Lúkási 10
10
Yɛɛ́so a á ega ntúɔ́ megaŋ nnɔ pí ntsɔp pīa megēm esambīa
1Ajʉɔ anu á tɔ́k páʼa, Yɛɛ́so á tsɔ́ʼ mmɔʼ megaŋ nnɔ pí ntsɔp pīa megēm esambīa#10.1 Emɔ̄ʼ membúʼ meŋwaʼne tɛ efʉʼ mvhɔ, é leé ŋ́gɛ, megēm esambīa., ŋ́gāpte á wɔ́p mémpīa mémpīa, ńtó á wɔ́p ŋ́gɛ pɔ́ ezī mvhɔ, ŋ́gʉ̄ɔ ánɛ metésɔŋ pīi, yí mé nnɔŋ ŋgɔ̄ egʉɔ éwú, mbɔɔ ánɛ mekap alāʼ. 2Ŋ́gē etó á wɔ́p, ńdé á mbū pɔ́p ŋ́gɛ: «Etsō é atswɛt tɛ nzáne tsīi, é kuʼ á lefaʼ. Wɔ faʼā é piŋ ŋkʉɔ́k. Púp, pɛ elɛ mbúʼ mbū, éswíŋte á ŋgaŋ ŋkāʼ, a etó megaŋ afaʼ, pɔ́ egʉɔ efāʼ etsō tsí mɛ́t. 3Pɛ egʉ̄ɔ, ńzhɛ́ á légɛ, meŋ túɔ́ á wɛ́ á nnɔ epuɔ menɔŋ, páʼ epɔ̄ memvhō mīi, é kúɔ́ á nnɔ metsho lā. 4Pɛ nɔŋɔ ŋgʉ̄ɔ, ndɛ́ʼ pɛ epɛ́ ŋkāp, ndɛ́ʼ pɛ epɛ́ apa, ndɛ́ʼ pɛ epɛ́ mmɔʼ meláŋ. Ndɛ́ʼ pɛ epiŋ ŋkó á mɛnzhɛ, ńzók ntshí ajʉʼ, ńtsāʼtɛ epuɔ. 5Pɛ nɔŋɔ ŋkúɔ́ tɛ mbɔɔ ánɛ eziɛ́ ŋgyā lɛ́, pɛ ezīi mvhɔ, ńtsāʼte epuɔ á ŋgyā mɛ́t, ńdé ŋ́gɛ: “Ndém a elɛ nnéŋ apwɛne, ánɛ epuɔ pīi é á ŋgyā ega.” 6Ŋ́gɔ́ yīi ŋiŋ a á ŋgyā mɛ́t, ŋ́kɔ̄ŋ apwɛne, Ndém á ghʉ, á wɛ apwɛne. Ŋ́gɔ́ yīi ŋiŋ a te éwú tɛ ŋkɔ̄ŋ ɔ́, Ndém a á le apwɛne á ŋgyā mɛ́t néŋ. 7Páʼ pɛ é kó á ŋgyā mɛ́t lā, pɛ náŋ éwú, mɛ́ ghī á wɛ́ ŋgyá akɔ̄ lɛ́, pɛ tswí mpfɛ́t, ńzéŋ nnú, melaʼ mīi ŋgaŋ afaʼ, a pɔŋteé á lewɛ ntsɔʼɔ́ afaʼ yí. Ndɛ́ʼ pɛ zéŋ ŋgʉ̄ɔ nnáŋ mmɔʼ mba ndɛʼɛ. 8Pɛ kúɔ́ ánɛ akap alāʼ, epuɔ akap mɛ́t é tswí á wɛ́, ŋ́kókne á wɛ́, ŋ́gyá á wɛ́ akɔ̄ lɛ́, pɛ pfɛ́t pfɛɛ́t. 9Pɛ eghʉ̄, megaŋ agɔ e etē á akap alāʼ mɛ́t, ńdé á mbū epuɔ akap mɛ́t ŋ́gɛ, afʉʼ zīi Ndém a gɔ ezi á lesāʼ lefɔ tsí, á tshóne tɛ mbáte á wɔ́p. 10Pɛ kúɔ́ ánɛ akap alāʼ, mɛ́ té á wɛ́ kókne, pɛ gʉɔ ŋkʉ́ʼne á methū mɛnzhɛ, ńziŋɛ ndʉ́ɛ́ ŋ́gɛ: 11«Tɛ mbɔɔ avɔ́p alāʼ zɛ́ zīi, á kó á mekhu pek, pek é pú njɔ̄kte, ńtsyā á alāʼ pɛ. Pɛ eké nzhɛ́ á mbɔŋɔ́ á légɛ, afʉʼ zīi Ndém a gɔ ezi á lesāʼ lefɔ tsí, á tshóne tɛ mbáte. » 12Meŋ ndɔkɔ nchʉ́ɛ nnɛ̄t eshúŋɔ á wɛ́ ŋ́gɛ, aleʼé zīi Ndém a záʼa ntsaŋ epuɔ menɔŋ, anu epuɔ akap alāʼ jʉɔ, a epék ntɔ́k azi epuɔ tésɔŋ Sodɔm#10.12 Tɔ́ŋ páʼ Ndém a le pík á tésɔŋ Sodɔm épúp, á ntē Aŋwaʼne Anɔŋɔ́ Ŋgɔŋ 18.16–19.29..
