Matío 20
20
Ashuŋne lepúʼ ánɛ megaŋ afaʼ, mbɔ mɛ́ ntɔ́ŋ awɔ́ lɛ́ ánɛ ezi njhʉ̄
1Yɛɛ́so á zéŋ ndé ŋ́gɛ: «Lefɔ Ndém é swhií anu mmɔʼ ŋgaŋ ŋkāʼ yīi, a le mé nzemɛ́nzēm, éfāʼ megaŋ afaʼ, ńnéŋ á ŋkāʼ methʉ́ lɛzɛŋ yí. 2Pɔ́ a megaŋ afaʼ é cuŋte páʼ, a a yá á taʼ apak ŋkāp#20.2 Mɛ́ lɛɛ́ ntɔ́ŋɔ ntií ŋkāp jʉɔ mɛ́t lɛ ndenía. Taʼ ndenía é gɔ́ ŋkāp, á lelɔk mbɛ́ á aleʼé alāʼ afaʼ njʉʼ‑ŋgɔ̄ŋ. á mbū ŋiŋ, ánɛ aleʼé alāʼ. Á lɛ ntswī pɔ́ gʉɔ mé ŋkāʼ yí. 3Menu levuʼɔ́ á kó ŋkūʼ, á zéŋ ntó, ŋ́gē eshʉʼe á azá, ńjʉ́ɔ emɔ̄ʼ epuɔ é tshíte éwú, ńnɔŋ te ŋghʉ̄ɛ azō ɔ́. 4Á lé mé pɔ́p ŋ́gɛ: “Pɛ egʉ̄ɔ á ŋkāʼ meŋ azɛ́. Meŋ a kó eyá ajū mīi, á ndeŋ ndeŋ á leyā mé pɛ.” 5Pɔ́ júʼ épúp, ńdɛ ŋgʉ̄ɔ mé éwú. Táŋ‑azokó á kó ŋkūʼ, ŋgaŋ ŋkāʼ mɛ́t á zéŋ ntó, ńjʉ́ɔ emɔ̄ʼ epuɔ, ńzéŋ ndé ndeŋ ndeŋ épúp. Menu ntɛ́t mbwɛ́t njhʉ̄ á kó ŋkūʼ, á tó, ńjʉ́ɔ emɔ̄ʼ epuɔ, ńzéŋ ndé ndeŋ ndeŋ épúp. 6Á kó ŋgɔ́ menu ntáa mbwɛ́t njhʉ̄, ŋgaŋ ŋkāʼ á zéŋ ntó, ŋ́gē eshʉʼe á azá, ńjʉ́ɔ emɔ̄ʼ epuɔ, é zéŋ ntshíte éwú, á zɛ́tte á wɔ́p ŋ́gɛ: “Melaʼ akɔ̄ pɛ tshií ega tɛ efhó nzemɛ́nzēm, té nɔŋ ŋghʉ̄ɛ azō ó?” 7Pɔ́ pwɛt á mbū yí ŋ́gɛ: “É melaʼ mīi, ŋiŋ a kaá ndɔ̄k á wék afaʼ á.” Á lé mé pɔ́p ŋ́gɛ: “Pɛ egʉ̄ɔ á ŋkāʼ meŋ azɛ́.”
8Eseéŋ‑njhʉ̄ á kó ŋkūʼ, ŋgaŋ ŋkāʼ á tswi á mbū ntɛne‑menu yi ŋ́gɛ: “Tɔ́ŋ megaŋ afaʼ, ŋ́gyá ŋkāp afaʼ awíɛ awíɛ á mbū yí, ńzī ánɛ megaŋ nzem pīi meŋ á ntɔ́ŋ, ńzōko ánɛ megaŋ mvhɔ.” 9Epuɔ pīi, mɛ́ ndɔ̄k wɔ́p afaʼ á ánɛ menu ntáa, é lɛ eshʉ̄ʼ, ntɛne‑menu á yá á wɔ́p á taʼ taʼ apak ŋkāp. 10Epi mɛ́ nzī á letɔ̄ŋ á wɔ́p, é shʉʼ azɔ́p, ńnɔŋ ŋkwāŋa ŋ́gɛ, ezɔp ŋkāp e etswhi ezá. Ḿbiŋ njʉ́ɔ, mɛ́ zéŋ ŋgyá á wɔ́p azɔ́p, áa taʼ taʼ apak ŋkāp. 11Pɔ́ ge etswí ŋkāp mɛ́t, ńnɔŋ nzwɛ́ttɛ á mbū ŋgaŋ ŋkāʼ ndʉ́ɛ́ ŋ́gɛ: 12“Epuɔ puɔ pīi, pɔ́ eshʉ̄ʼ nzem lā, pɔ́ é ghʉ afaʼ áa ánɛ taʼ leleŋ njhʉ̄ ndaʼ. O ó piŋ mbɛ́ á wɔ́p