Matío 18
18
Ŋiŋ yīi a á mía ŋiŋ á ntē Lefɔ Ndém
(Mlk 9.33-37; Lúk 9.46-48)
1Méŋ afʉʼ á tɔ́k, nnɔ Yɛɛ́so é tshóte nnɛ̄t mé lezēŋ tsí, ńzɛ́tte á yí ŋ́gɛ: «Awɔ́ mé péʼe, ŋ́gɔ́ á mía ŋiŋ, á ntē Lefɔ Ndém ḿ?» 2Yɛɛ́so á júʼ épúp, ńtɔ́ŋ á méŋ agáʼ mɔ́, ńtshí á mvhɔ pɔ́p. 3Ńdé ŋ́gɛ: «Kwaʼ anuúnē, meŋ shúŋɔ á wɛ́ ŋ́gɛ, pɛ gɔ te wáʼ atswhī tepɔŋ zɛ́, ńcʉ́ʼ páʼ mezízí ewɔŋkhʉ̄ lā, ŋgáŋ, mbɔ pɛ gɔ le kó á ntē Lefɔ Ndém ɛ́. 4Ŋiŋ yīi a á nɔŋ nnɛ̄t á esī, tɛ ncʉ́ʼ páʼ méŋ agáʼ mɔ́ wuɔ lāa, yí mé mía ŋiŋ á ntē Lefɔ Ndém. 5Ŋiŋ a kóknɛ á méŋ agáʼ mɔ́ páʼ ewuɔ lāa melaʼ má, mbɔ a kóknɛ áa gá.
Yɛɛ́so a á ega ntékɛ nnɔ yí, páʼ pɔ́ gɔ enáŋ épúp
(Mlk 9.42-48; Lúk 17.1-2)
6«Ŋiŋ a piŋɛ ntshóne á taʼ, á nnɔ ewɔŋkhʉ̄ puɔ pīi, é fɛɛ́ nnɛ̄t ŋgyá á mbū meŋ, ńnéŋ á ntē mefa, á gɔ́ mbɔŋ á mbū ŋgaŋ, á mɛ́ legaŋ mía mía tɔ́ á ntɔ̄ŋ yí, ńtshóne á yí mmāʼ á mía ntshi, á leteŋ. 7Meshhʉ̄ tepɔŋ é si ŋgɔ́ epuɔ pīi, pɔ́ é esī atsetsáʼ ŋ́ghʉ̄ɛ, epuɔ tɛ nzáne é faa nzhɛ. Ajū mīi á gɔ eghʉ̄ʉ, ŋiŋ á fa nzhɛ, á gɔ́ le púŋ. Táʼ, ndɔ e é athū ŋiŋ yīi, a á tshóne á ŋiŋ, ńnéŋ á ntē mefa. 8Apū jú, ká akhu jú, á nɔŋ ntshónɛ á wú nnéŋɛ ánɛ mefa, o ezáʼ, ŋ́gwáʼ tɛ ŋgia é sak. Á mbɔŋ á mbū wu, á lecʉ̄ʼ akem apū, ká akem akhu, ńtā á lezēŋ Ndém, ńtɔ́k á wú á lewɛ mbū mbīa, ká mekhu mbīa, mɛ́ piŋ mmāʼ á wú á ntē mmók yīi, é té láʼ epí í. 9Lezēk cú mé nɔŋ ntshónɛ á wú, nnéŋɛ ánɛ mefa, o etsɔ́ʼ, ŋ́gwáʼ tɛ ŋgia é sak. Mbɔŋ a á wú á legɔ̄ apií‑lezēk, ŋ́kó á lephū, ńtɔ́k á wú á lewɛ menēk mú mɛ́mbīa, mɛ́ piŋ mmāʼ á wú á ntē mmók.
Mvhō zīi e le píī, mɛ́ zéŋ njʉ́ɔ
(Lúk 15.1-7)
10«Pɛ epá á wɛ́ á lewāk tsɔ taʼ méŋ agáʼ mɔ́ á nnɔ ewɔŋkhʉ̄ puɔ. Meŋ shúŋɔ á wɛ́ ŋ́gɛ, mecɔʼ Ndém pīi é túŋnɛ á wɔ́p, é tshiteé á lezēŋ Mɔʼɔ́ ga á athʉ́ lephū, efʉʼ metsem. [ 11Méŋ‑Ŋiŋnɔŋ wuɔ a lɛɛ́ eshʉʼɛ á esī atsetsáʼ, á efaāʼ epuɔ pīi, pɔ́ lē mbíi, éghʉ pɔ́ epīŋ nzem á mbū Ndém.] 12Pɛ ekwāŋ azɛ́ anu jʉɔ, éshúŋ á gá. Ŋiŋ a wiɛ memvhō mí mbaŋ ŋkhʉ, taʼ á tó éwú mbí, mbɔ a a ghʉ páʼ lā? Mbɔ a te tshi emi ntsɔp levuʼɔ́ megēm levuʼɔ́ á lekwɛ̄t nnéŋ, égʉɔ eláʼ efaʼ ewiɛ́ taʼ yīi, a á pí lā tɛ eláʼ ejʉ́ɔ lɛ̄? 13Meŋ ké eshúŋɔ á wɛ́ á kwaʼ anuúnē ŋ́gɛ, a faʼa tɛ njʉ́ɔ, mbɔ ŋgɔŋ e pɔŋ á yí tɛʼ, ánɛ ewiɛ́ taʼ mɛ́t, étɔ́k emi ntsɔp levuʼɔ́ megēm levuʼɔ́ mīi, é kaá mbí í. 14Á épúp tɛ́, Mɔʼɔ́ wɛ yīi a á lephū, a te si ŋkɔ̄ŋɔ ŋ́gɛ, tsɔ taʼ ánɛ ewɔŋkhʉ̄ pí puɔ, a epí í.
