Oseas 6
6
Israele' cu ya'alic u suut ti' Yuumtzil
1Co'otene'ex tuláacale'ex u ti'al ca suunaco'on ti' Yuumtzil.
Leti' tu xe'exe'et'ajo'on, leti' xan bíin u yutzquinto'on;
leti' tu lobiltajo'on, bey xan leti' bíin u dzaco'on.
2Jun súutuc bíin u sut c toj óolal,
tu yóox p'éel kiine' bíin u líikeso'on u ti'al ca cuxlaco'on tu táan.
3¡Cone'ex ch'a'ic óol u ti'al ca j kaj óolt Yuumtzil!
Yuumtzile' bíin talac ti' to'on jach tu jaajil,
je'el bix jaajil u jóokol le kiino',
jach tu jaajil, je'el bix jaajil u jóoyabta'al le lu'um quéen káaxac ja'
tu kiinil yáax kiin yéetel tu kiinil ja'aja'al.
U núuc t'aan Yuumtzil
4Yuumtzile' cu ya'alic:
¿Ba'ax bíin in beet ta wéetel, Efraín?
¿Ba'ax bíin in beet tu yéetel Judá?
Le yaacunaj a dzaamaje'ex ti' teno' bey u ye'ebil ja'atzcab kiine',
bey u p'ul ja'il ya'ab u bin u sa'atale', ma' tu xáantal u sa'ap'ale'.
5Le t o'olal dzo'oc in xe'exet'ique'ex tu yéetel le aj bóobato'obo';
tu yéetel in péectzile' dzo'oc in quiimsique'ex.
In ti'ibil bejile' cu jóokol je'el bix le sáasilo'.
6Ba'ax quin káatic ti' te'exe' ca a yaacuntene'exi',
ma' ca a kube'ex ti' teen quíimsbil ba'alche'obi';
kamene'ex bey a Kuexe', ma' a kubique'ex ti' teen tóocbil ba'alche'ob.
7Ba'ale' in caajale' bey je'el bix Adame',
ma' tu dzo'ocbesaj in nup t'aani', tu kexajen xan.
8Galaade' jun p'éel u caajil kaakas wíinico'ob,
láaj pa'apa'ak yéetel u ki'ik ma' tu páajtal u balic.
9Le aj kiino'obo' chéen jun múuch' j oocolo'ob,
táan u ch'úuctico'ob u máan máac;
cu quiimsico'ob wíinico'ob yéetel cu beetico'ob
ba'alo'ob talam subtzil tu bejil Siquem.
10Tu lu'umil Israele' dzo'oc in wilic ba'alo'ob talam kaastac:
Efraine' dzo'oc u kastal, Israele' dzo'oc u pa'apa'aktal yéetel keban.
11Tac ti' teech Judá, dzo'oc in yéeyic u kiinil a ja'adzal.
Le kiin in káat in beet utz ti' in caajal Israel,
Currently Selected:
Oseas 6: MAYABI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992