Hechos 8

Sauloe' cu ch'a'apaachtic le iglesiao'

1Sauloe' qui'imac u yóol quiimsa'abic Esteban. Ti' le kiino' cáaj jun p'éel nojoch ch'a'apachtajil tu contra le iglesia yaan Jerusaleno'. Tuláacal láaj t'i'it'pajo'ob tac tu lu'umilo'ob Judea yéetel Samaria, chéen le apóstolo'ob ma' j ch'a'apachta'abo'obi'. 2Dze'edzec utzil máaco'obe' tu mucajo'ob Esteban ca tu jach okoltajo'ob. 3Ca'aliquile' Sauloe' táan u yóoltic u xu'uls le iglesiao', táan u yocol jooltaqui naj u ti'al u jíilt jóokesic máaco'ob yéetel co'olelo'ob u ti'al ca u túuxt kalbilo'ob.

Cu tze'ecta'al le ma'alob péectzil samariao'

4Ba'ale' le máaxo'ob yanji u jóokolo'ob Jerusaleno' tu tze'ectajo'ob u péectzilil tocsajil je'el tu'uxac bino'obe'. 5Felipe máax jun túul ti' leti'obe', j bin tu caajil Samariae' ca jo'op' u tze'ectic Cristo ti'ob. 6J much'laj le máaco'obo'; tuláacalo'obe' tu ch'enxiquinto'ob ba'ax cu ya'alic Felipe. Tu yilajo'ob xan le chíiculalo'ob tu beetajo'. 7Tumen ya'ab máaxo'ob yaan kaakas pixan ti'obe' dzaab u tojóolalo'ob, le kaakas pixano'obo' táan u yawato'ob ca'aliquil táan u jóokolo'ob ti' le máaco'obo'. Ya'ab máaxo'ob tu'uch' u wíinclilo'ob yéetel móoch u yooco'obe' dzaab u tojóolalo'ob xan. 8Tu yo'olal lelo' yanji nojoch qui'imac óolal te j caajo'.

9Ba'ale' yaan jun túul máac u kaaba' Simone', cu beetic ca'ach u pulya'ajil te j caajo', táan u tusic u cajnáalilo'ob Samaria, tumen cu ya'alique' leti'e' nojoch ba'al. 10Tuláacal máac u'uyic yéetel kub óolal, u asab chichanilti'obe' tac u asab nojochil, tumen cu ya'alico'obe': Le máaca' leti' u nojoch páajtalil Ku.

11Cu yu'ubico'ob u t'aane' tumen tusa'ano'ob ca'ach ya'ab kiino'ob yéetel le pulya'ajo'. 12Ba'ale' le ca j tze'ecta'ab ti'ob tumen Felilpe u ma'alob péectzilil u ajawil Ku yéetel u kaaba' Jesucristoe' tu yocsaj óoltajo'ob ca j ocja'anajo'ob xiibo'ob bey xan co'olelo'ob. 13Tac Simón ocsaj óolnaj ca j ocja'anaji, ca jo'op' u láakintic Felipe, tumen jaka'an u yóol tu yo'olal le nucuch chíiculalo'ob yéetel le jakbe'en ba'alo'ob cu beeta'alo'.

14Le ca ojéelta'ab tumen le apóstolo'ob yano'ob Jerusalén dzo'oc u ka'amal le ma'alob péectzil tumen le Samriailo'obo', tutúuxtajo'ob Pedro yéetel Juan u ti'al ca xi'ico'ob te'elo'. 15Le ca j kucho'obe' payalchi'inajo'ob tu yo'olal le ocsaj óolo'ob yano'ob Samariao' u ti'al ca u kamo'ob Quili'ich Pixan. 16Tumen tu yóokol mix jun túul ti'ob taalac le Quili'ich Pixano'. Chéen dzo'oc u yocja'ob tu kaaba' Yuumtzil Jesús. 17Pedro yéetel Juan túune' tu dzaj u kaabo'ob tu yóokolo'obe' ca tu kamajo'ob Quili'ich Pixan.

18Le ca tu yilaj Simón cu taal Quili'ich Pixan le quéen u dzáa u kab le apóstolo'obo', tu tich'aj taakin ti'ob, 19táan u ya'alic Dza'ex xan teen le páajtalila', u ti'al beyo' le quéen in dzáa in kab tu yóokol je'el máaxaque' ca u kam Quili'ich Pixan.