Ntií lelɔk mbʉ́ʼte melɔ́ʼ ánɛ acuʼte epɔ̄ Ndém
15«Ŋiŋ a faa á mbū wu, o egʉ̄ɔ njʉ́ɔ á yí, á ajʉʼ pɛ yí mémpīa, éshúŋ á yí á ajū mīi, a á fa á mbū wu. Ŋ́gɔ́ éyi, o ó shúŋ á yí tɛ á véŋ mefa mí, o ezhɛ́ á légɛ, o ó fhó ánɛ mɛnzhɛ tepɔŋ, efók á yí. 16Ḿbiŋ ŋgɔ́ éyi, a ka mefa mí véŋ ɛ́, o egʉ̄ɔ efāʼ á taʼ ŋiŋ, ká epuɔ mémpīa, pɛ a pɔ́p é gʉɔ njʉ́ɔ á yí, tɛ mɛ́ ge ezápa anu ajʉʼ, wɔ njhʉɛ‑njʉ́ɔ é gɔ́ á esī, epuɔ mémpīa, ká epuɔ métɛ́t, páʼ aŋwaʼne Ndém á leé épúp#18.16 Anu jʉɔ mɛ́t á túɔ́ á ntē Aŋwaʼne Akimté Mbé 19.15.. 17Ŋ́gɔ́ éyi, a á kó nzéŋ ńdʉ̄ʼ á levēŋ mefa á mvhɔ pɔ́p, o elɔ̄k anu ŋgʉ̄ɔ mé mvhɔ alúŋ wɔ fɛ́‑nnɛ̄t ŋgyá á mbū meŋ. Ŋ́gɔ́ éyi, a á kó nzéŋ ńdʉ̄ʼ á levēŋ mefa á mvhɔ pɔ́p, o elɛ ndɔ̄k á yí ntɔ́ŋ á te zhɛ́‑Ndém, ńdɔ̄k á yí ntɔ́ŋ á ntswi‑ncup. 18Kwaʼ anuúnē, meŋ shúŋɔ á wɛ́ ŋ́gɛ, akʉ̄ɛ akʉ̄ɛ ntsem zīi, pɛ́ é jʉ́ɔ tɛ mvéŋ á esī atsetsáʼ, a shʉʼ egɔ́ mvéŋ veéŋ á athʉ́ lephū. Akʉ̄ɛ akʉ̄ɛ ntsem zīi, pɛ é jʉ́ɔ tɛ ndʉ̄ʼ á esī atsetsáʼ, a egɔ́ ndʉʼ lʉʼe á athʉ́ lephū.
19«Meŋ zéŋɛ eshúŋɔ á wɛ́ ŋ́gɛ, epuɔ mémpīa á nnɔ pɛ, é gɔ́ á taʼ nchu, á esī atsetsáʼ ega, ḿbú ndɔ́ tɛ mbɔɔ akɔ̄ lɛ́, mbɔ Mɔʼɔ́ ga Ndém yīi, a á athʉ́ lephū, a a yá azō mɛ́t á mbū pɔ́p. 20Ajʉʼ zīi epuɔ mémpīa ká epuɔ métɛ́t é cúʼte éwú, ánɛ lezēŋ tsá, meŋ á tsetsɛlɛ pɔ́p. »
Yɛɛ́so a á ega nzíʼnɛ ŋ́gɛ, mɛ́ pɔŋteé á letsā mezeŋɛ té ndhʉ
(Lúk 17.4)
21Piɛ á lɛ ntshóte nnɛ̄t mé lezēŋ Yɛɛ́so, ńzɛ́tte á yí ŋ́gɛ: «Mɔʼɔ́ wek, ŋiŋ a faa anu á mbū meŋ, meŋ ndēkne ŋgyá á mbū yí, tɛ á gɔ́ ŋgʉɔ shɔ́ʼɔ́? Tɛ á láʼ ŋgɔ́ ŋgʉɔ esambīa lɛ́?» 22Yɛɛ́so á pwɛt á mbū yí ŋ́gɛ: «Meŋ ka lé á mbū wu ŋ́gɛ, tɛ á láʼ ŋgɔ́ ŋgʉɔ esambīa á. Meŋ á gɛ, tɛ á láʼ ŋgɔ́ ŋgʉɔ megēm esambīa, ŋgʉɔ esambīa.