Metésɔŋ pīi é kʉŋne ŋke mbɔŋ
(Mat 11.20-24)
13Afʉʼ á kuʼ, Yɛɛ́so á tsá ŋ́gɛ: «Wóó epuɔ Kolazin lōo. Wóó epuɔ Betsayída lōo, pɛ é wɔ eshhʉ̄ tepɔŋ. Meŋkʉʼne anu mīi, meŋ gɛ nzóko ŋghʉ̄ɛ á alāʼ pɛ, meŋ nde wíʼe, ńdɔkɔ ŋghʉ̄ɛ á ntē tésɔŋ Tíi pɔ́ Sidɔŋ, mbɔ ŋgia é éwú yīi, pɔ́ lē ndáʼ ŋgɔ̄ nnɛ̄t zɔp, ńzwík mezwiŋ epa, ḿbōk á avhō, ńdɔk ntswī á légɛ, pɔ́ é wáʼ atswhī tepɔŋ zɔ́p, ḿbīŋ nzem á mbū Ndém. 14Pɛ echʉ́ nnɛ̄t nzhɛ́ á légɛ, aleʼé zīi Ndém a záʼa ntsaŋ epuɔ menɔŋ, anu zɛ́ a epék ntɔ́k azi epuɔ Tíi pɔ́ epuɔ Sidɔŋ. 15Ḿbiŋ ŋgɔ́ mé pɛ epuɔ Kafaanawum, pɛ é kwaŋ ŋ́gɛ, Ndém a a shʉʼ ekɔ́ʼne á wɛ́, tɛ pɛ epfēŋ lephū lɛ́? Ŋgáŋ, a a shʉʼ esóʼne á wɛ́ sóʼne, tɛ pɛ ekó á apwɛt. » 16Yɛɛ́so á ge emakne, ńdé á mbū nnɔ yí wuɔ mɛ́t ŋ́gɛ: «Ŋiŋ a júʼɔ ashuŋne zɛ́, mbɔ a lɔkɔ njúʼɔ azá. Ŋiŋ a piŋɛ ŋkʉ̄ŋne ashuŋne zɛ́, mbɔ a lɔkɔ ŋkʉ̄ŋnɛ áa gá. Ŋiŋ a piŋɛ ŋkʉ̄ŋne á gá, mbɔ a lɔkɔ ŋkʉ̄ŋnɛ áa ŋiŋ yīi, a le tó á gá. »
Ajū mīi á gɔ eghʉ̄ʉ nnɔ Yɛɛ́so é wɛ lekāk
17Epuɔ pīi Yɛɛ́so á ntó á wɔ́p ntsɔp pīa megēm esambīa lā, pɔ́ shʉʼ ŋgē epiŋ nzem, ŋ́gwɛ̄ á mía lekāk á ntē pɔ́p. Ńdé á mbū Yɛɛ́so ŋ́gɛ: «Mɔʼɔ́ wek, pek é páʼa ŋgɔ́ éyi pek tɔ́ŋɔ lezēŋ cú, mbɔɔ mesī, é júʼ nchu wék. » 18Yɛɛ́so á pwɛt ŋ́gɛ: «Anuúnē, meŋ ke náŋ tɛ njʉ́ɔ Sɛ́ta á gɛ ŋwaŋ páʼ ŋŋí mbeŋ lā, éfhó á lephū esóʼo efɛ́. 19Pɛ ejúʼ, meŋ ke yá á wɛ́ mete, á lelɔk nzīŋ ánɛ menū, mbɔɔ ánɛ meŋgá esī. Ńzéŋ ŋgyá á wɛ́ mete, á lelɔk mbwɔ́ʼte mbʉʼ Sɛ́ta, ŋgaŋ mbo. Amɔ̄ʼ anu tepɔŋ á piŋ ŋgɔ́ á le á wɛ́ ghʉ. 20Táʼ, ndɛ́ʼ pɛ ekák áa páʼ mesī é júʼ nchu wɛ́. Pɛ nɔŋ ŋkáka, pɛ ekák áa páʼ, Ndém a á tí lezēŋ tsɛ́ á ntē aŋwaʼne yí, á athʉ́ lephū. »