20Pedro túune' tu ya'alaj ti': Xu'ulsa'ac a taakin pa'ate' ta wéetel, tumen ta a tucultique' u siibal Kue' cu páajtal u ma'anal yéetel taakine'. 21Teche' ma' táacpaja'anech bey xan mix ba'al yaan a wil yéetel le meyaja' tumen a pucsi'ikale' ma' toj tu táan Kui'. 22Xúump'at le kasa'anila', ca a káat ti' Ku wa úuchac u sa'atsic teech le ba'ax ta tucultaj ta pucsi'ikalo'. 23Tumen táan in wilique' chuupech yéetel káakaj óolalil yéetel kaxa'anech tumen le kaaso'.

24Simone' tu núucaj túun: Payalchi'inene'ex ti' Yuumtzil tin wo'olal, u ti'al ma' u yúuchul teen mix ba'al ti' le ba'alo'ob dzo'oc a wa'alique'exa'.

25Cu dzo'ocol u jaajcunajo'ob yéetel u tzicbaltico'ob u t'aan Kue', le apotolo'obo' tu tze'ectajo'ob le ma'alo'ob péectzil ti' ya'abcach u mejen caajilo'ob Samariao', cu dzo'ocole' ca j suunajo'ob Jerusalén.

Felipe yéetel jun túun j Etiopiail

26Cu dzo'ocol lela' jun túul u ángel Yuumtzil tu ya'alaj ti' Felipe: Líiken ca xi'iquech j noojol, ti' le bej cu yéemel Jerusalén tac Gasao'. Lela' leti' le x tocoy bejo'. 27Felipe' j líike' ca j bini; ti' le bejo' táan u bin xan jun túul Etiopiail, lela' jun túul máac nuumquinsa'an nojoch jalach yéetel u j canan taakin Candace, u x ajawil Etiopía, j bin Jerusalén u ti'al u kultic Ku. 28Le máaca' táan u suut tu lu'um, culucbal tu bolan táan u xoquic u dzíib aj bóobat Isaías. 29Quili'ich Pixane' tu ya'alaj ti' Felipe: nadzabáa ti' le bolano'.

30Le ca tu nadzuba'e', Felipee' tu yu'ubaj táan u xoquic u dzíib aj bóobat Isaías, ca tu káataj ti': ¿Ca ch'a'anu'utic wa le ba'ax ca xoquico'?

31Le máaco' tu núucaj ti': ¿Bix túun je'el u páajtal in ch'a'anu'uctic wa mina'an mix máac tzolic tene'? Ca u ya'alaj ti' Felipe ca na'acac u ti'al j cutal tu tzéel.

32Le jun jaatz dzíib cu xoquico' leti' lela':

Bisa'ab ti' quíimil je'el bix jun túul j tamane';

je'el bix le j taman cu maquic u chi' tu táan le máaxo'ob kosic u tzo'otzelo', bey xan leti'e' ma' tu je'aj u chi'i'.

33Ichil u cabal óolale' ma' j beeta'ab ba'al toj tu yéeteli'; u ch'i'ilancabile' ¿máax je'el u páajtal u tzicbal tu yo'olali'? Tumen luksa'ab u cuxtal ti' le lu'uma'.

34Le jalach wíinico' tu káataj ti' Felipe: Quin káatóoltic teech ca a wa'al teen, ¿tu yo'olal máax cu ya'alic le aj bóobat le ba'alo'oba', tu yo'olal leti', wa tu yo'olal yaanal máac?

35Felipe túune' yéetel le dzíib cu xoquic le máaco', tu cáajsaj u tzicbaltic ti' u ma'alob péctzilil Jesús. 36Le ca j máano'ob ti' jun p'éel cúuchil tu'ux yaan ja'e' le jalach wíinico' tu ya'alaj: je'el ja'a'. ¿Je'el wa u páajtal in wocja'e'?

37Felipee' tu ya'alaj ti': Je'el u páajtale', wa ca wocsajóol yéetel tuláacal a pucsi'ikale'. Le máaco' tu núucaj: Quin wocsaj óoltic Jesucristo u paal Ku.

38Ca tu ya'alaj ca wa'acunsa'ac le bolano', ca éemo'ob tu ca'a túulilo'ob tu'ux yaan le ja'o', ca j dzaab u yocja' tumen Felipe. 39Le ca j na'aco'ob u ti'al u lukbalo'ob tu'ux yaan le ja'o', Quili'ich Pixane' tu bisaj Felipe. Le jalach wíinico' ma' j suunaj u yil Felipei', ba'ale' j bin yéetel qui'imac óolal. 40Felipee' yanchaj Azoto, ca j máan cajal caaj táan u tzicbaltic le ma'alob péectzilo'ob tac ca j kuch Cesarea.

Currently Selected:

Hechos 8: MAYABI

Highlight

Copy