23«Pɛ eké njʉ́ɔ anu zīi, Lefɔ Ndém é swhií á aziɛ́. É swhií anu taʼ efɔ yīi, a le nɔ̄ŋ ŋkɔŋɔ ŋ́gɛ, pɔ́ a mecɔʼ pí e egɔ́ á taʼ nchu, ánɛ njú zīi, pɔ́ pɔŋteé á letɔŋ á mbū yí. 24Mɛ́ gē ezii, ńdɔ̄k á taʼ cɔʼ eshʉ̄ʼ, á pɔ́ŋ á yí ŋkāp tɛ é gɔ́ áa atʉtʉ. 25Páʼ a ka wɛ̄ ŋkāp á lelɔk ntɔ̄ŋ njú mɛ́t ɛ́ lā, efɔ á tswi ŋ́gɛ, mɛ́ eswīŋ á yí, éswīŋ á nzwí yi, éswīŋ ewɔŋkhʉ̄ pí mbɔɔ ajūɔ tsem zīi a wɛɛ̄, ńdɔk ntɔ̄ŋ njú mɛ́t. 26Cɔʼ yi wɔ̄ á júʼ, ŋ́gwhʉ̄ á mekhu yí, ŋ́ŋɔ́ʼne tɛ athū zí á pfeŋ esī, ńdé á mbū yí ŋ́gɛ: “Lɛ nzwíʼte á gá zwíʼte, meŋ a shʉʼ epú etɔŋ njú ju ntsem.” 27Efɔ á júʼ épúp, ńtsá mezeŋɛ cɔʼ yi wɔ̄, ńtshī á yí néŋ, ḿbú ntsák njú mɛ́t.
28Cɔʼ wɔ̄ á lɛ ŋgē etó á ŋgyā, ḿbōte mmɔʼ cɔʼ efɔ yīi, á pɔɔ́ŋ á yí áa méŋ agáʼ ŋkāp, ńdɛ ntém ŋgak á ntɔ̄ŋ yí, ésēm ntɔ̄ŋ yí tɛ á nɔŋ ŋgɔ̄ á efémɛ, ńnɔŋ ndʉ́ɛ́ á mbū yí ŋ́gɛ: “Tɔŋ njú za zīi e é mbū wu.” 29Esoó yi wɔ̄ á lɛ ŋgwhʉ̄ á mekhu yí, éswíŋte á yí ndé ŋ́gɛ: “Lɛ nnáʼ nzwíʼte á gá, meŋ a shʉʼ etɔŋ njú ju.” 30Á pú ndʉ̄ʼ, ḿbú ŋgē etswiŋ, ńdɔ̄k á yí ŋgʉ̄ɔ nnéŋ á ŋgyā atʉɛ́, ŋ́gɛ a eláʼ ntɔ̄ŋ njú zi. 31Emɔ̄ʼ mecɔʼ efɔ é jʉ́ɔ ajū mīi á tɔ́k, á pú nzáŋ á wɔ́p, tɛ pɔ́ gʉɔ mbɛ́te éshúŋ á efɔ, ajūɔ tsem zīi, á tɔ́k. 32Efɔ mɛ́t á tswi mɛ́ lɔk á yí eshʉ̄ʼ, á lé mé yí ŋ́gɛ: “O ó tepɔŋ cɔʼ efɔ, o ke swiŋté á gá, meŋ mbú ntsák njú ntsem zīi, o ó mbɔ́ŋ á gá. 33O ke gɔ́, ó o le zéŋ ntsá mezeŋɛ esoó wu ajú, ńdeŋ ndeŋ páʼ meŋ méŋwɛ̄t, é ntsá emú ajú lɛ̄?” 34Anu mɛ́t á pú nzáŋ á efɔ zaáŋ, tɛ á tswi ŋ́gɛ, mɛ́ eyá á yí, á mbū wɔ píp‑atʉɛ́, pɔ́ elɔ̄k metʉʼ, ŋ́gʉ́t á yí á mbɔŋɔ́, tɛ a eláʼ ntɔ̄ŋ njú zi ntsem. »
35Yɛɛ́so á ge emakne, ńdé ŋ́gɛ: «Á páʼa ŋgɔ́ páʼ Mɔʼɔ́ ga yīi, a á athʉ́ lephū, a a láʼ eghʉ épúp, ánɛ awíɛ yīi, a ka lɔ̄k á taʼ ntē ndēkne mefa ŋiŋ yīi, a á fa á mbū yí í. »
Currently Selected:
Matío 18: ybb
Highlight
Share
Copy
Want to have your highlights saved across all your devices? Sign up or sign in
© CABTAL
