Matío 19
19
Ntekné Yɛɛ́so ánɛ alaá‑ŋgyā
(Mlk 10.1-12; Lúk 16.18)
1Yɛɛ́so a le māk á leshūŋ anu mɛ́t, éfhó á Ŋgaliléa ŋgʉ̄ɔ mé apak alāʼ Yudéa, á nzéŋ ntshi Juldɛŋ. 2Nnɔ alāʼ tɛ nzá é zhɛne á yí mé éwú, á ghʉ megaŋ agɔ pɔ́p é te. 3Epuɔ Falísia é tshóte nnɛ̄t mé lezēŋ tsí, ńdɔ̄k ashuŋne ndʉ̄ʼ á yí letā, ńzɛ́tte á yí ŋ́gɛ: «Tɛ á péʼe, lepé tsímpɛ é véŋ ŋ́gɛ, ŋiŋ a ejūŋ á nzwí yi, ánɛ tɛ mbɔɔ akɔ̄ lɛ́ zīi, a á fa a?» 4Yɛɛ́so á pwɛt á mbū pɔ́p ŋ́gɛ: «Pɛ laá ntɔ́ŋ á ntē aŋwaʼne Ndém tɛ njúʼ páʼ, Ndém a le gē enɔŋ ŋgɔŋ, ḿbɔ́ á ŋiŋ mbaŋa pɔ́ menzwí lɛ̄? 5A le zéŋ ndé ŋ́gɛ: “Melaʼ épúp tɛ́ ŋiŋ mbaŋa a a fú enáŋ tɛ efak nnɛ̄t, ánɛ mɔʼɔ́ yi pɔ́ mɛ́ wɔp, égʉɔ ekwɛ́t nnɛ̄t ánɛ nzwí yi, pɔ́p mémpīa e ekwɛ́tɛ ncʉ́ʼɛ á taʼ ŋiŋ.” 6Púp, pɔ́ le zéŋ nzɛ́t epuɔ mémpīa á, pɔ́ ecʉ́ʼ á taʼ ŋiŋ. Á épúp tɛ́, ndɛ́ʼ ŋiŋnɔŋ á fakne ajū mīi, Ndém mé temte. »
7Epuɔ Falísia é lé á mbū yí ŋ́gɛ: «Tɛ melaʼ akɔ̄, Mɔɔ́sɛ a le néŋ lepé ŋ́gɛ, ŋiŋ a gɔ́ éyi a a juŋ á nzwí yi, á tí akɛtte ŋgyá á mbū yí, ŋ́gɛ pɔ́ yí e efākne, ńjūŋ á yí í?» 8Á pwɛt á mbū pɔ́p ŋ́gɛ: «Mɔɔ́sɛ a le gē elé mé pɛ gɛ, ŋiŋ a gɔ ejūuŋ á nzwí yi páʼā, melaʼ mīi, pɛ é wɔ athū te júʼ á mbū Ndém. Tɛ efhó á anɔŋɔ́‑ŋgɔŋ, á lɛ te épúp ɔ́. 9Meŋ ké eshúŋɔ á wɛ́ ŋ́gɛ, ŋiŋ a juŋɔ á nzwí yi, té gɔ́ yīi menzwí mɛ́t a á ghʉ agā, ḿbīŋ nnéŋ mmɔʼ á ŋgyā, mbɔ ŋgaŋ a á ghʉ agā. »
10 Megaŋ nnɔ Yɛɛ́so é lé á mbū yí ŋ́gɛ: «A gɔ́ éyi á páʼa ŋgɔ́ atswhī zīi, ŋiŋ mbaŋa a pɔŋteé á lewɛ ánɛ nzwí yi, mbɔ amɔ̄ʼ apɛ á té éwú á mbū ŋiŋ mbaŋa, á lelā ŋgyā á. » 11Yɛɛ́so á pwɛt á mbū pɔ́p ŋ́gɛ: «Epuɔ metsem é gɔ le véŋ anu jʉɔ zīi, meŋ shúŋɔ la á. Ńdaʼ epuɔ pīi, Ndém a á yá wɔ́p eshhʉ̄ á lelɔk mvéŋ. 12Á zi ŋgē egɔ́ mbɔ, á mbū emɔ̄ʼ epuɔ, mbɔ mɛ́ le gē ezhí á wɔ́p, á gɔ́ yīi pɔ́ gɔ le zhí. Ŋ́gɔ́ á mbū emɔ̄ʼ, mbɔ epuɔ menɔŋ mé le shʉ́ á wɔ́p. Ḿbiŋ ŋgɔ́ mé emɔ̄ʼ epuɔ, mbɔ pɔ́ mé le véŋ á wɔ́p á lenāŋ té zhí melaʼ Lefɔ Ndém. A gɔ́ éyi ŋiŋ a a véŋ ajʉɔ anu mɛ́t, á véŋ. »