Ajū mīi á ghʉʉ̄ Yɛɛ́so á tswhi ŋkák
(Mat 11.25-27; 13.16-17)
21Yɛɛ́so a le māk ajʉɔ anu mɛ́t, Azwakne Ndém á ghʉ, ntē yí é gáŋte, á tɔ́ŋ á Ndém ndé ŋ́gɛ: «Mɔʼɔ́ ga, Atsyapuɔ, wu yīi, o pɔɔ́ŋ lephū pɔ́ esī atsetsáʼ, meŋ á syákne á wú, páʼ o ke lʉ̄ɔ menu mú á mbū megaŋ azhɛ̄‑anu, mbɔɔ á mbū meghi, ḿbiŋ ntswī á mbū epuɔ pīi, é páʼ ewɔŋkhʉ̄ lā, éwɔ te zhɛ́‑anu. Ŋŋ me Mɔ́ʼɔ, á gɔ́ épúp páʼā, ŋ́gɔ́ áa páʼ wu mé kɔŋ. »
22Yɛɛ́so á zéŋ ndé á mbū epuɔ ŋ́gɛ: «Mɔʼɔ́ ga a lē mbú ŋgyá mete ntsem á mbū meŋ. Ŋiŋ a gɔ le zhɛ́ páʼ meŋ, Méŋ yi, meŋ á épúp ɔ́, ńdaʼ yí. Ŋiŋ á pīŋ le zhɛ́ páʼ Mɔʼɔ́ ga á épúp ɔ́, ńdaʼ gá Méŋ yi, mbɔɔ epuɔ pīi Mɔ́, a á tswi á wɔ́p á ŋiŋ yīi, Mɔʼɔ́ yi á ewiɛ́. »
23Yɛɛ́so á ghʉ mbēkne nnɛ̄t, ńdé á mbū nnɔ yí ntsem ŋ́gɛ: «Pɛ é meshhʉ̄ mbɔŋ, á wɛ́ pīi pɛ jʉ́ɔ emuɔ menu lāa. 24Pɛ echʉ́ nnɛ̄t nzhɛ́ á mbɔŋɔ́ á légɛ, metswi‑ŋke Ndém mbɔɔ mefɔ tɛ nzáne, pɔ́ le tsá á wɔ́p á lejʉ̄ɔ ajū mīi, pɛ é ayáʼa njʉ́ɔ la, ńdáʼ te jʉ́ɔ. Ńtsá á wɔ́p á lejūʼ ajū mīi, pɛ é ayáʼa njúʼɔ la, ńdáʼ te júʼ. »
Ashuŋne lepúʼ ánɛ ŋiŋ Samalía, ŋkʉɛ anɔŋɔ́‑mɛnzhɛ
25Mmɔʼ ŋkɛʼte‑mbé Ndém a le júʼ ashuŋne Yɛɛ́so, tɛ ndū á esī, ńtáte á yí, ńzɛ́tte á yí ŋ́gɛ: «Ńziʼnɛ, meŋ gɔ eghʉ̄ʉ azá lɛ akɔ̄, tɛ́ Ndém á fú ŋghʉ̄, pek yí mé cʉ́ʼɛ mbúu nnáŋa á?» 26Yɛɛ́so á júʼ épúp, ḿbwɛ̄t á mbū yí ŋ́gɛ: «Mɛ́ leé ŋ́gɛ akɔ̄, ánɛ anu jʉɔ mɛ́t, á ntē aŋwaʼne mbé Ndém m? O tɔɔ́ŋ ajú mbé, á ntē aŋwaʼne, ńjúʼ lɛ akɔ̄?» 