áa páʼ pek lā. Tɛ́ mbɔ pek é nzók á leghʉ afaʼ té zwite, nu á zéŋ ŋgɔ́ éwú ntɔ̄ɔ á wék.” 13Ŋgaŋ ŋkāʼ, á pwɛt á mbū taʼ ŋiŋ, á nnɔ pɔ́p ŋ́gɛ: “Esoó ga, meŋ ka amɔ̄ʼ anu á mbū wu fā á. Pɔkɔ kaá ŋgɔ́ á taʼ nchu, á gá á leyā taʼ apak ŋkāp á mbū wu ú kɛ? 14Kɔ ŋkāp ju, ńdɔk efhó á lezēŋ meŋ ŋgʉ̄ɔ. Meŋ a yá ezi ŋiŋ wuɔ mɛ́t, áa nzwiŋ yīi, meŋ á yá eju épúp. 15Meŋ te pɔŋté á gá á lelɔk ŋkāp za, ŋ́ghʉ̄ ajū mīi meŋ á kɔŋ á lɛ̄? O cʉʉ á gá lezēk tepɔŋ melaʼ mīi, meŋ á ŋiŋ mbɔŋ ŋ́gɛ akɔ̄?” 16Yɛɛ́so á ge emakne ndé ŋ́gɛ, á épúp tɛ́ mezoknzem, e fú ecʉ́ʼ megaŋ mvhɔ, megaŋ mvhɔ e epīŋ ncʉ́ʼ mezoknzem. »
Yɛɛ́so a á ega ánɛ mbáte tɛ́t, ḿbwhʉ́ɛ á yí leshʉʼ ŋkwhʉ́, ńzím
(Mlk 10.32-34; Lúk 18.31-34)
17Yɛɛ́so a le fāk meziŋ‑ntō pí ntsɔp pīa mé legēm, pɔ́ a pɔ́p é nɔŋ mbʉ̄ɛ̄ ŋ́gʉ̄ɔ mé Yelósalɛm, á kó á mɛnzhɛ, ńdé á mbū pɔ́p ŋ́gɛ: 18«Ḿpɛ é ega mbʉ̄ɛ̄ mé Yelósalɛm páʼa, ékó éwú, mɛ́ eswīŋ á Méŋ‑Ŋiŋnɔŋ wuɔ á mbū wɔ nɔŋ‑epɔʼ epi melʉɛ, pɔ́ a wɔ kɛ́ʼte‑mbé Ndém, pɔ́ ezápa á légɛ mɛ́ ezwhí á yí. 19Púp, ŋ́gyá á yí á mbū mege pīi, é sáʼa alāʼ, pɔ́ ezwī á yí, ńdɔ̄k ntɛ̄ ntswá á yí, ŋ́kwɛ̄te á yí ánɛ mbaŋne paŋné. A epiŋ ŋgɔ́ ánɛ eleʼé tɛ́t, a ezím ánɛ lewhʉ̄. »
Taʼ menzwí a á ega ndɔ́ɔ á Yɛɛ́so azō, éyá mé ewɔŋkhʉ̄ pí
(Mlk 10.35-45; Lúk 22.25-27)
20Nzwí Zebedé pɔ́ ewɔŋkhʉ̄ pí, é ghʉ ndɛ̄ ntshóte nnɛ̄t mé lezēŋ Yɛɛ́so, nzwí Zebedé mɛ́t á tswíʼte á esī, ŋ́gɔ̄ á ndɔ́ á yí azō. 21Yɛɛ́so á lé mé yí ŋ́gɛ: «O kɔŋɔ akɔ̄?» Á gɛ: «Lɛ mvéŋ ŋ́gɛ, afʉʼ zīi, o o láʼ egɔ́ á efɔ, ewɔŋkhʉ̄ pá puɔ mémpīa e etʉɔ́ʼte á wú, mmɔʼ ŋgaŋ a enáŋ á ŋkɔʼɔ́ apū ete wu, mmɔʼ a enáŋ á ŋkɔʼɔ́ apū tswioɛ. » 22Yɛɛ́so á pwɛt á mbū ewɔŋkhʉ̄ mɛ́t ŋ́gɛ: «Pɛ te si nzhɛ́ɛ ajū mīi, pɛ lɔ́ɔ ɔ́. Pɛ gɔ ekūuʼ á wɛ́ á lenū ntūʼ ŋgʉɔ̄ʼ jʉɔ zīi, meŋ gʉɔ mé nnuú la a?» Pɔ́ pwɛt á mbū yí ŋ́gɛ: «Pek gɔ ekūuʼ. » 23Yɛɛ́so á lé mé pɔ́p ŋ́gɛ: «Á anuúnē, pɛ e shʉʼ enú ntūʼ ŋgʉɔ̄ʼ zīi, meŋ gʉɔ mé nnuú. Táʼ, ŋ́ké ŋgɔ́ mé lenāŋ ánɛ ŋkɔʼɔ́ apū ete gá, kɛ́ eyi tswioɛ, meŋ mé té pɔŋté á levēŋ ɛ́. Ejʉʼ cʉɔ mɛ́t, Mɔʼɔ́ ga a lē ncuŋte, ńdɔk mbyɛ́t epuɔ pīi, a le láʼ ntsɔ́ʼ á wɔ́p. »