Yɛɛ́so a á ega ŋkóknɛ ewɔŋkhʉ̄
(Mlk 10.13-16; Lúk 18.15-17)
13Afʉʼ á kuʼ, epuɔ é lɔk ewɔŋkhʉ̄ eshʉ̄ʼ njʉ́ɔ á Yɛɛ́so ŋ́gɛ, a egē ezápa mbū á athū pɔ́p, éswíŋte ŋ́gɛ Ndém a enéŋ mbwɛ́né ánɛ pɔ́p. Nnɔ Yɛɛ́so é jʉ́ɔ épúp, ńtɔ̄ʼ á wɔ́p. 14Yɛɛ́so á lé mé pɔ́p ŋ́gɛ: «Pɛ etshī ewɔŋkhʉ̄ pwɔ̄ néŋ. Ndɛ́ʼ pɛ ezéŋ ntɔ̄ʼ á wɔ́p á leshʉʼ á mbū meŋ, melaʼ mīi lepɔŋ ánɛ Lefɔ Ndém, é mbū epuɔ pīi é páʼ pɔ́p lā. » 15Ńdé épúp, ńzápa mbū á athū pɔ́p, ńdɛ efhó á ajʉʼ mɛ́t ŋgʉ̄ɔ.
Yɛɛ́so a á ega eshúŋɔ á mía alɔ́ʼ zīi ánɛ lewūʼ
(Mlk 10.17-31; Lúk 18.18-30)
16Mmɔʼ ŋiŋ á kó ntshóte nnɛ̄t mé lezēŋ Yɛɛ́so, ńdé á mbū yí ŋ́gɛ: «Ńziʼnɛ, meŋ gɔ eghʉ̄ʉ akɔ̄ zīi á mbɔŋ, tɛ́ Ndém á fú ŋghʉ̄, pek yí mé cʉ́ʼɛ mbúu nnáŋa á?» 17Yɛɛ́so á pwɛt á mbū yí ŋ́gɛ: «Melaʼ akɔ̄ o zɛ́ttɛ á gá anu, ánɛ leghʉ ajū mīi á mbɔŋ ŋ̄? Ndaʼ taʼ ŋiŋ mé éwú, ŋ́gɔ́ á ŋghʉɛ‑anu mbɔŋ. O nɔŋ ŋkɔ̄ŋɔ á wú á lefū ntā á lezēŋ Ndém, o ekúʼte mbé Ndém. » 18Á zɛ́tte á yí ŋ́gɛ: «Émiɛ́ mbé é?» Yɛɛ́so á gɛ, émi é lé ŋ́gɛ: «Ndɛ́ʼ ŋiŋ á láʼ aleʼé nzwhí á ŋiŋ. Ndɛ́ʼ ŋiŋ á ghʉ agā. Ndɛ́ʼ ŋiŋ á jʉ. Ndɛ́ʼ ŋiŋ á tɔ́k ekém ŋkɔŋ. 19Awíɛ a eghʉ̄ mekuʼ mɔʼɔ́ yi pɔ́ mɛ́ wɔp, ŋ́kɔ̄ŋ á ŋiŋ ntsem, páʼ athū nnɛ̄t zí lā. » 20Mɔ́ ŋgwɛso mɛ́t, á lé mé yí ŋ́gɛ: «Meŋ gɛ mbúu ŋkúʼtɛ mbé muɔ mɛ́t ntsem. Meŋ gɔ ezéŋ ŋghʉ̄ akɔ̄ azi ndɛʼɛ ɛ́?»
21Yɛɛ́so á lé á mbū yí ŋ́gɛ: «O nɔŋ ŋkɔ̄ŋɔ á wú á lepū ŋgɔ́ te alɔ́ʼ, o egʉ̄ɔ eswīŋ ajūɔ tsem zīi o wɛ̄ɛ, ŋ́gyá ŋkāp á mbū wɔ te kuʼ ánɛ azō, éfú ŋgwɛ̄ á mía ntaŋá á athʉ́ lephū. Ghʉ épúp, ḿbiŋ eshʉ̄ʼ ńtsé á nzem meŋ. » 22Mɔ́ ŋgwɛso wɔ̄, á júʼ anu jʉɔ mɛ́t, éswáŋ nnɛ̄t ŋgē egʉɔ, anu mɛ́t á ziŋɛ nzɛ̄tɛ á yí, melaʼ mīi a le wɛ̄ etsō tɛ é zá tɛʼ.