27Á gɛ: «Meŋ tɔɔ́ŋ njúʼ lɛ, pú ŋkɔ̄ŋ Atsyapuɔ Ndém wu, mé ntē wú ntsem, ḿbú ŋgyá athū nnɛ̄t jú ntsem á mbū yí. Pú ndɔ̄k mete mú ntsem, ŋ́ghʉ̄ ajū mīi, a á si nzɛ́ttɛ, akwaŋte jú a epú ntshí ánɛ yí efʉʼ metsem#10.27 Jʉ́ɔ́ Aŋwaʼne Akimtɛ Mbé. 6.5.. Ńzéŋ ŋkɔ̄ŋ á ŋiŋ ntsem, páʼ athū nnɛ̄t jú lā#10.27 Jʉ́ɔ́ Aŋwaʼne Mɛt 19.18.. » 28Yɛɛ́so á pwɛt á mbū yí ŋ́gɛ: «Ŋŋ, o ó shúŋ anuúnē. Gʉɔ̄, ŋ́kó ŋghʉ̄ ajú épúp, éfú mbú ntā á lezēŋ Ndém. » 29Ŋiŋ mɛ́t á nɔŋ efāʼa á lezɔŋ athū zí, ńzɛ́tte á Yɛɛ́so ŋ́gɛ: «Méŋ mɔ́ ga mɛ́t, a ké mbiŋ ŋgɔ́ awɔ́?»
30Yɛɛ́so á lɔk ashuŋne lepúʼ jʉɔ, ḿbwɛ̄t ŋ́gɛ: «Mmɔʼ ŋiŋ a le nɔ̄ŋ efhɔ́ɔ á Yelósalɛm, ńcú ŋgʉ̄ɔ mé Jeliko. Ŋ́gʉɔ tɛ ŋkó á mɛnzhɛ, metsɔ́ŋ é gɔ á yí, ŋ́kú tsitsi yi, ésɔ̄ŋ menzhó ánɛ yí. Ńtswá á yí tswáa, tɛ á cʉ́ʼɛ ŋgɔ̄ áa ŋkwhʉ́ɛ, pɔ́ wáʼ ŋkʉ̄. 31Mmɔʼ nnɔŋ‑epɔʼ epuɔ Yúda, á kó nnɔ̄ŋ ndɔ̄kɔ nzhɛ mɛ́t, ntɔ́kɔ, ńjʉ́ɔ á ŋiŋ mɛ́t, á nɔŋ á esī. Á gʉ́ŋne á yí, ńdɔ̄k eyi mmɔʼ ŋkɔʼɔ́ mɛnzhɛ, ńtɔ́k ŋgʉ̄ɔ. 32Mmɔʼ ŋiŋ á zéŋ eshʉ̄ʼ azí, ŋ́gɔ́ á ŋiŋ ánɛ nzwɛt Levi, mbɔ pɔ́p mé gɔ ntswítɛ á nnɔŋ‑epɔʼ. Ŋ́kó á ajʉʼ mɛ́t, ńjʉ́ɔ á ŋiŋ wɔ̄, ŋ́gʉ́ŋne á yí, ńdɔ̄k eyi mmɔ̄ʼ ŋkɔʼɔ́ mɛnzhɛ, ńtɔ́k ŋgʉ̄ɔ azí. 33Mmɔʼ ŋiŋ á zéŋ nnɔ̄ŋ nzápa azí ánɛ nzhɛ mɛ́t, ḿbiŋ ŋgɔ́ á ŋiŋ Samalía#10.33 A gaá lɛ́, mbɔ ŋiŋ yīi, mɛ́ ntswá á yí lā, a á ŋiŋ Yúda. Epuɔ Yúda pɔ́ epuɔ Samalía, é si ŋgɔ́ megaŋ mbo tɛ efhó tɛ efʉʼ.. Ŋ́gʉɔ tɛ ŋkó éwú, ńzéŋ njʉ́ɔ á yí azí, mezeŋɛ mí é pú ŋkó á yí. 34Á tshóte nnɛ̄t mé lezēŋ tsí, ńdɔ̄k meluʼ esōk meféŋ mí, ńdɔ̄k mevɛ̄t ncɔ̄ʼ, ńchʉ́ nnɛ̄t ŋkwɛ́t. Ńtswíʼ á yí nzápa á ndo lʉ́ɔ́, ńdɔ̄k á yí ŋgʉɔ tɛ ŋkó mmɔʼ ŋgyā zīi, mege é gɛ mbíɛ́ ndáʼa éwú. Ńdáʼ alāʼ ńcʉ̄tɛ á yí. 35Njhʉ̄ é lá, á fók ŋkāp á apa yí, ŋ́gyá á mbū ŋgaŋ ŋgyā wuɔ mɛ́t, ńdé á mbū yí ŋ́gɛ: “Kɔ, ńcʉ́ʼ ndɔk nzɔ̄ŋ á ŋgɔ ga wuɔ. E cʉ́ʼɛ te kūʼ, o etswīʼne. Meŋ méŋwɛ̄t é shʉʼ ŋgē etɔ́k ega, ńtsɔ́ʼ ajū mīi, o ó tswiʼne éwú, á mbū wu.”» 36Yɛɛ́so á pɛ́te épúp, ḿbiŋ nzɛ́tte á ŋiŋ mɛ́t ŋ́gɛ: «O ó kwaŋ ajú ŋ́gɛ, ánɛ epuɔ puɔ métɛ́t, awɔ́ a á tswi á légɛ, yí é méŋ mɔ́ ŋiŋ yīi, metsɔ́ŋ é ŋgɔ̄ á yí lā a?» 37Á pwɛt ŋ́gɛ: «Meŋ á kwaŋ ŋ́gɛ, ŋiŋ yīi a le ghʉ̄ anu mbɔŋ ánɛ yí, ńzɔ̄ŋ á yí lā. » Yɛɛ́so á gɛ: «Gʉɔ̄, ŋ́kó nnáŋa ŋghʉ̄ɛ ajú épúp. »
Yɛɛ́so a á ega ŋgúa á Mákta pɔ́ Malía
38Yɛɛ́so pɔ́ nnɔ yí é gɔ́ á mɛnzhɛ, ńnɔŋ ŋgʉ̄ɔ mé leziŋ, ŋ́gʉɔ tɛ ŋkó mmɔʼ lepfhō alāʼ, mmɔʼ nzwí ŋiŋ lepfhō mɛ́t, lezēŋ tsí é gɔ́ lɛ Mákta, á púʼ mbū ŋ́gɛ, Yɛɛ́so a eshʉ̄ʼ á mba yí, ŋ́gúa á yí. 39A le pɔ́ŋ mmɔʼ ntsiʼnzem yi, éyi menzwí, lezēŋ tsí é gɔ́ lɛ Malía. Yɛɛ́so á shʉʼ ŋkó á ŋgyā páʼā, Malía wuɔ mɛ́t, á shʉʼ nnáŋ á lezēŋ yí, ńnɔŋ njúʼɔ anu zīi, a á si eshúŋɔ. 40Mákta á piŋ ŋgɔ́ si nnɔŋɔ ntɛ̄ttɛ azí, ánɛ mefaʼ á lelā etsō. Afʉʼ á kuʼ, á shʉʼ á lezēŋ Yɛɛ́so, ńzɛ́tte á yí ŋ́gɛ: «Ndi, o ó véŋ ajú ŋ́gɛ Malía a epú esákne á lelā lekʉŋ á mbū meŋ, éshʉʼ nnáŋ ega lɛ́? Tswiī, a eshʉ̄ʼ ntswíte á gá. » 41Yɛɛ́so á pwɛt á mbū yí ŋ́gɛ: «Mákta, Mákta, o ó si ntɛ̄ttɛ, ńnɔŋ nzāpa nnɛ̄t ju, ánɛ etsō tɛ nzáne. 42Táʼ, mía anu mbɔŋ yīi, a á ŋgɔ́ esī, Malía a á kaŋ. Ŋiŋ a gɔ le fhó á mbū yí efók ó. »
Currently Selected:
Lúkási 10: ybb
Highlight
Share
Copy
Want to have your highlights saved across all your devices? Sign up or sign in
© CABTAL
