Hechos 9

U kex tuucul Saulo

1Ca'aliquile' Sauloe' ma' jáaw u taasic sajbe'entzilo'ob beyxan quíimil tu yóokol u yocsaj óolo'ob Yuumtzil. Le o'olale' j bin u yil u noojoch le j kiino'obo', 2u ti'al u káatic dzíibil ju'uno'ob tu'ux cu dza'abal páajtalil ti' ca xi'ic tac tu sinagogailo'ob Damasco u caxant le máaxo'ob u kammajo'ob le ma'alob péectzilo' u ti'al u kax u taaso'ob Jerusalén, xiibo'ob bey xan co'olelo'ob. 3Ca'aliquil táan u bin tu bejil Damascoe', le ca j náadz ti' le caajo', téec léembalnaj tu bakpach jun p'éel sáasilil ca'an u taal. 4Saulo' túune' j lúub lu'ume' ca tu yu'ubaj jun p'éel t'aan, táan u ya'alic ti'; Saulo, Saulo, ¿ba'axten ca ch'a'apachtiquen? 5Sauloe' tu káat chi'itaj túun: ¿Máaxech Yuumtzil? Le t'aano' tu núucaj: Teen Jesús le máax ca ch'a'apachtico'. Táan a loobilticabáa teech, je'el bix u beetic le wacax le quéen u co'ococha'at le lom che'o'.

6Saulo túune' táan u quiquilanquil tumen sajaque', ca tu ya'alaj: Yuumtzil, ¿ba'ax a káat ca in beete? Yuumtzile' tu ya'alaj ti': Líiken ooquen te j caajo'. Ti' cu bin a'albil teech ba'ax unaj a beetique'.

7Le máaco'ob u yéet bino'ob Saulo' jach ja'ak u yóolo'ob, tumen tu yu'ubajo'ob le t'aano' ba'ale' mix máac tu yilajo'ob. 8Cu dzo'ocole'; j líik Saulo', ba'ale' le ca tu p'ilaj u yiche' ma' páatchaj u yilic mix ba'ali'. Bey túuno' j ma'ach u kabe' ca j bisa'ab Damasco. 9Óox p'éel kiin p'áat ma' tu páajtal u paacat, ma' jaani' mix tu yukaj mix ba'ali'.

10Caja'an Damasco jun túul j canbal Ananías u kaaba', ti' máax tu chíicbesubáa Yuumtzile' ca tu ya'alaj ti': Ananías. Leti'e' tu núucaj: Je'elena', Yuumtzil.

11Yuumtzil túune' tu ya'alaj ti': Líiken xeen ti' le bej cu kaaba'intic Toj Bej, tu yotoch Judase' káat péectzilt jun túul máac Tarsoil, Saulo' u kaaba'. Táan u Payalchi'. 12Dzo'oc u yilic u chíicpajal ti'e' jun túul máac Ananías u kaaba', táan u yocol yéetel táan u dzáic u kab tu yóokol u ti'al ca paacatnac tu ca'a téen.

13Ananíase', le ca tu yu'ubaj lela', tu ya'alaj: Yuumtzil ya'ab máaxo'ob dzo'oc u tzicbaltico'ob ti' teen tu yo'olal le máaca', yéetel buca'aj loob dzo'oc u beetic Jerusalén ti' le máaxo'ob u yocsmaj óoltmajo'ob a kaaba'o'. 14Bejela'e' j taal waye' yéetel u páajtalil u noojoch le j kiino'obo' u ti'al u kax u bis tuláacal le máaxo'ob cu ch'a'achi'itico'ob a kaaba'e'.

15Ba'ale' Yuumtzile' tu ya'alaj ti': Xeen, tumen le máaco' in yéeymaj u ti'al ca u tzicbalt in kaaba' ti' u cajnáalilo'ob yaanal lu'umo'ob, ti' ajawo'ob, ti' le Israelilo'ob xano'. 16Teen quin in we'es ti' buca'aj ba'alo'ob unaj u mukyaj tin wo'olal.

17Ananías túune' j bin tac ti' le naj tu'ux yaan Sauloo'. Le ca j ooque' tu dzaj u kab tu yóokole' ca tu ya'alaj ti': Sucu'un Saulo, Yuumtzil Jesuse', le máax tu chíicbesjubáa ti' teech te j bej le tu'ux taalecho' tu túuxtajen u ti'al ca paacatnaquech tu ca'a téen yéetel u ti'al ca chu'upuquech yéetel Quili'ich Pixan.

18Tu séeblaquil ti' u yiche' júut ba'alo'ob bey u séel ixi'ime' ca j páatji u paacat tu ca'a téen. Sauloe' j líik túune'ca j ocja'anaji. 19Cu dzo'ocole' jaani ca yanchaj u muuk tu ca'a téen. Ca j p'áat dze'edzec kiino'ob tu yicnal le ocsaj óolo'ob yaan Damasco'.

Sauloe' cu tze'ec Damascoo'

20Cu dzo'ocole' Sauloe' jo'op' u tze'ec te j sinagogaobo' táan u ya'alique' Jesuse' leti' u Paal Junab Ku. 21Tuláacal le máaxo'ob u'uyico' ja'ak u yóolo'ob táan u ya'alico'ob: ¿Ma' wa leti' le máac ch'a'apachtic le máaxo'ob cu ch'a'achi'itico'ob u kaaba' Jesús tu caajil Jerusaleno'? ¿Ma' wa leti' le máax taal way u ti'al u kax u biso'ob yéetel u kubo'ob ti' u nuuctaquil le j kiino'obo'?

22Ba'ale' Sauloe' tze'ecnaj yéetel nojoch páajtalil, táan u ya'alique' Jesuse' leti' le Cristo', ca tu sa'asataj u yóol le judíob yano'ob Damascoo'.

Sauloe' cu púudzul ti' le judíobo'

23Cu dzo'ocol u máan ya'abcach kiino'obe', le judióbo' tu múuch' tucultajo'ob u quiimsico'ob Saulo'; 24ba'ale' leti'e' j kuch u yojéelte. Bul kiin yéetel bul áakab táan u pa'atico'ob tu jool najilo'ob le caajo' u ti'al u quiimsico'ob, 25ba'ale' le j ocsaj óolo'obo' tu dzajo'ob ti' jun p'éel nojoch xaaque' ca tu yéemso'ob yéetel áakab paachil ti le tuulumil bakpachtic le caajo'; bey púudzico'.

Sauloe' cu bin Jerusalén

26Le ca j kuch Saulo Jerusalene' tu yóoltaj u nupubáa yéetel le ocsaj óolo'obo', ba'ale' tuláacalo'obe' sajacchajo'ob ti' tumen ma' tu yocsaj tu yóolo'ob wa tu jaajil dzo'oc u yocsaj óol ti' Yuum Jesúsi'. 27J bisa'ab túun tumen Bernabé tu táan le apóstolo'obo'. Tu tzicbaltaj ti'ob bix úuchic u yila'al Yuum Jesús tumen Saulo te j bejo', bix xan t'a'anic tumen Yuumtzil, bix xan t'aanajic Saulo yéetel tuláacal kub óol tu caajil Damasco. 28Sauloe' j p'áat túun Jerusalén táan u máan yéetelo'ob. 29Táan u t'aan yéetel kub óolal tu kaaba' Yuumtzil táan u tzicbal yéetel táan u ba'atel t'aan yéetel le judíob cu t'aano'ob ich griegoo', ba'ale' lelo'oba' táan u yilico'ob bix je'el u quiimsico'obe'. 30Le sucu'uno'obo' le ca tu yilajo'ob lela', tu bisajo'ob Saulo tac cesarea, te túuno' tu túuxtajo'ob tac tarso.

31Tuláacal le iglesiaob tu lu'umil Judea, Galilea yéetel Samariae', yaan jéedzel ti'ob yéetel taan u ch'a'ico'ob muuk. Cuxa'ano'ob ti' u sajaquilil Yuumtzil, bey xan táan u ya'abtalo'ob yéetel u yáantaj Quili'ich Pixan.

Cu dza'abal u toj óolal Eneas

32Le ca j máan Pedro u xíimbalt le sucu'uno'obo' j bin xan u yil le ocsaj óolo'ob cajacbalo'ob Lida. 33Te'elo' tu yilaj jun túul máac u kaaba'e' Eneas, ocho ja'abo'ob chilac tumen tu'uch' u wíinclil. 34Pedroe' tu ya'alaj ti' Eneas, Jesucristoe' cu dzáic a toj óolal. Líiken nu'ucbes u nu'ucul a chital. Tu séeblaquil j líik Eneas. 35J ila'ab tumen tuláacal le máaxo'ob caja'ano'ob Lida yéetel Sarono', tu yocsaj óolto'ob Yuumtzil.

Cu ca'a púut cuxquinta'al Dorcas

36Ti' le kiino'obo' yanchaj tu caajil Jope jun túul x ocsajóol u kaaba'e' Tabita, ich griegoe' cu ya'ala'al Dorcas. Le co'olela' mantadz táan u beetic utz yéetel táan u yáantic le óotzilo'obo'. 37Ti' le kiino'obo' Dorcase' koja'anchaje' ca j quíimi; cu dzo'ocol u p'o'obol u wíinclile' ca j dza'ab ti' jun p'éel u ca'anal káasabil le najo'.

38Jope' naadz yanil ti' Lida, le caaj tu'ux yaan Pedroe'. Le ca ojéelta'ab tumen le ocsaj óolo'ob ti' yaan te'elo', tu túuxtajo'ob ca'a túul máaco'ob u ya'alo'ob ti': Co'oten Jope tu séeblaquil.

39Pedroe' j bin tu yéetelo'ob. Le ca j kuche', j bisa'ab te j naj le tu'ux dza'an le wíinclilo'. Tuláacal túun le x quimen íichamo'obo' tu bakpachto'ob Pedro táan u yokolo'ob táan xan u ye'esico'ob ti'e' le nooko'ob beeta'ab tumen Dorcas ca'aliquil cuxa'ano'. 40Cu dzo'ocole' Pedroe' tu beetaj u láaj jóokolo'ob. J xolaje' ca j payalchi'inaji'; tu pactaj le co'olel quimeno' ca tu ya'alaj: Tabita líiken.

Le co'olel túuno' tu p'ilaj u yih, tu pactaj Pedroe' ca j culaji. 41Leti' túune' tu machaj tu kabe' ca tu líiksaj; cu dzo'ocole' tu t'anaj le sucu'uno'ob yéetel le x quimen íicha'amo'obo', ca tu kubaj cuxa'an ti'ob. 42Lela' j kuch ojéeltbil ti' tuláacal u caajil jope, ya'ab túune' tu yocsaj óoltajo'ob Yuumtzil. 43Pedroe' j p'áat dze'edzec kiino'ob te j caajo', tu yotoch cu meyajtic kéewel u kaaba'e' Simón.

Currently Selected:

Hechos 9: MAYABI

Highlight

Copy