23Yɛɛ́so á lé á mbū nnɔ yí ŋ́gɛ: «Kwaʼ anuúnē meŋ shúŋɔ á wɛ́ ŋ́gɛ, á teē tɛʼ á mbū ŋgaŋ lewūʼ, á levēŋ ŋ́gɛ, Ndém mé ecʉ́ʼɛ esáʼa á yí, tɛ a eláʼ ŋgwɛ̄ lepɔŋ ánɛ Lefɔ Ndém. 24Meŋ a zéŋ eshúŋ á wɛ́ leswhī leswhī egɛ, á zaŋneē tɛʼ á mbū shamo, á letɔ̄k ánɛ lephʉ̄ leswáʼ, ńtsyā á ŋgaŋ lewūʼ á levēŋ ŋ́gɛ, Ndém mé ecʉ́ʼɛ esáʼa á yí, tɛ a eláʼ ŋgwɛ̄ lepɔŋ ánɛ Lefɔ Ndém. » 25Nnɔ Yɛɛ́so é júʼ anu jʉɔ mɛ́t, á pú ŋkʉ̄ʼne á wɔ́p tɛʼ. Pɔ́ lé ŋ́gɛ: «Tɛ á páʼa, awɔ́ mé gɔ eláʼ ntswɛ́t é?» 26Yɛɛ́so á pʉ́ʼɛ menēk ntshí ánɛ pɔ́p, ńdé ŋ́gɛ: «Ajʉɔ anu mɛ́t á gɔ etsyāa áa epuɔ menɔŋ, ŋ́ké ŋgɔ́ á mbū Ndém, mbɔ a kuūʼ á leghʉ ajūɔ tsem. »
27Piɛ á lɛ ndé á mbū Yɛɛ́so ŋ́gɛ: «Ŋgɔ́ mé pek, jʉ́ɔ páʼ, pek lē mbú esákne azék akʉ̄ɛ akʉ̄ɛ, éshʉʼ ntsé á nzem wu. Azék anu a láʼ egɔ́ lɛ akɔ̄?» 28Yɛɛ́so á pwɛt á mbū pɔ́p ŋ́gɛ: «Kwaʼ anuúnē meŋ shúŋɔ á wɛ́ ŋ́gɛ, a láʼ ekuʼ afʉʼ zīi, Ndém a ghʉɛ, akʉ̄ɛ akʉ̄ɛ á cʉ́ʼɛ azi eswhī, áfʉʼ zīi Méŋ‑Ŋiŋnɔŋ wuɔ, a náŋa ánɛ mía akɔʼ lefɔ zí, pɛ pīi pɛ ke tsé á nzem meŋ, pɛ enáŋte azɛ́ ánɛ ekɔʼ lefɔ ntsɔp pīa mé legēm, ésáʼ nzwɛt ŋgyā Islaɛl, étseŋ ŋgyā Islaɛl ntsɔp pīa mé legēm. 29Ŋiŋ ntsem yīi, a á tshi mba zi nnéŋ, ńtshī epɔ̄ memía pí, épi wɔnzwí mbɔɔ epi mbaŋa nnéŋ, ŋ́gwáʼ á mɔʼɔ́ yi, ŋ́gwáʼ á mɛ́ wɔp, ŋ́gwáʼ ewɔŋkhʉ̄ pí mbɔɔ meŋkāʼ mí melaʼ má, a a shʉʼ ewɛ ecʉɔ etsō mɛ́t tɛ e ezá ntɔ́k. Ndém a epiŋ ŋghʉ̄, pɔ́ yí mé ecʉ́ʼɛ mbúu nnáŋa. 30Epuɔ tɛ nzá pīi pɔ́ é tsetsɔŋɔ, ŋ́gɔ́ megaŋ mvhɔ, pɔ́ e shʉʼ ecʉ́ʼ mezoknzem. Epuɔ tɛ nzá pīi pɔ́ é mezoknzem, e ecʉ́ʼ megaŋ mvhɔ.
Currently Selected:
Matío 19: ybb
Highlight
Share
Copy
Want to have your highlights saved across all your devices? Sign up or sign in
© CABTAL
