Oseas 5
5
1Aj kiine'ex u'uye'ex lela'; u caajil Israel dzáa óolte'ex xan;
u cajnáale'ex jalach naj ch'en xiquinte'ex:
Ta wóokole'ex bíin talac le p'is óolo', tumen te'exe' jun p'éele'ex léech dza'an tu lu'umil mizpa,
jun p'éele'ex u káanil léech dza'an yóokol u witzil tabor,
2jun p'éele'ex u taamil ch'e'en tu táax u lu'umil Sitim.
Le t o'olal bin in ca'aj in jadze'ex.
3Tene' in kaj óoltmaj Efraín; in kaj óoltmaj xan Israel.
Efraine' dzo'oc u kascunticubáa; israele' dzo'oc u bóonol.
4Le ba'alo'ob kaastac cu beetic le caajo' ma' tu ch'a'ic u suut ti' u Ku.
T'onquina'an tumen le weeyanquil, ma' tu kaj óoltic Yuumtzil.
5U j ca'anal ichil Israele' cu ka'am tac pool tu yo'olal;
Efraine' cu t'óochpajal ti' u kasa'anil,
¡pa'ate' yéetelo'obe', Judae' bíin t'óochpajac!
6Yéetel u j tamano'ob bey xan yéetel u wacaxo'ob
bíin xi'ico'ob u caxanto'ob Yuumtzil,
ba'ale' ma' bíin u nuptáanto'obi' tumen tu tzelajubáa ti'ob.
7Tu kexajo'ob u Yuumtzil, tumen yanchaj u paalal yéetel u yaanal taata,
tu yo'olal u kex óolal, chéen ti' jun winale'
u lu'umilo'obe' bíin xu'ulsa'ac.
U jaadzilo'ob Israel yéetel Judá
8¡Uste'ex le u baaquil ba'atelil tu lu'umil Gabaa
yéetel le jóopsaj paaxo' tu lu'umil Ramá!
¡Dza'ex u péectzlil sajaquil Bet-avén!
¡Pake'ex péec óolal tu lu'umil Benjamín!
9Teen ka'aytic ichil u ch'i'ibalo'ob Israel
ba'ax bíin úuchuc jach tu jaajil:
Efraine' bíin u ch'éejsa'ac tu kiinil le jaadzo'.
10Yuumtzile' cu ya'alic:
U nuuquilo'ob Judae' beyo'ob le máaco'ob
cu kexico'ob u xu'uk le coolo'obo'.
¡Ba'ale' bin in ca'aj in bulo'ob yéetel in p'uja'anil!
11Efraine' táan u ye'edzel, ma' utz tu yóol
u pepe'echa'ata'al ba'ax cu najmata'al,
tumen tu pechubáa j bin tu paach beetbil kuob.
12Teen túune' bíin béeychajaquen j kamas u ti'al Efraín,
beyen j sib u ti'al u caajil Judá.
13Le quéen u yil Efraín u yajil u koja'anil,
le quéen u yila'a' xan yajilo'obe',
Efraine' bin xi'ic Asiria u ti'al u káatic áantaj ti' noj ajaw,
ba'ale' leti'e' ma' bíin páatac u dzaquic u yajili'.
14Bey jun túul león cu pulcubáe' tu yóokol u dzoone',
bey bíin in pulinbáa tu yóokol Efraín yéetel tu yóokol Judá;
teen bíin in xe'exet'o'ob cu dzo'ocole' quin bin;
bíin in jáanpayto'ob, mix máac cu bin páajtal u toquico'ob.
15Cu dzo'ocole' quin suut tin cúuchil,
tac quéen u kaj óolto'ob u kebano'ob, ca talaco'ob u caxanteno'ob.
¡Ichil u mukyajo'ob cu bin u caxanteno'ob!
Currently Selected:
Oseas 5: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