24Epi emɔ̄ʼ megaŋ nnɔ Yɛɛ́so legēm, é júʼ anu jʉɔ mɛ́t, ńzī á leŋɔ̄ʼɔ epi emɔ̄ʼ mémpīa. 25Yɛɛ́so á tɔ́ŋ á wɔ́p metsem, ńdé á mbū pɔ́p ŋ́gɛ: «Pɛ zhɛɛ́ ŋ́gɛ, wɔ sáʼ‑ŋgɔŋ, é gē esáʼ epuɔ, éswɛ́t á wɔ́p swɛ́te. Memía epuɔ é ziŋte ánɛ epuɔ ziŋte. 26Á té pɔŋté á légɛ, a egɔ́ épúp á tsetsɛlɛ pɛ ɛ́. Á gɔ́ áa lɛ, ŋiŋ a nɔŋ ŋkɔ̄ŋɔ á yí á legɔ̄ á mía ŋiŋ, á nnɔ pɛ, á cʉ́ʼ ŋgaŋ afaʼ wɛ. 27Ŋiŋ á nɔŋ ŋkɔ̄ŋɔ á yí á legɔ̄ á ŋgaŋ mvhɔ, á nnɔ pɛ, á cʉ́ʼ páʼ ŋkwa zɛ lā. 28Á páʼa mɛ́t, tɛ́ Méŋ‑Ŋiŋnɔŋ wuɔ a lɛɛ́ te eshʉ̄ʼɛ á ŋgɔŋ ega páʼā, ŋ́gɛ mɛ́ efāʼ á mbū yí í. A lɛɛ́ eshʉʼɛ, égɔ́ á ŋgaŋ afaʼ epuɔ menɔŋ, éfaʼ faʼe, tɛ eyá athū nnɛ̄t zí, élɔk ecuʼ atʉtʉ epuɔ.
Yɛɛ́so a á ega ŋghʉ̄ɛ, wɔ efʉʉ́‑menēk mémpīa é jʉ́ɔ ejʉʼ
(Mlk 10.46-52; Lúk 18.35-43)
29Yɛɛ́so pɔ́ nnɔ yí, é fhó á tésɔŋ Jeliko ntó, ńnɔŋ ŋgʉ̄ɔ, nnɔ alāʼ é gɔ́ á nzem nzhɛ̄nɛ á yí. 30Wɔ efʉʉ́‑menēk mémpīa, é náŋte á legʉ̄ŋ mɛnzhɛ, ńjúʼ á légɛ Yɛɛ́so mé tsia, ńzī á legaʼte ndé ŋ́gɛ: «Ndi, méŋ Efɔ Ndavít, lɛ ntsá mezeŋɛ mék. » 31Alāʼ á nɔŋ ntsɛ̄nɛ á wɔ́p, ŋ́gɛ pɔ́ eláŋte. Tɛ́ pɔ́ tswiʼne ŋkɔ́ʼne ŋghi mé athʉ́ ŋ́gɛ: «Ndi, méŋ Efɔ Ndavít, lɛ ntsá mezeŋɛ mék. » 32Yɛɛ́so á júʼ, ńtshí á ajʉʼ, ńtɔ́ŋ á wɔ́p nzɛ́tte á wɔ́p ŋ́gɛ: «Pɛ kɔŋɔ ŋ́gɛ, meŋ eghʉ̄ páʼ lā á mbū pɛ ɛ̄?» 33Pɔ́ pwɛt á mbū yí ŋ́gɛ: «Ndi, lɛ ŋŋáʼa menēk mék, pek ejʉ́ɔ ejʉʼ. » 34Mezeŋɛ mɔ́p é kú á yí, á pfeŋ menēk mɔ́p, pɔ́ lɛ nzī á lejʉ̄ɔ ejʉʼ. Ńtsé á nzem yí.
Currently Selected:
Matío 20: ybb
Highlight
Share
Copy
Want to have your highlights saved across all your devices? Sign up or sign in
© CABTAL
