Oseas 9
9
Osease', cu ka'aytic u ja'adzal Israel
1Israel, ma' u qui'imactal a wóol;
ma' a síit' qui'imac a wóol je'el bix le u láak caajo'obo',
kebanchajech úuchic a xúump'attic a Ku.
Te tu t'o'ol lu'umil tu'ux cu p'u'uchul trigoo',
utzchaj ta t'aan a kamic u bo'olal a weeyanquil.
2U caajil Israele' ma' bíin yanac trigo ti'i' mix vinoi;
u túumben vinoe' ma' bíin chúucpajaqui'.
3Efraine' bíin suunac Egipto,
tu lu'umil Asiriae' bíin jaanta'ac janal ma' utz yanili'.
Ma' bíin cajlaco'ob tu múuch' caajalo'ob Yuumtzili':
4Ma' bíin u yuuco'ob vino ti' u tziiquil Yuumtzil,
mix bíin u kubo'ob te j cúuchilo' u quiimsbil ba'alche'obi'.
Waaj bíin u jaanto'obe' bey u waajil u yokom óolta'al quimene',
máaxo'ob bíin jaantique' bíin páataco'ob ma' utz yanilo'obi'.
Leti'ob bíin u jaanto'ob le waajo',
ba'ale' ma' bíin páatac u bisico'ob tu kulnaj Yuumtzili'.
5¿Ba'ax bíin a beete'ex tu kiinil kiinbesaj,
tu qui' óotzilil u kiinbesajil Yuumtzil?
6Leti'obe' dzo'oc púudzulo'ob ti' le xu'ulsajo';
Egipto bíin kamico'ob, tu lu'umil Menfise' bíin mu'ucuco'ob.
U taakino'ob plata u ca'aje' bíin u chu'upuco'ob yéetel láal,
tu chuybil najo'obe', ki'ixo'ob bíin ch'íijico'obi'.
7¡Dzo'oc u kuchul u kiinilo'ob le jaadzo'!
¡Dzo'oc u kuchul u kiinilo'ob u yúuchul bo'ol je'el bix u najmale'!
¡Israele' yaan u yojéeltic dzo'oc u kuchul le kiino'!
Te'exe' ca wa'alique'ex: Aj bóobate' mix ba'al u yojel.
Le máac yaan sáasil tuucul ti'e' ma' tu yóol yanili'.
Ba'ale' cu ya'alico'ob tumen chuupo'ob yéetel loob
tumen u p'eequile' jach nojoch.
8Kue' tu dzaj u aj bóobat u ti'al u canant u caajilo'ob Efraín, ba'ale' te'exe' ca dzáique'ex léecho'ob tu beel;
¡tac u ichil kulnaj Ku ca p'ectique'ex!
9Jach kaschaje'ex, je'el bix tu kiinilo'ob Gabae'.
Ba'ale' Yuumtzile' ma' bíin tu'ubuc u kasa'anili'
bíin u jadz tu yo'olal u kebano'ob.
Israele' bíin mukyajnac tu yo'olal u keban
10Yuumtzile' cu ya'alic:
Le ca tin nuptáantaj Israele', qui'imacchaj in wóol
je'el bix le máax cu nuptáantic uvaob x tocoy lu'ume'.
A máanja'an ch'i'ibale'exe' tin wilajo'ob
beyo'ob ca'ach u yáax ich higoe'.
Ba'ale' le ca'aj j kucho'ob tu lu'umil Baal-peore'
tu jun páaycuntajuba'ob ti' le ma' jaaj kuobo',
ca tu beetajuba'ob jach p'ecbe'eno'ob
je'el bix le beetbil kuob cu yaacuntico'ob ca'acho',
11U nojochil Efraine' bíin xiknalnac bey jun túul ch'íiiche'.
Ma' bíin síijic u láak paalali',
ma' bíin yanac u láak co'olelo'ob x yo'omchaja'ano'obi'.
ma' bíin yanac u láak u mejen paalalo'obi',
12Wa ca páatchajac u yantal u paalale',
tene' bíin in toc ti'ob, ma' bíin p'at in mix jun túul ti'obi'.
¡Yaj yanilo'ob le máaco'ob le quéen in tzelimbáa ti'obe'!
13Quin wilic bix u t'anic Efraín u paalal
bey wíinico'ob macha'ano'ob u ti'al j quiimsbilo'obe';
cu jóokesico'ob u ti'al u kubico'ob u ti'al j quiimsbilo'ob.
14¡Yuumtzil, dzáa ti'ob le ba'ax kabéet a dzáic ti'ob!
¡Ma' a cha'ic ca maamachajaco'ob, mix ca tzéemnaco'ob!
Yuumtzile' cu p'u'ujul tu yo'olal Efraín
15Yuumtzile' cu ya'alic:
Tu caajil Gilgale' tu beetajo'ob tuláacal ba'ax kaas,
ti' tin chucbesaj in p'ectico'obi'.
Tu yo'olal u kaakas cuxtalo'obe' bin in ca'aj in jóokeso'ob tin wotoch;
ma' bíin in ca'a yaabilto'obi',
tumen tuláacal u nuuquilo'obe' ma' tu yu'ubico'ob t'aan.
16Efraine' quimpaja'an, bey jun cúul che' tiquin u motze'
tu p'ataj u dzáic u yich.
Quex wa ca yanac u paalale', teen bíin in beet u quíimilo'ob.
17Le caaja' ma' u yóolt u ch'en xiquint in Ku;
le t o'olale' in Kue' yaan u cúulpachcuntic,
bíin xan u máanaco'ob saatalo'ob ichil u láak caajo'ob.
Cu je'enel u multuunilo'ob kultaj tu lu'umil Israel
Currently Selected:
Oseas 9: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
