ob! ¡Ma' a p'áatale'ex culucbale'ex, ma' táan a beetique'ex mixba'al! ¡Yaan c bin jáanpayt le lu'umo'! 10Le quéen kuchuque'ex te'elo' yaan a wilique'ex máaco'ob jejedzquilo'ob caja'anilo'ob yaan ya'ab u lu'umilo'ob, mixba'al cu bineltic ti'ob, Ku bíin u dzáa ca a ch'a'ex.
11Seiscientos u j xiibilo'ob u ch'i'ibalo'ob Dane' jóoko'ob Zora yéetel Estaol táan u bisico'ob u nu'ucul ba'atel. 12Le ca j kucho'ob Judae' je'elo'ob tu chikin Quiriat-jearim, le cúuchil cu kaaba'intic bejela'e' u Jaato Dan. 13j líiko'ob Te'elo' ca j bino'ob tu pu'uquilo'ob Efraín ca je'elo'ob tu yotoch Micaía.
14Le cinco máaco'ob taalo'ob ca'ach u xakalt ilo'ob u múuch' cajtalilo'ob Laise' tu ya'alajo'ob ti' u yéet xíimbalo'obe': ¿A wojele'ex jun p'éel ba'al? te j najo' yaan jun p'éel efod yéetel jejeláas kuob bey xan jun p'éel póolbil ku to'an yéetel plata. ¿Ba'ax ca tucultique'ex a beetique'ex?
15Le aj xakalt ilaj caajo'obo' náachchajo'ob ti' le u yéet xíimbalo'obo' ca j bino'ob tu yotoch le j xi'ipal levio', u káat ya'ale' tu yotoch Micaía, ca tu te'escuntajo'ob. 16Ca'aliquil le seiscientos aj ba'atelo'ob j danilo'ob yéetel u nu'ucul ba'atele' táan pa'atajo'ob tu jool le najo'. 17Le cinco j xakal caajo'obo' j ooco'ob táanil te j najo' ca tu ch'a'ajo'ob le póolbil ku to'an yéetel plata, le efod yéetel u kuob le j otochnáalo'obo', ca'aliquil le aj kiino' j p'áat tu jool le naj yéetel le seiscientos aj ba'atelo'obo'.
18Ca tu yilaj le aj kiin le cinco j ooco'ob tu yotoch Micaía táan u bisico'ob le póolbil ku, le efod yéetel le otochnáalo'ob kuob, tu ya'alaj ti'ob: ¿Ba'ax ca beetique'ex?
19Leti'obe' tu núucajo'ob: ¡Mac a chi', co'oten t éetel! ¡J káate' ca a meyajto'on bey aj kiine' yéetel ca beeyaquech bey jun túul taata ichilo'one'! ¿Ma' ta wilic ma'alob ca beetabáa aj kiin ti' tuláacal u múuch' u ch'i'ibalo'ob Israel, ma' chéen jun p'éel u yotoch jun túul j xiibi'?
20Lela' utzchaj ti' le aj kiino' ca tu ch'a'aj le póolbil kuobo' le efodo' yéetel u kuob le j otochnáalo'obo', ca j bin yéetelo'ob le j danilo'obo', 21Ca j xíimbalnajo'ob tu ca'a téene' táan u bisico'ob táanile' le mejen paalalo'obo', u wacaxo'ob je'el bix tuláacal ba'ax yaan ti'ob. 22Dzo'oc ca'ach u xíimbaltico'ob ya'abe', Micaía yéetel u yéet cajtalilo'ob, ca j bino'ob u ch'a'apachto'ob. 23Le j danilo'obo' tu yu'ubajo'ob u yawato'ob le máaxo'ob ch'a'apachtico'obo' ca tu sutajuba'obe' ca tu káat chi'itajo'ob ti' Micaía: ¿Ba'ax cu yúuchul teech? ¿Ba'axten ca wawtico'on beya'?
24Micaíae' tu núucaj: Te'exe' táan a bisique'ex le kuob tin beetajo', bey xan in aj kiin, táan a p'atiquene'ex yéetel mix ba'al, ¿cu dzo'ocole' ca káat chi'itique'ex teen ba'ax cu yúuchul teen?
25Le j danilo'obo' tu núucajo'ob: Ma' ka'am awatico'on, ma' xan ca yanac máaxo'ob ichilo'on ca p'u'ujuco'obe' ca u loobiltecho'ob, cu dzo'ocole' ca quíisa'aquech yéetel a wéet otochnáalo'ob.
26Ca tu yilaj Micaía ya'abo'obe', leti'e' j suunaj tu yotoch; ba'ale' le j danilo'ob túuno' j bin u xíimbalo'ob 27yéetel le ba'alo'ob tu beetaj Micaía yéetel xan u aj kiin, ca j kucho'ob tac Lais. Te'elo' u caajnáalilo'obe' utz u bisicuba'ob, let o'olal ca j cóojo'ob le j danilo'obo' tu quíimsajo'ob tuláacalo'ob ch'acbil yéetel máascab ca tu tóocajo'ob le caajo'. 28Tu yo'olal náach yanil le caaj ti' Sidone', yéetel ma' tu bisicuba'ob yéetel mix máaque', ma' yanchaj máax áantico'obi'. Ti' yaan ca'ach te j táax lu'um cu ti'alintic Bet-rehob. Cu dzo'ocole' le j danilo'obo' tu ca'a líiksajo'ob le caajo' ca j p'áato'ob cajtali'. 29Quex cu kaaba'intic ca'ach Laise', leti'obe' tu dzajo'ob u kaaba'int Dan, u ti'al tziquico'ob u máanja'an ch'i'ibal bey u kaaba' ca'ach jun túul u paal Israel. 30Te'elo' le j danilo'ob tu dzajo'ob u póolbil kuo' u ti'al u kultico'ob, u aj kiin ca'ache' Jonatán, u paal Gersón yéetel u yáabil Moisés. Cu dzo'ocole' u ch'i'ibalo'ob Jonatán tu beeto'ob ca'ach aj kiin ti' le j danilo'obo', ti' yano'ob ca'ach táanxel lu'ume'. 31Te'elo' tu p'atajo'ob ichilo'obe' le póolbil ku tu beetaj ca'ach Micaía, tuláacal le kiino'obo' ti' yanji u quili'ich naj Yuumtzil Siloe'.
Currently Selected:
Jueces 18: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
